Read Библия Церковнославянская а҃ паралипоме́нѡнъ 24 Bible Online

а҃ паралипоме́нѡнъ 24 - Библия Церковнославянская bible

а҃ паралипоме́нѡнъ 24

¹И҆ сынѡ́мъ а҆арѡ҄нимъ раздѣлє́нїѧ: сы́нове а҆арѡ҄ни: нада́въ и҆ а҆вїѹ́дъ, и҆ є҆леаза́ръ и҆ ї҆ѳама́ръ.

²И҆ ѹ҆мро́ста нада́въ и҆ а҆вїѹ́дъ пре́жде ѻ҆тца̀ своегѡ̀, и҆ сы́нове не бы́ша и҆́ма: и҆ свѧще́нствова є҆леаза́ръ и҆ ї҆ѳама́ръ, сы́нове а҆арѡ҄ни.

³И҆ раздѣлѝ и҆̀хъ даві́дъ, и҆ садѡ́къ ѿ сынѡ́въ є҆леаза́ровыхъ, а҆хїмеле́хъ же ѿ сынѡ́въ ї҆ѳама́ровыхъ по сочисле́нїю и҆́хъ, по слѹже́нїю и҆́хъ и҆ по домѡ́мъ ѻ҆те́чествъ и҆́хъ.

⁴И҆ ѡ҆брѣто́шасѧ сы́нове є҆леаза́рѡвы мно́жайшїи въ нача́лники си́лъ, не́жели сы́нове ї҆ѳама́рѡвы: и҆ раздѣлѝ и҆̀хъ сынѡ́мъ є҆леаза́рѡвымъ въ нача́лники въ до́мы ѻ҆те́чествъ шестьна́десѧть, и҆ сынѡ́мъ ї҆ѳама́рѡвымъ по домѡ́мъ ѻ҆те́чествъ и҆́хъ, ѻ҆́смь.

⁵Раздѣли́ же и҆̀хъ по жре́бїємъ междѹ̀ и҆́ми, поне́же бѧ́хѹ нача҄лницы свѧти́лища и҆ нача҄лницы бж҃їи въ сынѣ́хъ є҆леаза́ровыхъ и҆ въ сынѣ́хъ ї҆ѳама́ровыхъ:

⁶ѡ҆писа́ же и҆̀хъ самаі́а сы́нъ наѳанаи́ль пи́сарь ѿ леѵї҄тъ пред̾ царе́мъ и҆ кнѧ҄зи и҆ садѡ́комъ свѧще́нникомъ и҆ а҆хїмеле́хомъ сы́номъ а҆вїаѳа́ра, и҆ нача҄лницы ѻ҆те́чествъ свѧще́нникѡвъ и҆ леѵі́тѡвъ до́мѹ ѻ҆те́чества, є҆ди́нъ ко є҆леаза́рѹ и҆ є҆ди́нъ ко ї҆ѳама́рѹ.

⁷И҆ и҆зы́де жре́бїй пе́рвый ї҆ѡарі́мѹ, ї҆еді́ю вторы́й,

⁸харі́вѹ тре́тїй, сеѡрі́мѹ четве́ртый,

⁹мелхі́ю пѧ́тый, меїамі́нѹ шесты́й,

¹⁰а҆ккѡ́сѹ седмы́й, а҆ві́и ѻ҆смы́й,

¹¹ї҆исѹ́ю девѧ́тый, сехені́и десѧ́тый,

¹²є҆лїасі́вѹ є҆динонадесѧ́тый, ї҆акі́мѹ дванадесѧ́тый,

¹³ѻ҆ффа́ю тринадесѧ́тый, ї҆есваа́лѹ четыренадесѧ́тый,

¹⁴велгі́и пѧтыйна́десѧть, є҆мми́рѹ шестыйна́десѧть,

¹⁵ї҆еѳі́ю седмыйна́десѧть, а҆фессі́ю ѻ҆смыйна́десѧть,

¹⁶фетті́ю девѧтыйна́десѧть, и҆ є҆зекі́илю двадесѧ́тый,

¹⁷а҆хі́нѹ два́десѧть пе́рвый, гамѹи́лѹ два́десѧть вторы́й,

¹⁸далеі́ю два́десѧть тре́тїй, ї҆еи́лю два́десѧть четве́ртый.

¹⁹Сїѐ сочисле́нїе и҆́хъ по слѹже́нїю и҆́хъ входи́ти въ до́мъ гд҇ень по чи́нѹ своемѹ̀, рѹко́ю а҆арѡ́на ѻ҆тца̀ и҆́хъ, ѩ҆́коже повелѣ̀ гд҇ь бг҃ъ ї҆и҃левъ.

²⁰И҆ сынѡ́мъ леѵї҄инымъ прѡ́чїимъ: сынѡ́мъ а҆мвра҄млимъ сѡваи́лъ, сынѡ́мъ сѡваи҄лимъ ї҆адаі́а,

²¹сынѡ́мъ равї҄инымъ нача́лникъ ї҆есі́а,

²²сынѡ́мъ ї҆асарї҄инымъ салѡмѡ́ѳъ, сынѡ́мъ салѡмѡ́ѳѡвымъ ї҆а́ѳъ:

²³сы́нове ї҆едїѹ́а: ї҆ерїа́въ пе́рвый, а҆маді́а вторы́й, ї҆азїи́лъ тре́тїй, ї҆екмоа́мъ четве́ртый.

²⁴Сынѡ́мъ ѻ҆зїи҄лимъ мі́ха, сы́нове мї҄хины сами́ръ:

²⁵бра́тъ мі́хинъ ї҆сі́а, сы́нъ ї҆сі́инъ заха́рїа.

²⁶Сы́нове мера҄рїны: моолї̀ и҆ мѹсї̀, сы́нъ ѻ҆зі́инъ вонні́й:

²⁷сы́нове мера҄рїны ѻ҆зі́а: сы́нове є҆гѡ̀ ї҆есома̀ и҆ закхѹ́ръ и҆ ї҆ѡвѳї̀:

²⁸моолі́ю є҆леаза́ръ (и҆ ї҆ѳама́ръ). Ѹ҆́мре же є҆леаза́ръ, не бѣ́ша є҆мѹ̀ сы́нове.

²⁹Кі́сѹ сы́нъ кі́совъ ї҆ерамеи́лъ.

³⁰Сы́нове мѹ҄сїны: моолї̀ и҆ є҆де́ръ и҆ є҆рїмѡ́ѳъ. Сі́и сы́нове леѵі́тстїи по домѡ́мъ ѻ҆те́чествъ свои́хъ.

³¹Прїѧ́ша же и҆ ті́и жрє́бїѧ, ѩ҆́коже и҆ бра́тїѧ и҆́хъ сы́нове а҆арѡ҄ни, пред̾ даві́домъ царе́мъ и҆ садѡ́комъ и҆ а҆хїмеле́хомъ и҆ нача҄лники ѻ҆те́чествъ свѧще́нническихъ и҆ леѵі́тскихъ: патрїа́рси а҆арѡ҄ни, ѩ҆́коже и҆ бра́тїѧ є҆гѡ̀ ю҆нѣ́йшїи.