Read Библия Церковнославянская в҃ паралипоме́нѡнъ 13 Bible Online

в҃ паралипоме́нѡнъ 13 - Библия Церковнославянская bible

в҃ паралипоме́нѡнъ 13

¹Въ лѣ́то ѻ҆смоена́десѧть ца́рства ї҆еровоа́млѧ воцари́сѧ а҆ві́а над̾ ї҆ѹ́дою:

²трѝ лѣ҄та ца́рствова во ї҆ер҇ли́мѣ. И҆́мѧ же ма́тери є҆гѡ̀ мааха̀ дще́рь ѹ҆рїи́лева ѿ гаваѡ́на. И҆ бѣ̀ бра́нь междѹ̀ ї҆еровоа́момъ и҆ междѹ̀ а҆ві́ею.

³И҆ ѡ҆полчи́сѧ а҆ві́а въ си́лѣ во́инскїѧ си́лы, въ четы́рехъ ста́хъ ты́сѧщахъ мѹже́й си́льныхъ: ї҆еровоа́мъ же ѹ҆стро́и сопроти́вѹ є҆гѡ̀ бра́нь во ѻ҆смѝ ста́хъ ты́сѧщахъ мѹже́й вое́нныхъ крѣ́пкихъ си́лою.

⁴Ста́ же а҆ві́а на горѣ̀ сомо́ри, ѩ҆́же є҆́сть на горѣ̀ є҆фре́мли, и҆ речѐ: слы́шите ї҆еровоа́мъ и҆ ве́сь ї҆и҃ль:

⁵и҆лѝ не вѣ́сте, ѩ҆́кѡ гд҇ь бг҃ъ ї҆и҃левъ дадѐ ца́рство даві́дѹ над̾ ї҆и҃лемъ во вѣ́ки и҆ сыновѡ́мъ є҆гѡ̀ въ завѣ́тъ вѣ́ченъ;

⁶и҆ воста̀ ї҆еровоа́мъ сы́нъ нава́товъ, ра́бъ соломѡ́на сы́на даві́дова, и҆ ѿве́ржесѧ ѿ господи́на своегѡ̀:

⁷и҆ собра́шасѧ къ немѹ̀ мѹ́жїе па́гѹбнїи, сы́нове законопрестѹ́пнїи, и҆ воста̀ проти́вѹ ровоа́ма сы́на соломѡ́нова, ровоа́мъ же бѣ̀ ю҆нѣ́йшїй и҆ се́рдцемъ страшли́въ, и҆ не возмо́же противоста́ти лицѹ̀ є҆гѡ̀:

⁸и҆ нн҃ѣ вы̀ глаго́лете противоста́ти лицѹ̀ цр҇тва гд҇нѧ въ рѹцѣ̀ сынѡ́въ даві́довыхъ: и҆ вы̀ мно́зи ѕѣлѡ̀, и҆ съ ва́ми телцы̀ златі́и, и҆̀хже сотворѝ ва́мъ ї҆еровоа́мъ въ бо́ги:

⁹не и҆зверго́сте ли свѧще́нникѡвъ гд҇нихъ сынѡ́въ а҆арѡ́нихъ и҆ леѵі́тѡвъ, и҆ сотвори́сте себѣ̀ жерцы̀ ѿ люді́й всеѧ̀ землѝ, приходѧ́й напо́лнити рѹ́кѹ свою̀ телце́мъ ѿ волѡ́въ и҆ ѻ҆бна́ми седмїю̀, и҆ сотвори́сѧ жерце́мъ не сѹ́щемѹ бо́гѹ:

¹⁰мы́ же гд҇а бг҃а на́шегѡ не ѡ҆ста́вихомъ, и҆ свѧще́нницы є҆гѡ̀ слѹ́жатъ гд҇ѹ, сы́нове а҆арѡ́ни и҆ леѵі́ти,

