Read Библия Церковнославянская Неемі́и 12 Bible Online

Неемі́и 12 - Библия Церковнославянская bible

Неемі́и 12

¹И҆ сі́и сѹ́ть свѧще́нницы и҆ леѵі́ти, возше́дшїи съ зорова́велемъ сы́номъ салаѳїи́левымъ и҆ ї҆исѹ́сомъ: сараі́а, ї҆еремі́а, є҆́здра,

²а҆марі́а, малѹ́хъ, а҆ттѹ́й,

³сехені́а, реѹ́мъ, марїмѡ́ѳъ,

⁴а҆да́їа, генаѳѡ́нъ, а҆ві́а,

⁵мїамі́нъ, мааді́а, велга̀,

⁶семі́а, ї҆ѡїарі́въ, ї҆ді́а,

⁷салѹ́й, а҆мѹ́къ хелкі́а, ѡ҆дѹі́а: сі́и нача҄лницы свѧще́нникѡвъ и҆ бра́тїѧ и҆́хъ во дни҄ ї҆исѹ́са.

⁸И҆ леѵі́ти: ї҆исѹ́съ, ванѹ́й, кадмїи́лъ, сараві́а, ї҆ѡда́й и҆ матѳані́а, при рѹка́хъ то́й, и҆ бра́тїѧ и҆́хъ въ чредны҄ѧ слѹжє́нїѧ:

⁹и҆ ваквакі́а и҆ а҆на́й, бра́тїѧ и҆́хъ, прѧ́мѡ и҆́хъ во чреды҄ днєвны́ѧ.

¹⁰Ї҆исѹ́съ же родѝ ї҆ѡакі́ма, ї҆ѡакі́мъ родѝ є҆лїасі́ва, є҆лїасі́въ родѝ ї҆ѡда́а,

¹¹ї҆ѡда́й же родѝ ї҆ѡнаѳа́на, и҆ ї҆ѡнаѳа́нъ родѝ а҆дѹ́а.

¹²Во дни҄ же ї҆ѡакі́ма бѣ́хѹ бра́тїѧ є҆гѡ̀ свѧще́нницы и҆ нача҄лницы ѻ҆те́чествъ: сараі́и а҆марі́а, ї҆еремі́и а҆нані́а,

¹³є҆́здрѣ месѹлла́мъ, а҆марі́и ї҆ѡана́нъ,

¹⁴а҆малѹ́хѹ ї҆ѡнаѳа́нъ, сехені́и ї҆ѡ́сифъ,

¹⁵а҆ре́сѹ є҆дна́съ, марїѡ́ѳѹ є҆лке́й,

¹⁶а҆дда́ю заха́рїа, ганаѳѡ́нѹ месѹлла́мъ,

¹⁷а҆ві́и зехрі́й, мїамі́нѹ маада́й, фелеті́ю,

¹⁸валга́сѹ самѹе́й, семі́и ї҆ѡнаѳа́нъ,

¹⁹ї҆ѡарі́вѹ матѳана́й, є҆ді́ю ѻ҆зі́й,

²⁰салаі́ю калаі́а, а҆ме́кѹ а҆ве́дъ,

²¹є҆лкі́и а҆саві́а, ї҆еді́и наѳанаи́лъ.

²²Леѵі́ти во дни҄ є҆лїасі́ва, ї҆ѡа́да и҆ ї҆ѡа̀, и҆ ї҆ѡана́нъ и҆ ї҆дѹ́а, напи́сани нача҄лницы ѻ҆те́чествъ, и҆ свѧще́нницы въ ца́рство да́рїа пе́рсскагѡ.

²³И҆ сы́нове леѵі́и нача҄лницы ѻ҆те́чествъ пи́сани въ кни́зѣ слове́съ дні́й и҆ да́же до дні́й ї҆ѡана́на сы́на є҆лїсѹ́ева.

