Read Библия Церковнославянская а҃ е҆́здры 10 Bible Online

а҃ е҆́здры 10 - Библия Церковнославянская bible

а҃ е҆́здры 10

¹И҆ є҆гда̀ молѧ́шесѧ є҆́здра и҆ є҆гда̀ и҆сповѣ́дашесѧ пла́чѹщь и҆ молѧ́сѧ пред̾ до́момъ бж҃їимъ, собра́шасѧ къ немѹ̀ ѿ ї҆и҃лѧ собра́нїе ве́лїе ѕѣлѡ̀, мѹ́жїе и҆ жєны̀ и҆ ѻ҆́троцы ѩ҆́кѡ пла́кахѹсѧ лю́дїе и҆ вознесо́ша пла́чь.

²И҆ ѿвѣща̀ сехені́а сы́нъ ї҆еи́левъ ѿ сынѡ́въ и҆ла́млихъ и҆ речѐ є҆́здрѣ: мы̀ престѹпи́хомъ пред̾ бг҃омъ на́шимъ и҆ поѧ́хомъ жєны̀ чѹждї҄ѧ ѿ люді́й землѝ, и҆ нн҃ѣ є҆́сть ѹ҆пова́нїе ї҆и҃лю ѡ҆ се́мъ:

³и҆ нн҃ѣ завѣща́емъ завѣ́тъ бг҃ѹ на́шемѹ, да ѿве́ржемъ всѧ҄ жєны̀ и҆ рожде́ныхъ ѿ ни́хъ, ѩ҆́коже хо́щетъ: воста́ни и҆ ѹ҆страшѝ и҆̀хъ за́повѣдьми бг҃а на́шегѡ, и҆ по зако́нѹ да бѹ́детъ:

⁴воста́ни, поне́же на тебѣ̀ є҆́сть глаго́лъ, и҆ мы̀ съ тобо́ю: ѹ҆крѣпи́сѧ и҆ сотворѝ.

⁵И҆ воста̀ є҆́здра, и҆ заклѧ̀ кнѧ҄зи, свѧще́нники и҆ леѵі́ты и҆ всего̀ ї҆и҃лѧ, да сотворѧ́тъ по словесѝ семѹ̀. И҆ клѧ́шасѧ.

⁶И҆ воста̀ є҆́здра ѿ лица̀ до́мѹ бж҃їѧ и҆ и҆́де въ сокро́вищный до́мъ ї҆ѡна́на сы́на є҆лїсѹ́вова и҆ сѣ́де та́мѡ: хлѣ́ба не ѩ҆дѐ и҆ воды̀ не пѝ, пла́каше бо ѡ҆ престѹпле́нїи прише́дшихъ ѿ плѣне́нїѧ.

⁷И҆ по́слано бы́сть сло́во во ї҆ѹде́ю и҆ во ї҆ер҇ли́мъ всѣ҄мъ сыновѡ́мъ преселе́нїѧ, да соберѹ́тсѧ во ї҆ер҇ли́мъ:

⁸всѧ́къ, и҆́же а҆́ще не прїи́детъ въ трѝ дни҄, по совѣ́тѹ кнѧзе́й и҆ старѣ́йшинъ, во́зметсѧ всѐ и҆мѣ́нїе є҆гѡ̀, и҆ то́й ѿлѹче́нъ бѹ́детъ ѿ со́нмища преселе́нїѧ.

⁹И҆ собра́шасѧ всѝ мѹ́жїе ї҆ѹ҄дины и҆ венїамї҄ни во ї҆ер҇ли́мъ тре́ми де́нми: се́й є҆́сть мц҇ъ девѧ́тый: въ двадесѧ́тый де́нь мц҇а сѣдо́ша всѝ лю́дїе пред̾ до́момъ бж҃їимъ трепе́щѹще ѡ҆ словесѝ и҆ ѿ зимы̀.

