Read Библия Церковнославянская в҃ паралипоме́нѡнъ 12 Bible Online

в҃ паралипоме́нѡнъ 12 - Библия Церковнославянская bible

в҃ паралипоме́нѡнъ 12

¹И҆ бы́сть є҆гда̀ ѹ҆стро́исѧ ца́рство ровоа́мово, и҆ ѹ҆крѣпи́сѧ, ѡ҆ста́ви за́пѡвѣди гд҇ни, и҆ ве́сь ї҆и҃ль съ ни́мъ.

²И҆ бы́сть въ лѣ́то пѧ́тое ца́рства ровоа́млѧ взы́де сѹсакі́мъ ца́рь є҆гѵ́петскїй на ї҆ер҇ли́мъ, занѐ согрѣши́ша пред̾ гд҇емъ,

³съ ты́сѧщїю и҆ двѣма̀ сты̀ колесни́цъ и҆ шестьдесѧ́тъ ты́сѧщъ кѡ́нникъ, и҆ не бѣ̀ числа̀ наро́дѹ прише́дшемѹ съ ни́мъ ѿ є҆гѵ́пта, лївѵ́ане, трѡглодѵ́тѧне и҆ є҆ѳїо́плѧне:

⁴и҆ взѧ́ша гра́ды крѣ҄пкїѧ, и҆̀же бѧ́хѹ во ї҆ѹ́дѣ, и҆ прїидо́ша да́же до ї҆ер҇ли́ма.

⁵Саме́а же про҇ро́къ вни́де къ ровоа́мѹ и҆ къ нача́лникѡмъ ї҆ѹ҄динымъ, и҆̀же со́брани бѧ́хѹ во ї҆ер҇ли́мъ ѿ лица̀ сѹсакі́мова, и҆ речѐ къ ни҄мъ: сїѧ҄ речѐ гд҇ь: вы̀ ѡ҆ста́висте мѧ̀, и҆ а҆́зъ ѡ҆ста́влю ва́съ въ рѹкѹ̀ сѹсакі́ма.

⁶И҆ посрами́шасѧ нача҄лницы ї҆и҃лєвы и҆ ца́рь и҆ реко́ша: првднъ гд҇ь.

⁷Е҆гда́ же ви́дѣ гд҇ь, ѩ҆́кѡ смири́шасѧ, и҆ бы́сть сло́во гд҇не къ саме́ю, гл҃ѧ: смири́шасѧ, не разорю̀ и҆̀хъ, и҆ да́мъ и҆̀мъ вма́лѣ сп҇нїе, и҆ не ѹ҆ка́нетъ ѩ҆́рость моѧ̀ на ї҆ер҇ли́мъ,

⁸ѻ҆ба́че бѹ́дѹтъ въ рабы҄, да позна́ютъ рабо́тѹ мою̀ и҆ рабо́тѹ ца́рства землѝ.

⁹И҆ взы́де сѹсакі́мъ ца́рь є҆гѵ́петскїй во ї҆ер҇ли́мъ, и҆ взѧ̀ сокрѡ́вища, ѩ҆̀же въ домѹ̀ гд҇ни, и҆ сокрѡ́вища, ѩ҆̀же въ домѹ̀ царе́вѣ, всѧ҄ взѧ̀: и҆ взѧ̀ щиты̀ златы҄ѧ, и҆̀хже сотворѝ соломѡ́нъ.

¹⁰И҆ сотворѝ ца́рь ровоа́мъ щиты̀ мѣ҄дѧны вмѣ́стѡ и҆̀хъ. И҆ поста́ви на ни́мъ сѹсакі́мъ ца́рь є҆гѵ́петскїй нача́лникѡвъ предходѧ́щихъ стрегѹ́щихъ врата̀ царє́ва:

¹¹и҆ бы́сть внегда̀ входи́ти царю̀ въ до́мъ гд҇ень, вхожда́хѹ стрегѹ́щїи и҆ предходѧ́щїи, и҆ ѡ҆браща́ющесѧ восхожда́хѹ предходѧ́щїи ко ѻ҆рѹжехрани́телницѣ свое́й.

¹²И҆ є҆гда̀ смири́сѧ то́й, ѿврати́сѧ ѿ негѡ̀ ѩ҆́рость гд҇нѧ, а҆ не въ разоре́нїе въ коне́цъ: и҆́бо и҆ во ї҆ѹ́дѣ бѧ́хѹ словеса̀ бла҄га.

¹³И҆ ѹ҆крѣпи́сѧ ца́рь ровоа́мъ во ї҆ер҇ли́мѣ и҆ ца́рствова: четы́редесѧти же и҆ є҆ди́нагѡ лѣ́та бы́сть ровоа́мъ, є҆гда̀ ца́рствовати нача̀, и҆ седмьна́десѧть лѣ́тъ ца́рствова во ї҆ер҇ли́мѣ, во гра́дѣ, є҆го́же и҆збра̀ гд҇ь, да и҆менѹ́етсѧ и҆́мѧ є҆гѡ̀ тѹ̀ ѿ всѣ́хъ колѣ́нъ ї҆и҃левыхъ. И҆́мѧ же ма́тери є҆гѡ̀ ноома̀ а҆ммані́тынѧ.

¹⁴И҆ сотворѝ лѹка́вое, ѩ҆́кѡ не и҆спра́ви се́рдца своегѡ̀, да взы́щетъ гд҇а.

¹⁵Словеса́ же ровоа́мѡва пє́рваѧ и҆ послѣ҄днѧѧ не се́ ли, сѹ́ть пи҄сана въ словесѣ́хъ саме́а про҇ро́ка и҆ а҆́дда прови́дѧщагѡ, и҆ дѣѧ҄нїѧ є҆гѡ̀; И҆ воева́ше ровоа́мъ и҆ ї҆еровоа́мъ во всѧ҄ дни҄.

¹⁶И҆ ѹ҆́мре ровоа́мъ и҆ погребе́нъ бы́сть со ѻ҆тцы҄ свои́ми во гра́дѣ даві́довѣ. И҆ воцари́сѧ а҆ві́а сы́нъ є҆гѡ̀ вмѣ́стѡ є҆гѡ̀.