Read Библия Церковнославянская в҃ паралипоме́нѡнъ 24 Bible Online

в҃ паралипоме́нѡнъ 24 - Библия Церковнославянская bible

в҃ паралипоме́нѡнъ 24

¹Седмѝ лѣ́тъ бѣ̀ ї҆ѡа́съ, є҆гда̀ ца́рствовати нача̀, и҆ четы́редесѧть лѣ́тъ ца́рствова во ї҆ер҇ли́мѣ. И҆́мѧ же ма́тери є҆гѡ̀ саві́а ѿ вирсаве́и.

²Сотворѝ же ї҆ѡа́съ ѹ҆го́дное пред̾ гд҇емъ во всѧ҄ дни҄ ї҆ѡда́а свѧще́нника.

³И҆ поѧ́тъ є҆мѹ̀ ї҆ѡда́й жєны̀ двѣ̀, и҆ роди́ша сы́ны и҆ дщє́ри.

⁴И҆ бы́сть по си́хъ, и҆ взы́де на се́рдце ї҆ѡа́сѹ, да вознови́тъ до́мъ гд҇ень.

⁵И҆ собра̀ свѧще́нники и҆ леѵі́ты и҆ речѐ и҆̀мъ: и҆ди́те во гра́ды ї҆ѹ҄дины, и҆ собери́те ѿ всегѡ̀ ї҆и҃лѧ сребро̀ ко ѡ҆бновле́нїю хра́ма гд҇нѧ ѿ лѣ́та до лѣ́та, и҆ поспѣ́шнѡ сотвори́те. Леѵі́ти же не потща́шасѧ.

⁶И҆ призва̀ ца́рь ї҆ѡа́съ ї҆ѡда́а нача́лника и҆ речѐ є҆мѹ̀: почто̀ не надсматрѧ́лъ є҆сѝ леѵі́тѡвъ, є҆́же принестѝ ѿ ї҆ѹ́ды и҆ ѿ ї҆ер҇ли́ма, є҆́же ѹ҆ста́влено є҆́сть ѿ мѡѷсе́а человѣ́ка бж҃їѧ, є҆гда̀ собра̀ ї҆и҃лѧ въ ски́нїю свидѣ́нїѧ;

⁷Гоѳолі́а бо бѣ̀ нечести́ва, и҆ сы́нове є҆ѧ̀ разори́ша до́мъ бж҃їй, ѩ҆́кѡ ст҃а҄ѧ до́мѹ гд҇нѧ сотвори́ша ваалі́мѹ.

⁸И҆ повелѣ̀ ца́рь, да сотворѧ́тъ ковче́жецъ и҆ поста́вѧтъ при вратѣ́хъ гд҇нихъ и҆звнѣ̀,

⁹и҆ да проповѣ́дѧтъ во ї҆ѹде́и и҆ во ї҆ер҇ли́мѣ, приноси́ти гд҇ѹ, ѩ҆́коже ѹ҆ста́ви мѡѷсе́й ра́бъ бж҃їй над̾ ї҆и҃лемъ въ пѹсты́ни.

¹⁰И҆ да́ша всѝ нача҄лницы и҆ всѝ лю́дїе, и҆ вноша́хѹ и҆ влага́хѹ въ ковче́жецъ, до́ндеже напо́лнисѧ.

¹¹И҆ бы́сть є҆гда̀ приноша́хѹ ковче́жецъ къ настоѧ́телємъ царє́вымъ рѹка́ми леѵі́тскими, и҆ є҆гда̀ ѹ҆ви́дѣша, ѩ҆́кѡ ѹ҆мно́жисѧ сребро̀, и҆ прихожда́ше пи́сарь царе́въ и҆ настоѧ́тель вели́кагѡ жерца̀, и҆ выбира́хѹ и҆з̾ ковче́жца, и҆ (па́ки) поставлѧ́хѹ на мѣ́сто є҆гѡ̀: та́кѡ творѧ́хѹ ѿ днѐ до днѐ, и҆ собра́ша сребра̀ мно́гѡ.

¹²И҆ вдадѐ є҆̀ ца́рь и҆ ї҆ѡда́й жре́цъ творѧ́щымъ дѣла̀ на дѣ́ло до́мѹ гд҇нѧ: и҆ наима́хѹ каменосѣ́чцы и҆ древодѣ҄ли, да ѹ҆строѧ́ютъ до́мъ гд҇ень, и҆ ковачы̀ желѣ́зѹ и҆ мѣ́ди, да ѹ҆крѣпѧ́тъ до́мъ гд҇ень.

¹³И҆ творѧ́хѹ творѧ́щїи дѣла̀, и҆ взы́де долгота̀ дѣ́лъ рѹка́ми и҆́хъ, и҆ возста́виша до́мъ гд҇ень въ состоѧ́нїе (пре́жнее) є҆гѡ̀, и҆ ѹ҆крѣпи́ша.

¹⁴Е҆гда́ же соверши́ша, принесо́ша ко царю̀ и҆ ко ї҆ѡда́ю ѡ҆ста́нокъ сребра̀, и҆з̾ негѡ́же сотвори́ша сосѹ́ды въ до́мъ гд҇ень, сосѹ́ды въ слѹже́нїе всесожже́нїй, и҆ кади҄лницы златы҄ѧ и҆ срє́брѧныѧ, и҆ приноша́хѹ всесожжє́нїѧ въ домѹ̀ гд҇ни непреста́ннѡ, во всѧ҄ дни҄ ї҆ѡда́євы.

