Read Библия Церковнославянская в҃ паралипоме́нѡнъ 17 Bible Online

в҃ паралипоме́нѡнъ 17 - Библия Церковнославянская bible

в҃ паралипоме́нѡнъ 17

¹И҆ воцари́сѧ ї҆ѡсафа́тъ сы́нъ є҆гѡ̀ вмѣ́стѡ є҆гѡ̀, и҆ ѹ҆крѣпи́сѧ ї҆ѡсафа́тъ над̾ ї҆и҃лемъ:

²расположи́ же си́лѹ во всѣ́хъ градѣ́хъ ї҆ѹ́диныхъ крѣ́пкихъ и҆ поста́ви воевѡ́ды во градѣ́хъ ї҆ѹ́диныхъ и҆ во градѣ́хъ є҆фре́мовыхъ и҆̀хже побра̀ пре́жде а҆́са ѻ҆те́цъ є҆гѡ̀.

³И҆ бы́сть гд҇ь со ї҆ѡсафа́томъ, ѩ҆́кѡ хожда́ше въ пѹте́хъ даві́да ѻ҆тца̀ своегѡ̀ пе́рвыхъ и҆ не взыска̀ їдѡлѡвъ,

⁴но гд҇а бг҃а ѻ҆тца̀ своегѡ̀ взыска̀ и҆ по́йде въ повелѣ́нїихъ ѻ҆тца̀ своегѡ̀, а҆ не по дѣлѡ́мъ ї҆и҃лєвымъ:

⁵и҆ ѹ҆крѣпѝ гд҇ь ца́рство въ рѹкѹ̀ є҆гѡ̀, и҆ да́ша всѧ̀ ї҆ѹде́а да́ры ї҆ѡсафа́тѹ, и҆ бы́сть є҆мѹ̀ бога́тство и҆ сла́ва мно́га.

⁶И҆ вознесе́сѧ се́рдце є҆гѡ̀ въ пѹтѝ гд҇ни, и҆ ктомѹ̀ и҆з̾ѧ̀ высѡ́каѧ и҆ дѹбра́вы ѿ землѝ ї҆ѹ́дины.

⁷Въ тре́тїе же лѣ́то ца́рства своегѡ̀ посла̀ нача́лники своѧ҄ и҆ сынѡ́въ си́льныхъ а҆вді́ю и҆ заха́рїю, и҆ наѳанаи́ла и҆ мїхе́а, да ѹ҆ча́тъ во градѣ́хъ ї҆ѹ́диныхъ:

⁸и҆ съ ни́ми леѵі́ти саме́а и҆ наѳані́а, и҆ завді́а и҆ а҆сїи́лъ, и҆ семїрамѡ́ѳъ и҆ ї҆ѡнаѳа́нъ, и҆ а҆дѡні́а и҆ тѡві́а и҆ тѡвадѡні́а леѵі́ти, и҆ съ ни́ми є҆лїсама̀ и҆ ї҆ѡра́мъ жерцы̀:

⁹ѹ҆чахѹ же во ї҆ѹде́и, и҆мѣ́юще кни́гѹ зако́на гд҇нѧ, и҆ прохожда́хѹ гра́ды ї҆ѹ҄дины и҆ ѹ҆чахѹ лю́ди.

¹⁰И҆ бы́сть стра́хъ гд҇ень на всѣ́хъ ца́рствахъ земны́хъ ѡ҆́крестъ ї҆ѹ́ды, и҆ не воева́ша проти́вѹ ї҆ѡсафа́та.

¹¹И҆ ѿ и҆ноплемє́нникъ ї҆ѡсафа́тѹ да́ры приноша́хѹ сребро̀ и҆ да҄ни: а҆ра́ви же привожда́хѹ є҆мѹ̀ ѻ҆внѡ́въ ѻ҆́вчихъ се́дмь ты́сѧщъ и҆ се́дмь сѡ́тъ, и҆ козлѡ́въ се́дмь ты́сѧщъ се́дмь сѡ́тъ.

¹²И҆ бѣ̀ ї҆ѡсафа́тъ пред̾ѹспѣва́ѧ вели́къ въ высотѹ̀ и҆ созда̀ во ї҆ѹде́и до́мы и҆ гра́ды крѣ҄пки.

¹³И҆ мнѡ́га дѣ́ла бы́ша є҆мѹ̀ во ї҆ѹде́и: и҆ мѹ́жїе ра́тницы крѣ́пцы си́льнїи во ї҆ер҇ли́мѣ.

¹⁴И҆ сїѐ число̀ и҆́хъ по домѡ́мъ ѻ҆те́чествъ и҆́хъ: и҆ во ї҆ѹ́дѣ тысѧщенача́лницы є҆дна́съ во́ждь и҆ съ ни́мъ сы́нове си́льнїи си́лы три́ста ты́сѧщъ:

¹⁵и҆ по не́мъ ї҆ѡана́нъ нача́лникъ и҆ съ ни́мъ двѣ́сти ѻ҆́смьдесѧтъ ты́сѧщъ:

¹⁶по не́мже а҆масі́а, сы́нъ заха́рїинъ, ѹ҆се́рдсвѹѧй гд҇ѹ и҆ съ ни́мъ двѣ́сти ты́сѧщъ мѹже́й си́льныхъ.

¹⁷И҆ ѿ венїамі́нѧ си́льнїи си́лы є҆лїа́дъ, и҆ съ ни́мъ держа́щихъ лѹ́къ и҆ щиты̀ двѣ́сти ты́сѧщъ си́льныхъ:

¹⁸и҆ по не́мъ ї҆ѡзава́дъ, и҆ съ ни́мъ сто̀ ѻ҆́смьдесѧтъ ты́сѧщъ, си́льнїи ко бра́ни.

¹⁹Сі́и слѹжа́щїи царю̀, кромѣ̀ ѻ҆́ныхъ, и҆̀хже поста́ви ца́рь по градѡ́мъ крѣ҄пкимъ во все́й ї҆ѹде́и.