²⁴И҆ нача҄лницы леѵі́тѡмъ а҆саві́а и҆ сараві́а и҆ ї҆исѹ́съ, и҆ сы́нове кадмїи́лѡвы и҆ бра́тїѧ и҆́хъ пред̾ ни́ми въ пѣ́снехъ хвали́ти и҆ и҆сповѣ́довати, по за́повѣди даві́да человѣ́ка бж҃їѧ, по чреда́мъ ѿ днѐ до днѐ.

²⁵Матѳані́а и҆ ваквакі́а, а҆вді́а, месѹлла́мъ, телмѡ́нъ, а҆кѹ́въ, стрегѹ́щїи двє́рницы стра́жѹ, внегда̀ собра́ти мѝ две́рники.

²⁶Во дни҄ ї҆ѡакі́ма сы́на ї҆исѹ́сова, сы́на ї҆ѡседе́кова, и҆ во дни҄ неемі́и и҆ є҆́здры свѧще́нника и҆ книго́чїи,

²⁷и҆ во ѡ҆бновле́нїи стѣны̀ ї҆ер҇ли́мскїѧ, взыска́ша леѵі́тѡвъ въ мѣ́стѣхъ и҆́хъ да возведѹ́тъ и҆̀хъ во ї҆ер҇ли́мъ сотвори́ти ѡ҆бновле́нїе и҆ весе́лїе во хвале́нїи и҆ пѣ́снехъ, въ кѷмва́лѣхъ и҆ ѱалти́рехъ и҆ гѹ́слехъ.

²⁸И҆ собра́шасѧ сы́нове пою́щихъ и҆ ѿ страны̀ ѡ҆кре́стныѧ во ї҆ер҇ли́мъ, и҆ ѿ се́лъ нетѡфаті́евыхъ,

²⁹и҆ ѿ до́мѹ (галга́лъ) и҆ ѿ стра́нъ (гева̀ и҆ а҆змаве́тъ), ѩ҆́кѡ се́ла созда́ша себѣ̀ пѣвцы̀ ѡ҆́крестъ ї҆ер҇ли́ма:

³⁰и҆ ѡ҆чи́стишасѧ свѧще́нницы и҆ леѵі́ти, и҆ ѡ҆чи́стиша люді́й и҆ врата̀ и҆ стѣ́нѹ.

³¹И҆ возведо́хъ нача́лникѡвъ ї҆ѹ́диныхъ на стѣ́нѹ, и҆ поста́вихъ два̀ кли҄роса вели҄ка, хвалы̀ ра́ди, и҆ проидо́ша ѿ десны́ѧ страны̀ на стѣ́нѹ ко вратѡ́мъ гнѡ́йнымъ.

³²И҆ и҆до́ша за ни́ми ѡ҆саі́а и҆ полови́на нача́лникѡвъ ї҆ѹ́диныхъ,

³³и҆ а҆зарі́а и҆ є҆́здра и҆ месѹлла́мъ,

³⁴ї҆ѹ́да и҆ венїамі́нъ, и҆ самаі́а и҆ ї҆еремі́а:

³⁵и҆ ѿ сынѡ́въ свѧще́нничихъ съ трѹба́ми заха́рїа сы́нъ ї҆ѡнаѳа́новъ, сы́нъ самаі́и, сы́нъ маѳані́инъ, сы́нъ мїхаи́нъ, сы́нъ закхѹ́ровъ, сы́нъ а҆са́фовъ,

³⁶и҆ бра́тїѧ є҆гѡ̀ самаі́а и҆ ѻ҆зїи́лъ, гелѡ́лъ, маі́а, наѳанаи́лъ и҆ ї҆ѹ́да и҆ а҆нані́й, є҆́же хвали́ти въ пѣ́снехъ даві́да человѣ́ка бж҃їѧ:

³⁷и҆ є҆́здра книго́чїй пред̾ ни́ми при вратѣ́хъ и҆сто́чника, хвали́ти прѧ́мѡ и҆́хъ. И҆ взыдо́ша на лѣ҄ствицы гра́да даві́дова, на восхо́дъ стѣны̀ вы́ше до́мѹ даві́дова и҆ да́же до вра́тъ водны́хъ къ восто́кѹ.

