Read Библия Церковнославянская в҃ паралипоме́нѡнъ 18 Bible Online

в҃ паралипоме́нѡнъ 18 - Библия Церковнославянская bible

в҃ паралипоме́нѡнъ 18

¹И҆ бы́сть ї҆ѡсафа́тѹ бога́тство и҆ сла́ва мно́га, и҆ поѧ́тъ женѹ̀ въ домѹ̀ а҆хаа́вли.

²И҆ сни́де при концы̀ лѣ́тъ ко а҆хаа́вѹ въ самарі́ю: и҆ закла̀ є҆мѹ̀ а҆хаа́въ ѻ҆вны̀ и҆ волы̀ мнѡ́ги, и҆ лю́демъ сѹ́щымъ съ ни́мъ, и҆ ѹ҆вѣщава́ше є҆го̀, да сни́детъ съ ни́мъ въ рамѡ́ѳъ галаа́дскїй.

³И҆ речѐ а҆хаа́въ ца́рь ї҆и҃левъ ко ї҆ѡсафа́тѹ царю̀ ї҆ѹ́динѹ: по́йдеши ли со мно́ю въ рамѡ́ѳъ галаа́дскїй; И҆ речѐ є҆мѹ̀: ѩ҆́коже а҆́зъ, та́кѡ и҆ ты̀: и҆ ѩ҆́коже лю́дїе твоѝ, та́кѡ и҆ лю́дїе моѝ съ тобо́ю на бра́нь.

⁴И҆ речѐ ї҆ѡсафа́тъ царю̀ ї҆и҃левѹ: вопросѝ ѹ҆̀бо дне́сь гд҇а.

⁵И҆ собра̀ ца́рь ї҆и҃левъ проро́кѡвъ четы́реста мѹже́й и҆ речѐ къ ни҄мъ: пойдѹ́ ли въ рамѡ́ѳъ галаа́дскїй на бра́нь, и҆лѝ ѹ҆держѹ́сѧ; И҆ рѣ́ша: взы́ди, и҆ преда́стъ бг҃ъ въ рѹ́кѹ царе́вѹ.

⁶Рече́ же ї҆ѡсафа́тъ: нѣ́сть ли здѣ̀ про҇ро́ка гд҇нѧ є҆щѐ, да ѿ негѡ̀ вопро́симъ;

⁷И҆ речѐ ца́рь ї҆и҃левъ ко ї҆ѡсафа́тѹ: є҆́сть є҆щѐ мѹ́жъ є҆ди́нъ, и҆́мже вопроси́ти гд҇а, но а҆́зъ ненави́ждѹ є҆го̀, поне́же не прорица́етъ мнѣ̀ во блага҄ѧ, занѐ всѝ дні́е є҆гѡ̀ во ѕла҄ѧ: се́й мїхе́а сы́нъ ї҆емвли́нъ . Рече́ же ї҆ѡсафа́тъ: не глаго́ли, царю̀ та́кѡ.

⁸И҆ призва̀ ца́рь ї҆и҃левъ є҆ди́наго ѿ є҆ѵнѹ҄хъ и҆ речѐ є҆мѹ̀: (призовѝ) ско́рѡ мїхе́ю сы́на ї҆емвли́на.

⁹Ца́рь же ї҆и҃левъ и҆ ї҆ѡсафа́тъ ца́рь ї҆ѹ́динъ кі́йждо сѣдѧ́ше на престо́лѣ свое́мъ, и҆ ѡ҆блечє́на красото́ю ца́рскою, сѣдѧ́ста же на простра́нствѣ бли́з̾ вра́тъ самарі́йскїхъ, и҆ всѝ проро́цы проро́чествовахѹ пред̾ ни́ма.

¹⁰И҆ сотворѝ себѣ̀ седекі́а сы́нъ ханаа́нь ро́ги желѣ҄зны и҆ речѐ: сїѧ҄ гл҃етъ гд҇ь: си́ми и́збоде́ши сѷрі́ю, до́ндеже сконча́етсѧ.

