Read Библия Церковнославянская Неемі́и 10 Bible Online

Неемі́и 10 - Библия Церковнославянская bible

Неемі́и 10

¹И҆ въ печатлѣ́ющихъ бы́ша сі́и: неемі́а а҆ртаса́ста сы́нъ а҆халі́евъ и҆ седекі́а

²сы́нъ а҆раі́евъ, и҆ а҆зарі́а и҆ ї҆еремі́а,

³фасѹ́ръ, а҆марі́а, мелхі́а,

⁴а҆ттѹ́съ, севані́а, маллѹ́хъ,

⁵ї҆ра́мъ, мерамѡ́ѳъ, а҆вді́а,

⁶данїи́лъ, ганаѳѡ́нъ, варѹ́хъ,

⁷месѹлла́мъ, а҆ві́а, мїамі́нъ,

⁸маазі́а, велгаї̀, самаі́а: сі́и свѧще́нницы.

⁹Леѵі́ти же: ї҆исѹ́съ сы́нъ а҆зарі́инъ, ване́й ѿ сынѡ́въ и҆нада́довыхъ, кадмїи́лъ

¹⁰и҆ бра́тїѧ є҆гѡ̀ савані́а, ѡ҆дѹі́а, калїта́нъ, фелі́а, а҆на́нъ,

¹¹мїха̀, роѡ́въ, а҆севі́а,

¹²закхѡ́ръ, сараві́а, севані́а,

¹³ѡ҆дѹ́а, сы́нове ванѹі́ни.

¹⁴Нача҄лницы люді́й: форо́съ, фаа́ѳъ-мѡа́въ, и҆ла́мъ, заѳѹі́а,

¹⁵сы́нове ваннї҄ины а҆зга́дъ, вива́й,

¹⁶а҆нані́а, ваго́й, и҆ді́нъ,

¹⁷а҆ти́ръ, є҆зекі́а, а҆зѹ́ръ,

¹⁸ѡ҆дѹві́а, и҆са́мъ, висі́й,

¹⁹а҆рі́фъ, а҆наѳѡ́ѳъ, нѡва́й,

²⁰мегафи́съ, месѹлла́мъ, и҆зі́ръ,

²¹месѡзеви́лъ, садѹ́къ, ї҆еддѹ́а,

²²фалті́а, а҆на́нъ, а҆наі́а,

²³ѡ҆сі́а, а҆нані́а, а҆сѹ́въ,

²⁴а҆дѡ́й, фала́а, сѡви́къ,

²⁵раѹ́мъ, є҆ссавана̀, маасі́а

²⁶и҆ а҆і́а, є҆на́нъ, и҆на́мъ,

²⁷малѹ́хъ, и҆ра́мъ, ваана̀.

²⁸И҆ про́чїи ѿ люді́й, свѧще́нницы, леѵі́ти, двє́рницы, пѣвцы̀, наѳїні́ми и҆ всѧ́къ приходѧ́й ѿ люді́й зе́мскихъ ко зако́нѹ бж҃їю, жєны̀ и҆́хъ, сы́нове и҆́хъ, дщє́ри и҆́хъ, всѧ́къ вѣ́дѧй и҆ разѹмѣ́ѧй,

²⁹ѹ҆крѣплѧ́хѹсѧ над̾ бра́тїею свое́ю, и҆ заклина́ша и҆̀хъ, и҆ внидо́ша въ клѧ́твѹ и҆ въ ротѹ̀, є҆́же ходи́ти въ зако́нѣ бж҃їи, и҆́же да́нъ є҆́сть рѹко́ю мѡѷсе́а раба̀ бж҃їѧ, да сотворѧ́тъ и҆ сохранѧ́тъ всѧ҄ за́пѡвѣди гд҇ни и҆ сѹдбы҄ є҆гѡ̀ и҆ повелѣ҄нїѧ є҆гѡ̀,

³⁰и҆ є҆́же не да́ти дще́рей на́шихъ лю́демъ зє́мскимъ, и҆ дще́рей и҆́хъ не во́змемъ сыновѡ́мъ на́шымъ:

³¹лю́дїе же землѝ носѧ́щїи продає́маѧ и҆ всѧ҄ кѹпѹ́ємаѧ во днѝ сѹббѡ́ты продава́ти, не кѹ́пимъ ѿ ни́хъ въ сѹббѡ҄ты, ни въ де́нь свѧты́й: и҆ ѡ҆ста́вимъ лѣ́то седмо́е, и҆ даѧ́нїе всѣ́хъ рѹ́къ.

