Read Библия Церковнославянская Неемі́и 7 Bible Online

Неемі́и 7 - Библия Церковнославянская bible

Неемі́и 7

¹И҆ бы́сть є҆гда̀ созда́сѧ стѣна̀, и҆ поста́вихъ двє́ри, и҆ сочто́хъ придвє́рники и҆ пѣвцы̀ и҆ леѵі́ты:

²и҆ повелѣ́хъ а҆нані́и бра́тѹ моемѹ̀ и҆ а҆нані́и нача́лникѹ до́мѹ, и҆́же во ї҆ер҇ли́мѣ: то́й бо бѣ̀ ѩ҆́кѡ мѹ́жъ и҆́стиненъ и҆ боѧ́йсѧ бг҃а па́че про́чихъ:

³и҆ реко́хъ и҆́ма: да не ѿве́рзѹтсѧ врата̀ ї҆ер҇ли҄мскаѧ, до́ндеже взы́детъ со́лнце: и҆ є҆щѐ и҆̀мъ бдѧ́щымъ, да заключа́тсѧ врата̀ и҆ засѹ҄нѹта да бѹ́дѹтъ засо́вами: и҆ поста́ви стра́жы ѿ ѡ҆бита́ющихъ во ї҆ер҇ли́мѣ, кі́йждо во стра́жи свое́й и҆ кі́йждо проти́вѹ до́мѹ своегѡ̀.

⁴Гра́дъ же бы́сть широ́къ и҆ вели́къ, и҆ люді́й ма́лѡ въ не́мъ, и҆ не бѧ́хѹ до́мы со́здани.

⁵И҆ дадѐ бг҃ъ въ се́рдце моѐ, и҆ собра́хъ честны́хъ и҆ кнѧзе́й и҆ наро́дъ въ собра́нїе: и҆ ѡ҆брѣто́хъ кни́гѹ сочисле́нїѧ тѣ́хъ, и҆̀же взыдо́ша пе́рвѣе, и҆ ѡ҆брѣто́хъ напи́сано въ не́й:

⁶и҆ ті́и сы́нове страны̀ возше́дшїи ѿ плѣне́нїѧ преселе́нїѧ, и҆̀хже преселѝ навѹходоно́соръ ца́рь вавѷлѡ́нскїй, и҆ возврати́шасѧ во ї҆ер҇ли́мъ и҆ ї҆ѹде́ю, кі́йждо мѹ́жъ во гра́дъ сво́й,

⁷съ зорова́велемъ и҆ ї҆исѹ́сомъ и҆ неемі́ею, а҆за́рїа и҆ веелма̀, наема́нъ, мардохе́й, вааса́нъ, маасфара́ѳъ, є҆́здра, вогѹі́а, ї҆наѹ́мъ, ваана̀, масфа́ръ, мѹ́жїе люді́й ї҆и҃левыхъ:

⁸сы́нове форо́сѡвы двѣ̀ ты́сѧщы сто̀ се́дмьдесѧтъ два̀,

⁹сы́нове сафаті́євы три́ста се́дмьдесѧтъ два̀,

¹⁰сы́нове и҆ра́євы ше́сть сѡ́тъ пѧтьдесѧ́тъ два̀,

¹¹сы́нове фаа́ѳъ-мѡа҄вли сынѡ́въ ї҆исѹ́совыхъ и҆ ї҆ѡа́влихъ двѣ̀ ты́сѧщы ше́сть сѡ́тъ и҆ ѻ҆смьна́десѧть,