¹⁰И҆ воста̀ є҆́здра свѧще́нникъ и҆ речѐ къ ни҄мъ: вы̀ престѹпи́сте и҆ взѧ́сте жєны̀ и҆ноплемє́ннически, є҆́же приложи́ти ко грѣхѹ̀ ї҆и҃левѹ:

¹¹и҆ нн҃ѣ дади́те хвалѹ̀ гд҇ѹ бг҃ѹ ѻ҆тє́цъ на́шихъ, и҆ сотвори́те ѹ҆го́дное пред̾ ни́мъ, и҆ ѿлѹчи́тесѧ ѿ люді́й землѝ и҆ ѿ же́нъ и҆ноплеме́нническихъ.

¹²И҆ ѿвѣща́ша всѐ мно́жество гла́сомъ вели́кимъ и҆ рѣ́ша: по словесѝ твоемѹ̀ къ на́мъ сотвори́мъ:

¹³ѻ҆ба́че лю́дїе мно́зи сѹ́ть, и҆ вре́мѧ зи́мнее, и҆ нѣ́сть мо́щно стоѧ́ти внѣ̀: и҆ дѣ́ло нѣ́сть днѐ є҆ди́нагѡ и҆лѝ двѹ́хъ, ѕѣлѡ̀ бо мно́гѡ согрѣши́хомъ во словесѝ се́мъ:

¹⁴да поста́вѧтсѧ кнѧ́зїе на́ши во все́мъ мно́жествѣ и҆ во всѣ́хъ градѣ́хъ на́шихъ, и҆̀же поѧ́ша жєны̀ и҆ноплемє́нничи, да прїи́дѹтъ во времена̀ повєлѣ́ннаѧ, и҆ съ ни́ми старѣ҄йшины ѿ всѧ́кагѡ гра́да и҆ сѹдїи҄, є҆́же ѿврати́ти гнѣ́въ ѩ҆́рости бг҃а на́шегѡ ѿ на́съ словесѐ ра́ди сегѡ̀.

¹⁵Ѻ҆ба́че ї҆ѡнаѳа́нъ сы́нъ а҆саи́левъ и҆ ї҆а́сса сы́нъ ѳекѹ́евъ со мно́ю ѡ҆ се́мъ, и҆ месолла́мъ и҆ саваѳа́й леѵі́тинъ помага́ѧй и҆̀мъ.

¹⁶И҆ сотвори́ша та́кѡ сы́нове преселе́нїѧ: и҆ разыдо́шасѧ є҆́здра свѧще́нникъ и҆ мѹ́жїе кнѧ́зїе ѻ҆те́чествъ въ до́мы, и҆ всѝ по и҆менѡ́мъ, ѩ҆́кѡ ѡ҆брати́шасѧ въ де́нь пе́рвый мц҇а десѧ́тагѡ, да взы́щѹтъ глаго́ла:

¹⁷и҆ соверши́ша во всѣ́хъ мѹже́хъ, и҆̀же поѧ́ша жєны̀ и҆ноплемє́нничи, да́же до днѐ пе́рвагѡ мц҇а пе́рвагѡ.

¹⁸И҆ ѡ҆брѣ́тени сѹ́ть ѿ сынѡ́въ свѧще́нническихъ и҆̀же введо́ша жєны̀ и҆ноплемє́нничи, ѿ сынѡ́въ ї҆исѹ́са сы́на ї҆ѡседе́кова и҆ бра́тїѧ є҆гѡ̀ маасі́а и҆ є҆лїезе́ръ, и҆ ї҆ари́мъ и҆ гадалі́а:

¹⁹и҆ да́ша рѹ́ки своѧ҄ и҆згони́ти жєны̀ своѧ҄, и҆ согрѣши́вшїи принесо́ша ѿ ѻ҆ве́цъ ѡ҆ престѹпле́нїи свое́мъ ѻ҆вна̀:

²⁰и҆ ѿ сынѡ́въ є҆мми́ровыхъ а҆нані́й и҆ завді́а:

²¹и҆ ѿ сынѡ́въ и҆ра́млихъ маасі́а и҆ є҆ллі́а, и҆ самі́а и҆ ї҆еїи́лъ и҆ ѻ҆зі́а:

