Read Библия Церковнославянская в҃ паралипоме́нѡнъ 9 Bible Online

в҃ паралипоме́нѡнъ 9 - Библия Церковнославянская bible

в҃ паралипоме́нѡнъ 9

¹Цари́ца же са́вска ѹ҆слы́ша и҆́мѧ соломѡ́ново и҆ прїи́де и҆скѹси́ти є҆го̀ гада́ньми во ї҆ер҇ли́мѣ съ си́лою тѧ́жкою ѕѣлѡ̀: и҆ велблю́ды носѧ́щїи а҆рѡма́ты и҆ зла́та мно́жество и҆ ка́менїѧ драга́гѡ: и҆ прїи́де къ соломѡ́нѹ и҆ глаго́ла є҆мѹ̀ всѧ҄, є҆ли҄ка бѣ́ша въ се́рдцы є҆ѧ̀.

²И҆ возвѣстѝ є҆́й соломѡ́нъ всѧ҄ словеса̀ є҆ѧ̀, и҆ не пре́йде сло́во, є҆гѡ́же бы не возвѣсти́лъ є҆́й.

³И҆ ви́дѣ цари́ца са́вска премѹ́дрость соломѡ́ню, и҆ до́мъ є҆го́же созда̀,

⁴И҆ ѩ҆́ди столѡ́въ є҆гѡ̀, и҆ сѣда҄лища рабѡ́въ є҆гѡ̀, и҆ состоѧ́нїе слѹже́бникѡвъ є҆гѡ̀ и҆ ри҄зы и҆́хъ, и҆ вїночє́рпчїѧ є҆гѡ̀ и҆ ѹ҆краше́нїе и҆́хъ, и҆ всесожжє́нїѧ, ѩ҆̀же жрѧ́ше въ домѹ̀ гд҇ни, и҆ внѣ̀ себє̀ бы́сть.

⁵Рече́ же ко царю̀: и҆́стинно є҆́сть сло́во, є҆́же слы́шахъ въ землѝ мое́й ѡ҆ словесѣ́хъ твои́хъ и҆ ѡ҆ премѹ́дрости твое́й:

⁶и҆ не вѣ́ровахъ словесе́мъ и҆́хъ, до́ндеже прїидо́хъ, и҆ ви́дѣста ѻ҆́чи моѝ, и҆ сѐ, не возвѣсти́ша мнѣ̀ полови́ны мно́жества премѹ́дрости твоеѧ̀: приложи́лъ є҆сѝ ко слы́шанїю ѩ҆̀же слы́шахъ:

⁷блаже́ни мѹ́жїе твоѝ и҆ блаже́ни рабѝ твоѝ сі́и, и҆̀же предстоѧ́тъ пред̾ тобо́ю на всѧ́ко вре́мѧ и҆ слы́шатъ премѹ́дрость твою̀:

⁸да бѹ́детъ гд҇ь бг҃ъ тво́й блг҇ве́нъ, и҆̀же бл҃говолѝ въ тебѣ̀, є҆́же да́ти тѧ̀ на престо́лъ сво́й царѧ̀ гд҇ѹ бг҃ѹ твоемѹ̀: занѐ возлюбѝ гд҇ь бг҃ъ тво́й ї҆и҃лѧ, є҆́же ѹ҆тверди́ти є҆го̀ во вѣ́къ, и҆ поста́ви тѧ̀ над̾ ни́ми царѧ̀, да сотвори́ши сѹ́дъ и҆ пра́вдѹ.

⁹Даде́ же царю̀ сто̀ два́десѧть тала҄нтъ зла҄та и҆ а҆рѡма́ты мнѡ́ги ѕѣлѡ̀ и҆ ка́менїе драго́е, и҆ не бы́ша а҆рѡма́ты такѡвы́ ѩ҆́кѡ сїѧ҄, ѩ҆́же дадѐ цари́ца са́вска царю̀ соломѡ́нѹ.

¹⁰Но и҆ рабѝ хїра́мѡвы съ рабы҄ соломѡ́ними приноша́хѹ зла́то соломѡ́нѹ драго́е.

¹¹И҆ сотворѝ соломѡ́нъ ца́рь ѿ дре́въ пе́ѵговыхъ степє́ни въ до́мъ гд҇ень и҆ въ до́мъ царе́въ, и҆ гѹ́сли и҆ ѱалти҄ри пѣ́сней, и҆ никогда́же ви҄дѣна бы́ша въ землѝ ї҆ѹ́динѣ пре́жде такѡа́ѧ.

¹²Ца́рь же соломѡ́нъ дадѐ ца́рицѣ са́встѣй всѧ҄ по жела́нїю є҆ѧ̀, и҆́хже проси́ла, кромѣ̀ всѣ́хъ ѩ҆̀же принесѐ царю̀ соломѡ́нѹ, и҆ возврати́сѧ въ зе́млю свою̀.

¹³Бѣ́ же вѣ́съ зла́та приноси́магѡ къ соломѡ́нѹ на всѧ́ко лѣ́то ше́сть сѡ́тъ шестьдесѧ́тъ ше́сть тала҄нтъ зла́та,

¹⁴кромѣ̀ мѹже́й по́дданныхъ и҆ кѹпцѡ́въ, и҆̀же приноша́хѹ, и҆ всѣ́хъ царе́й а҆ра́вскихъ и҆ вла́стелей землѝ, и҆̀же всѝ приноша́хѹ зла́то и҆ сребро̀ царю̀ соломѡ́нѹ.

