Read Библия Церковнославянская а҃ паралипоме́нѡнъ 23 Bible Online

а҃ паралипоме́нѡнъ 23 - Библия Церковнославянская bible

а҃ паралипоме́нѡнъ 23

¹И҆ даві́дъ ста́ръ и҆ и҆спо́лненъ дні́й, и҆ воцарѝ соломѡ́на сы́на своего̀ вмѣ́стѡ себє̀ над̾ ї҆и҃лемъ:

²и҆ собра̀ всѣ́хъ кнѧзе́й ї҆и҃левыхъ, и҆ свѧще́нникѡвъ, и҆ леѵі́тѡвъ:

³сочте́ни же бы́ша леѵі́ти, ѿ три́десѧти лѣ́тъ и҆ вы́шше, и҆ бы́сть число̀ и҆́хъ по глава́мъ и҆́хъ, мѹже́й три́десѧть и҆ ѻ҆́смь ты́сѧщъ:

⁴ѿ си́хъ и҆збра́ни на дѣла̀ до́мѹ гд҇нѧ два́десѧть четы́ри ты́сѧщы, и҆ книго́чєй и҆ сѹді́й ше́сть ты́сѧщъ,

⁵и҆ четы́ри ты́сѧщы две́рникѡвъ, и҆ четы́ри ты́сѧщы пою́щихъ гд҇еви во ѻ҆рга́ны, и҆̀хже сотворѝ ко хвале́нїю гд҇ню.

⁶И҆ раздѣлѝ и҆̀хъ даві́дъ на чре́ды сынѡ́мъ леѵї҄инымъ, гирсѡ́нѹ, каа́ѳѹ и҆ мера́рѣ:

⁷и҆ гирсѡ́нѹ и҆ леада́нѹ и҆ семе́ю.

⁸Сы́нове леада҄ни: нача́лникъ ї҆еїи́лъ и҆ зеѳѡ́ѳъ и҆ ї҆ѡи́ль, трїѐ.

⁹Сы́нове же семе́ѡвы: салѡмі́ѳъ и҆ а҆заи́лъ и҆ а҆ра́мъ, трїѐ: сі́и нача҄лницы ѻ҆те́чествъ леада́нихъ.

¹⁰И҆ сынѡ́мъ семе́ѡвымъ ї҆е́ѳъ и҆ зїза́й, и҆ ї҆ѡа́съ и҆ верїа̀: ті́и сы́нове семе́ѡвы четы́ре.

¹¹Бѣ́ же ї҆е́ѳъ пе́рвый и҆ зїза́й вторы́й: ї҆ѡа́съ же и҆ варїа̀ не и҆мѣ́ста мно́гихъ сынѡ́въ и҆ бы́ста въ домѹ̀ ѻ҆те́чества въ причте́нїе є҆ди́но.

¹²Сы́нове каа́ѳѡвы: а҆мвра́мъ и҆ ї҆ссаа́ръ, хеврѡ́нъ, ѻ҆зїи́лъ, четы́ри.

¹³Сы́нове а҆мвра҄мли: а҆арѡ́нъ и҆ мѡѷсе́й: ѿлѹче́нъ же бы́сть а҆арѡ́нъ є҆́же ѡ҆свѧща́ти ст҃а҄ѧ ст҃ы́хъ, то́й и҆ сы́нове є҆гѡ̀ во вѣ́ки, и҆ да кади́тъ ѳѷмїа́момъ пред̾ гд҇емъ, слѹ́житъ є҆мѹ̀ и҆ мо́литсѧ во и҆́мѧ є҆гѡ̀ до вѣ́ка.

¹⁴Мѡѷсе́й же человѣ́къ бж҃їй и҆ сы́нове є҆гѡ̀ причте́ни сѹ́ть въ колѣ́но леѵі́ино.

¹⁵Сы́нове мѡѷсе́ѡвы: гирса́мъ и҆ є҆лїезе́ръ.

¹⁶Сы́нове гирса҄мли, сѹваи́лъ нача́лникъ.

¹⁷Бы́ша же сы́нове є҆лїезе́рѹ, раві́а нача́лникъ: и҆ не бѣ́ша є҆лїезе́рѹ сы́нове и҆ні́и: сы́нове же раві́ини ѹ҆мно́жени сѹ́ть ѕѣлѡ̀.

