Read Библия Церковнославянская в҃ паралипоме́нѡнъ 16 Bible Online

в҃ паралипоме́нѡнъ 16 - Библия Церковнославянская bible

в҃ паралипоме́нѡнъ 16

¹И҆ въ лѣ́то три́десѧть ѻ҆смо́е ца́рства а҆́сина, взы́де ваа́са ца́рь ї҆и҃левъ на ї҆ѹ́дѹ и҆ стѣна́ми ѹ҆крѣпѝ ра́мѹ, да не да́стъ вхо́да и҆ и҆схо́да а҆́сѣ царю̀ ї҆ѹ́динѹ.

²И҆ взѧ̀ а҆́са сребро̀ и҆ зла́то ѿ сокро́вищъ до́мѹ гд҇нѧ и҆ до́мѹ царе́ва, и҆ посла̀ ко (венада́дѹ) сы́нѹ а҆де́ра царѧ̀ сѵ́рска, живѹ́щемѹ въ дама́сцѣ, глаго́лѧ:

³положѝ завѣ́тъ междѹ̀ мно́ю и҆ тобо́ю и҆ междѹ̀ ѻ҆тце́мъ мои́мъ и҆ ѻ҆тце́мъ твои́мъ: сѐ посла́хъ тебѣ̀ сребро̀ и҆ зла́то: прїидѝ и҆ ѿженѝ ѿ менє̀ ваа́сѹ царѧ̀ ї҆и҃лева, и҆ да ѿи́детъ ѿ менє̀.

⁴И҆ послѹ́ша сы́нъ а҆де́ровъ царѧ̀ а҆́сы и҆ посла̀ нача́лники во́євъ свои́хъ на гра́ды ї҆и҃лєвы, и҆ поразѝ а҆їнѡ́на и҆ да́на, и҆ а҆велмаі́на и҆ всѧ҄ ѡ҆крє́стнаѧ нефѳалї҄млѧ.

⁵И҆ бы́сть є҆гда̀ ѹ҆слы́ша ваа́са ца́рь ї҆и҃левъ, ѡ҆ста́ви ктомѹ̀ созида́ти ра́мѹ и҆ ѡ҆ста́ви дѣ́ло своѐ.

⁶А҆́са же ца́рь взѧ̀ всего̀ ї҆ѹ́дѹ и҆ взѧ̀ ка́менїе ѿ ра́мы и҆ лѣ́съ є҆ѧ̀, ѩ҆̀же на созда́нїе ѹ҆гото́ва ваа́са, и҆ созда̀ и҆з̾ ни́хъ гаваю̀ и҆ масфѹ̀.

⁷И҆ во вре́мѧ ѻ҆́но прїи́де а҆на́нїй про҇ро́къ ко а҆́сѣ царю̀ ї҆ѹ́динѹ и҆ речѐ є҆мѹ̀: поне́же и҆мѣ́лъ є҆сѝ ѹ҆пова́нїе на царѧ̀ сѵ́рска, а҆ не ѹ҆пова́лъ є҆сѝ на гд҇а бг҃а твоего̀, тогѡ̀ ра́ди спасе́сѧ си́ла царѧ̀ сѵ́рскагѡ ѿ рѹкѹ̀ твоє́ю:

⁸не є҆ѳїо́пи ли и҆ лївѵ́ане бѧ́хѹ на тѧ̀ въ си́лѣ мно́зѣ, въ де́рзости колесни́цъ и҆ кѡ́нникъ во мно́жество ѕѣлѡ̀; и҆ є҆гда̀ ѹ҆пова́лъ є҆сѝ на гд҇а, предадѐ и҆̀хъ въ рѹ́кѹ твою̀:

⁹ѻ҆́чи бо гд҇ни назира́ютъ всю̀ зе́млю, є҆́же ѹ҆крѣпи́ти сѹ́щихъ се́рдцемъ соверше́ннымъ къ немѹ̀: бѹ́е сотвори́лъ є҆сѝ сїѐ, (сегѡ̀ ра́ди) ѿнн҃ѣ бѹ́детъ на тѧ̀ бра́нь.

¹⁰Разгнѣ́васѧ же а҆́са на про҇ро́ка и҆ всадѝ є҆го̀ въ темни́цѹ, поне́же прогнѣ́васѧ ѡ҆ се́мъ: и҆ ѹ҆бѝ а҆́са ѿ люді́й во вре́мѧ то̀ (мно́гихъ).

¹¹И҆ сѐ, словеса̀ а҆́сы, пє́рваѧ и҆ послѣ҄днѧѧ, пи҄сана сѹ́ть въ кни́зѣ царе́й ї҆ѹ́диныхъ и҆ ї҆и҃лѧ.

¹²И҆ разболѣ́сѧ а҆́са въ лѣ́то три́десѧть девѧ́тое ца́рства своегѡ̀ нога́ма, болѣ́знїю ѕѣ́лнѣйшею: и҆ нижѐ въ не́мощи свое́й взыска̀ гд҇а, но врачє́въ.

¹³ѹ҆́спе же а҆́са со ѻ҆тцы҄ свои́ми, и҆ ѹ҆́мре въ лѣ́то четы́редесѧть пе́рвое ца́рства своегѡ̀:

¹⁴и҆ погребо́ша є҆го̀ во гро́бѣ, є҆го́же и҆скопа̀ себѣ̀ во гра́дѣ даві́довѣ, и҆ положи́ша є҆го̀ на ѻ҆дрѣ̀, и҆ напо́лниша а҆рѡма́тами и҆ ро́дами мѵ́рѡвъ благоѹха́нныхъ, и҆ сотвори́ша є҆мѹ̀ погребе́нїе вели́ко ѕѣлѡ̀.