Read Библия Церковнославянская в҃ паралипоме́нѡнъ 25 Bible Online

в҃ паралипоме́нѡнъ 25 - Библия Церковнославянская bible

в҃ паралипоме́нѡнъ 25

¹Два́десѧти пѧтѝ лѣ́тъ бы́сть а҆масі́а, є҆гда̀ ца́рствовати нача̀, и҆ два́десѧть де́вѧть лѣ́тъ ца́рствова во ї҆ер҇ли́мѣ. И҆́мѧ же ма́тери є҆гѡ̀ ї҆ѡада́ень ѿ ї҆ер҇ли́ма.

²И҆ сотворѝ пра́вое пред̾ гд҇емъ, ѻ҆ба́че не се́рдцемъ соверше́ннымъ.

³И҆ бы́сть є҆гда̀ ѹ҆тверди́сѧ ца́рство въ рѹцѣ̀ є҆гѡ̀, и҆ ѹ҆мертвѝ рабы҄ своѧ҄ и҆̀же ѹ҆би́ша царѧ̀ ѻ҆тца̀ є҆гѡ̀.

⁴Сынѡ́въ же и҆́хъ не и҆збѝ по за́повѣдемъ зако́на гд҇нѧ, ѩ҆́коже пи́сано є҆́сть въ кни́зѣ зако́на мѡѷсе́ова, ѩ҆́коже повелѣ̀ гд҇ь, гл҃ѧ: не ѹ҆́мрѹтъ ѻ҆тцы̀ за сы́ны, и҆ сы́нове не ѹ҆́мрѹтъ за ѻ҆тцы̀, но кі́йждо во грѣсѣ̀ свое́мъ ѹ҆́мретъ.

⁵И҆ собра̀ а҆масі́а до́мъ ї҆ѹ́динъ, и҆ поста́ви и҆̀хъ по домѡ́мъ ѻ҆те́чествъ и҆́хъ въ ты́сѧщники и҆ со́тники, во все́й ї҆ѹде́и и҆ венїамі́нѣ: и҆ сочтѐ и҆̀хъ ѿ два́десѧти лѣ́тъ и҆ вы́шше, и҆ ѡ҆брѣ́те и҆̀хъ три́ста ты́сѧщъ си́льныхъ и҆сходи́ти на бра́нь, держа́щихъ ко́пїѧ и҆ щиты̀.

⁶Е҆ще́ же наѧ̀ ѿ ї҆и҃лѧ сто̀ ты́сѧщъ хра́брыхъ въ си́лѣ, за сто̀ тала҄нтъ сребра̀.

⁷И҆ прїи́де человѣ́къ бж҃їй къ немѹ̀, глаго́лѧ: Ѽ, царю̀ да не и҆зы́детъ съ тобо́ю си́ла ї҆и҃лева, нѣ́сть бо гд҇ь со ї҆и҃лемъ, со всѣ́ми сыны̀ є҆фрє́мли:

⁸ѩ҆́кѡ а҆́ще мни́ши ѹ҆крѣпи́тисѧ съ ни́ми, въ бѣ́гство ѡ҆брати́тъ тѧ̀ гд҇ь пред̾ враги҄, занѐ ѿ гд҇а є҆́сть ѹ҆крѣпи́тисѧ и҆ въ бѣ́гство ѡ҆брати́тисѧ.

⁹Рече́ же а҆масі́а къ человѣ́кѹ бж҃їю: и҆ что̀ сотворю̀ ѡ҆ стѣ̀ тала́нтахъ, ѩ҆̀же да́хъ си́лѣ ї҆и҃левѣ; И҆ речѐ человѣ́къ бж҃їй: и҆́мать гд҇ь да́ти тебѣ̀ мно́жае си́хъ.

¹⁰И҆ ѿлѹчѝ а҆масі́а си́лѹ прише́дшѹю къ немѹ̀ ѿ є҆фре́ма, ѿитѝ на мѣ́сто своѐ. И҆ разгнѣ́вашасѧ ѕѣлѡ̀ на ї҆ѹ́дѹ, и҆ возврати́шасѧ во странѹ̀ свою̀ во гнѣ́вѣ ѩ҆́рости.

¹¹И҆ а҆масі́а ѹ҆крѣпи́сѧ, и҆ взѧ̀ лю́ди своѧ҄ и҆ и҆́де во ѹ҆до́ль сла́нѹю, и҆ поразѝ та́мѡ сынѡ́въ сиі́ръ де́сѧть ты́сѧщъ.

¹²И҆ де́сѧть ты́сѧщъ живы́хъ ѩ҆́ша сы́нове ї҆ѹ҄дины, и҆ приведо́ша и҆̀хъ на ве́рхъ нѣ́которыѧ стремни́ны, и҆ сверго́ша и҆̀хъ стремгла́въ съ высоты̀ стремни́ны, и҆ всѝ разсѣдо́шасѧ.

¹³Сы́нове же си́лы, и҆̀хже ѿсла̀ а҆масі́а, да не и҆́дѹтъ съ ни́мъ на бра́нь, нападо́ша на гра́ды ї҆ѹ҄дины ѿ самарі́и да́же до веѳѡрѡ́на: и҆ ѹ҆би́ша ѿ ни́хъ трѝ ты́сѧщы, и҆ плѣни́ша плѣ́нъ мно́гъ.

¹⁴И҆ бы́сть є҆гда̀ возврати́сѧ а҆масі́а порази́въ ї҆дѹме́ю, и҆ принесѐ себѣ̀ богѡ́въ сынѡ́въ сиі́ръ, и҆ поста́ви въ бо́ги себѣ̀, и҆ покланѧ́шесѧ и҆̀мъ и҆ са́мъ кадѧ́ше и҆̀мъ.