¹⁸Сы́нове ї҆ссаа́рѡвы, саллѹмѡ́ѳъ нача́лникъ.

¹⁹Сы́нове хеврѡ҄ни: ї҆ерїа́въ пе́рвый, а҆марі́а вторы́й, ї҆азїи́лъ тре́тїй ї҆езекі́а четве́ртый.

²⁰Сы́нове же ѻ҆зїи҄ли: мі́ха пе́рвый, и҆ ї҆ессїа̀ вторы́й.

²¹Сы́нове мера҄рїны: моолї̀ и҆ мѹсї̀.

²²Сы́нове моолі́євы: є҆леаза́ръ и҆ кі́съ. Ѹ҆́мре же є҆леаза́ръ, и҆ не бы́ша є҆мѹ̀ сы́нове, но то́кмѡ дщє́ри: и҆ поѧ́ша и҆̀хъ сы́нове кі́сѡвы бра́тїѧ и҆́хъ.

²³Сы́нове мѹсї҄ины: моолї̀ и҆ є҆де́ръ и҆ ї҆арїмѡ́ѳъ, трїѐ.

²⁴Сі́и сы́нове леѵі́ини по домѡ́мъ ѻ҆те́чествъ и҆́хъ, нача҄лницы ѻ҆те́чествъ и҆́хъ, по соглѧ́данїю и҆́хъ, по числѹ̀ и҆ме́нъ и҆́хъ, по глава́мъ и҆́хъ, и҆̀же творѧ́хѹ дѣла̀ слѹже́нїѧ до́мѹ гд҇нѧ, ѿ два́десѧти лѣ́тъ и҆ вы́шше.

²⁵Рече́ бо даві́дъ: поко́й дадѐ гд҇ь бг҃ъ лю́демъ свои҄мъ ї҆и҃лю, и҆ всели́сѧ во ї҆ер҇ли́мѣ да́же да вѣ́ка,

²⁶и҆ леѵі́ти не бы́ша носѧ́ще ски́нїю и҆ всѧ҄ сосѹ́ды є҆ѧ̀ къ слѹже́нїю є҆ѧ̀.

²⁷По повелѣ́нїю бо даві́довѹ послѣ́днемѹ є҆́сть число̀ сыновѡ́мъ леѵї҄инымъ ѿ два́десѧти лѣ́тъ и҆ вы́шше:

²⁸занѐ поста́ви и҆̀хъ под̾ рѹкѹ̀ сынѡ́мъ а҆арѡ҄нимъ, є҆́же слѹжи́ти въ домѹ̀ гд҇ни во дво́рѣхъ и҆ въ притво́рѣхъ, и҆ во ѡ҆чище́нїи всѣ́хъ ст҃ы́нь, и҆ въ дѣ́лѣхъ слѹже́нїѧ до́мѹ бж҃їѧ,

²⁹и҆ над̾ хлѣ́бами предложе́нїѧ, и҆ над̾ мѹко́ю пшени́чною же́ртвы, и҆ над̾ прѧ́жмами ѡ҆прѣсно́чными, и҆ над̾ сковрадо́ю, и҆ над̾ пече́нымъ, и҆ над̾ всѧ́кимъ вѣ́сомъ и҆ мѣ́рою,

³⁰и҆ є҆́же стоѧ́ти, ѹ҆́трѡ хвали́ти и҆ и҆сповѣ́датисѧ гд҇еви, та́кожде и҆ къ ве́черѹ,

³¹и҆ над̾ всѣ́ми возноси́мыми всесожжє́нїи гд҇еви въ сѹббѡ҄ты, и҆ въ новомѣ́сѧчїихъ, и҆ въ пра́здницѣхъ, по числѹ̀, по чи́нѹ и҆́хъ вы́нѹ гд҇еви,

³²и҆ да сохранѧ́тъ стражбы҄ ски́нїи свидѣ́нїѧ, и҆ стра́жѹ свѧти́лища, и҆ стражбы҄ сынѡ́въ а҆арѡ́нихъ бра́тїй свои́хъ, да слѹ́жатъ въ домѹ̀ гд҇ни.