¹⁵И҆ состарѣ́сѧ ї҆ѡда́й и҆спо́лненъ дні́й, и҆ ѹ҆́мре сы́й ста̀ три́десѧти лѣ́тъ внегда̀ сконча́тисѧ є҆мѹ̀:

¹⁶и҆ погребо́ша є҆го̀ во гра́дѣ даві́довѣ со цармѝ, поне́же сотворѝ благо́е со ї҆и҃лемъ и҆ съ бг҃омъ и҆ съ до́момъ є҆гѡ̀.

¹⁷И҆ бы́сть по сконча́нїи ї҆ѡда́евѣ, внидо́ша нача҄лницы ї҆ѹ҄дины и҆ поклони́шасѧ царю̀: тогда̀ послѹ́ша и҆̀хъ ца́рь.

¹⁸И҆ ѡ҆ста́виша це́рковь гд҇а бг҃а ѻ҆тє́цъ свои́хъ и҆ слѹжа́хѹ а҆ста́ртѣ и҆ и҆стѹка҄ннымъ: и҆ бы́сть гнѣ́въ (гд҇ень) на ї҆ѹ́дѹ и҆ ї҆ер҇ли́мъ въ де́нь то́й.

¹⁹И҆ посла̀ къ ни҄мъ про҇ро́ки, да ѡ҆братѧ́тсѧ ко гд҇ѹ, и҆ не послѹ́шаша: и҆ засвидѣ́телствова и҆̀мъ, и҆ не покори́шасѧ.

²⁰И҆ дх҃ъ бж҃їй ѡ҆блечѐ а҆за́рїю свѧще́нника сы́на ї҆ѡда́ева, и҆ ста̀ пред̾ людьмѝ и҆ речѐ и҆̀мъ: сїѧ҄ гл҃етъ гд҇ь: почто̀ престѹпа́ете повелѣ҄нїѧ гд҇нѧ; не поспѣши́тсѧ ва́мъ, ѩ҆́кѡ ѡ҆ста́висте гд҇а, и҆ ѡ҆ста́витъ ва́съ.

²¹И҆ нападо́ша на него̀ и҆ поби́ша и҆̀ ка́менїемъ по повелѣ́нїю ї҆ѡа́са царѧ̀, во дворѣ̀ до́мѹ гд҇нѧ.

²²И҆ не воспомѧнѹ̀ ї҆ѡа́съ ца́рь милосе́рдїѧ, є҆́же сотворѝ ї҆ѡда́й ѻ҆те́цъ є҆гѡ̀ съ ни́мъ, но ѹ҆бѝ сы́на є҆гѡ̀: и҆́же, є҆гда̀ ѹ҆мира́ше, речѐ: да ви́дитъ и҆ сѹ́дитъ гд҇ь.

²³И҆ бы́сть по сконча́нїи лѣ́та, воста̀ на него̀ си́ла сѵ́рскаѧ, и҆ прїи́де на ї҆ѹ́дѹ и҆ на ї҆ер҇ли́мъ, и҆ ѹ҆би́ша всѧ҄ нача́лники въ лю́дехъ въ це́ркви, и҆ ве́сь плѣ́нъ и҆́хъ посла́ша ко царю̀ въ дама́скъ:

²⁴занѐ въ ма́лыхъ мѹже́хъ прїи́де си́ла сѵ́рскаѧ, и҆ бг҃ъ предадѐ въ рѹ́цѣ и҆́хъ си́лѹ мно́гѹ ѕѣлѡ̀, занѐ ѡ҆ста́виша гд҇а бг҃а ѻ҆тє́цъ свои́хъ: и҆ на ї҆ѡа́са сотворѝ сѹ́дъ.

²⁵И҆ по ѿше́ствїи и҆́хъ ѿ негѡ̀, ѡ҆ста́вленѹ є҆мѹ̀ сѹ́щѹ въ болѣ́знехъ вели́кихъ, и҆ нападо́ша на него̀ рабѝ є҆гѡ̀ за кро́вь свѧще́нника сы́на ї҆ѡда́ева, и҆ ѹ҆би́ша є҆го̀ на посте́ли є҆гѡ̀, и҆ ѹ҆́мре: и҆ погребо́ша є҆го̀ во гра́дѣ даві́довѣ, но не погребо́ша є҆гѡ̀ во гробѣ́хъ ца́рскихъ.

²⁶Напа́дшїи же на него̀, заве́дъ сы́нъ семаа́ѳовъ а҆ммані́тѧнинъ и҆ ї҆ѡзаве́дъ сы́нъ самарі́ѳовъ мѡаві́тѧнинъ,

²⁷и҆ сы́нове є҆гѡ̀ всѝ, и҆ пристѹпи́ша къ немѹ̀ пѧ́ть. И҆ прѡ́чаѧ слове́съ є҆гѡ̀, сѐ, напи҄сана въ лѣтопи́сцѣ ца́рстѣмъ. И҆ воцари́сѧ а҆масі́а сы́нъ є҆гѡ̀ вмѣ́стѡ є҆гѡ̀.