Read Библия Церковнославянская в҃ паралипоме́нѡнъ 22 Bible Online

в҃ паралипоме́нѡнъ 22 - Библия Церковнославянская bible

в҃ паралипоме́нѡнъ 22

¹Поста́виша же царе́мъ ѡ҆бита́ющїи во ї҆ер҇ли́мѣ ѻ҆хозі́ю сы́на є҆гѡ̀ ме́ншаго вмѣ́стѡ є҆гѡ̀: всѣ́хъ бо ста́ршихъ и҆зби́ша наше́дшїи на ни́хъ разбо́йницы а҆ра́ви и҆ а҆лїмазо́нѧне, и҆ воцари́сѧ ѻ҆хозі́а сы́нъ ї҆ѡра́мовъ ца́рь ї҆ѹ́динъ:

²два́десѧти двѹ̀ лѣ́тъ сы́й ѻ҆хозі́а ца́рствовати нача̀, и҆ є҆ди́но лѣ́то ца́рствова во ї҆ер҇ли́мѣ. И҆ и҆́мѧ ма́тери є҆гѡ̀ гоѳолі́а дщѝ а҆мврі́ина.

³И҆ се́й ходи́лъ є҆́сть по пѹтѝ до́мѹ а҆хаа́влѧ, ма́ти бо є҆гѡ̀ бѣ̀ совѣ́тница, да грѣши́тъ:

⁴и҆ сотворѝ лѹка́вое пред̾ гд҇емъ ѩ҆́коже до́мъ а҆хаа́вовъ, сі́и бо бы́ша є҆мѹ̀ совѣ҄тницы по сме́рти ѻ҆тца̀ є҆гѡ̀, въ погѹбле́нїе є҆мѹ̀,

⁵и҆ въ совѣ́тѣхъ и҆́хъ хожда́ше: и҆ по́йде со ї҆ѡра́момъ сы́номъ а҆хаа́ва царѧ̀ ї҆и҃лева на бра́нь проти́вѹ а҆заи́ла царѧ̀ сѵ́рска въ рамѡ́ѳъ галаа́дскїй. И҆ порази́ша стрѣлцы̀ ї҆ѡра́ма.

⁶И҆ возврати́сѧ ї҆ѡра́мъ и҆зцѣли́тисѧ во ї҆езрае́ль ѿ ра́нъ, и҆́миже ра́ниша є҆го̀ сѵ́рѧне въ рамѡ́ѳѣ, внегда̀ бра́тисѧ є҆мѹ̀ со а҆заи́лемъ царе́мъ сѵ́рскимъ. Ѻ҆хозі́а же сы́нъ ї҆ѡра́мль ца́рь ї҆ѹ́динъ сни́де посѣти́ти ї҆ѡра́ма сы́на а҆хаа́влѧ во ї҆езрае́ль, разболѣ́сѧ бо.

⁷И҆ ѿ бг҃а бы́сть превраще́нїе ѻ҆хозі́и, да прїи́детъ ко ї҆ѡра́мѹ: и҆ внегда̀ прїитѝ є҆мѹ̀, и҆зы́де съ ни́мъ ї҆ѡра́мъ проти́вѹ ї҆иѹ́а сы́на намессі́ина, є҆го́же пома́за гд҇ь на до́мъ а҆хаа́вль.

⁸И҆ бы́сть є҆гда̀ ѿмстѝ ї҆иѹ́й до́мѹ а҆хаа́влю, и҆ ѡ҆брѣ́те нача́лники ї҆ѹ҄дины и҆ бра́тїю ѻ҆хозі́инѹ, слѹжа́щихъ ѻ҆хозі́и, и҆ ѹ҆бѝ и҆̀хъ: и҆ ѹ҆бѝ ї҆иѹ́й ї҆ѡра́ма, и҆ ѹ҆бѣжа̀ ѻ҆хозі́а.

⁹И҆ речѐ ї҆иѹ́й, є҆́же взыска́ти ѻ҆хозі́ю: и҆ ѩ҆́ша є҆го̀ врачѹ́ющасѧ въ самарі́и и҆ приведо́ша є҆го̀ ко ї҆иѹ́еви, и҆ ѹ҆бѝ є҆го̀, и҆ погребо́ша є҆го̀: рѣ́ша бо, ѩ҆́кѡ сы́нъ ї҆ѡсафа́товъ є҆́сть, и҆́же взыска̀ гд҇а всѣ́мъ се́рдцемъ свои́мъ. И҆ не бы́сть въ домѹ̀ ѻ҆хозі́инѣ воспрїѧ́ти си́лѹ ѡ҆ ца́рствѣ.

¹⁰И҆ гоѳолі́а ма́ти ѻ҆хозі́ина ви́дѣ, ѩ҆́кѡ ѹ҆́мре сы́нъ є҆ѧ̀, и҆ воста̀ и҆ погѹбѝ всѐ сѣ́мѧ ца́рское въ домѹ̀ ї҆ѹ́динѣ.

¹¹И҆ взѧ̀ ї҆ѡсавее́ѳъ дщѝ царе́ва ї҆ѡа́са сы́на ѻ҆хозі́ина, и҆ ѹ҆крадѐ є҆го̀ ѿ среды̀ сынѡ́въ царе́выхъ, є҆гда̀ ѹ҆бива́хѹ и҆̀хъ, и҆ дадѐ є҆го̀ и҆ корми́лицѹ є҆гѡ̀ въ хра́минѹ посте́льнюю, и҆ скры̀ є҆го̀ ї҆ѡсавее́ѳъ дще́рь царѧ̀ ї҆ѡра́ма, сестра̀ ѻ҆хозі́ина, жена̀ ї҆ѡда́а а҆рхїере́а, и҆ скры̀ є҆го̀ ѿ лица̀ гоѳолі́ина, и҆ не ѹ҆бѝ є҆гѡ̀.

¹²И҆ бы́сть съ ни́ми въ домѹ̀ бж҃їи сокры́тъ ше́сть лѣ́тъ, и҆ ца́рствова гоѳолі́а на землѝ.