Read Библия Церковнославянская в҃ паралипоме́нѡнъ 11 Bible Online

в҃ паралипоме́нѡнъ 11 - Библия Церковнославянская bible

в҃ паралипоме́нѡнъ 11

¹Прїи́де же ровоа́мъ во ї҆ер҇ли́мъ, и҆ созва̀ (ве́сь) до́мъ ї҆ѹ́динъ и҆ венїамі́нь, сто̀ ѻ҆́смьдесѧтъ ты́сѧщъ и҆збра́нныхъ ю҆́ношей творѧ́щихъ бра́нь, и҆ воева́ше проти́вѹ ї҆и҃лѧ и҆ ї҆еровоа́ма, да ѡ҆брати́тъ къ себѣ̀ ца́рство.

²И҆ бы́сть сло́во гд҇не къ саме́ю человѣ́кѹ бж҃їю, гл҃ѧ:

³глаго́ли къ ровоа́мѹ сы́нѹ соломѡ́ню, царю̀ ї҆ѹ́динѹ, и҆ ко всемѹ̀ ї҆и҃лю, и҆́же є҆́сть во ї҆ѹ́дѣ и҆ венїамі́нѣ:

⁴сїѧ҄ речѐ гд҇ь: не восходи́те, нижѐ ѡ҆полча́йтесѧ проти́вѹ бра́тїи ва́шеѧ: возврати́тесѧ кі́йждо въ до́мъ сво́й, занѐ ѿ менє̀ бы́сть гл҃го́лъ се́й. И҆ послѹ́шаша сло́ва гд҇нѧ, и҆ возврати́шасѧ, и҆ не поидо́ша проти́вѹ ї҆еровоа́ма.

⁵Ѡ҆бита́ же ровоа́мъ во ї҆ер҇ли́мѣ и҆ созда̀ гра́ды стѣна҄ты во ї҆ѹде́и:

⁶состро́и же виѳлее́мъ и҆ є҆та́мъ, и҆ ѳекѹѐ

⁷и҆ веѳсѹ́ръ, и҆ сокхѡ́ѳъ и҆ ѻ҆долла́мъ,

⁸и҆ ге́ѳъ и҆ марїса́нъ, и҆ зі́фъ

⁹и҆ а҆дѹре́мъ, и҆ лахі́съ и҆ а҆зи́кѹ,

¹⁰и҆ сала́ю и҆ є҆лѡ́нъ и҆ хеврѡ́нъ, и҆́же є҆́сть ї҆ѹ́динъ и҆ венїамі́нь, гра́ды крѣ҄пкїѧ:

¹¹и҆ ѹ҆крѣпѝ и҆̀хъ стѣна́ми, и҆ поста́ви въ ни́хъ нача́лники, житохрани҄лища, и҆ є҆ле́й и҆ вїно̀,

¹²во всѧ́цѣмъ гра́дѣ щиты̀ и҆ ко́пїѧ, и҆ ѹ҆крѣпѝ и҆̀хъ во мно́жествѣ ѕѣлѡ̀, и҆ бы́ста под̾ ни́мъ ї҆ѹ́да и҆ венїамі́нъ.

¹³Свѧще́нницы же и҆ леѵі́ты, и҆̀же бѧ́хѹ во все́мъ ї҆и҃ли, собра́шасѧ къ немѹ̀ ѿ всѣ́хъ предѣ҄лъ:

¹⁴ѩ҆́кѡ ѡ҆ста́виша леѵі́ти селє́нїѧ ѡ҆держа́нїѧ своегѡ̀ и҆ поидо́ша ко ї҆ѹ́дѣ во ї҆ер҇ли́мъ, поне́же и҆згна̀ и҆̀хъ ї҆еровоа́мъ и҆ сы́нове є҆гѡ̀, є҆́же не слѹжи́ти гд҇еви:

¹⁵и҆ поста́ви себѣ̀ жерцы̀ на высо́кихъ, и҆ їдѡлѡмъ, и҆ сѹ́єтнымъ, и҆ телцє́мъ, и҆̀хже сотворѝ ї҆еровоа́мъ.

¹⁶И҆ и҆згна̀ и҆̀хъ ѿ всѣ́хъ колѣ́нъ ї҆и҃левыхъ, и҆̀же вда́ша се́рдце своѐ, да взы́щѹтъ гд҇а бг҃а ї҆и҃лева: и҆ прїидо́ша во ї҆ер҇ли́мъ пожре́ти гд҇ѹ бг҃ѹ ѻ҆тє́цъ свои́хъ:

¹⁷и҆ ѹ҆крѣпи́ша ца́рство ї҆ѹ́дино. И҆ ѹ҆крѣпи́сѧ ровоа́мъ сы́нъ соломѡ́нь въ трѝ лѣ҄та, хожда́ше бо по пѹтє́мъ даві́да и҆ соломѡ́на ѻ҆тца̀ своегѡ̀ лѣ҄та трѝ.

¹⁸И҆ взѧ̀ себѣ̀ ровоа́мъ женѹ̀ моола́ѳѹ, дще́рь ї҆ерїмѡ́ѳа сы́на даві́дова, и҆ а҆вїге́ю дще́рь є҆лїа́ва сы́на ї҆ессе́ова.

¹⁹И҆ родѝ є҆мѹ̀ сы́ны: ї҆еѹ́са и҆ саморі́а и҆ заа́ма.

²⁰По си́хъ же поѧ̀ себѣ̀ маа́хѹ дще́рь а҆вессалѡ́млю, и҆ родѝ є҆мѹ̀ а҆ві́ю и҆ ї҆еѳѳі́а, и҆ зі́зѹ и҆ салимѡ́ѳа.

²¹И҆ возлюбѝ ровоа́мъ маа́хѹ дще́рь а҆вессалѡ́млю па́че всѣ́хъ же́нъ свои́хъ и҆ подло́жницъ свои́хъ, ѩ҆́кѡ же́нъ ѻ҆смьна́десѧть и҆мѣ̀ и҆ подло́жницъ шестьдесѧ́тъ: и҆ родѝ два́десѧть ѻ҆́смь сынѡ́въ и҆ шестьдесѧ́тъ дще́рей.

²²И҆ поста́ви въ нача́лника ровоа́мъ а҆ві́ю сы́на маа́хина и҆ кнѧ́земъ над̾ все́ю бра́тїею є҆гѡ̀, того̀ бо и҆ царе́мъ сотвори́ти помышлѧ́ше.

²³И҆ возрастѐ па́че всѣ́хъ бра́тїй свои́хъ во всѣ́хъ предѣ́лѣхъ ї҆ѹ́диныхъ и҆ венїамі́нихъ и҆ во градѣ́хъ крѣ́пкихъ, и҆ дадѐ и҆̀мъ пи́щи мно́жество мно́го, и҆ мно́гихъ взыска̀ же́нъ.