³²И҆ поста́вимъ над̾ на́ми за́повѣдь даѧ́ти на́мъ тре́тїю ча́сть дїдра́хмы на лѣ́то, на дѣ́ло до́мѹ бг҃а на́шегѡ,

³³на хлѣ́бы предложе́нїѧ и҆ на жє́ртвы повседнє́вныѧ, и҆ во всесожже́нїе пр҇ное сѹббѡ́тъ, новомч҇їй, въ пра́здники и҆ во ст҃а҄ѧ, и҆ ѩ҆̀же ѡ҆ грѣсѣ́хъ, помоли́тисѧ за ї҆и҃лѧ, и҆ на дѣла̀ до́мѹ бг҃а на́шегѡ.

³⁴И҆ жре́бїй метнѹ́хомъ ѡ҆ ноше́нїи древе́съ, свѧще́нницы и҆ леѵі́ти и҆ лю́дїе, носи́ти въ до́мъ бг҃а на́шегѡ, по домѡ́мъ ѻ҆те́чествъ на́шихъ, ѿ вре́мене до вре́мене, ѿ лѣ́та до лѣ́та возжига́ти на ѻ҆лтарѝ гд҇ѹ бг҃ѹ на́шемѹ, ѩ҆́коже пи́сано є҆́сть въ зако́нѣ,

³⁵и҆ приноси́ти перворѡ́днаѧ землѝ на́шеѧ и҆ перворѡ́днаѧ плода̀ всѧ́кагѡ дре́ва, ѿ лѣ́та до лѣ́та, въ до́мъ гд҇ень,

³⁶и҆ пе́рвенцы сынѡ́въ на́шихъ и҆ скотѡ́въ на́шихъ, ѩ҆́коже пи́сано є҆́сть въ зако́нѣ, и҆ пе́рвенцы волѡ́въ на́шихъ и҆ ста́дъ на́шихъ приноси́ти въ до́мъ бг҃а на́шегѡ, свѧще́нникѡмъ слѹжа́щымъ въ домѹ̀ бг҃а на́шегѡ:

³⁷и҆ нача́тки жи҄тъ на́шихъ и҆ пло́дъ всѧ́кагѡ дре́ва, вїна̀ и҆ є҆ле́а, приноси́ти бѹ́демъ свѧще́нникѡмъ въ сокро́вище до́мѹ бж҃їѧ, и҆ десѧти́нѹ землѝ на́шеѧ леѵі́тѡмъ, и҆ ті́и леѵі́ти десѧти́нѹ прїе́млютъ во всѣ́хъ градѣ́хъ дѣ́лъ на́шихъ.

³⁸Бѹ́детъ же свѧще́нникъ сы́нъ а҆арѡ́новъ съ леѵї҄ты въ десѧти́нахъ леѵі́тѡвъ, и҆ леѵі́ти и҆́мѹтъ приноси́ти десѧ́тѹю ча́сть десѧти́ны въ до́мъ бг҃а на́шегѡ въ сокро́вище до́мѹ бж҃їѧ,

³⁹ѩ҆́кѡ въ сокрѡ́вища принесѹ́тъ сы́нове ї҆и҃лєвы и҆ сы́нове леѵі́тстїи нача́тки пшени́цы и҆ вїна̀ и҆ є҆ле́а, и҆ та́мѡ (бѹ́дѹтъ) сосѹ́ди свѧті́и, и҆ свѧще́нницы и҆ слѹжи́телїе и҆ двє́рницы и҆ пѣвцы̀, и҆ не ѡ҆ста́вимъ до́мѹ бг҃а на́шегѡ.