¹⁵И҆ бы́сть гнѣ́въ гд҇ень на а҆масі́ю, и҆ посла̀ къ немѹ̀ про҇ро́ка, и҆ речѐ є҆мѹ̀: почто̀ взыска́лъ є҆сѝ богѡ́въ людски́хъ, и҆̀же не и҆зба́виша люді́й свои́хъ ѿ рѹкѹ̀ твоє́ю;

¹⁶И҆ бы́сть є҆гда̀ то́й глаго́лаше къ немѹ̀, и҆ ѿвѣща̀ є҆мѹ̀: є҆да̀ совѣ́тника царе́ва поста́вихъ тѧ̀; внемлѝ, да не бїе́нъ бѹ́деши. И҆ ѹ҆молча̀ про҇ро́къ и҆ речѐ: вѣ́мъ, ѩ҆́кѡ восхотѣ̀ гд҇ь потреби́ти тѧ̀, зане́же сотвори́лъ є҆сѝ сїѐ ѕло̀) и҆ не послѹ́шалъ є҆сѝ совѣ́та моегѡ̀.

¹⁷И҆ совѣща̀ а҆масі́а ца́рь ї҆ѹ́динъ, и҆ посла̀ ко ї҆ѡа́сѹ сы́нѹ ї҆ѡаха́за сы́на ї҆иѹ́ева, ко царю̀ ї҆и҃левѹ, глаго́лѧ: прїидѝ, да ѹ҆ви́димсѧ междѹ̀ собо́ю въ лицѐ.

¹⁸И҆ посла̀ ї҆ѡа́съ ца́рь ї҆и҃левъ ко а҆масі́и царю̀ ї҆ѹ́динѹ, глаго́лѧ: те́рнъ, и҆́же въ лїва́нѣ, посла̀ ко ке́дрѹ лїва́нскѹ, глаго́лѧ: да́ждь дще́рь твою̀ сы́нѹ моемѹ̀ въ женѹ̀, и҆ сѐ, прїи́дѹтъ ѕвѣ́рїе, и҆̀же въ дѹбра́вѣ лїва́нстѣй: и҆ прїидо́ша ѕвѣ́рїе и҆ потопта́ша те́рнъ:

¹⁹ре́клъ є҆сѝ: сѐ, порази́хъ ї҆дѹме́ю, и҆ воздвиза́етсѧ се́рдце твоѐ въ горды́ню: нн҃ѣ сѣдѝ въ домѹ̀ твое́мъ, и҆ почто̀ совѣщава́еши себѣ̀ лѹка́вое; паде́ши ты̀ и҆ ї҆ѹ́да съ тобо́ю.

²⁰И҆ не послѹ́ша а҆масі́а, занѐ ѿ гд҇а бы́сть, да преда́стсѧ въ рѹ́ки ї҆ѡа́сѹ, ѩ҆́кѡ взыска̀ богѡ́въ ї҆дѹме́йскихъ.

²¹И҆ взы́де ї҆ѡа́съ ца́рь ї҆и҃левъ, и҆ ѩ҆ви́стасѧ дрѹ́гъ дрѹ́гѹ, то́й и҆ а҆масі́а ца́рь ї҆ѹ́динъ, въ веѳсамѵ́сѣ, и҆́же є҆́сть ї҆ѹ́динъ.

²²И҆ падѐ ї҆ѹ́да пред̾ лице́мъ ї҆и҃левымъ, и҆ бѣжа̀ кі́йждо въ жили́ще своѐ.

²³И҆ а҆масі́ю царѧ̀ ї҆ѹ́дина сы́на ї҆ѡа́сова, сы́на ѻ҆хозі́ина, ѩ҆́тъ ї҆ѡа́съ ца́рь ї҆и҃левъ въ веѳсамѵ́сѣ, и҆ введѐ є҆го̀ во ї҆ер҇ли́мъ, и҆ разорѝ стѣ́ны ї҆ер҇ли҄мли ѿ вра́тъ є҆фре́млихъ да́же до вра́тъ ѹ҆́гла на четы́реста лакѡ́тъ:

²⁴и҆ всѐ зла́то и҆ сребро̀, и҆ всѧ҄ сосѹ́ды ѡ҆брѣ́тшыѧсѧ въ домѹ̀ гд҇ни и҆ ѹ҆ а҆вдедо́ма, и҆ сокрѡ́вища до́мѹ царе́ва, и҆ сынѡ́въ зало́га, и҆ возвратѝ въ самарі́ю.

²⁵И҆ поживѐ а҆масі́а сы́нъ ї҆ѡа́совъ, ца́рь ї҆ѹ́динъ, по ѹ҆ме́ртвїи ї҆ѡа́са сы́на ї҆ѡаха́зова царѧ̀ ї҆и҃лева пѧтьна́десѧть лѣ́тъ.

²⁶Прѡ́чаѧ же словеса̀ а҆масї҄ина пє́рваѧ и҆ послѣ҄днѧѧ, не се́ ли, пи҄сана сѹ́ть въ кни́зѣ царе́й ї҆ѹ́диныхъ и҆ ї҆и҃левыхъ;

²⁷И҆ во вре́мѧ є҆гда̀ а҆масі́а ѿстѹпѝ ѿ гд҇а, и҆ нападо́ша на него̀ нападе́нїемъ, и҆ побѣжѐ и҆з̾ ї҆ер҇ли́ма въ лахі́съ. И҆ посла́ша в̾слѣ́дъ є҆гѡ̀ въ лахі́съ, и҆ ѹ҆би́ша є҆го̀ тѹ̀.

²⁸И҆ взѧ́ша є҆го̀ на ко́нехъ и҆ погребо́ша є҆го̀ со ѻ҆тцы҄ є҆гѡ̀ во гра́дѣ даві́довѣ.