Read Библия Церковнославянская в҃ е҆́здры 6 Bible Online

в҃ е҆́здры 6 - Библия Церковнославянская bible

в҃ е҆́здры 6

¹Во второ́е же лѣ́то ца́рства да́рїева про҇ро́чества а҆гге́й и҆ заха́рїа сы́нъ а҆́ддѡвъ, про҇ро́цы, ко ї҆ѹде́ємъ, и҆̀же во ї҆ѹде́и и҆ во ї҆ер҇ли́мѣ, и҆́менемъ гд҇а бг҃а ї҆и҃лєва къ ни҄мъ.

²Тогда̀ ста́въ зорова́вель сы́нъ салаѳїи́левъ и҆ ї҆исѹ́съ сы́нъ ї҆ѡседе́ковъ, нача́ста созида́ти до́мъ гд҇ень, и҆́же во ї҆ер҇ли́мѣ, сѹ́щымъ съ ни́ми про҇ро́кѡмъ гд҇нимъ помага́ющымъ и҆̀мъ.

³Въ то̀ вре́мѧ прїи́де къ ни҄мъ сїсі́ннїй воево́да сѷрі́йскїй и҆ фїнїкі́йскїй и҆ саѳравѹза́нъ и҆ дрѹ́зїе є҆гѡ̀, и҆ реко́ша и҆̀мъ:

⁴чі́имъ повелѣ́нїемъ вы̀ до́мъ се́й созида́ете, и҆ кро́въ се́й, и҆ и҆́на всѧ҄ соверша́ете; и҆ кто̀ сѹ́ть строи́телїе, и҆̀же сїѧ҄ созида́ютъ,

⁵И҆ и҆мѣ́ша бл҃года́ть посѣще́нїѧ бы́вшагѡ на плѣне́нїе ѿ гд҇а старѣ҄йшины ї҆ѹде́йстїи:

⁶и҆ не возбрани́ша и҆̀мъ созида́ти, до́ндеже возвѣсти́тсѧ да́рїю ѡ҆ си́хъ и҆ ѿвѣща́но бѹ́детъ.

⁷Ѡ҆́бразъ же посла́нїѧ, є҆́же писа́ша да́рїю и҆ посла́ша: сїсі́ннїй воево́да сѷрі́йскїй и҆ фїнїкі́йскїй и҆ саѳравѹза́нъ и҆ дрѹ́зїе, и҆̀же въ сѷрі́и и҆ фїнїкі́и воевѡ́ды, царю̀ да́рїю ра́доватисѧ:

⁸всѧ҄ зна́єма да бѹ́дѹтъ господи́нѹ на́шемѹ царю̀, ѩ҆́кѡ прише́дше во странѹ̀ ї҆ѹде́йскѹ и҆ вше́дше во ї҆ер҇ли́мъ гра́дъ, ѡ҆брѣто́хомъ ѿ плѣне́нїѧ старѣ́йшинъ ї҆ѹде́йскихъ во ї҆ер҇ли́мѣ гра́дѣ

⁹созида́ющихъ до́мъ гд҇ѹ вели́къ, но́въ ѿ ка́меней те́саныхъ драги́хъ, полага́юще древа̀ въ стѣна́хъ,

¹⁰и҆ дѣла̀ та҄ съ прилѣжа́нїемъ творѧ́тсѧ, и҆ преспѣва́етъ дѣ́ло въ рѹка́хъ и҆́хъ и҆ во все́й сла́вѣ и҆ прилѣжа́нїи соверша́етсѧ:

¹¹тогда̀ вопроси́хомъ старѣ́йшинъ ѻ҆́ныхъ, глаго́люще: чі́имъ повелѣ́нїемъ вы̀ созида́ете до́мъ се́й и҆ дѣла̀ та҄ ѡ҆снова́ете;

¹²вопроси́хомъ ѹ҆̀бо и҆̀хъ, да вѣ́домо сотвори́мъ тебѣ̀ и҆ напи́шемъ тѝ человѣ҄къ предста́телей, и҆ и҆ме́нъ писа́нїѧ и҆спроси́хомъ ѿ ѻ҆́ныхъ предста́телей:

¹³ті́и же ѿвѣща́ша на́мъ, глаго́люще: мы̀ є҆смы̀ рабѝ гд҇а, и҆́же сотворѝ не́бо и҆ зе́млю,

