Read Библия Церковнославянская Неемі́и 3 Bible Online

Неемі́и 3 - Библия Церковнославянская bible

Неемі́и 3

¹И҆ воста̀ є҆лїасѹ́въ свѧще́нникъ вели́кїй и҆ бра́тїѧ є҆гѡ̀ свѧще́нницы, и҆ созда́ша врата̀ ѡ҆́вчаѧ: сі́и ѡ҆свѧти́ша и҆̀хъ и҆ поста́виша двє́ри и҆́хъ и҆ да́же до столпа̀ ста̀ лакѡ́тъ ѡ҆свѧти́ша и҆̀хъ, да́же до столпа̀ а҆намеи́лѧ.

²И҆ бли́з̾ є҆гѡ̀ созида́ша мѹ́жїе ї҆ерїхѡ́нстїи, и҆ бли́з̾ и҆́хъ созида̀ закхѹ́ръ сы́нъ а҆мані́инъ.

³Врата́ же ры҄бнаѧ созида́ша сы́нове а҆сана́євы: сі́и покры́ша и҆̀хъ и҆ поста́виша двє́ри и҆́хъ и҆ завѡ́ры и҆́хъ и҆ верєѝ и҆́хъ.

⁴И҆ бли́з̾ и҆́хъ созида́ше и҆з̾ рамѡ́ѳы сы́нъ ѹ҆рі́инъ, сы́на а҆ккѡ́сова: и҆ бли́з̾ є҆гѡ̀ созида́ше мосолла́мъ сы́нъ варахі́инъ, сы́на мазеви́лѧ: и҆ бли́зъ и҆́хъ созида́ше садѡ́къ сы́нъ ваана́евъ:

⁵и҆ бли́з̾ и҆́хъ созида́ша ѳекѡі́ми, си́льнїи же и҆́хъ не положи́ша вы́и своеѧ̀ въ дѣ́ло гд҇а бг҃а своегѡ̀.

⁶И҆ врата̀ ста҄раѧ созида́ше ї҆ѡїда̀ сы́нъ фасе́ковъ и҆ месѹлла́мъ сы́нъ васѡді́евъ: ті́и покры́ста и҆̀хъ и҆ поста́виста двє́ри и҆́хъ и҆ завѡ́ры и҆ верєѝ и҆́хъ.

⁷И҆ бли́з̾ и҆́хъ созида́ша малті́а гаваѡні́тинъ и҆ є҆ѵарѡ́нъ мирѡнѡѳі́тъ, мѹ́жїе ѿ гаваѡ́на и҆ ма́сфы, да́же до престо́ла кнѧ́зѧ (и҆́же бы́сть) ѡ҆б̾ ѡ҆́нъ по́лъ рѣкѝ.

⁸И҆ бли́з̾ є҆гѡ̀ созида̀ ѻ҆зїи́лъ сы́нъ а҆рахі́евъ злата́рь: и҆ бли́з̾ є҆гѡ̀ созида̀ а҆нані́а сы́нъ рѡкеі́ма, и҆ возста́виша ї҆ер҇ли́мъ да́же до стѣны̀ широ́кїѧ.

⁹И҆ бли́з̾ и҆́хъ созида́ше рафаі́а сы́нъ сѹ́ринъ, нача́лникъ полови́ны ѡ҆кре́стныѧ страны̀ ї҆ер҇ли́мли.

¹⁰И҆ бли́з̾ и҆́хъ созида́ше ї҆еде́а сы́нъ є҆рѡма́фовъ, и҆ проти́вѹ до́мѹ є҆гѡ̀: и҆ бли́з̾ є҆гѡ̀ созида̀ а҆ттѹ́ѳъ сы́нъ а҆савані́инъ.

¹¹И҆ вторѹ́ю ча́сть созида́ше мелхі́а сы́нъ и҆ра́мовъ и҆ а҆сѹ́въ сы́нъ фаа́ѳъ-мѡа́вль, и҆ да́же до столпа̀ пе́щнагѡ.

¹²И҆ бли́з̾ є҆гѡ̀ созида́ше саллѹ́мъ сы́нъ а҆ллѡи́совъ, нача́лникъ полови́ны страны̀ ѡ҆кре́стныѧ ї҆ер҇ли́мли, то́й и҆ дщє́ри є҆гѡ̀.

¹³Врата̀ ю҆до́ли созида́ша а҆нѹ́нъ и҆ ѡ҆бита́ющїи въ занѡ́нѣ: ті́и созда́ша и҆̀хъ и҆ поста́виша двє́ри и҆́хъ и҆ завѡ́ры и҆́хъ и҆ верєѝ и҆́хъ, и҆ ты́сѧща лакѡ́тъ въ стѣнѣ̀ да́же до вра́тъ гно́йныхъ.

¹⁴И҆ врата̀ гнѡ́йнаѧ созида́ше мелхі́а сы́нъ риха́вль, нача́лникъ ѡ҆кре́стныѧ страны̀ виѳакра́мскїѧ, то́й и҆ сы́нове є҆гѡ̀, и҆ покры́ша и҆̀хъ и҆ поста́виша двє́ри и҆́хъ и҆ завѡ́ры и҆́хъ и҆ верєѝ и҆́хъ.

