Read Библия Церковнославянская а҃ е҆́здры 4 Bible Online

а҃ е҆́здры 4 - Библия Церковнославянская bible

а҃ е҆́здры 4

¹И҆ ѹ҆слы́шаша вразѝ ї҆ѹ҄дины и҆ венїамї҄ни, ѩ҆́кѡ сы́нове преселе́нїѧ созида́ютъ це́рковь гд҇ѹ бг҃ѹ ї҆и҃левѹ,

²и҆ пристѹпи́ша къ зорова́велю и҆ ко кнѧзє́мъ ѻ҆те́чествъ и҆ реко́ша и҆̀мъ: сози́ждемъ съ ва́ми, поне́же, ѩ҆́коже и҆ вы̀, и҆́щемъ бг҃а ва́шего и҆ є҆мѹ̀ мы̀ жре́мъ же́ртвѹ ѿ дні́й а҆сарада́на царѧ̀ а҆ссѹ́рска приве́дшагѡ ны сѣ́мѡ.

³И҆ речѐ и҆̀мъ зорова́вель и҆ ї҆исѹ́съ и҆ про́чїи кнѧ҄зи ѻ҆те́чествъ ї҆и҃левыхъ: нѣ́сть на́мъ и҆ ва́мъ созда́ти до́мъ бг҃ѹ на́шемѹ, поне́же мы̀ са́ми ѡ҆со́бнѡ сози́ждемъ гд҇ѹ бг҃ѹ на́шемѹ, ѩ҆́коже повелѣ̀ на́мъ кѵ́ръ ца́рь пе́рсскїй.

⁴И҆ бы́ша лю́дїе землѝ (тоѧ̀) ѡ҆слаблѧ́юще рѹ́ки люді́й ї҆ѹде́йскїхъ, и҆ препина́хѹ и҆̀мъ въ созида́нїи,

⁵и҆ наима́хѹ на ни́хъ совѣ́тникѡвъ, да разорѧ́тъ совѣ́тъ и҆́хъ, во всѧ҄ дни҄ кѵ́ра царѧ̀ пе́рсскагѡ и҆ да́же до ца́рства да́рїа царѧ̀ пе́рсскагѡ.

⁶Въ ца́рство же а҆ссѹи́ра, (и҆́же є҆́сть а҆ртаѯе́рѯъ,) въ нача́лѣ ца́рства є҆гѡ̀, написа́ша сви́токъ на живѹ́щихъ во ї҆ѹде́и и҆ во ї҆ер҇ли́мѣ.

⁷И҆ во дни҄ а҆рѳасаѳа́на написа̀ въ ми́рѣ мїѳрїда́тъ и҆ тавеи́лъ со про́чими сослѹжи́тєли ко а҆ртаѯе́рѯѹ царю̀ пе́рсскомѹ: написа̀ писмоно́сецъ писа́нїе сѵ́рскимъ ѧ҆зы́комъ и҆ претолко́вано.

⁸Реѹ́мъ валтаа́мъ и҆ самѱа̀ книго́чїй написа́ста посла́нїе є҆ди́но на ї҆ер҇ли́мъ ко а҆ртаѯе́рѯѹ царю̀:

⁹та́кѡ сѹди́лъ реѹ́мъ валтаа́мъ и҆ самѱа̀ книго́чїй и҆ про́чїи сослѹжи́телїе на́ши, дїне́є, а҆фарсаѳахе́є, тарфале́є, а҆рфасе́є, а҆рхѷе́є, вавѷлѡ́нѧне, сѹсанахе́є, саве́є, є҆лами́те

¹⁰и҆ про́чїи ѿ ѩ҆зы҄къ, и҆̀хже преведѐ а҆ссенафа́ръ вели́кїй и҆ пресла́вный и҆ вселѝ и҆̀хъ во градѣ́хъ самарі́йскихъ и҆ про́чихъ ѡ҆б̾ ѡ҆́нъ по́лъ рѣкѝ.

