Read Библия Церковнославянская в҃ е҆́здры 7 Bible Online

в҃ е҆́здры 7 - Библия Церковнославянская bible

в҃ е҆́здры 7

¹Тогда̀ сїсі́ннїй є҆па́рхъ кїлисѷрі́йскїй и҆ фїнїкі́йскїй, и҆ саѳравѹза́нъ, и҆ дрѹ́зїе, послѣ́дѹюще ѿ да́рїа царѧ̀ повелѣ́нїемъ,

²настоѧ́хѹ свѧщє́ннымъ дѣлѡ́мъ, прилѣ́жнѣе содѣ́йствѹюще старѣ́йшинамъ ї҆ѹде́євъ и҆ свѧщеннонача́лникѡмъ:

³и҆ благопоспѣ҄шна бѧ́хѹ свѧщє́ннаѧ дѣла̀, прорица́ющымъ а҆гге́ю и҆ заха́рїи про҇ро́комъ.

⁴И҆ соверши́ша сїѧ҄ по за́повѣди гд҇а бг҃а ї҆и҃лева и҆ съ повелѣ́нїемъ кѵ́ра и҆ да́рїа и҆ а҆ртаѯе́рѯа царе́й пе́рсскихъ:

⁵и҆ соверше́нъ бы́сть до́мъ ст҃ы́й да́же до тре́тїѧгѡ и҆ двадесѧ́тагѡ днѐ мц҇а а҆да́ра, шеста́гѡ лѣ́та да́рїа царѧ̀.

⁶И҆ сотвори́ша сы́нове ї҆и҃лєвы и҆ свѧще́нницы и҆ леѵі́ти и҆ про́чїи, и҆̀же бѧ́хѹ ѿ плѣне́нїѧ, приста́вленнїи, по напи҄саннымъ въ кни́зѣ мѡѷсе́овѣ,

⁷и҆ принесо́ша во ѡ҆бновле́нїе свѧти́лища гд҇нѧ ю҆нцє́въ сто̀ ѻ҆внѡ́въ двѣ́сти, а҆́гнцєвъ четы́ре ста҄,

⁸козлѡ́въ за грѣхѝ всегѡ̀ ї҆и҃лѧ двана́десѧть по числѹ̀, ѿ племенонача́лникѡвъ ї҆и҃левыхъ двана́десѧти.

⁹И҆ ста́ша свѧще́нницы и҆ леѵі́ти по племенѡ́мъ ѡ҆дѣ́ѧни въ ри҄зы, над̾ дѣ́лы гд҇а бг҃а ї҆и҃лева, по кни́зѣ мѡѷсе́овѣ, и҆ вра҄тари над̾ кі́имиждо две́рми,

¹⁰И҆ содѣ́ѧша сы́нове ї҆и҃левы съ сѹ́щими ѿ плѣне́нїѧ па́схѹ въ четвертыйна́десѧть де́нь пе́рвагѡ мц҇а, є҆гда̀ ѡ҆свѧти́шасѧ свѧще́нницы и҆ леѵі́ти.

¹¹Вси́ же сы́нове плѣне́нїѧ не вкѹ́пѣ ѡ҆чи́стишасѧ, поне́же леѵі́ти всѝ вкѹ́пѣ ѡ҆чи́стишасѧ

¹²и҆ пожро́ша па́схѹ всѣ҄мъ сыновѡ́мъ плѣне́нїѧ и҆ бра́тїѧмъ и҆́хъ свѧще́нникѡмъ и҆ себѣ̀ са́ми.

¹³И҆ ѩ҆до́ша сы́нове ї҆и҃лє́вы, и҆̀же ѿ плѣне́нїѧ, всѝ ѿлѹчи́вшїисѧ ѿ ме́рзостей ѩ҆зы́кѡвъ землѝ, и҆́щѹще гд҇а,

¹⁴и҆ пра́здноваша пра́здникъ ѡ҆прѣсно́кѡвъ се́дмь дні́й, веселѧ́щесѧ пред̾ гд҇емъ,

¹⁵поне́же ѡ҆братѝ совѣ́тъ царѧ̀ а҆ссѷрі́йскагѡ къ ни҄мъ, є҆́же ѹ҆крѣпи́ти рѹ́ки и҆́хъ на дѣла̀ гд҇а бг҃а ї҆и҃лева.