Read Библия Церковнославянская а҃ паралипоме́нѡнъ 17 Bible Online

а҃ паралипоме́нѡнъ 17 - Библия Церковнославянская bible

а҃ паралипоме́нѡнъ 17

¹И҆ бы́сть є҆гда̀ ѡ҆бита́ше даві́дъ въ домѹ̀ свое́мъ, и҆ речѐ даві́дъ къ наѳа́нѹ про҇ро́кѹ: сѐ, а҆́зъ живѹ̀ въ домѹ̀ ке́дровѣ, кївѡ́тъ же завѣ́та гд҇нѧ под̾ ко́жами.

²И҆ речѐ наѳа́нъ къ даві́дѹ: всѐ є҆́же въ се́рдцы твое́мъ творѝ, ѩ҆́кѡ бг҃ъ съ тобо́ю є҆́сть.

³И҆ бы́сть но́щи тоѧ̀, и҆ бы́сть сло́во гд҇не къ наѳа́нѹ, гл҃ѧ:

⁴и҆дѝ и҆ рцы̀ даві́дѹ рабѹ̀ моемѹ̀: сїѧ҄ речѐ гд҇ь: не сози́ждеши ты̀ мнѣ̀ до́мѹ, є҆́же ѡ҆бита́ти мѝ въ не́мъ:

⁵ѩ҆́кѡ не ѡ҆бита́хъ въ домѹ̀ ѿ днѐ, въ ѻ҆́ньже и҆зведо́хъ ї҆и҃лѧ (ѿ землѝ є҆гѵ́петскїѧ), да́же до днѐ сегѡ̀, но бы́хъ въ ски́нїи и҆ въ шатрѣ̀:

⁶во всѣ́хъ а҆́може ходи́хъ со всѣ́мъ ї҆и҃лемъ, а҆́ще гл҃ѧ гл҃ахъ ко́емѹ колѣ́нѹ ї҆и҃левѹ, и҆̀мже повелѣ́хъ да пасѹ́тъ лю́ди моѧ҄, гл҃ѧ: чесѡ̀ ра́ди не созда́сте мнѣ̀ до́мѹ ке́дрова;

⁷и҆ нн҃ѣ та́кѡ рцы̀ рабѹ̀ моемѹ̀ даві́дѹ: сїѧ҄ речѐ гд҇ь вседержи́тель: а҆́зъ и҆з̾ѧ́хъ тѧ̀ ѿ па́ствы, є҆гда̀ послѣ́довалъ є҆сѝ ста́дѹ, є҆́же бы́ти тебѣ̀ вожде́мъ над̾ людьмѝ мои́ми ї҆и҃лемъ,

⁸и҆ бы́хъ съ тобо́ю во всѣ́хъ, и҆дѣ́же ходи́лъ є҆сѝ, и҆ потреби́хъ всѧ҄ врагѝ твоѧ҄ ѿ лица̀ твоегѡ̀, и҆ сотвори́хъ тебѣ̀ и҆́мѧ ѩ҆́коже и҆́мѧ вели́кихъ, и҆̀же на землѝ:

⁹и҆ да́хъ мѣ́сто лю́демъ мои҄мъ ї҆и҃лю, и҆ насади́хъ ѧ҆̀, и҆ ѡ҆бита́ютъ въ не́мъ, и҆ не возскорбѧ́тъ ктомѹ̀: ни сы́нове беззако́нїѧ приложа́тъ смири́ти и҆̀хъ ѩ҆́коже ѿ нача́ла

¹⁰и҆ ѿ дні́й, въ нѧ́же да́хъ сѹдїи҄ лю́демъ мои҄мъ ї҆и҃лю, и҆ смири́хъ всѧ҄ врагѝ твоѧ҄, и҆ возращѹ́ тѧ, и҆ до́мъ сози́ждетъ тѝ гд҇ь:

¹¹и҆ бѹ́детъ є҆гда̀ и҆спо́лнѧтсѧ дні́е твоѝ и҆ почі́еши со ѻ҆тцы҄ твои́ми, и҆ воздви́гнѹ сѣ́мѧ твоѐ по тебѣ̀, є҆́же бѹ́детъ ѿ чре́ва твоегѡ̀, и҆ возста́влю ца́рство є҆гѡ̀:

¹²то́й сози́ждетъ мнѣ̀ до́мъ, и҆ ѹ҆крѣплю̀ престо́лъ є҆гѡ̀ да́же до вѣ́ка:

¹³а҆́зъ бѹ́дѹ є҆мѹ̀ во ѻ҆тца̀, и҆ то́й бѹ́детъ мнѣ̀ въ сы́на: и҆ мл҇ть мою̀ не ѿимѹ̀ ѿ негѡ̀, ѩ҆́коже ѿѧ́хъ ѿ бы́вшихъ пре́жде тебє̀:

¹⁴и҆ ѹ҆вѣ́рю є҆го̀ въ домѹ̀ мое́мъ и҆ во ца́рствїи є҆гѡ̀ да́же до вѣ́ка, и҆ престо́лъ є҆гѡ̀ бѹ́детъ и҆спра́вленъ до вѣ́ка.