¹⁵Сотворѝ ѹ҆́бѡ ца́рь соломѡ́нъ двѣ́сти щитѡ́въ златы́хъ тѧ́гненыхъ, ше́сть сѡ́тъ златни҄къ чи́стыхъ бѧ́хѹ во є҆ди́нѣмъ щитѣ̀:

¹⁶и҆ три́ста щитѡ́въ златы́хъ тѧ́гненыхъ, по три́ста златни҄къ бѧ́ше во є҆ди́нѣмъ ко́емждо щитѣ̀, и҆ положѝ ѧ҆̀ ца́рь въ домѹ̀ дре́ва лїва́нова.

¹⁷Сотвори́ же ца́рь престо́лъ ѿ слоно́выхъ зѹбѡ́въ вели́къ, и҆ позлатѝ є҆го̀ зла́томъ чи́стымъ,

¹⁸и҆ ше́сть степе́нїй ѹ҆ престо́ла позлаще́ни зла́томъ, и҆ мы҄шчицы двѣ̀ тѹ́дѹ и҆ сю́дѹ над̾ престо́ломъ сѣда́лища, и҆ два̀ льва҄ стѡѧ́ща бли́з̾ мы́шчцей,

¹⁹и҆ двана́десѧть львѡ́въ стоѧ́щихъ та́мѡ на шестѝ степе́нехъ ѿ ѻ҆бои́хъ стра́нъ: и҆ не бы́сть тако́въ престо́лъ во всѧ́цѣмъ ца́рствѣ.

²⁰Вси́ же сосѹ́ди царѧ̀ соломѡ́на бѧ́хѹ зла҄ты, и҆ всѝ сосѹ́ди до́мѹ дѹбра́вы лїва́нскїѧ зла́томъ ѡ҆крѹжє́ны, сребро́ бо во дне́хъ соломѡ́нихъ ни во что̀ вмѣнѧ́шесѧ:

²¹занѐ кора́бль царе́въ хожда́ше въ ѳарсі́съ съ рабы҄ хїра́мовыми, є҆ди́ницею въ лѣ҄та трѝ прихожда́ше кора́бль ѿ ѳарсі́са ко царю̀, по́лнъ зла́та и҆ сребра̀ и҆ зѹбѡ́въ слоно́выхъ и҆ ѻ҆без̾ѧнъ.

²²И҆ возвели́чисѧ соломѡ́нъ па́че всѣ́хъ царе́й земны́хъ бога́тствомъ и҆ мѹ́дростїю.

²³Вси́ же ца́рїе зе́мстїи жела́хѹ ви́дѣти лицѐ соломѡ́не и҆ слы́шати премѹ́дрость є҆гѡ̀, ю҆́же дадѐ бг҃ъ въ се́рдце є҆гѡ̀:

²⁴и҆ приноша́хѹ є҆мѹ̀ кі́йждо да́ры своѧ҄, сосѹ́ды срє́брѧны и҆ зла҄ты, и҆ ѡ҆дѣѧ́нїѧ и҆ ста́ктѹ, и҆ сла́дѡсти, ко́ни и҆ мскѝ, на всѧ́кое лѣ́то.

²⁵И҆ бѧ́хѹ царю̀ соломѡ́нѹ четы́редесѧть ты́сѧщъ кобыли́цъ къ колєсни́цы и҆ двана́десѧть ты́сѧщъ кѡ́нникъ, и҆ поста́ви и҆̀хъ во градѣ́хъ колесни́чныхъ и҆ со царе́мъ во ї҆ер҇ли́мѣ.

²⁶И҆ бы́ть во́ждь всѣ́хъ царе́й ѿ рѣкѝ (є҆ѵфра́та) да́же до землѝ и҆ноплемє́нникъ и҆ да́же до предѣ҄лъ є҆гѵ́петскихъ.

²⁷И҆ дадѐ ца́рь зла́то и҆ сребро̀ во ї҆ер҇ли́мѣ ѩ҆́кѡ ка́менїе, и҆ ке́дры ѩ҆́кѡ черни́чїе, є҆́же (ражда́етсѧ) въ полѧ́хъ мно́жество.

²⁸И҆ приводѧ́хѹ ко́ни соломѡ́нѹ ѿ є҆гѵ́пта и҆ ѿ всеѧ̀ землѝ.

²⁹И҆ прѡ́чаѧ словеса̀ соломѡ҄нѧ пє́рваѧ и҆ послѣ҄днѧѧ, сѐ, сїѧ҄ пи҄сана сѹ́ть въ словесѣ́хъ наѳа́на про҇ро́ка и҆ въ словесѣ́хъ а҆хі́и силѡні́ты и҆ въ видѣ́нїихъ ї҆ѡи́лѧ ви́дѧщагѡ, проти́вѹ ї҆еровоа́ма сы́на нава́това.

³⁰И҆ ца́рствова соломѡ́нъ во ї҆ер҇ли́мѣ над̾ всѣ́мъ ї҆и҃лемъ четы́редесѧть лѣ́тъ.

³¹И҆ ѹ҆́спе соломѡ́нъ со ѻ҆тцы҄ свои́ми, и҆ погребо́ша є҆го̀ во гра́дѣ даві́да ѻ҆тца̀ є҆гѡ̀. И҆ воцари́сѧ ровоа́мъ сы́нъ є҆гѡ̀ вмѣ́стѡ є҆гѡ̀.