Read Библия Церковнославянская в҃ е҆́здры 2 Bible Online

в҃ е҆́здры 2 - Библия Церковнославянская bible

в҃ е҆́здры 2

¹Ца́рствѹющѹ кѵ́рѹ пе́рсскомѹ пе́рвагѡ лѣ́та, во и҆сполне́нїе сло́ва гд҇нѧ ѹ҆сты҄ ї҆еремі́иными,

²воздви́же гд҇ь дѹ́хъ кѵ́ра царѧ̀ пе́рсскагѡ, и҆ проповѣ́да во все́мъ ца́рствѣ свое́мъ, и҆ кѹ́пнѡ писа́ньми, глаго́лѧ:

³сїѧ҄ глаго́летъ кѵ́ръ ца́рь пе́рсскїй: (гд҇ь) менѐ поста́ви царѧ̀ вселе́ннѣй, гд҇ь ї҆и҃левъ, гд҇ь вы́шнїй,

⁴и҆ назна́мена мнѣ̀ созда́ти є҆мѹ̀ до́мъ во ї҆ер҇ли́мѣ, и҆́же во ї҆ѹде́и:

⁵а҆́ще ѹ҆̀бо кто̀ є҆́сть въ ва́съ ѿ ѩ҆зы́ка є҆гѡ̀, да бѹ́детъ гд҇ь є҆гѡ̀ съ ни́мъ: и҆ возше́дъ во ї҆ер҇ли́мъ, и҆̀же во ї҆ѹде́и, да сози́ждетъ до́мъ гд҇а ї҆и҃лева: се́й гд҇ь, и҆́же всели́сѧ во ї҆ер҇ли́мѣ:

⁶є҆ли́цы ѹ҆̀бо ѡ҆́крестъ мѣ́стъ ѡ҆бита́ютъ, да помо́гѹтъ є҆мѹ̀, и҆̀же сѹ́ть на мѣ́стѣ то́мъ, и҆ зла́томъ и҆ сребро́мъ,

⁷даѧ́нїемъ съ конмѝ и҆ скѡты̀ и҆ и҆ны́ми по ѡ҆бѣща́нїю предлага́емыми во свѧти́лище гд҇не, є҆́же во ї҆ер҇ли́мѣ.

⁸И҆ стоѧ́щїи нача҄лницы колѣ́нѡмъ ѻ҆те́чествъ ї҆ѹ́диныхъ и҆ колѣ́на венїамі́нова, и҆ свѧще́нницы и҆ леѵі́ти, и҆ всѝ, и҆́хже дѹ́хъ воздви́же гд҇ь взы́ти, созда́ти до́мъ гд҇ень, и҆́же во ї҆ер҇ли́мѣ,

⁹и҆ и҆̀же ѡ҆́крестъ и҆́хъ, помого́ша во все́мъ зла́томъ и҆ сребро́мъ, конмѝ и҆ скѡты̀ и҆ ѡ҆бѣ́тами мно́гими ѕѣлѡ̀, и҆́хже чѹ́вство воздви́жено бы́сть.

¹⁰И҆ кѵ́ръ ца́рь и҆знесѐ свѧщє́нныѧ сосѹ́ды гд҇ни, и҆̀хже пренесѐ навѹходоно́соръ (ца́рь вавѷлѡ́нскїй) и҆з̾ ї҆ер҇ли́ма и҆ поста́ви и҆̀хъ во їдѡлницѣ свое́й:

¹¹и҆ и҆знесѐ ты҄ѧ кѵ́ръ ца́рь пе́рсскїй и҆ предадѐ ѧ҆̀ мїѳрїда́тѹ сокровищехрани́телю своемѹ̀,

¹²то́й же предадѐ сасавасса́рѹ власти́телю ї҆ѹде́йскомѹ.

¹³И҆́хже сїѐ число̀ бѣ̀: возлива́лницъ златы́хъ ты́сѧща, и҆ возлива́лницъ сре́брѧныхъ ты́сѧща, кади́лницъ сре́брѧныхъ два́десѧть де́вѧть, фїа҄лъ златы́хъ три́десѧть, сре́брѧныхъ двѣ̀ ты́сѧщы четы́ре ста҄ и҆ де́сѧть, и҆ и҆ны́хъ сосѹ́дѡвъ ты́сѧща:

¹⁴всѣ́хъ же сосѹ́дѡвъ пренесе́ныхъ златы́хъ и҆ сре́брѧныхъ пѧ́ть ты́сѧщъ четы́ре ста҄ шестьдесѧ́тъ де́вѧть.

¹⁵Принесе́ни же сасавасса́ромъ вкѹ́пѣ съ тѣ́ми, и҆̀же ѿ плѣне́нїѧ и҆з̾ вавѷлѡ́на во ї҆ер҇ли́мъ.

