Read Библия Церковнославянская а҃ паралипоме́нѡнъ 27 Bible Online

а҃ паралипоме́нѡнъ 27 - Библия Церковнославянская bible

а҃ паралипоме́нѡнъ 27

¹Сы́нове же ї҆и҃лєвы но числѹ̀ своемѹ̀, нача҄лницы ѻ҆те́чествъ, ты́сѧщницы и҆ со́тницы и҆ книгѡ́чїи слѹжа́щїи царю̀, и҆ на всѧ́кое сло́во царе́во по раздѣле́нїємъ, и҆ на всѧ́кое сло́во входѧ́щагѡ и҆ и҆сходѧ́щагѡ, мц҇ъ ѿ мц҇а, во всѧ҄ мц҇ы лѣ́та раздѣле́нїе є҆ди́но, два́десѧть четы́ре ты́сѧщы.

²И҆ над̾ пе́рвымъ раздѣле́нїемъ въ пе́рвый мц҇ъ бы́сть ї҆звоа́зъ сы́нъ завдїи́ловъ, въ раздѣле́нїи є҆гѡ̀ два́десѧть четы́ре ты́сѧщы:

³ѿ сынѡ́въ фаре́совыхъ, нача́лникъ всѣ҄мъ кнѧзє́мъ во́инства мц҇а пе́рвагѡ.

⁴И҆ над̾ раздѣле́нїемъ мц҇а втора́гѡ дѡда́й є҆кхѡ́тскїй и҆ над̾ раздѣле́нїемъ є҆гѡ̀, и҆ макеллѡ́ѳъ во́ждь, и҆ въ раздѣле́нїи є҆гѡ̀ два́десѧть четы́ре ты́сѧщи, кнѧ҄зи си́лы.

⁵Тре́тїй мц҇а тре́тїѧгѡ ване́а сы́нъ ї҆ѡда́евъ, и҆́же свѧще́нникъ нача́лный, и҆ въ раздѣле́нїи є҆гѡ̀ два́десѧть четы́ре ты́сѧщы:

⁶се́й ване́а крѣпча́йшїй междѹ̀ три́десѧтми, и҆ над̾ три́десѧтми: и҆ над̾ раздѣле́нїемъ є҆гѡ̀ зава́дъ сы́нъ є҆гѡ̀.

⁷Четве́ртый мц҇а четве́ртагѡ а҆саи́лъ бра́тъ ї҆ѡа́вль, и҆ заваді́а сы́нъ є҆гѡ̀ и҆ бра́тїѧ, и҆ въ полцѣ̀ є҆гѡ̀ два́десѧть четы́ре ты́сѧщы.

⁸Пѧ́тый пѧ́тагѡ мц҇а нача́лникъ самаѡ́ѳъ сы́нъ ї҆езра́евъ, и҆ въ полцѣ̀ є҆гѡ̀ два́десѧть и҆ четы́ре ты́сѧщы.

⁹Шесты́й мц҇а шеста́гѡ ѻ҆дѹ́їа сы́нъ є҆кки́совъ ѳекѹи́тѧнинъ, и҆ въ полцѣ̀ є҆гѡ̀ два́десѧть и҆ четы́ре ты́сѧщы.

¹⁰Седмы́й мц҇а седма́гѡ хелли́съ и҆́же ѿ фалѹ́са, ѿ сынѡ́въ є҆фре́млихъ, и҆ въ полцѣ̀ є҆гѡ̀ два́десѧть и҆ четы́ре ты́сѧщы.

¹¹Ѻ҆смы́й мц҇а ѻ҆сма́гѡ совоха́й ѹ҆саѳі́тѧнинъ, ѿ колѣ́на зара́ина, и҆ въ полцѣ̀ є҆гѡ̀ два́десѧть и҆ четы́ре ты́сѧщы.

¹²Девѧ́тый мц҇а девѧ́тагѡ а҆вїезе́ръ, и҆́же ѿ а҆наѳѡ́ѳа, ѿ землѝ венїамі́ни, и҆ въ полцѣ̀ є҆гѡ̀ два́десѧть и҆ четы́ре ты́сѧщы.

¹³Десѧ́тый мц҇а десѧ́тагѡ меира́й, и҆́же ѿ нетѡфаѳі́та, ѿ колѣ́на зара́ина, и҆ въ полцѣ̀ є҆гѡ̀ два́десѧть и҆ четы́ре ты́сѧщы.

¹⁴Первыйна́десѧть мц҇а первагѡна́десѧть ванаі́а, и҆́же ѿ фараѳѡ́на, ѿ сынѡ́въ є҆фре́млихъ и҆ въ полцѣ̀ є҆гѡ̀ два́десѧть и҆ четы́ре ты́сѧщы.

¹⁵Вторыйна́десѧть мц҇а вторагѡна́десѧть хѡлді́а, и҆́же ѿ нетѡфаѳі́та, ѿ колѣ́на гоѳонїи́лева, и҆ въ полцѣ̀ є҆гѡ̀ два́десѧть и҆ четы́ре ты́сѧщы.

