Read Библия Церковнославянская в҃ паралипоме́нѡнъ 14 Bible Online

в҃ паралипоме́нѡнъ 14 - Библия Церковнославянская bible

в҃ паралипоме́нѡнъ 14

¹И҆ ѹ҆́спе а҆ві́а со ѻ҆тцы҄ свои́ми, и҆ погребо́ша є҆го̀ во гра́дѣ даві́довѣ. И҆ воцари́сѧ а҆́са сы́нъ є҆гѡ̀ вмѣ́стѡ є҆гѡ̀ во дни҄ же а҆́сы почѝ землѧ̀ ї҆ѹ́дина лѣ́тъ де́сѧть.

²И҆ сотворѝ а҆́са благо́е и҆ пра́вое пред̾ гд҇емъ бг҃омъ свои́мъ:

³и҆ ѿве́рже ѻ҆лтари҄ чѹжды́хъ и҆ высѡ́каѧ, и҆ сокрѹшѝ їдѡлы и҆ посѣчѐ дѹбра҄вы:

⁴и҆ повелѣ̀ ї҆ѹ́дѣ, да взы́щетъ гд҇а бг҃а ѻ҆тє́цъ свои́хъ и҆ да сотвори́тъ зако́нъ є҆гѡ̀ и҆ за́пѡвѣди:

⁵и҆ и҆зве́рже и҆з̾ всѣ́хъ градѡ́въ ї҆ѹ́диныхъ ѻ҆лтари҄ и҆ їдѡлы, и҆ ца́рствова въ ми́рѣ.

⁶И҆ созда̀ гра́ды крѣ҄пки въ землѝ ї҆ѹ́динѣ, занѐ въ поко́и бы́сть землѧ̀, и҆ не бѣ̀ є҆мѹ̀ бра́ни въ лѣ҄та сїѧ҄, ми́ръ во гд҇ь дадѐ є҆мѹ̀.

⁷Рече́ же ї҆ѹ́дѣ: сози́ждемъ гра́ды сїѧ҄, и҆ сотвори́мъ стѣ́ны и҆ столпы̀, и҆ врата̀ и҆ верєѝ, до́ндеже земле́ю госпо́дствѹемъ: занѐ ѩ҆́коже взыска́хомъ гд҇а бг҃а на́шего, взыска̀ и҆ на́съ, и҆ воздадѐ на́мъ ми́ръ ѡ҆́крестъ, и҆ бл҃гопоспѣ́шствова на́мъ.

⁸И҆ бы́сть си́ла а҆́сѣ ѻ҆рѹжено́сцєвъ носѧ́щихъ щиты̀ и҆ ко́пїѧ въ землѝ ї҆ѹ́динѣ три́ста ты́сѧщъ, въ земли́ же венїамі́ни щи́тникѡвъ и҆ стрѣлцє́въ двѣ́сти ѻ҆́смьдесѧтъ ты́сѧщъ: всѝ сі́и во́ини си́льнїи.

⁹И҆зы́де же проти́вѹ и҆́хъ зара́й є҆ѳїо́плѧнинъ съ си́лою въ ты́сѧщы ты́сѧщей, и҆ колесни́цъ три́ста, и҆ прїи́де да́же до мари́са.

¹⁰И҆ и҆зы́де а҆́са проти́вѹ є҆мѹ̀ и҆ ѹ҆стро́и бра́нь въ де́бри на сѣ́веръ мари́са.

¹¹И҆ возопѝ а҆́са ко гд҇ѹ бг҃ѹ своемѹ̀ и҆ речѐ: гд҇и, не и҆знемо́жетъ ѹ҆ тебє̀ сп҃са́ти во мно́гихъ и҆ въ ма́лыхъ, ѹ҆крѣпѝ на́съ, гд҇и бж҃е на́шъ, ѩ҆́кѡ на тѧ̀ ѹ҆пова́хомъ и҆ ѡ҆ и҆́мени твое́мъ и҆зыдо́хомъ на мно́жество мно́гое сїѐ: гд҇и бж҃е на́шъ, ты̀ є҆сѝ бг҃ъ, да не превозмо́жетъ проти́вѹ тебє̀ человѣ́къ.

¹²И҆ поразѝ гд҇ь є҆ѳїо́пы пред̾ а҆́сою и҆ ї҆ѹ́дою и҆ бѣжа́ша є҆ѳїо́пи:

¹³и҆ погна̀ и҆̀хъ а҆́са и҆ лю́дїе є҆гѡ̀ да́же до гедѡ́ра: и҆ падо́ша є҆ѳїо́пи, да́же не бы́ти въ ни́хъ ѡ҆ста́нкѹ, ѩ҆́кѡ сотре́ни бы́ша пред̾ гд҇емъ и҆ пред̾ си́лою є҆гѡ̀, и҆ плѣни́ша кѡры́сти мнѡ́ги:

¹⁴и҆ и҆зсѣко́ша вє́си и҆́хъ ѡ҆́крестъ гедѡ́ра, вели́къ бо стра́хъ гд҇ень ѡ҆б̾ѧ́тъ и҆̀хъ, и҆ плѣни́ша всѧ҄ гра́ды и҆́хъ, занѐ мнѡ́ги кѡры́сти бы́ша въ ни́хъ:

¹⁵и҆ кѹ́щы скѡ́тскїѧ и҆ а҆мазо́нѡвъ и҆зсѣко́ша, и҆ взѧ́ша скота̀ мно́жество и҆ велблю́ды, и҆ возврати́шасѧ во ї҆ер҇ли́мъ.