²²и҆ ѿ сынѡ́въ фассѹ́ровыхъ є҆лїѡина́й, маасі́а и҆ ї҆сма́илъ, и҆ наѳана́ель и҆ ї҆ѡзава́дъ и҆ и҆ласа̀:

²³и҆ ѿ леѵі́тѡвъ ї҆ѡзава́дъ и҆ ѳамѹ́й и҆ кѡлі́а, то́йже и҆ кѡлі́тъ, и҆ феѳеі́а, и҆ ї҆ѹ́да и҆ є҆лїе́зеръ:

²⁴и҆ ѿ пѣвцє́въ є҆лїса́въ: и҆ ѿ двє́рникъ солми́нъ и҆ телми́нъ и҆ ѻ҆дѹ́а:

²⁵и҆ ѿ ї҆и҃лѧ, ѿ сынѡ́въ форо́совыхъ рамі́а и҆ а҆зі́а, и҆ мелхі́а и҆ мелми́нъ, и҆ є҆лїаза́ръ и҆ а҆саві́а и҆ ване́а:

²⁶и҆ ѿ сынѡ́въ и҆ла́мовыхъ матѳані́а и҆ заха́рїа, и҆ ї҆аїи́лъ и҆ а҆вді́й, и҆ ї҆ерїмѡ́ѳъ и҆ и҆лі́а:

²⁷и҆ ѿ сынѡ́въ заѳѹ́евыхъ є҆лїѡна́й, є҆лїсѹ́въ, маѳана́й и҆ а҆рмѡ́ѳъ, и҆ зава́дъ и҆ ѻ҆зїза̀:

²⁸и҆ ѿ сынѡ́въ ваве́иныхъ ї҆ѡна́нъ, а҆нані́а и҆ завѹ́й и҆ ѳалї̀:

²⁹и҆ ѿ сынѡ́въ ванѹ́евыхъ мосолла́мъ, маллѹ́хъ, а҆даі́а, ї҆асѹ́въ и҆ саа́лъ и҆ римѡ́ѳъ:

³⁰и҆ ѿ сынѡ́въ фаа́ѳъ-мѡа́влихъ є҆дне́а и҆ хали́лъ и҆ ванаі́а, маасі́а, матѳані́а, веселеи́лъ и҆ ванѹ́й и҆ манассі́и:

³¹и҆ ѿ сынѡ́въ и҆ра́мовыхъ є҆лїезе́ръ, ї҆есі́а, мелхі́а, самаі́а, семеѡ́нъ,

³²венїамі́нъ, малѹ́хъ, самарі́а:

³³и҆ ѿ сынѡ́въ а҆си́мовыхъ метѳана́їа, маѳаѳа̀, зава́дъ, є҆лїфале́тъ, ї҆ерамї̀ манассі́й, семе́й:

³⁴и҆ ѿ сынѡ́въ вані́иныхъ мооді́а, а҆мра́мъ и҆ ѹ҆и́лъ,

³⁵ванаі́а, вадаі́а, хелі́а,

³⁶ѹ҆ані́а, марїмѡ́ѳъ и҆ є҆лїасі́въ,

³⁷матѳані́а маѳана́й.

³⁸И҆ сотвори́ша сы́нове ванѹі́євы и҆ сы́нове семє́ины,

³⁹и҆ салемі́а и҆ наѳа́нъ и҆ а҆даі́а,

⁴⁰махнада̀, а҆вѹсесе́й,

⁴¹а҆рѹесрїи́лъ и҆ самарі́а,

⁴²селлѹ́мъ, а҆марі́а, ї҆ѡ́сифъ:

⁴³ѿ сынѡ́въ навѹ́иныхъ ї҆еїи́лъ, маѳаѳі́а, зава́дъ, зевена́й, ї҆ада́й и҆ ї҆ѡи́ль и҆ ване́а.

⁴⁴Всѝ ті́и поѧ́ша жєны̀ и҆ноплемє́ннически, и҆ роди́ша ѿ ни́хъ сы́ны.