¹⁶Во временѣ́хъ же а҆ртаѯе́рѯа царѧ̀ пе́рсскагѡ, восписа́ша є҆мѹ̀ на ѡ҆бита́ющихъ во ї҆ѹде́и и҆ ї҆ер҇ли́мѣ ви́лемосъ и҆ мїѳрїда́тъ, и҆ таве́ллїй и҆ раѳѵ́мъ, и҆ веелте́ѳмъ и҆ саме́ллїй писе́цъ, и҆ про́чїи соѹчине́ннїи, ѡ҆бита́ющїи въ самарі́и и҆ во и҆ны́хъ мѣ́стѣхъ, нижепи́санное посла́нїе:

¹⁷царю̀ а҆ртаѯе́рѯѹ господи́нѹ ѻ҆́троцы твоѝ, раѳѵ́мъ писе́цъ слѹ́чаєвъ и҆ саме́ллїй писе́цъ, и҆ про́чїи ѿ совѣ́та и҆́хъ и҆ сѹдїи҄, и҆̀же въ кїлисѷрі́и и҆ фїнїкі́и:

¹⁸и҆ нн҃ѣ зна́емо да бѹ́детъ господи́нѹ царю̀, ѩ҆́кѡ ї҆ѹде́є, и҆̀же взыдо́ша ѿ ва́съ, къ на́мъ прише́дшїи во ї҆ер҇ли́мъ гра́дъ ѿме́тный и҆ стропти́вый, созида́ютъ тѡ́ржища є҆гѡ̀, и҆ составлѧ́ютъ стѣ́ны є҆гѡ̀, и҆ хра́мъ воздвиза́ютъ:

¹⁹а҆́ще ѹ҆̀бо гра́дъ то́й сози́ждетсѧ и҆ стѣ́ны совершє́ны бѹ́дѹтъ, не то́кмѡ да́ни не потерпѧ́тъ даѧ́ти, но и҆ царє́мъ воспроти́вѧтсѧ:

²⁰а҆ поне́же дѣ́йствѹютсѧ ѩ҆̀же ѡ҆ хра́мѣ, пра́вѡ бы́ти разсѹжда́емъ не презрѣ́ти сегѡ̀,

²¹но зна́емо сотвори́ти господи́нѹ на́шемѹ царю̀, да а҆́ще возмни́тсѧ тебѣ̀, да взы́щетсѧ въ кни́гахъ ѻ҆тє́цъ твои́хъ,

²²и҆ ѡ҆брѧ́щеши въ лѣтопи́сцѣхъ пи́сано ѡ҆ тѣ́хъ, и҆ позна́еши, ѩ҆́кѡ гра́дъ то́й бѧ́ше ѿме́тникъ и҆ царе́й и҆ гра́ды смѹща́ющь,

²³и҆ ї҆ѹде́є ѿстѹ҄пницы, и҆ ѡ҆полче́нїе сотворѧ́юще въ не́мъ ѿ вѣ́ка, є҆ѧ́же ра́ди вины̀ и҆ гра́дъ то́й ѡ҆пѹстоше́нъ бы́сть:

²⁴нн҃ѣ ѹ҆̀бо зна́емо тѝ твори́мъ, господи́не царю̀ ѩ҆́кѡ а҆́ще гра́дъ се́й созда́нъ бѹ́детъ и҆ стѣ́ны є҆гѡ̀ возста́влєны бѹ́дѹтъ, и҆схо́дѹ тебѣ̀ ктомѹ̀ не бѹ́детъ въ кїлисѷрі́ю и҆ фїнїкі́ю.

²⁵Тогда̀ восписа̀ ца́рь раѳѵ́мѹ пи́шѹщемѹ слѹча́ємаѧ и҆ веелте́ѳмѹ и҆ саме́ллїю писцѹ̀ и҆ про́чымъ, соѹчинє́нымъ и҆ ѡ҆бита́ющымъ въ самарі́и и҆ сѷрі́и и҆ фїнїкі́и, сїѧ҄ пи҄санаѧ:

²⁶что́хъ посла́нїе, є҆́же посла́сте ко мнѣ̀: повелѣ́хъ ѹ҆̀бо взыска́ти, и҆ ѡ҆брѣ́тено є҆́сть, ѩ҆́кѡ гра́дъ то́й є҆́сть ѿ нача́ла царє́мъ противлѧ́ющьсѧ,

²⁷и҆ человѣ́цы ѿстѹплє́нїѧ и҆ ѡ҆полче́нїе въ не́мъ сотворѧ́юще, и҆ ца́рїе крѣ́пцы и҆ же́стоцы бы́ша во ї҆ер҇ли́мѣ, ѡ҆блада́юще и҆ да҄ни налага́юще на кїлисѷрі́ю и҆ фїнїкі́ю:

²⁸нн҃ѣ ѹ҆̀бо повелѣ́хъ возбрани́ти человѣ́кѡмъ ѡ҆́нымъ созида́ти гра́дъ и҆ пред̾ѹсмотрѧ́ти, да ничто́же бо́лѣ си́хъ сотворѧ́тъ,

²⁹ни да происхо́дѧтъ бо мнѡ́жайшаѧ лѹка҄вства, во є҆́же царє́мъ трѹ́дъ твори́ти.

³⁰Тогда̀ проче́тше ѿ царѧ̀ а҆ртаѯе́рѯа напи҄саннаѧ раѳѵ́мъ и҆ саме́ллїй писе́цъ и҆ съ ни́ми соѹчине́ннїи, впрѧ́гше потща́ннѡ прїидо́ша во ї҆ер҇ли́мъ съ кѡ́нники и҆ наро́днымъ ѡ҆полче́нїемъ,

³¹и҆ нача́ша созида́ющихъ ѹ҆держава́ти: и҆ ѹ҆праздни́сѧ созида́нїе хра́ма, и҆́же во ї҆ер҇ли́мѣ, да́же до втора́гѡ лѣ́та ца́рства да́рїа царѧ̀ пе́рсскагѡ.