¹⁴и҆ созида́шесѧ се́й до́мъ пре́жде лѣ́тъ мно́гихъ ѿ царѧ̀ ї҆и҃лева вели́кагѡ и҆ крѣ́пкагѡ, и҆ соверши́сѧ,

¹⁵и҆ поне́же ѻ҆тцы̀ на́ши прогнѣ́вавше согрѣши́ша къ бг҃ѹ ї҆и҃левѹ нб҇номѹ, предадѐ и҆̀хъ въ рѹ́ки навѹходоно́сора царѧ̀ вавѷлѡ́нскагѡ, царѧ̀ халде́йска,

¹⁶до́мъ же то́й разори́вше сожго́ша и҆ люді́й плѣни́ша въ вавѷлѡ́нъ:

¹⁷въ пе́рвое же лѣ́то ца́рствѹющѹ кѵ́рѹ царю̀ над̾ страно́ю вавѷлѡ́нскою, писа̀ ца́рь кѵ́ръ до́мъ то́й созида́ти,

¹⁸и҆ свѧщє́нныѧ сосѹ́ды златы҄ѧ и҆ срє́брѧныѧ, и҆̀хже и҆знесѐ навѹходоно́соръ и҆з̾ до́мѹ, и҆́же во ї҆ер҇ли́мѣ, и҆ поста́ви ѧ҆̀ во свое́мъ ка́пищи, па́ки и҆знесѐ та҄ кѵ́ръ ца́рь ѿ хра́ма, и҆́же въ вавѷлѡ́нѣ и҆ предадѐ и҆̀хъ зорова́велю и҆ санавасса́рѹ воево́дѣ,

¹⁹и҆ повелѣ́но бы́сть є҆мѹ̀ ѿнестѝ всѧ҄ сїѧ҄ сосѹ́ды и҆ возложи́ти во хра́мъ, и҆́же во ї҆ер҇ли́мѣ, и҆ хра́мъ гд҇ень се́й созида́ти на мѣ́стѣ є҆гѡ̀:

²⁰тогда̀ санавасса́ръ ѻ҆́ный прише́дъ, положѝ ѡ҆снова҄нїѧ до́мѹ гд҇нѧ, и҆́же во ї҆ер҇ли́мѣ, и҆ ѿ ѻ҆́нагѡ да́же донн҃ѣ зи́ждемый не прїѧ̀ соверше́нїѧ:

²¹нн҃ѣ ѹ҆̀бо, а҆́ще ѹ҆го́дно тебѣ̀, ѽ, царю̀, да пои́щетсѧ въ ца́рскихъ книгохрани́лницахъ кѵ́ровыхъ (ѩ҆̀же въ вавѷлѡ́нѣ),

²²и҆ а҆́ще ѡ҆брѣ́тено бѹ́детъ съ повелѣ́нїемъ кѵ́ра царѧ̀ бы́вшее строе́нїе до́мѹ гд҇нѧ, и҆́же во ї҆ер҇ли́мѣ, и҆ сѹ́дитсѧ ѿ господи́на царѧ̀ на́шегѡ, да возвѣсти́тсѧ ѡ҆ тѣ́хъ на́мъ.

²³Тогда̀ ца́рь да́рїй повелѣ̀ и҆ска́ти въ ца́рскихъ книгохрани́лницахъ сѹ́щихъ въ вавѷлѡ́нѣ, и҆ ѡ҆брѣ́тено бы́сть во є҆квата́нѣхъ, во гра́дѣ сѹ́щемъ во странѣ̀ миді́йстѣй, мѣ́сто є҆ди́но (въ лѣтопи́сцѣ), въ не́мже напи҄сана бѧ́хѹ сїѧ҄:

²⁴въ лѣ́то пе́рвое ца́рствѹющѹ кѵ́рѹ, ца́рь кѵ́ръ повелѣ̀ до́мъ гд҇ень, и҆́же во ї҆ер҇ли́мѣ, созида́ти, и҆дѣ́же жрѧ́хѹ ѻ҆гне́мъ непреста́ннымъ,