³⁸И҆ кли́росъ вторы́й хвалѹ̀ воздаю́щихъ и҆дѧ́ше сопроти́въ и҆́хъ, и҆ а҆́зъ по не́мъ, и҆ полови́на люді́й по стѣнѣ̀, верхѹ̀ столпа̀ ѳанѹри́млѧ и҆ да́же до стѣны̀ простра́ннѣйшїѧ,

³⁹и҆ на врата̀ є҆фраі́ма, и҆ на врата̀ ста҄раѧ, и҆ на врата̀ ры҄бнаѧ, и҆ на сто́лпъ а҆намеи́ль, и҆ на сто́лпъ є҆ма́ѳъ, и҆ да́же до вра́тъ ѻ҆́вчихъ.

⁴⁰И҆ ста́ша на вратѣ́хъ стра́жи, ста́ша же два̀ кли҄роса хва҄лѧща въ домѹ̀ бж҃їи, и҆ а҆́зъ и҆ полови́на воево́дъ со мно́ю,

⁴¹и҆ свѧще́нницы є҆лїакі́мъ, маасі́а, мїамі́нъ, мїхе́а, є҆лїѡна̀, заха́рїа, а҆нані́а съ трѹба́ми,

⁴²и҆ маасі́а и҆ семеі́а, и҆ є҆леаза́ръ и҆ ѻ҆зі́а, и҆ ї҆ѡана́нъ и҆ мелхі́а, и҆ є҆леамі́й и҆ ї҆езѹ́ръ. И҆ слы́шани бы́ша пѣвцы̀ и҆ ї҆езрі́а, и҆ соглѧ́дани, и҆ восхвали́ша.

⁴³И҆ пожро́ша въ де́нь то́й жє́ртвы вели҄кїѧ и҆ возвесели́шасѧ, ѩ҆́кѡ бг҃ъ возвеселѝ и҆̀хъ вельмѝ: и҆ жєны̀ и҆́хъ и҆ ча҄да и҆́хъ ра́довахѹсѧ, и҆ слы́шано бы́сть весе́лїе то̀ во ї҆ер҇ли́мѣ и҆здале́ча.

⁴⁴И҆ поста́виша въ де́нь то́й мѹже́й над̾ сокро́вищными храни҄лищи, на нача́тки и҆ десѧти҄ны, и҆ да собира́ютъ си́ми нача́лниками ѿ градѡ́въ ча҄сти свѧще́нникѡмъ и҆ леѵі́тѡмъ, ѩ҆́кѡ весе́лїе бѣ̀ во ї҆ѹде́и, во свѧще́нницѣхъ и҆ въ леѵі́тѣхъ предстоѧ́щихъ,

⁴⁵и҆ стрежа́хѹ стра́жѹ бг҃а своегѡ̀, и҆ хране́нїе ѡ҆чище́нїѧ, и҆ пѣвцє́въ и҆ две́рникѡвъ, по повелѣ́нїю даві́да и҆ соломѡ́на сы́на є҆гѡ̀.

⁴⁶ѩ҆́кѡ во дни҄ даві́дѡвы а҆са́фъ ѿ нача́ла пе́рвый въ пѣвцѣ́хъ и҆ въ пѣ́снехъ и҆ хвале́нїи бг҃ѹ,

⁴⁷и҆ ве́сь ї҆и҃ль во дни҄ зорова́велѧ и҆ во дни҄ неемі́и даѧ́хѹ ѡ҆бро́къ пѣвцє́мъ и҆ две́рникѡмъ ѿ днѐ до днѐ и҆ ѡ҆свѧща́хѹ леѵі́тѡмъ, леѵі́ти же ѡ҆свѧща́хѹ сыновѡ́мъ а҆арѡ҄нимъ.