Read Библия Церковнославянская а҃ е҆́здры 3 Bible Online

а҃ е҆́здры 3 - Библия Церковнославянская bible

а҃ е҆́здры 3

¹Прише́дшѹ же мц҇ѹ седмо́мѹ, и҆ бѧ́хѹ сы́нове ї҆и҃лєвы во градѣ́хъ свои́хъ, и҆ собра́шасѧ лю́дїе а҆́ки человѣ҄къ є҆ди́нъ во ї҆ер҇ли́мъ.

²И҆ воста̀ ї҆исѹ́съ сы́нъ ї҆ѡседе́ковъ и҆ бра́тїѧ є҆гѡ̀ свѧще́нницы, и҆ зорова́вель сы́нъ салаѳїи́левъ и҆ бра́тїѧ є҆гѡ̀, и҆ созда́ша ѻ҆лта́рь бг҃ѹ ї҆и҃левѹ, да принесѹ́тъ на не́мъ всесожжє́нїѧ, ѩ҆́коже пи́сано є҆́сть въ зако́нѣ мѡѷсе́а человѣ́ка бж҃їѧ.

³И҆ ѹ҆гото́ваша ѻ҆лта́рь на ѡ҆снова́нїи є҆гѡ̀, поне́же стра́хъ бѣ̀ на ни́хъ ѿ люді́й земны́хъ, и҆ вознесо́ша на то́мъ всесожже́нїе гд҇еви ѹ҆́трѡ и҆ въ ве́черъ:

⁴и҆ сотвори́ша пра́здникъ кѹ́щей, ѩ҆́коже пи́сано, и҆ всесожжє́нїѧ на всѧ́къ де́нь число́мъ по повелѣ́нїю, дѣ́ло днѐ въ де́нь сво́й:

⁵и҆ посе́мъ всесожжє́нїѧ непреста҄ннаѧ и҆ въ новомч҇їѧ и҆ во всѧ҄ пра́здники гд҇еви ѡ҆свѧщє́нныѧ, и҆ ѡ҆ всѧ́цѣмъ доброво́льнѡ приносѧ́щемъ со ѹ҆се́рдїемъ гд҇еви.

⁶Ѿ пе́рвагѡ днѐ мц҇а седма́гѡ нача́ша возноси́ти всесожжє́нїѧ гд҇еви, до́мъ же гд҇ень не бѣ̀ є҆щѐ ѡ҆снова́нъ.

⁷И҆ вда́ша пѣ҄нѧзи каменосѣ́чцємъ и҆ древодѣ́лємъ, пи́щѹ же и҆ питїѐ и҆ є҆ле́й сїдѡ́нѧнѡмъ и҆ тѵ́рѧнѡмъ, да принесѹ́тъ древа̀ ке́дрѡва ѿ лїва́на къ мо́рю ї҆оппі́йскомѹ, ѩ҆́коже соизво́ли кѵ́ръ ца́рь пе́рсскїй ѡ҆ ни́хъ.

⁸И҆ въ лѣ́то второ́е, внегда̀ прїитѝ и҆̀мъ къ до́мѹ бж҃їю во ї҆ер҇ли́мъ, мц҇а втора́гѡ нача̀ зорова́вель сы́нъ салаѳїи́левъ и҆ ї҆исѹ́съ сы́нъ ї҆ѡседе́ковъ, и҆ про́чїи ѿ бра́тїи и҆́хъ свѧще́нницы и҆ леѵі́ти, и҆ всѝ, и҆̀же прїидо́ша ѿ плѣне́нїѧ во ї҆ер҇ли́мъ, и҆ поста́виша леѵі́тѡвъ ѿ два́десѧти лѣ́тъ и҆ вы́шше над̾ творѧ́щими дѣла̀ во хра́мѣ гд҇ни.

⁹И҆ ста̀ ї҆исѹ́съ и҆ сы́нове є҆гѡ̀ и҆ бра́тїѧ є҆гѡ̀, кадои́лъ и҆ сы́нове є҆гѡ̀, сы́нове ї҆ѹ҄дины, ѩ҆́коже мѹ́жъ є҆ди́нъ да є҆динодѹ́шнѡ настоѧ́тъ над̾ творѧ́щими дѣла̀ въ домѹ̀ бж҃їи, сы́нове и҆нада́дѡвы, сы́нове и҆́хъ и҆ бра́тїѧ и҆́хъ леѵі́ти.

¹⁰И҆ ѡ҆снова̀ша созида́юще до́мъ гд҇ень: и҆ ста́ша свѧще́нницы во ѹ҆краше́нїи свое́мъ со трѹба́ми, и҆ леѵі́ти сы́нове а҆са́фѡвы, въ кѷмва́лѣхъ да хва́лѧтъ гд҇а, по ѹ҆ста́вѹ даві́да царѧ̀ ї҆и҃лева:

¹¹и҆ вопїѧ́хѹ въ пѣ́снехъ и҆ и҆сповѣ́данїи гд҇еви, ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀ над̾ ї҆и҃лемъ: и҆ всѝ лю́дїе возглаша́хѹ гла́сомъ вели́кимъ хвале́нїе гд҇ѹ при ѡ҆снова́нїи до́мѹ гд҇нѧ.

¹²И҆ мно́зи ѿ свѧще́нникѡвъ и҆ леѵї҄тъ, и҆ кнѧ҄зи ѻ҆те́чествъ и҆ старѣ҄йшины, и҆̀же ви́дѣша до́мъ пре́жднїй на ѡ҆снова́нїи свое́мъ, и҆ се́й до́мъ пред̾ ѻ҆чесы̀ свои́ми, пла́кахѹ гла́сомъ ве́лїимъ: и҆ наро́дъ возглаша́ющь, въ весе́лїи возвыша́хѹ:

¹³и҆ не можа́хѹ лю́дїе позна́ти гла́са восклица́нїѧ веселѧ́щихсѧ ѿ гласѡ́въ пла́ча наро́днагѡ, поне́же лю́дїе восклица́хѹ гла́сомъ вели́кимъ, и҆ гла́съ вели́къ слы́шашесѧ и҆здале́ча.