¹⁵И҆ врата̀ и҆сто́чника созида́ше соломѡ́нъ сы́нъ халезе́овъ, нача́лникъ страны̀ масфы̀: то́й созда̀ и҆̀хъ и҆ покры̀ и҆̀хъ, и҆ поста́ви двє́ри и҆́хъ и҆ завѡ́ры и҆́хъ и҆ верєѝ и҆́хъ, и҆ стѣ́нѹ кѹпѣ́ли сїлѡа́мли ко вертогра́дѹ царе́вѹ и҆ да́же до степе́ней низходѧ́щихъ ѿ гра́да даві́дова.

¹⁶По не́мже созида́ше неемі́а сы́нъ завѹ́ховъ, нача́лникъ полови́ны страны̀ виѳсѹ́ровы, да́же до вертогра́да гро́ба даві́дова и҆ да́же до кѹпѣ́ли ѹ҆стро́еныѧ и҆ да́же до до́мѹ си́льныхъ.

¹⁷По не́мъ созида́ша леѵі́ти, раѹ́мъ сы́нъ ванаи́мль: по не́мъ созида́ше а҆саві́а, нача́лникъ полови́ны страны̀ кеїлы̀ на странѣ̀ свое́й,

¹⁸и҆ по не́мъ созида́ша бра́тїѧ и҆́хъ, вене́й сы́нъ и҆нада́довъ, нача́лникъ полови́ны ѡ҆кре́стныѧ страны̀ кеїлы̀.

¹⁹И҆ созида́ше бли́з̾ є҆гѡ̀ а҆зѹ́ръ сы́нъ ї҆исѹ́совъ, нача́лникъ масфы̀, мѣ́рѹ вторѹ́ю столпа̀ восхо́да каса́ющагѡсѧ ѹ҆́глѹ.

²⁰И҆ по не́мъ созида́ше варѹ́хъ, сы́нъ завѹ́евъ, мѣ́рѹ вторѹ́ю ѿ ѹ҆́гла да́же до вра́тъ до́мѹ є҆лїасѹ́ва свѧще́нника вели́кагѡ.

²¹По не́мъ созида́ше мерамѡ́ѳъ сы́нъ ѹ҆рі́и, сы́на а҆ккѡ́сова, мѣ́рѹ вторѹ́ю ѿ вра́тъ до́мѹ є҆лїасѹ́вова да́же до конца̀ до́мѹ є҆лїасѹ́вова.

²²И҆ по не́мъ созида́ша свѧще́нницы, мѹ́жїе ѿ по́лѧ (ї҆ѻрда́нска).

²³И҆ по не́мъ созида́ста венїамі́нъ и҆ а҆сѹ́въ проти́вѹ домѡ́въ свои́хъ: и҆ по не́мъ созида́ше а҆зарі́а сы́нъ маасі́евъ, сы́на а҆нані́ина, бли́з̾ до́мѹ своегѡ̀.

²⁴По не́мъ созида́ше ване́й сы́нъ а҆да́довъ мѣ́рѹ вторѹ́ю ѿ до́мѹ а҆зарі́и да́же до ѹ҆́гла и҆ да́же до ѹ҆клоне́нїѧ.

²⁵Фала́хъ сы́нъ ѹ҆за́инъ проти́вѹ ѹ҆́гла и҆ столпа̀ возвыше́нагѡ и҆з̾ до́мѹ царе́ва высо́кѡ, и҆́же во дворѣ̀ темни́чнѣмъ: и҆ по не́мъ фадаі́а сы́нъ форо́совъ.

²⁶И҆ наѳїні́ми ѡ҆бита́ша во ѡ҆фа́лѣ, да́же до вертогра́да вра́тъ во́дныхъ ко восто́кѡмъ и҆ да́же до столпа̀, и҆́же бѣ̀ возвыше́нъ.

²⁷И҆ по ни́хъ созида́ша ѳекѡі́ми мѣ́рѹ вторѹ́ю ѿ страны̀ столпа̀ вели́кагѡ и҆ высо́кагѡ да́же до стѣны̀ ѻ҆флы̀.

²⁸Вы́шше вра́тъ ко́нскихъ созида́ша свѧще́нницы, є҆ди́нъ кі́йждо проти́вѹ до́мѹ своегѡ̀.

²⁹И҆ по не́мъ созида́ше саддѹ́къ сы́нъ є҆мми́рь проти́вѹ до́мѹ своегѡ̀: и҆ по не́мъ созида́ше самаі́а сы́нъ сехені́евъ, стра́жъ вра́тъ восто́чныхъ.

³⁰По не́мъ созида́ше а҆нані́а сы́нъ селемі́евъ и҆ а҆нѡ́мъ сы́нъ селе́фовъ шесты́й мѣ́рѹ вторѹ́ю: по не́мъ созида́ше месѹлла́мъ сы́нъ варахі́евъ проти́вѹ сокро́вищницы своеѧ̀.

³¹По не́мъ созида́ше мелхі́а сы́нъ сарефі́евъ да́же до до́мѹ наѳїні́млѧ и҆ щиты̀ продаю́щихъ, проти́вѹ вра́тъ сѹ́дныхъ, и҆ да́же до го́рницы ѹ҆́гла.

³²И҆ посредѣ̀ вра́тъ ѻ҆́вчихъ созида́ша кѡвачѝ и҆ щитопрода́вцы.