¹¹И҆ всѝ проро́цы прорица́хѹ та́кѡ, глаго́люще: взы́ди въ рамѡ́ѳъ галаа́дскїй и҆ пред̾ѹспѣ́еши, и҆ преда́стъ гд҇ь въ рѹ́кѹ царе́вѹ.

¹²Вѣ́стникъ же, ше́дый призва́ти мїхе́ю, речѐ є҆мѹ̀: сѐ, реко́ша проро́цы є҆ди́нѣми ѹ҆́сты҄ блага҄ѧ ѡ҆ царѝ да бѹ́дѹтъ ѹ҆̀бо и҆ твоѧ҄ словеса̀, ѩ҆́коже є҆ди́нагѡ ѿ ни́хъ, и҆ да рече́ши блага҄ѧ.

¹³И҆ ѿвѣща̀ мїхе́а: жи́въ гд҇ь, ѩ҆́кѡ є҆́же а҆́ще рече́тъ бг҃ъ ко мнѣ̀, сїѐ возглаго́лю.

¹⁴И҆ прїи́де ко царю̀, и҆ речѐ є҆мѹ̀ ца́рь: мїхе́е, и҆́мамъ ли и҆тѝ рамѡ́ѳъ галаа́дскїй на бра́нь, и҆лѝ ѹ҆держѹ́сѧ; И҆ ѿвѣща̀: взы́ди и҆ пред̾ѹспѣ́еши, и҆ предадѹ́тсѧ (вразѝ) въ рѹ́ки ва́шѧ.

¹⁵И҆ речѐ є҆мѹ̀ ца́рь: коли́кѡ кра́тъ заклина́ю тѧ̀, да не глаго́леши мнѣ̀, то́кмѡ и҆́стинѹ во и҆́мѧ гд҇не.

¹⁶И҆ речѐ мїхе́а: ви́дѣхъ всего̀ ї҆и҃лѧ расточе́на по гора́мъ ѩ҆́кѡ ѻ҆́вцы, и҆̀мже нѣ́сть па́стырѧ: и҆ речѐ гд҇ь: не и҆́мѹтъ сі́и вожда̀, да возвратѧ́тсѧ кі́йждо въ до́мъ сво́й въ ми́рѣ.

¹⁷И҆ речѐ ца́рь ї҆и҃левъ ко ї҆ѡсафа́тѹ: не рѣ́хъ ли тебѣ̀, ѩ҆́кѡ не прорица́етъ ѡ҆ мнѣ̀ блага҄ѧ, но то́кмѡ ѕла҄ѧ;

¹⁸И҆ речѐ мїхе́а: не та́кѡ: слы́шите сло́во гд҇не: ви́дѣхъ гд҇а сѣдѧ́ща на пр҇то́лѣ свое́мъ, и҆ всѧ̀ си́ла нб҇наѧ предстоѧ́ше ѡ҆деснѹ́ю є҆гѡ̀ и҆ ѡ҆шѹ́юю є҆гѡ̀:

¹⁹и҆ речѐ гд҇ь: кто̀ прельсти́тъ а҆хаа́ва царѧ̀ ї҆и҃лева, да взы́детъ и҆ паде́тъ въ рамѡ́ѳѣ галаа́дстѣмъ; и҆ глаго́лаше є҆ди́нъ та́кѡ, и҆ и҆́нъ речѐ та́кѡ:

²⁰и҆ и҆зы́де дѹ́хъ, и҆ ста̀ пред̾ гд҇емъ, и҆ речѐ: а҆́зъ прельщѹ̀ є҆го̀: є҆мѹ́же гд҇ь, въ че́мъ, речѐ, (прельсти́ши);

²¹и҆ речѐ: и҆зы́дѹ и҆ бѹ́дѹ дѹ́хъ лжи́въ во ѹ҆стѣ́хъ всѣ́хъ проро́кѡвъ є҆гѡ̀: рече́ же (гд҇ь): прельсти́ши и҆ превозмо́жеши, и҆зы́ди и҆ сотворѝ та́кѡ:

²²и҆ нн҃ѣ сѐ, гд҇ь дадѐ дѹ́ха лжи́ва во ѹ҆ста̀ всѣ҄мъ проро́кѡмъ твои҄мъ си҄мъ, и҆ гд҇ь гл҃а ѡ҆ тебѣ̀ ѕла҄ѧ.

