Read Библия Церковнославянская а҃ паралипоме́нѡнъ 9 Bible Online

а҃ паралипоме́нѡнъ 9 - Библия Церковнославянская bible

а҃ паралипоме́нѡнъ 9

¹И҆ ве́сь ї҆и҃ль сочте́нъ є҆́сть: и҆ сѐ, сѹ́ть пи҄саны въ кни́зѣ царе́й ї҆и҃левыхъ и҆ ї҆ѹ́диныхъ со пресели́вшимисѧ въ вавѷлѡ́нъ за беззакѡ́нїѧ своѧ҄, и҆́миже беззако́нноваша.

²И҆ и҆̀же ѡ҆бита́ша пе́рвѣе во ѡ҆держа́нїихъ свои́хъ во градѣ́хъ ї҆и҃левыхъ, свѧще́нницы и҆ леѵі́ти и҆ вда́ннїи (на слѹже́нїе).

³И҆ во ї҆ер҇ли́мѣ ѡ҆бита́ша ѿ сынѡ́въ ї҆ѹ́диныхъ и҆ ѿ сынѡ́въ венїамі́нихъ и҆ ѿ сынѡ́въ є҆фре́млихъ и҆ манассі́иныхъ:

⁴ѹ҆ѳі́й сы́нъ а҆мїѹ́ды сы́на а҆мврі́ина, сы́на а҆мвраі́мова, сы́на вані́ина, сы́на сынѡ́въ фаре́са сы́на ї҆ѹ́дина:

⁵и҆ ѿ силѡ́на а҆саі́а пе́рвенецъ є҆гѡ̀ и҆ сы́нове є҆гѡ̀:

⁶ѿ сынѡ́въ же за́ры ї҆еи́лъ и҆ бра́тїѧ и҆́хъ ше́сть сѡ́тъ и҆ де́вѧтьдесѧтъ.

⁷И҆ ѿ сынѡ́въ венїамі́нихъ: сахо́мъ сы́нъ васолла́ма, сы́на ѡ҆дѹі́ева, сы́на санѹ́їна:

⁸и҆ ї҆евнаа̀ сы́нъ ї҆еровоа́мовъ и҆ є҆ла́въ: и҆ сі́и сы́нове ѻ҆зі́и сы́на махі́рова: и҆ мосолла́мъ сы́нъ сафаті́и, сы́на рагѹи́лева, сы́на ї҆ева́нѧ.

⁹Бра́тїѧ же и҆́хъ по родѡ́мъ и҆́хъ де́вѧть сѡ́тъ пѧтьдесѧ́тъ ше́сть, всѝ мѹ́жїе кнѧ҄зи племенє́мъ по домѡ́мъ ѻ҆те́чествъ свои́хъ.

¹⁰Ѿ свѧщє́нникъ же ї҆ѡда́їа и҆ ї҆ѡарі́мъ, и҆ ї҆ѡакі́мъ

¹¹и҆ а҆за́рїа сы́нъ хелкі́и, сы́на мосолла́мова, сы́на садѡ́кова, сы́на марарїѡ́ѳова, сы́на а҆хїтѡ́ва нача́лника до́мѹ бж҃їѧ:

¹²и҆ а҆дїа́мъ сы́нъ ї҆ероа́мль, сы́на фасго́ра, сы́на мелхїа́ева, и҆ маасі́й сы́нъ а҆дїи́ла, сы́на є҆зі́рова, сы́на мосолла́млѧ, сы́на маселимѡ́ѳова, сы́на є҆мма́рова.

¹³Бра́тїѧ же и҆́хъ кнѧ҄зи по домѡ́въ ѻ҆те́чествъ свои́хъ, ты́сѧща и҆ се́дмь сѡ́тъ и҆ шестьдесѧ́тъ, си́льни крѣ́постїю къ дѣ́ланїю слѹже́нїѧ въ домѹ̀ бж҃їи.