¹²сы́нове є҆ла́мѡвы ты́сѧща двѣ́сти пѧтьдесѧ́тъ четы́ри,

¹³сы́нове соѳѳѹ́євы ѻ҆́смь сѡ́тъ четы́редесѧть пѧ́ть,

¹⁴сы́нове заха́нєвы се́дмь сѡ́тъ шестьдесѧ́тъ,

¹⁵сы́нове ванѹі́євы ше́сть сѡ́тъ четы́редесѧть ѻ҆́смь,

¹⁶сы́нове вереі́євы ше́сть сѡ́тъ два́десѧть ѻ҆́смь,

¹⁷сы́нове гета́дѡвы двѣ̀ ты́сѧщы три́ста два́десѧть два̀,

¹⁸сы́нове а҆дѡнїка҄мли ше́сть сѡ́тъ шестьдесѧ́тъ се́дмь,

¹⁹сы́нове вагѹі́євы двѣ̀ ты́сѧщы шестьдесѧ́тъ се́дмь,

²⁰сы́нове и҆дї҄ни ше́сть сѡ́тъ пѧтьдесѧ́тъ четы́ри,

²¹сы́нове а҆ти́рѡвы и҆ сы́нове є҆зекі́євы де́вѧтьдесѧтъ ѻ҆́смь,

²²сы́нове и҆самі́євы три́ста два́десѧть ѻ҆́смь,

²³сы́нове васеі́євы три́ста два́десѧть четы́ри,

²⁴сы́нове а҆рі́фѡвы сто̀ двана́десѧть, сы́нове а҆се́нѡвы двѣ́сти два́десѧть трѝ,

²⁵сы́нове гаваѡ҄ни де́вѧтьдесѧтъ пѧ́ть,

²⁶сы́нове веѳалеї҄мли сто̀ два́десѧть трѝ, сы́нове а҆тѡ́фѡвы пѧтьдесѧ́тъ ше́сть,

²⁷сы́нове а҆наѳѡ́ѳѡвы сто̀ два́десѧть ѻ҆́смь,

²⁸сы́нове а҆замѡ́ѳѡвы, мѹ́жїе ви́ѳѡвы, четы́редесѧть два̀,

²⁹мѹ́жїе карїаѳїарї҄мли, кафі́рѡвы и҆ вирѡ́ѳѡвы се́дмь сѡ́тъ четы́редесѧть трѝ,

³⁰мѹ́жїе а҆ра́ма и҆ гава́а ше́сть сѡ́тъ два́десѧть є҆ди́нъ,

³¹мѹ́жїе махима́сѡвы сто̀ два́десѧть два̀,

³²мѹ́жїе веѳи҄ли и҆ а҆і́євы сто̀ два́десѧть трѝ, мѹ́жїе а҆наві́а дрѹга́гѡ сто̀ пѧтьдесѧ́тъ два̀,

³³сы́нове мегевѡ́сѡвы сто̀ пѧтьдесѧ́тъ ше́сть,

³⁴мѹ́жїе и҆лама́євы ты́сѧща двѣ́сти пѧтьдесѧ́тъ два̀,

³⁵сы́нове и҆ра҄мли три́ста два́десѧть,

³⁶сы́нове ї҆ері́хѡвы три́ста четы́редесѧть пѧ́ть,

³⁷сы́нове лѡ́дѡвы, а҆ді́дѡвы и҆ ѡ҆́нѡвы се́дмь сѡ́тъ два́десѧть є҆ди́нъ,

³⁸сы́нове а҆нані́ни трѝ ты́сѧщы де́вѧть сѡ́тъ три́десѧть:

³⁹свѧще́нницы, сы́нове ї҆ѡда́євы въ домѹ̀ ї҆исѹ́совѣ де́вѧть сѡ́тъ се́дмьдесѧтъ трѝ,

⁴⁰сы́нове є҆мми́рѡвы ты́сѧща пѧтьдесѧ́тъ два̀,

⁴¹сы́нове фассеѹ́рѡвы ты́сѧща двѣ́сти четы́редесѧть се́дмь,

⁴²сы́нове и҆ра́мѡвы ты́сѧща седмьна́десѧть:

⁴³леѵі́ти, сы́нове ї҆исѹ́са кадмїи́льскагѡ ѿ сынѡ́въ ѹ҆дѹи́лихъ се́дмьдесѧтъ четы́ри:

⁴⁴пѣвцы̀, сы́нове а҆са́фѡвы сто̀ два́десѧть ѻ҆́смь:

⁴⁵двє́рницы сы́нове селлѹ҄мли,

⁴⁶сы́нове а҆ти́рѡвы, сы́нове телмѡ҄ни, сы́нове а҆ккѹ́вѡвы, сы́нове а҆ті́тѡвы, сы́нове савї҄ины сто̀ три́десѧть ѻ҆́смь:

⁴⁷наѳїні́ми, сы́нове и҆ла́євы, сы́нове а҆се́фѡвы, сы́нове заваѡ́ѳѡвы,

⁴⁸сы́нове кїра́сѡвы, сы́нове сиса҄їны, сы́нове фадѡ҄ни, сы́нове лава҄ни, сы́нове а҆га́вѡвы, сы́нове а҆кѹ́вѡвы,

⁴⁹сы́нове ѹ҆та́євы, сы́нове кита́рѡвы, сы́нове га́вѡвы, сы́нове селмеі́ни, сы́нове а҆на́нѡвы,