¹⁶И҆ над̾ племены̀ ї҆и҃левыми, рѹви́мѹ во́ждь є҆лїезе́ръ, сы́нъ зехрі́евъ: сѷмеѡ́нѹ сафаті́а, сы́нъ мааха̀:

¹⁷леѵі́ю а҆саві́а, сы́нъ камѹи́левъ: а҆арѡ́нѹ садѡ́къ:

¹⁸ї҆ѹ́дѣ є҆лїа́въ ѿ бра́тїй даві́довыхъ: ї҆ссаха́рѹ а҆мрѝ, сы́нъ мїхаи́ловъ:

¹⁹завѹлѡ́нѹ самаі́а, сы́нъ а҆вді́евъ: нефѳалі́мѹ ї҆ерїмѡ́ѳъ, сы́нъ ѻ҆зїи́ль:

²⁰є҆фре́мѹ ѡ҆сі́й, сы́нъ ѻ҆зазі́евъ: полѹпле́мени манассі́инѹ ї҆ѡи́ль, сы́нъ фаде́евъ:

²¹полѹпле́мени манассі́инѹ сѹ́щемѹ въ землѝ галаа́дстѣй ї҆адда́й сы́нъ заваді́инъ: сынѡ́мъ венїамї҄нимъ ї҆асїи́лъ, сы́нъ а҆вени́ровъ:

²²да́нѹ а҆зарїи́лъ, сы́нъ ї҆ѡра́мовъ. Сі́и бы́ша нача҄лницы племенѡ́мъ ї҆и҃левымъ.

²³Не хотѣ́ же даві́дъ счестѝ и҆̀хъ ѿ двадесѧтилѣ́тнагѡ и҆ нижа́е: занѐ речѐ гд҇ь ѹ҆мно́жити ї҆и҃лѧ, ѩ҆́кѡ ѕвѣ́зды небє́сныѧ.

²⁴Ї҆ѡа́въ же сы́нъ сарѹі́евъ нача̀ сочита́ти лю́ди, и҆ не совершѝ: сегѡ̀ ра́ди бы́сть гнѣ́въ бж҃їй на ї҆и҃лѧ: и҆ не внесе́сѧ сочисле́нїе въ кни́гѹ слове́съ царѧ̀ даві́да.

²⁵Над̾ сокрѡ́вищи же ца́рскими бы́сть а҆смѡ́ѳъ сы́нъ ѻ҆дїи́левъ: и҆ над̾ сокрѡ́вищи, и҆̀же на ни́вахъ и҆ въ се́лѣхъ, и҆ въ ве́сехъ и҆ въ столпѣ́хъ, ї҆ѡнаѳа́нъ сы́нъ ѻ҆зі́евъ:

²⁶и҆ над̾ земледѣ́латєли зе́млю дѣ́лающими є҆здра́й сы́нъ хелѹ́вовъ:

²⁷и҆ над̾ се́лы семе́й а҆рмаѳе́йскїй: и҆ над̾ сокро́вищами вїногра́дными замвді́а сы́нъ сефамі́евъ:

²⁸над̾ ма́слинами же и҆ над̾ черни́чїемъ, и҆̀же бѧ́хѹ на полѧ́хъ, валана́нъ гедѡрі́тѧнинъ: над̾ сокрѡ́вищи є҆ле́а ї҆ѡа́съ:

²⁹над̾ скѡты́ же, и҆̀же пасѧ́хѹсѧ въ сарѡ́нѣ, сатра́й сарѡні́тѧнинъ: и҆ над̾ вѡлы̀, и҆̀же во ю҆до́лѣхъ, сѡфа́тъ сы́нъ а҆да́инъ:

³⁰над̾ велблю҄ды же ѹ҆ві́а ї҆сма́илтѧнинъ: над̾ ѻ҆слы҄ же ї҆аді́а, и҆́же ѿ мараѳѡ́на:

³¹и҆ над̾ ѻ҆вца́ми ї҆ѡа́съ а҆гарі́тинъ. Всѝ ті́и нача҄лницы и҆мѣ́нїй даві́да царѧ̀.

³²Ї҆ѡнаѳа́нъ же дѧ́дѧ даві́довъ (бы́сть) совѣ́тникъ, мѹ́жъ мѹ́дръ и҆ кни́женъ сы́й: и҆ ї҆еи́ль сы́нъ а҆хамані́евъ бѣ̀ съ сына́ми царе́выми.

³³А҆хїтофе́лъ совѣ́тникъ царе́въ, и҆ хѹсі́а пе́рвѣйшїй дрѹ́гъ царе́въ,

³⁴и҆ по (не́мъ) а҆хїтофе́лѣ бы́сть (бли́з̾)) ї҆ѡда́й сы́нъ ване́инъ и҆ а҆вїаѳа́ръ: и҆ ї҆ѡа́въ нача́лный воево́да царе́въ.