Read Библия Церковнославянская в҃ паралипоме́нѡнъ 27 Bible Online

в҃ паралипоме́нѡнъ 27 - Библия Церковнославянская bible

в҃ паралипоме́нѡнъ 27

¹Сы́нъ два́десѧти и҆ пѧтѝ лѣ́тъ бѧ́ше ї҆ѡаѳа́мъ, є҆гда̀ ца́рствовати нача̀, и҆ шестьна́десѧть лѣ́тъ ца́рствова во ї҆ер҇ли́мѣ. И҆́мѧ же ма́тере є҆гѡ̀ ї҆ерѹса̀, дщѝ садѡ́кова.

²И҆ сотворѝ пра́вое пред̾ гд҇емъ по всѣ҄мъ, ѩ҆̀же сотворѝ ѻ҆зі́а ѻ҆те́цъ є҆гѡ̀, ѻ҆ба́че не вни́де въ це́рковь гд҇ню, и҆ є҆щѐ лю́дїе согрѣша́хѹ.

³То́й созда̀ врата̀ до́мѹ гд҇нѧ высѡ́каѧ, и҆ на стѣнѣ̀ ѻ҆́фли созда̀ мнѡ́га:

⁴и҆ гра́ды созда̀ на гора́хъ ї҆ѹ́диныхъ, и҆ въ дѹбра́вѣхъ дворы̀ и҆ столпы̀.

⁵И҆ то́й ѡ҆полчи́сѧ проти́вѹ царѧ̀ сынѡ́въ а҆ммѡ́нихъ и҆ ѡ҆долѣ̀ є҆го̀: и҆ даѧ́хѹ є҆мѹ̀ сы́нове а҆ммѡ҄ни на всѧ́кое лѣ́то по стѹ̀ тала҄нтъ сребра̀ и҆ де́сѧть ты́сѧщъ кѡ́ръ (мѣ́ръ) пшени́цы и҆ де́сѧть ты́сѧщъ ѩ҆чме́нѧ: сїѧ҄ є҆мѹ̀ приноша́ше ца́рь сынѡ́въ а҆ммѡ́нихъ на лѣ́то, въ пе́рвое лѣ́то и҆ второ́е и҆ тре́тїе.

⁶И҆ ѹ҆крѣпи́сѧ ї҆ѡаѳа́мъ, ѩ҆́кѡ ѹ҆гото́ва пѹти҄ своѧ҄ пред̾ гд҇емъ бг҃омъ свои́мъ.

⁷Прѡ́чаѧ же словеса̀ ї҆ѡаѳа҄млѧ, и҆ бра́нь, и҆ дѣѧ҄нїѧ є҆гѡ̀, сѐ, пи҄сана въ кни́зѣ царе́й ї҆ѹ́диныхъ и҆ ї҆и҃левыхъ.

⁸Сы́нъ два́десѧти и҆ пѧтѝ лѣ́тъ бѧ́ше, є҆гда̀ ца́рствовати нача̀, и҆ шестьна́десѧть лѣ́тъ ца́рствова во ї҆ер҇ли́мѣ.

⁹Ѹ҆́спе же ї҆ѡаѳа́мъ со ѻ҆тцы҄ свои́ми и҆ погребе́нъ бы́сть во гра́дѣ даві́довѣ. И҆ воцари́сѧ а҆ха́зъ сы́нъ є҆гѡ̀ вмѣ́стѡ є҆гѡ̀.