⁵⁰сы́нове садеї҄ны, сы́нове гаа́рѡвы, сы́нове рааї҄ины,

⁵¹сы́нове раасѡ҄ни, сы́нове некѡ́дѡвы,

⁵²сы́нове гиза҄мли, сы́нове ѡ҆́зїны, сы́нове фе́ссѡвы,

⁵³сы́нове висї҄ины, сы́нове меїнѡ́нѡвы, сы́нове нефѡса҄ины,

⁵⁴сы́нове ваквѹ́кѡвы, сы́нове а҆хі́фѡвы, сы́нове а҆рѹ҄рины,

⁵⁵сы́нове васалѡ́ѳѡвы, сы́нове мїда́євы, сы́нове а҆даса҄ни,

⁵⁶сы́нове варкѹ́євы, сы́нове сїсара́ѳѡвы, сы́нове ѳима́євы,

⁵⁷сы́нове нїсї҄ины, сы́нове а҆ті́фѡвы: сы́нове рабѡ́въ соломѡ́новыхъ,

⁵⁸сы́нове сѹтє́ины, сы́нове сафара́тѡвы, сы́нове ферї҄дины,

⁵⁹сы́нове лели҄лины, сы́нове доркѡ҄ни, сы́нове гадаи҄ли, сы́нове фараха́сѡвы,

⁶⁰сы́нове саваи҄ни, сы́нове и҆мми҄ни:

⁶¹всѝ наѳїні́ми и҆ сы́нове слѹ́гъ соломѡ́новыхъ три́ста де́вѧтьдесѧтъ два̀.

⁶²И҆ сі́и взыдо́ша ѿ ѳелме́ѳа, ѳеласа́ръ, харѹ́въ, и҆рѡ́нъ, ї҆еми́ръ, и҆ не мого́ша сказа́ти домѡ́въ ѻ҆те́чествъ свои́хъ и҆ сѣ́мене своегѡ̀, ѿ ї҆и҃лѧ ли бы́ша:

⁶³сы́нове далеа́євы, сы́нове вѹа́євы, сы́нове тѡвї҄ины, сы́нове некѡда́євы, ше́сть сѡ́тъ четы́редесѧть два̀:

⁶⁴и҆ ѿ свѧщє́нникъ сы́нове а҆ві́євы, сы́нове а҆ккѡ́сѡвы, сы́нове верзелла҄ины, ѩ҆́кѡ поѧ́ша ѿ дще́рей верзелла́а галааді́тина жєны̀ и҆ прозва́шасѧ по и҆́мени и҆́хъ.

⁶⁵Сі́и и҆ска́ша писа́нїѧ своегѡ̀ родосло́вїѧ, и҆ не ѡ҆брѣто́ша, и҆ и҆зве́ржени сѹ́ть ѿ свѧще́нства.

⁶⁶Рече́ же а҆ѳерсаѳа̀ и҆̀мъ, да не ѩ҆дѧ́тъ ѿ ст҃а҄ѧ ст҃ы́хъ, до́ндеже воста́нетъ свѧще́нникъ и҆з̾ѧвлѧ́ѧй.

⁶⁷И҆ бы́сть ве́сь собо́ръ є҆динодѹ́шнѡ а҆́ки четы́редесѧть двѣ̀ ты́сѧщы три́ста шестьдесѧ́тъ,

⁶⁸кромѣ̀ рабѡ́въ и҆́хъ и҆ рабы́нь и҆́хъ, и҆́хже бѧ́хѹ се́дмь ты́сѧщъ три́ста три́десѧть се́дмь: и҆ пѣвцы̀ и҆ пѣвни҄цы двѣ́сти три́десѧть ше́сть.

⁶⁹Ко́ни (и҆́хъ) се́дмь сѡ́тъ три́десѧть ше́сть, мскѝ и҆́хъ двѣ́сти четы́редесѧть пѧ́ть, велблю́ды и҆́хъ четы́ре ста҄ три́десѧть пѧ́ть, ѻ҆слы̀ и҆́хъ ше́сть ты́сѧщъ се́дмь сѡ́тъ два́десѧть.

⁷⁰И҆ ѿ ча́сти нача́лникѡвъ ѻ҆те́чествъ да́ша въ дѣ́ло а҆ѳерсаѳѣ̀, да́ша въ сокро́вище златы́хъ ты́сѧщѹ, фїа҄лъ пѧтьдесѧ́тъ и҆ ри́зъ жре́ческихъ три́десѧть.

⁷¹И҆ ѿ нача́лникѡвъ ѻ҆те́чествъ да́ша въ сокро́вище дѣ́ла зла́та дра́хмъ два́десѧть ты́сѧщъ и҆ сребра̀ мна҄съ двѣ̀ ты́сѧщы и҆ три́ста.

⁷²И҆ да́ша про́чїи лю́дїе зла́та дра́хмъ два́десѧть ты́сѧщъ и҆ сребра̀ мна҄съ двѣ̀ ты́сѧщы и҆ двѣ́сти, и҆ ри́зъ свѧще́нническихъ шестьдесѧ́тъ се́дмь.

⁷³И҆ сѣдо́ша свѧще́нницы и҆ леѵі́ти и҆ двє́рницы и҆ пѣвцы̀ и҆ про́чїй наро́дъ и҆ наѳїні́ми и҆ ве́сь ї҆и҃ль во градѣ́хъ свои́хъ.