¹⁵По всѣ҄мъ словесє́мъ си҄мъ и҆ по всемѹ̀ видѣ́нїю семѹ̀ та́кѡ глаго́лалъ є҆́сть наѳа́нъ къ даві́дѹ.

¹⁶И҆ прїи́де ца́рь даві́дъ, и҆ сѣ́де пред̾ гд҇емъ, и҆ речѐ: кто̀ є҆́смь а҆́зъ, гд҇и бж҃е мо́й; и҆ что̀ до́мъ мо́й, ѩ҆́кѡ возлюби́лъ мѧ̀ є҆сѝ до вѣ́ка;

¹⁷и҆ сїѧ҄ ма҄ла сѹ́ть пред̾ тобо́ю, бж҃е, и҆ гл҃алъ є҆сѝ на до́мъ раба̀ твоегѡ̀ (є҆щѐ) и҆здале́ча, и҆ призрѣ́лъ є҆сѝ на мѧ̀ ѩ҆́кѡ видѣ́нїе человѣ́ка, и҆ возвы́силъ мѧ̀ є҆сѝ, гд҇и бж҃е:

¹⁸что̀ приложи́тъ є҆щѐ даві́дъ къ тебѣ̀ є҆́же просла́вити; и҆ ты̀ раба̀ твоего̀ вѣ́си:

¹⁹гд҇и, раба̀ твоегѡ̀ ра́ди сотвори́лъ є҆сѝ всѐ вели́чїе сїѐ и҆ по се́рдцѹ твоемѹ̀, є҆́же зна́єма сотвори́ти всѧ҄ вели҄чїѧ твоѧ҄:

²⁰гд҇и, нѣ́сть подо́бенъ тебѣ̀, и҆ нѣ́сть бг҃а ра́звѣ тебє̀, по всѣ҄мъ є҆ли҄ка слы́шахомъ ѹ҆ши́ма на́шима,

²¹и҆ нѣ́сть, ѩ҆́коже лю́дїе твоѝ ї҆и҃ль, ѩ҆зы́къ є҆щѐ на землѝ, ѩ҆́кѡ по́йде бг҃ъ и҆зба́вити лю́ди себѣ̀, є҆́же положи́ти и҆́мѧ себѣ̀ ве́лїе и҆ сла́вное, є҆́же и҆згна́ти ѿ лица̀ люді́й твои́хъ, и҆̀хже и҆зба́вилъ є҆сѝ ѿ є҆гѵ́пта, ѩ҆зы́ки:

²²и҆ да́лъ є҆сѝ лю́ди твоѧ҄ ї҆и҃лѧ тебѣ̀ въ лю́ди да́же до вѣ́ка, и҆ ты̀, гд҇и, бы́лъ є҆сѝ и҆̀мъ въ бг҃а:

²³и҆ нн҃ѣ, гд҇и, сло́во твоѐ, є҆́же гл҃алъ є҆сѝ рабѹ̀ твоемѹ̀ и҆ на до́мъ є҆гѡ̀, да ѹ҆вѣ́ритсѧ до вѣ́ка: и҆ сотворѝ ѩ҆́коже гл҃алъ є҆сѝ,

²⁴и҆ да ѹ҆вѣ́ритсѧ и҆ возвели́читсѧ и҆́мѧ твоѐ да́же до вѣ́ка, глаго́лющихъ: гд҇и, гд҇и вседержи́телю, бж҃е ї҆и҃левъ, и҆ до́мъ даві́да раба̀ твоегѡ̀ да бѹ́детъ и҆спра́вленъ пред̾ тобо́ю:

²⁵ты́ бо, гд҇и бж҃е мо́й, ѿве́рзлъ є҆сѝ ѹ҆́хо раба̀ твоегѡ̀ созда́ти є҆мѹ̀ до́мъ, сегѡ̀ ра́ди ѡ҆брѣ́те ра́бъ тво́й (дерзнове́нїе) моли́тисѧ пред̾ лице́мъ твои́мъ:

²⁶и҆ нн҃ѣ, гд҇и, ты̀ є҆сѝ са́мъ бг҃ъ, и҆ гл҃алъ є҆сѝ къ рабѹ̀ твоемѹ̀ бл҃га҄ѧ сїѧ҄:

²⁷и҆ нн҃ѣ начнѝ блг҇ви́ти до́мъ раба̀ твоегѡ̀, да бѹ́детъ во вѣ́ки пред̾ тобо́ю: ѩ҆́кѡ ты̀, гд҇и, блг҇ви́лъ є҆сѝ, и҆ блг҇вѝ во вѣ́ки.