Read Библия Церковнославянская в҃ паралипоме́нѡнъ 5 Bible Online

в҃ паралипоме́нѡнъ 5 - Библия Церковнославянская bible

в҃ паралипоме́нѡнъ 5

¹И҆ внесѐ соломѡ́нъ ст҃а҄ѧ даві́да ѻ҆тца̀ своегѡ̀, сребро̀ и҆ зла́то и҆ всѧ҄ сосѹ́ды, и҆ дадѐ въ сокро́вище до́мѹ гд҇нѧ.

²Тогда̀ собра̀ соломѡ́нъ всѧ҄ старѣ҄йшины ї҆и҃лєвы и҆ всѧ҄ нача́лники колѣ́нъ, вожды̀ ѻ҆те́чествъ сынѡ́въ ї҆и҃левыхъ во ї҆ер҇ли́мъ, да вознесѹ́тъ кївѡ́тъ завѣ́та гд҇нѧ ѿ гра́да даві́дова, и҆́же є҆́сть сїѡ́нъ.

³И҆ собра́шасѧ ко царю̀ всѝ мѹ́жїе ї҆и҃лєвы въ пра́здникъ, се́й є҆́сть мц҇ъ седмы́й.

⁴И҆ прїидо́ша всѝ старѣ҄йшины ї҆и҃лєвы, и҆ взѧ́ша всѝ леѵі́ти кївѡ́тъ

⁵и҆ внесо́ша є҆го̀ и҆ ски́нїю свидѣ́нїѧ и҆ всѧ҄ сосѹ́ды ст҃ы҄ѧ, и҆̀же въ ски́нїи, и҆ внесо́ша є҆го̀ свѧще́нницы и҆ леѵі́ти.

⁶Ца́рь же соломѡ́нъ и҆ ве́сь со́нмъ сынѡ́въ ї҆и҃левыхъ, и҆ боѧ́щїисѧ и҆ собра́нїи пред̾ кївѡ́томъ, жрѧ́хѹ телцы̀ и҆ ѻ҆́вцы безчи́слєнны и҆ несочислѧ́ємы ѿ мно́жества.

⁷И҆ внесо́ша свѧще́нницы кївѡ́тъ завѣ́та гд҇нѧ на мѣ́сто є҆гѡ̀, є҆́же є҆́сть моли́твенникъ хра́ма, во ст҃а҄ѧ ст҃ы́хъ, под̾ крилѣ҄ херѹві́мѡвъ.

⁸И҆ бѧ́хѹ херѹві́ми распросте́рше кри́ла своѧ҄ над̾ мѣ́стомъ кївѡ́та, и҆ покрыва́хѹ херѹві́ми над̾ кївѡ́томъ и҆ над̾ носи́лами є҆гѡ̀ свы́ше.

⁹И҆ дли́ннѣе бѧ́хѹ нѡси́ла, и҆ ви́дѧхѹсѧ главы҄ нѡси́лъ ѿ ст҃ы́хъ въ лицѐ моли́твенника, и҆ не ви́дѧхѹсѧ внѣ̀, и҆ бы́ша та́мѡ да́же до настоѧ́щагѡ днѐ.

¹⁰Ничто́же бѣ̀ въ кївѡ́тѣ, то́кмѡ двѣ̀ скрижа҄ли, и҆̀хже положѝ мѡѷсе́й въ хѡри́вѣ, є҆гда̀ зако́нъ дадѐ гд҇ь сынѡ́мъ ї҆и҃лєвымъ, и҆сходѧ́щымъ и҆̀мъ и҆з̾ землѝ є҆гѵ́петскїѧ.

¹¹И҆ бы́сть и҆сходѧ́щымъ свѧще́нникѡмъ ѿ ст҃ы́хъ, всѝ бо свѧще́нницы, и҆̀же тѹ̀ ѡ҆брѣто́шасѧ, ѡ҆свѧще́ни бы́ша и҆ не бѧ́хѹ расположе́ни въ дневнѹ́ю чредѹ̀,

¹²леѵі́ти же и҆ пѣвцы̀ всѝ съ сынмѝ а҆са́фовыми, со є҆ма́номъ, ї҆дїѳѹ́момъ, и҆ съ сынмѝ и҆́хъ и҆ съ бра́тїѧми и҆́хъ, ѡ҆блече́ни въ ри҄зы льнѧ҄ны, въ кѷмва́лѣхъ и҆ ѱалти́ри и҆ гѹ́слехъ (возглаша́хѹ) стоѧ́ще пред̾ ѻ҆лтаре́мъ, и҆ съ ни́ми жерцє́въ сто̀ два́десѧть трѹбѧ́ще трѹба́ми:

¹³и҆ бы́сть є҆ди́нъ гла́съ въ трѹбле́нїи и҆ въ ѱалмопѣ́нїи и҆ въ возглаше́нїи гла́сомъ є҆ди́нымъ є҆́же хвали́ти и҆ и҆сповѣ́датисѧ гд҇еви. И҆ є҆гда̀ воздвиго́ша гла́съ въ трѹба́хъ и҆ кѷмва́лѣхъ и҆ ѻ҆рга́нѣхъ пѣ́сней, и҆ глаго́лахѹ: и҆сповѣ́дайтесѧ гд҇еви, ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀: и҆ до́мъ и҆спо́лнисѧ ѡ҆́блака сла́вы гд҇ни,

¹⁴и҆ не мого́ша свѧще́нницы ста́ти слѹжи́ти ѿ лица̀ ѡ҆́блака, напо́лни бо сла́ва гд҇нѧ до́мъ бж҃їй.