²³И҆ пристѹпѝ седекі́а сы́нъ ханаа́нь, и҆ ѹ҆да́ри мїхе́ю въ лани́тѹ и҆ речѐ є҆мѹ̀: ко́имъ пѹте́мъ про́йде дх҃ъ гд҇ень ѿ менє̀, є҆́же глаго́лати къ тебѣ̀;

²⁴Рече́ же мїхе́а: сѐ, ѹ҆́зриши въ де́нь то́й, є҆гда̀ вни́деши въ ло́жницѹ и҆з̾ ло́жницы, да ѹ҆кры́ешисѧ.

²⁵И҆ речѐ ца́рь ї҆и҃левъ: возми́те мїхе́ю, и҆ ѿведи́те ко є҆мми́рѹ нача́лникѹ гра́да и҆ ко ї҆ѡа́сѹ кнѧ́зю сы́нѹ царе́вѹ,

²⁶и҆ рцы́те: сїѧ҄ глаго́летъ ца́рь: вве́рзите сего̀ въ темни́цѹ, и҆ да ѩ҆́стъ хлѣ́бъ печа́ли и҆ во́дѹ печа́ли, до́ндеже возвращѹ́сѧ въ ми́рѣ.

²⁷Рече́ же мїхе́а: а҆́ще возвраща́ѧсѧ возврати́шисѧ въ ми́рѣ, не гл҃а гд҇ь мно́ю. И҆ речѐ: слы́шите, всѝ лю́дїе.

²⁸И҆ взы́де ца́рь ї҆и҃левъ и҆ ї҆ѡсафа́тъ ца́рь ї҆ѹ́динъ въ рамѡ́ѳъ галаа́дскїй.

²⁹Рече́ же ца́рь ї҆и҃левъ ко ї҆ѡсафа́тѹ: прикры́юсѧ и҆ вни́дѹ во бра́нь, ты̀ же ѡ҆блецы́сѧ въ ри҄зы моѧ҄. И҆ прикры́сѧ ца́рь ї҆и҃левъ и҆ вни́де во бра́нь.

³⁰Ца́рь же сѵ́рскїй повелѣ̀ вождє́мъ колесни́цъ свои́хъ, глаго́лѧ: не ѹ҆стремлѧ́йтесѧ на ма́ла и҆ на вели́ка, но то́кмѡ на самаго̀ царѧ̀ ї҆и҃лева.

³¹И҆ бы́сть є҆гда̀ ѹ҆ви́дѣша нача҄лницы колесни́цъ ї҆ѡсафа́та, глаго́лаша: ца́рь ї҆и҃левъ є҆́сть се́й. И҆ ѡ҆быдо́ша є҆го̀ вою́юще. Ї҆ѡсафа́тъ же возопѝ ко гд҇ѹ, и҆ гд҇ь послѹ́ша є҆го̀, и҆ ѿвратѝ и҆̀хъ бг҃ъ ѿ негѡ̀.

³²И҆ бы́сть є҆гда̀ ѹ҆ви́дѣша воевѡ́ды колесни́цъ, ѩ҆́кѡ не бѧ́ше ца́рь ї҆и҃левъ, ѡ҆ста́виша є҆го̀.

³³И҆ мѹ́жъ налѧчѐ лѹ́къ примѣ́тнѡ и҆ поразѝ царѧ̀ ї҆и҃лева междѹ̀ ле́гкимъ и҆ пе́рсѧми. И҆ речѐ воза́таю своемѹ̀: ѡ҆братѝ рѹ́кѹ твою̀ и҆ и҆зведѝ мѧ̀ ѿ бра́ни ѩ҆́кѡ и҆знемого́хъ.

³⁴И҆ сконча́на бы́сть бра́нь въ де́нь то́й, и҆ ца́рь ї҆и҃левъ бѣ̀ стоѧ̀ на колесни́цѣ свое́й проти́вѹ сѷрі́ѡмъ да́же до ве́чера, и҆ ѹ҆́мре заходѧ́щѹ со́лнцѹ.