²⁵є҆гѡ́же высота̀ лакѡ́тъ шестьдесѧ́тъ, широта̀ лакѡ́тъ шестьдесѧ́тъ, съ дома́ми ка́меней те́саныхъ тремѝ и҆ съ до́момъ древѧ́нымъ тогѡ̀ мѣ́ста но́вымъ є҆ди́нымъ, и҆ расхо́ды даѧ́ти и҆з̾ до́мѹ кѵ́ра царѧ̀:

²⁶и҆ свѧщє́нныѧ сосѹ́ды до́мѹ гд҇нѧ златы҄ѧ же и҆ срє́брѧны, и҆̀хже взѧ̀ навѹходоно́соръ и҆з̾ до́мѹ (гд҇нѧ), и҆́же во ї҆ер҇ли́мѣ, и҆ ѿнесѐ въ вавѷлѡ́нъ, возврати́ти въ до́мъ, и҆́же во ї҆ер҇ли́мѣ, и҆дѣ́же бѧ́хѹ пре́жде, да поста́вѧтсѧ та́мѡ.

²⁷Повелѣ́ же (ца́рь) прилѣжа́ти сїсі́ннїю воево́дѣ сѷрі́йскѹ и҆ фїнїкі́йскѹ и҆ саѳравѹза́нѹ и҆ клевре́тѡмъ є҆гѡ̀ и҆ ѹ҆чинє́ннымъ въ сѷрі́и и҆ фїнїкі́и нача́лникѡмъ, да не пристѹпа́ютъ къ мѣ́стѹ, ѡ҆ста́вѧтъ же ѻ҆́трокѹ гд҇ню зорова́велю, нача́лникѹ же ї҆ѹде́йскомѹ, и҆ старѣ́йшинамъ ї҆ѹде́йскимъ до́мъ гд҇ень ѻ҆́ный созида́ти на мѣ́стѣ є҆гѡ̀.

²⁸И҆ а҆́зъ повелѣ́хъ всѧ́чески созида́ти и҆ прилѣжа́ти, да помога́ютъ сѹ́щымъ ѿ плѣне́нїѧ ї҆ѹде́ѡмъ, до́ндеже соверши́тсѧ хра́мъ гд҇ень:

²⁹и҆ ѿ да́ни кїлисѷрі́йскїѧ и҆ фїнїкі́йскїѧ прилѣ́жнѡ собра́нїе даѧ́ти си҄мъ человѣ́комъ на же́ртвѹ гд҇ню, зорова́велю є҆па́рхѹ, на ю҆нцы̀ и҆ ѻ҆вны̀ и҆ а҆́гнцы,

³⁰та́кожде и҆ пшени́цѹ и҆ со́ль, и҆ вїно̀ и҆ є҆ле́й, всегда̀ на всѧ́ко лѣ́то, ѩ҆́коже свѧще́нницы, и҆̀же во ї҆ер҇ли́мѣ, рекѹ́тъ и҆ждива́ти на всѧ́къ де́нь, без̾ сомнѣ́нїѧ:

³¹да прино́сѧтсѧ возлїѧ́нїѧ вы́шнемѹ бг҃ѹ за царѧ̀ и҆ ѻ҆́троки є҆гѡ̀, и҆ да мо́лѧтъ за и҆́хъ живо́тъ:

³²и҆ да возвѣсти́тсѧ, є҆ли́цы а҆́ще престѹ́пѧтъ что̀ ѿ предпи́санныхъ и҆лѝ презрѧ́тъ, да во́зметсѧ дре́во ѿ свои́хъ є҆мѹ̀, и҆ на то́мъ да ѡ҆бѣ́ситсѧ, и҆мѣ́нїѧ же є҆гѡ̀ царю̀ припи́шѹтсѧ:

³³си́хъ ра́ди и҆ гд҇ь, є҆гѡ́же и҆́мѧ призыва́етсѧ та́мѡ, да и҆стреби́тъ всѧ́каго царѧ̀ и҆ ѩ҆зы́къ, и҆́же рѹ́кѹ свою̀ простре́тъ возбрани́ти, и҆лѝ ѡ҆ѕло́бити до́мъ гд҇ень ѻ҆́ный, и҆́же во ї҆ер҇ли́мѣ:

³⁴а҆́зъ ца́рь да́рїй повелѣ́хъ прилѣ́жнѡ.