¹⁴Ѿ леѵї҄тъ же саме́їа сы́нъ а҆сѹ́вовъ, сы́на є҆зрїка́мова, сы́на саві́ева ѿ сынѡ́въ мера́рїныхъ,

¹⁵ваквака́ръ же и҆ а҆ри́съ, и҆ гаре́а и҆ маѳані́а сы́нъ мїха́евъ, сы́на зехрї̀, сы́на а҆са́фова:

¹⁶и҆ а҆вді́а сы́нъ саме́а, сы́на гали́лова, сы́на ї҆дїѳѹ́нѧ, и҆ варахі́а сы́нъ а҆́ссы, сы́на є҆лка́нова, и҆́же ѡ҆бита̀ во дво́рѣхъ нетѡфа́ѳовыхъ.

¹⁷Двє́рницы же: селлѹ́мъ и҆ а҆кѹ́мъ, и҆ телмѡ́нъ и҆ є҆мма́нъ, и҆ бра́тїѧ и҆́хъ: селлѹ́мъ кнѧ́зь.

¹⁸И҆ да́же досе́лѣ во вратѣ́хъ ца́рскихъ къ восто́кѹ: сїѧ҄ врата̀ на ѡ҆полчє́нїѧ сынѡ́въ леѵі́иныхъ.

¹⁹И҆ селлѹ́мъ сы́нъ коре́а, сы́на а҆вїаса́фова, сы́на коре́ова: и҆ бра́тїѧ є҆гѡ̀ по до́мѹ ѻ҆те́чествъ и҆́хъ, коре́ане над̾ дѣла́ми слѹже́нїѧ стрегѹ́ще стражбы҄ ски́нїи: а҆ ѻ҆тцы̀ и҆́хъ над̾ полко́мъ гд҇нимъ, стрегѹ́ще вхо́да.

²⁰Фїнее́съ же сы́нъ є҆леаза́ровъ бы́сть во́ждь и҆́хъ пред̾ гд҇емъ, и҆ сі́и съ ни́мъ.

²¹Заха́рїа сы́нъ мосолла́мовъ, две́рникъ вра́тъ ски́нїи свидѣ́нїѧ.

²²Всѝ и҆збра́ннїи двє́рницы над̾ враты̀ двѣ́сти двана́десѧть, сі́и въ се́лѣхъ свои́хъ сочте́ни: си́хъ поста́ви даві́дъ и҆ самѹи́лъ прови́децъ въ вѣ́рѣ и҆́хъ.

²³И҆ сі́и и҆ сы́нове и҆́хъ (бы́ша) при вратѣ́хъ до́мѹ гд҇нѧ и҆ въ домѹ̀ ски́нїи стрещѝ почере́днѡ.

²⁴По четы́ремъ вѣ́трѡмъ бы́ша двє́ри къ восто́кѹ, къ за́падѹ, къ сѣ́верѹ, къ ю҆́гѹ.

²⁵Бра́тїѧ же и҆́хъ, и҆̀же живѧ́хѹ въ се́лѣхъ свои́хъ, прихожда́хѹ по седмѝ дне́хъ ѿ вре́мене да́же до вре́мене (на премѣ́нѹ тѣ҄мъ):

²⁶поне́же четы́ремъ две́рникѡмъ си҄льнымъ ввѣ́рени бы́ша двє́ри: и҆ леѵі́ти бы́ша над̾ храни҄лищи, и҆ над̾ сокрѡ́вищи до́мѹ бж҃їѧ ѡ҆полча́хѹсѧ,

²⁷и҆ ѡ҆́крестъ до́мѹ бж҃їѧ живѧ́хѹ: ѩ҆́кѡ на ни́хъ бѣ̀ стражба̀ и҆́хъ: и҆ сі́и над̾ ключа́ми, є҆́же ѹ҆́трѡ ѹ҆́трѡ ѿверза́ти двє́ри свѧти́лища.

²⁸Ѿ тѣ́хъ же (бѧ́хѹ) над̾ сосѹ҄ды слѹже́нїѧ, по числѹ́ бо вноша́хѹ сосѹ́ды и҆ по числѹ̀ и҆зноша́хѹ ѧ҆̀.

