Read Библия Церковнославянская в҃ паралипоме́нѡнъ 3 Bible Online

в҃ паралипоме́нѡнъ 3 - Библия Церковнославянская bible

в҃ паралипоме́нѡнъ 3

¹И҆ нача̀ соломѡ́нъ созида́ти до́мъ гд҇ень во ї҆ер҇ли́мѣ, на горѣ̀ а҆мѡрі́а, на мѣ́стѣ, є҆́же ѹ҆гото́ва даві́дъ на гѹмнѣ̀ ѻ҆́рны ї҆евѹсе́анина:

²нача́ же созида́ти въ мц҇ъ вторы́й лѣ́та четве́ртагѡ ца́рства своегѡ̀.

³И҆ си́це нача̀ соломѡ́нъ созида́ти до́мъ бж҃їй: въ долготѹ̀ лакѡ́тъ, размѣ́ръ пе́рвый, лакѡ́тъ шестьдесѧ́тъ, въ широтѹ́ же лакѡ́тъ два́десѧть:

⁴и҆ притво́ръ пред̾ лице́мъ до́мѹ, долгота̀ по лицѹ̀ широты̀ до́мѹ, лакѡ́тъ два́десѧть, высота́ же лакѡ́тъ сто̀ два́десѧть и҆ позлатѝ є҆го̀ внѹ́трь зла́томъ чи́стымъ.

⁵До́мъ же вели́кїй ѡ҆кры̀ дска́ми ке́дровыми и҆ позлатѝ зла́томъ чи́стымъ: и҆зваѧ́ же на не́мъ подѡ́бїѧ фі́нїкѡвъ и҆ ѩ҆́кѡ мрє́жицы проме́жь себє̀ сплета́ющѧсѧ,

⁶и҆ ѹ҆красѝ хра́мъ ка́менїемъ драги́мъ сла́внѡ, и҆ позлатѝ зла́томъ, є҆́же ѿ фарѹі́ма .

⁷И҆ позлатѝ до́мъ и҆ стѣ́ны є҆гѡ̀, и҆ врата̀ и҆ пра́ги, и҆ ѻ҆́кна и҆ двє́ри зла́томъ, и҆ и҆зваѧ̀ херѹві́мы на стѣна́хъ.

⁸Сотвори́ же до́мъ ст҃а҄ѧ ст҃ы́хъ, долгота̀ є҆гѡ̀ по лицѹ̀ широты̀ до́мѹ, лакѡ́тъ два́десѧть, широта̀ та́кожде два́десѧть лакѡ́тъ, и҆ позлатѝ и҆̀ зла́томъ чи́стымъ на херѹві́мѣхъ, тала҄нтъ ше́сть сѡ́тъ.

⁹И҆ вѣ́съ гвозді́й, вѣ́съ гво́здѧ є҆ди́нагѡ пѧтьдесѧ́тъ сї҄кль зла́та, и҆ го́рницѹ позлатѝ зла́томъ.

¹⁰И҆ сотворѝ въ домѹ̀ ст҃а҄ѧ ст҃ы́хъ херѹвї҄ма два̀, дѣ́ло ѿ дре́въ негнїю́шихъ и҆ позлатѝ и҆̀хъ зла́томъ.

¹¹И҆ крилѣ҄ херѹві́мѡвъ, долгота̀ два́десѧть лакѡ́тъ, и҆ є҆ди́но крило̀ лакѡ́тъ пѧтѝ, прикаса́ющеесѧ стѣнѣ̀ до́мѹ,

¹²и҆ дрѹго́е крило̀ пѧтѝ лакѡ́тъ, прикаса́ющеесѧ крилѹ̀ херѹві́ма дрѹга́гѡ:

¹³крилѣ҄ же херѹві́мѡвъ си́хъ распростє́ртѣ на лакѡ́тъ два́десѧть, ті́и же стоѧ́хѹ на но́зѣхъ свои́хъ, ли́ца же и҆́хъ (зрѧ́ще) къ до́мѹ.

¹⁴Сотвори́ же завѣ́сѹ ѿ синеты̀ и҆ багрѧни́цы, и҆ червлени́цы и҆ вѷссо́на, и҆ сотка̀ на не́й херѹві́мы.

¹⁵И҆ сотворѝ пред̾ хра́момъ стѡлпа̀ два̀, лакѡ́тъ три́десѧть пѧ́ть въ высотѹ̀, и҆ главы҄ и҆́хъ пѧ́ть лакѡ́тъ.

¹⁶И҆ сотворѝ чє́пи въ даві́рѣ и҆ положѝ на глава́хъ столпѡ́въ, и҆ ши́пкѡвъ сотворѝ сто̀, и҆̀хже положѝ на мрє́жи.

¹⁷И҆ поста́ви столпы̀ пред̾ лице́мъ хра́ма, є҆ди́наго ѡ҆деснѹ́ю, а҆ дрѹга́го ѡ҆шѹ́юю: и҆ наречѐ и҆́мѧ сѹ́щемѹ ѡ҆деснѹ́ю и҆справле́нїе, и҆́мѧ же сѹ́щемѹ ѡ҆шѹ́юю крѣ́пость.