¹¹Сїѐ є҆́сть сказа́нїе посла́нїѧ, є҆́же посла́ша къ немѹ̀, ко а҆ртаѯе́рѯѹ царю̀: рабѝ твоѝ, мѹ́жїе, и҆̀же за рѣко́ю:

¹²вѣ́домо да бѹ́детъ царю̀, ѩ҆́кѡ ї҆ѹде́є, и҆̀же взыдо́ша ѿ тебє̀ къ на́мъ, прїидо́ша во ї҆ер҇ли́мъ гра́дъ ѿстѹ́пный и҆ лѹка́вый, є҆го́же созида́ютъ: и҆ стѣ́ны є҆гѡ̀ состро́єны сѹ́ть, и҆ ѡ҆снова́нїе є҆гѡ̀ возвы́сиша:

¹³нн҃ѣ ѹ҆̀бо вѣ́домо да бѹ́детъ царю̀, ѩ҆́кѡ, а҆́ще гра́дъ се́й со́зданъ бѹ́детъ, и҆ стѣ́ны є҆гѡ̀ соверша́тсѧ, да҄ни не бѹ́дѹтъ тебѣ̀, нижѐ (лѣ́тнѧгѡ воздаѧ́нїѧ) дадѹ́тъ: и҆ сїѐ царє́мъ ѕло̀ твори́тъ,

¹⁴и҆ посрамоще́нїѧ царе́ва не лѣ́ть на́мъ ви́дѣти: сегѡ̀ ра́ди посла́хомъ и҆ возвѣсти́хомъ царю̀,

¹⁵да разсмо́трено бѹ́детъ въ кни́зѣ памѧтопи́снѣй ѻ҆тцє́въ твои́хъ, и҆ ѡ҆брѧ́щеши въ кни́зѣ памѧтопи́снѣй и҆ позна́еши, ѩ҆́кѡ гра́дъ ѡ҆́нъ ѿстѹ́пный є҆́сть и҆ ѡ҆би́дѧщь царе́й и҆ страны҄, и҆ ѹ҆бѣ҄жища слѹ́гъ быва́ютъ посредѣ̀ є҆гѡ̀ ѿ дні́й дре́внихъ, сегѡ̀ ра́ди и҆ гра́дъ то́й ѡ҆пѹстоше́нъ є҆́сть:

¹⁶вѣ́домо ѹ҆̀бо твори́мъ царю̀, ѩ҆́кѡ, а҆́ще гра́дъ то́й со́зданъ бѹ́детъ и҆ стѣ́ны є҆гѡ̀ соверша́тсѧ, то̀ не бѹ́детъ тѝ ми́ра.

¹⁷И҆ посла̀ ца́рь ко реѹ́мѹ валтаа́мѹ и҆ самѱа́ю книгѡ́чїю и҆ ко про́чымъ сослѹжи́телємъ и҆́хъ ѡ҆бита́ющымъ въ самарі́и и҆ про́чымъ за рѣко́ю ми́ръ

¹⁸и҆ речѐ: писмоно́сецъ, є҆го́же посла́сте къ на́мъ, при́званъ пред̾ менѐ,

¹⁹и҆ ѿ менє̀ повелѣ́но є҆́сть, и҆ соглѧ́дахомъ и҆ ѡ҆брѣто́хомъ, ѩ҆́кѡ гра́дъ то́й ѿ дні́й дре́внихъ на царе́й возно́ситсѧ, ѿстѹплє́нїѧ и҆ ѹ҆бѣ҄жища быва́ютъ въ не́мъ:

²⁰и҆ ца́рїе крѣ́пцы бы́ша во ї҆ер҇ли́мѣ и҆ ѡ҆блада́хѹ все́ю страно́ю, ѩ҆́же за рѣко́ю, да҄ни же мнѡ́ги и҆ ча́сть дава́шесѧ и҆̀мъ:

²¹и҆ нн҃ѣ повели́те мѹжє́мъ ѡ҆́нымъ преста́ти ѿ дѣ́ла, и҆ гра́дъ ѻ҆́ный да не созида́етсѧ ктомѹ̀:

²²ѩ҆́кѡ да ѿ повелѣ́нїѧ сегѡ̀ ѡ҆па́сни бѹ́дете нерадѣ́нїе твори́ти ѡ҆ се́мъ, да не когда̀ ѹ҆мно́житсѧ поги́бель на ѕло̀ царє́мъ.

²³Тогда̀ писмоно́сецъ а҆ртаѯе́рѯа царѧ̀ прочтѐ сви́токъ пред̾ реѹ́момъ валтаа́момъ и҆ самѱа́емъ книго́чїемъ и҆ сослѹжи́телми и҆́хъ: и҆ и҆до́ша тща́телнѡ во ї҆ер҇ли́мъ и҆ во ї҆ѹде́ю, и҆ ѹ҆держа́ша и҆̀хъ мы́шцею си́льною.

²⁴Тогда̀ преста̀ дѣ́ло до́мѹ бж҃їѧ, є҆́же во ї҆ер҇ли́мѣ, и҆ не творѧ́шесѧ да́же до лѣ́та втора́гѡ ца́рства да́рїа царѧ̀ пе́рсскагѡ.