¹¹и҆ по чреда́мъ свои҄мъ жрѹ́тъ гд҇ѹ всесожжє́нїѧ ѹ҆́трѡ и҆ пред̾ ве́черомъ, и҆ ѳѷмїа́мъ сложе́нїѧ, и҆ предложє́нїѧ хлѣ́бѡвъ на трапе́зѣ чи́стѣй, и҆ свѣти́лникъ златы́й, и҆ свѣ́щники возжже́нїѧ возжиза́ти къ ве́черѹ: мы́ бо храни́мъ стражбы҄ гд҇а бг҃а ѻ҆тє́цъ на́шихъ, вы́ же є҆го̀ ѡ҆ста́висте:

¹²и҆ сѐ, съ на́ми въ нача́лѣ гд҇ь, и҆ свѧще́нницы є҆гѡ̀, и҆ трѹбы҄ зна́менованїѧ, є҆́же зна́менати проти́вѹ ва́мъ: сы́нове ї҆и҃лєвы, не ра́тѹйте проти́вѹ гд҇а бг҃а ѻ҆тє́цъ ва́шихъ, поне́же не благопоспѣши́тсѧ ва́мъ.

¹³Ї҆еровоа́мъ же ѡ҆братѝ подса́дѹ прїитѝ є҆мѹ̀ созадѝ, и҆ бы́сть проти́вѹ ї҆ѹ́ды (са́мъ), подса́да же созадѝ.

¹⁴И҆ ѡ҆брати́сѧ ї҆ѹ́да, и҆ сѐ, є҆мѹ̀ бра́нь сопредѝ и҆ созадѝ, и҆ возопи́ша ко гд҇ѹ, и҆ свѧще́нницы вострѹби́ша трѹба́ми:

¹⁵и҆ возопи́ша мѹ́жїе ї҆ѹ҄дины. И҆ бы́сть вопїю́щымъ мѹжє́мъ ї҆ѹ҄динымъ, и҆ гд҇ь поразѝ ї҆еровоа́ма и҆ ї҆и҃лѧ пред̾ а҆ві́ею и҆ ї҆ѹ́дою:

¹⁶и҆ бѣжа́ша сы́нове ї҆и҃лєвы ѿ лица̀ ї҆ѹ́ды, и҆ предадѐ и҆̀хъ гд҇ь бг҃ъ въ рѹ́ки и҆́хъ:

¹⁷и҆ поразѝ и҆̀хъ а҆ві́а и҆ лю́дїе є҆гѡ̀ ѩ҆́звою вели́кою, и҆ падо́ша ра́нени ѿ ї҆и҃лѧ пѧ́ть сѡ́тъ ты́сѧщъ мѹже́й крѣ́пкихъ.

¹⁸И҆ смири́шасѧ сы́нове ї҆и҃лєвы въ де́нь то́й, и҆ ѹ҆крѣпи́шасѧ сы́нове ї҆ѹ҄дины, ѩ҆́кѡ ѹ҆пова́ша на гд҇а бг҃а ѻ҆тє́цъ свои́хъ.

¹⁹Погна́ же а҆ві́а в̾слѣ́дъ ї҆еровоа́ма и҆ взѧ̀ ѿ негѡ̀ гра́ды: веѳи́ль и҆ се́ла є҆гѡ̀, и҆ ї҆есѵ́нѹ и҆ се́ла є҆ѧ̀, и҆ є҆фрѡ́нъ и҆ се́ла є҆гѡ̀.

²⁰И҆ не возмо́же ктомѹ̀ проти́витисѧ ї҆еровоа́мъ во всѧ҄ дни҄ а҆ві́и, и҆ поразѝ є҆го̀ гд҇ь: и҆ ѹ҆́мре.

²¹А҆ві́а же ѹ҆крѣпи́сѧ, и҆ поѧ́тъ себѣ̀ же́нъ четырена́десѧть, и҆ родѝ два́десѧть два̀ сы҄на и҆ шестьна́десѧть дще́рей.

²²Прѡ́чаѧ же словеса̀ а҆ві́єва и҆ дѣѧ҄нїѧ є҆гѡ̀ и҆ словеса̀ є҆гѡ̀ пи҄сана въ кни́зѣ а҆́дды про҇ро́ка.