Read Библия Церковнославянская в҃ е҆́здры 3 Bible Online

в҃ е҆́здры 3 - Библия Церковнославянская bible

в҃ е҆́здры 3

¹И҆ воцари́всѧ да́рїй сотворѝ ве́черю вели́кѹ всѣ҄мъ, и҆̀же под̾ ни́мъ, и҆ всѣ҄мъ, и҆̀же ѿ до́мѹ ро́да є҆гѡ̀, и҆ всѣ҄мъ вельмо́жамъ ми҄дскимъ и҆ пє́рсскимъ,

²и҆ всѣ҄мъ сатра́пѡмъ, и҆ намѣ́стникѡмъ, и҆ воево́дамъ, и҆̀же под̾ ни́мъ ѿ ї҆нді́и да́же до є҆ѳїо́пїи на сто̀ два́десѧть се́дмь воево́дствъ.

³И҆ є҆гда̀ ѩ҆до́ша и҆ пи́ша, и҆ насы́тившесѧ возврати́шасѧ, тогда̀ да́рїй ца́рь вни́де въ ло́жницѹ свою̀, и҆ поспа̀ и҆ возбѹди́сѧ.

⁴Тогда̀ трїѐ ю҆́нѡши тѣле́снїи стра́жы, и҆̀же стрежа́хѹ тѣ́ло царе́во, реко́ша дрѹ́гъ ко дрѹ́гѹ:

⁵рце́мъ кі́йждо ѿ на́съ є҆ди́но сло́во: и҆ и҆́же превозмо́жетъ, и҆ є҆гѡ́же ѩ҆ви́тсѧ сло́во мѹдрѣ́йше дрѹга́гѡ, да́стъ є҆мѹ̀ ца́рь да́рїй да́ры вели҄кїѧ и҆ по́чєсти вели҄кїѧ,

⁶и҆ порфѵ́рою ѡ҆дѣ́ѧнъ бѹ́детъ, и҆ во зла́тѣ пи́ти и҆ на зла́тѣ спа́ти, и҆ колесни́цѹ златоѹ́зднѹ, и҆ кїда́ръ вѷссо́нный, и҆ гри́внѹ ѡ҆́крестъ вы́и,

⁷и҆ вторы́й сѧ́детъ по да́рїи ра́ди премѹ́дрости своеѧ̀, и҆ сро́дникъ да́рїевъ нарече́тсѧ.

⁸И҆ тогда̀ написа́вше кі́йждо своѐ сло́во запеча́таша и҆ подложи́ша под̾ возгла́вїе да́рїа царѧ̀,

⁹и҆ реко́ша: є҆гда̀ воста́нетъ ца́рь, дадѹ́тъ є҆мѹ̀ писа́нїе, и҆ є҆го́же разсѹ́дитъ ца́рь и҆ трѝ вельмѡ́жи пе́рсстїи, ѩ҆́кѡ сло́во є҆гѡ̀ мѹдрѣ́йше є҆́сть, томѹ̀ да да́стсѧ побѣ́да, ѩ҆́коже пи́сано є҆́сть,

¹⁰Е҆ди́нъ написа̀: сильнѣ́е є҆́сть вїно̀,

¹¹Дрѹгі́й написа̀: сильнѣ́е є҆́сть ца́рь.

¹²Тре́тїй написа̀: сильнѣ́е сѹ́ть жєны̀, па́че же всѣ́хъ побѣжда́етъ и҆́стина.

¹³Е҆гда́ же воста̀ ца́рь, взе́мше писа҄нїѧ да́ша є҆мѹ̀, и҆ прочтѐ.

¹⁴И҆ посла́въ созва̀ всѣ́хъ вельмо́жей пе́рсскихъ и҆ ми́дскихъ и҆ сатра́пѡвъ, и҆ воево́дъ и҆ намѣ́стникѡвъ и҆ ѵ҆па́тѡвъ,

¹⁵и҆ сѣ́де въ совѣ́тнѣй пала́тѣ, и҆ прочте́но бы́сть писа́нїе пред̾ ни́ми.

¹⁶И҆ речѐ: призови́те ю҆́ношъ, и҆ ті́и и҆звѣстѧ́тъ словеса̀ своѧ҄. И҆ при́звани бы́ша и҆ внидо́ша.

¹⁷И҆ речѐ и҆̀мъ: возвѣсти́те на́мъ ѡ҆ тѣ́хъ, ѩ҆̀же пи҄сана сѹ́ть. И҆ нача̀ пе́рвый, и҆́же глаго́ла ѡ҆ крѣ́пости вїна̀,

¹⁸и҆ речѐ си́це: ѽ, мѹ́жїе, ко́ль премога́етъ вїно̀! всѣ́хъ человѣ҄къ пїю́щихъ є҆го̀ прельща́етъ:

¹⁹ѹ҆́мъ царе́въ и҆ си́рагѡ твори́тъ ѹ҆́мъ є҆ди́нъ, и҆ раба̀ и҆ свобо́днагѡ, и҆ ѹ҆бо́гагѡ и҆ бога́тагѡ,

²⁰и҆ всѧ́къ ѹ҆́мъ превраща́етъ въ безстра́шїе и҆ весе́лїе, и҆ не па́мѧтѹетъ всѧ́кїѧ печа́ли и҆ всѧ́кагѡ до́лга:

²¹и҆ всѧ҄ сердца̀ сотворѧ́етъ бога҄та, и҆ не па́мѧтѹетъ царѧ̀, нижѐ вельмо́жи, и҆ всѧ҄ по тала́нтѡмъ глаго́лати твори́тъ:

²²и҆ не па́мѧтѹютъ, є҆гда̀ пїю́тъ, ѹ҆гожда́ти дрѹгѡ́мъ и҆ бра́тїи, и҆ не мно́гѡ пото́мъ и҆звлача́тъ мечы̀:

²³и҆ є҆гда̀ ѿ вїна̀ воста́нѹтъ, не по́мнѧтъ, ѩ҆̀же сотвори́ша:

²⁴ѽ, мѹ́жїе не премога́етъ ли вїно̀, є҆́же та́кѡ понѹжда́етъ твори́ти; И҆ ѹ҆молча̀ глаго́лавый си́це.