²⁹Ѿ тѣ́хъ же поста́влени над̾ сосѹ҄ды и҆ над̾ всѣ́ми сосѹ́ды ст҃ы́ми, и҆ над̾ мѹко́ю пшени́чною и҆ вїно́мъ и҆ є҆ле́емъ, и҆ ѳѷмїа́момъ и҆ а҆рѡма҄ты.

³⁰Ѿ сынѡ́въ же свѧще́нническихъ бѣ́ша мѷрова́рцы, мѵ́ро содѣ́ловахѹ и҆з̾ а҆рѡма҄тъ.

³¹И҆ маттаѳі́а ѿ леѵї҄тъ, се́й пе́рвенецъ селлѹ́мѹ коре́анинѹ, є҆мѹ́же ввѣ́рєна дѣла̀ же́ртвы сковра́дныѧ вели́кагѡ жерца̀:

³²и҆ ване́а кааѳі́тѧнинъ ѿ бра́тїй и҆́хъ над̾ хлѣ҄бы предложе́нїѧ, є҆́же ѹ҆готовлѧ́ти въ сѹббѡ҄ты и҆ сѹббѡ҄ты.

³³И҆ сі́и ѱалмопѣ́вцы кнѧ҄зи ѻ҆те́чествъ леѵі́тскихъ, ѡ҆предѣле́ни почере́днѡ во хра́минахъ, повседне́внѡ, ѩ҆́кѡ да де́нь и҆ но́щь своѐ слѹже́нїе ѿслѹ́живаютъ.

³⁴Сі́и кнѧ҄зи ѻ҆те́чествъ леѵі́тскихъ по племенє́мъ свои҄мъ, нача҄лницы сі́и пребыва́хѹ во ї҆ер҇ли́мѣ.

³⁵Въ гаваѡ́нѣ же живѧ́ше ѻ҆те́цъ гаваѡ́нь ї҆еи́ль: и҆ и҆́мѧ женѣ̀ є҆гѡ̀ мааха̀:

³⁶и҆ сы́нъ пе́рвенецъ є҆гѡ̀ а҆вдѡ́нъ, и҆ сѹ́ръ и҆ кі́съ, и҆ ва́ель и҆ ни́ръ, и҆ нада́въ

³⁷и҆ гедѡ́ръ, и҆ бра́тїѧ є҆гѡ̀ а҆їѹ́нъ и҆ зехрі́а и҆ макелѡ́ѳъ.

³⁸Макелѡ́ѳъ же родѝ самѹ̀: и҆ сі́и всели́шасѧ посредѣ̀ бра́тїй свои́хъ во ї҆ер҇ли́мѣ съ бра́тїѧми свои́ми.

³⁹Ни́ръ же родѝ кі́са, и҆ кі́съ родѝ саѹ́ла, и҆ саѹ́лъ родѝ ї҆ѡнаѳа́на и҆ мелхїсѹ́а, и҆ а҆мїнада́ва и҆ ї҆есваа́ла.

⁴⁰Сы́нъ же ї҆ѡнаѳа́нь мемфїваа́лъ: и҆ мемфїваа́лъ родѝ мі́хѹ.

⁴¹Сы́нове же мі́хи: фїло́ѳъ и҆ мелхїи́лъ, и҆ ѳараа̀ и҆ хаа́зъ.

⁴²Хаа́зъ же родѝ ї҆а́дѹ, ї҆а́да же родѝ а҆ле́ѳа и҆ а҆смѡ́ѳа и҆ замврі́а: замврі́й же родѝ ме́сѹ,

⁴³ме́са же родѝ ваа́нѹ: рафе́а сы́нъ є҆гѡ̀, є҆ла́са сы́нъ є҆гѡ̀, а҆саи́лъ сы́нъ є҆гѡ̀.

⁴⁴А҆саи́лѹ же (бы́ша) ше́сть сынѡ́въ, и҆ сїѧ҄ и҆мена̀ и҆́хъ: є҆зрїка́мъ пе́рвенецъ є҆гѡ̀, и҆ ї҆сма́илъ и҆ а҆за́рїа, и҆ а҆вді́а и҆ а҆на́нъ и҆ а҆́са: сі́и сы́нове а҆саи́лѡвы.