Read Библия Церковнославянская в҃ е҆́здры 8 Bible Online

в҃ е҆́здры 8 - Библия Церковнославянская bible

в҃ е҆́здры 8

¹И҆ по си́хъ, ца́рствѹющѹ а҆ртаѯе́рѯѹ царю̀ пе́рсскомѹ, пристѹпѝ є҆́здра сы́нъ сарі́инъ, є҆зері́евъ, хелкі́евъ, салѹ́мовъ,

²садѹ́ковъ, а҆хїтѡ́въ, а҆марі́евъ, є҆зі́евъ, мемерѡ́ѳовъ, заре́евъ саѹі́евъ, вокка́евъ, а҆вїсѹ́мовъ, фїнее́совъ, є҆леаза́ровъ, а҆арѡ́на пе́рвагѡ свѧще́нника:

³то́й є҆́здра взы́де ѿ вавѷлѡ́на, ѩ҆́кѡ книго́чїй благоразѹ́менъ сы́й въ зако́нѣ мѡѷсе́овѣ, да́ннѣмъ ѿ гд҇а бг҃а ї҆и҃лева,

⁴и҆ дадѐ є҆мѹ̀ ца́рь сла́вѹ, ѡ҆брѣ́тшемѹ благода́ть пред̾ ни́мъ, над̾ всѣ́ми досто́инствы є҆гѡ̀.

⁵И҆ взыдо́ша вкѹ́пѣ съ ни́мъ ѿ сынѡ́въ ї҆и҃левыхъ, и҆ свѧще́нникѡвъ и҆ леѵі́тѡвъ, и҆ свѧщеннопѣвцє́въ и҆ вра́тарей и҆ рабѡ́въ церко́вныхъ во ї҆ер҇ли́мъ,

⁶лѣ́та седма́гѡ ца́рствѹющѹ а҆ртаѯе́рѯѹ въ пѧ́тый мц҇ъ: то̀ лѣ́то седмо́е царю̀: и҆зше́дше бо и҆з̾ вавѷлѡ́на въ новомч҇їи пе́рвагѡ мц҇а, прїидо́ша во ї҆ер҇ли́мъ по да́нномѹ и҆̀мъ поспѣ́хѹ въ пѹ́ть ѿ гд҇а:

⁷и҆́бо є҆́здра мно́гое свѣ́дѣнїе ѡ҆бдержа́ше, дабы̀ ничто̀ ѡ҆ста́вити сѹ́щихъ ѿ зако́на гд҇нѧ и҆ ѿ за́повѣди, є҆́же наѹчи́ти всего̀ ї҆и҃лѧ всѣ҄мъ ѡ҆правда́нїємъ и҆ сѹдба́мъ.

⁸Прїи́де же напи́санное повелѣ́нїе ѿ а҆ртаѯе́рѯа царѧ̀ ко є҆́здрѣ свѧще́нникѹ и҆ чтецѹ̀ зако́на гд҇нѧ, є҆гѡ́же є҆́сть списа́нїе подлежа́щее:

⁹ца́рь а҆ртаѯе́рѯъ є҆́здрѣ свѧще́нникѹ и҆ чтецѹ̀ зако́на гд҇нѧ ра́доватисѧ:

¹⁰человѣколю́бнѡ а҆́зъ сѹди́въ, повелѣ́хъ хотѧ́щымъ ѿ ѩ҆зы́ка ї҆ѹде́йскагѡ съ во́лею благо́ю, и҆ ѿ свѧщє́нникъ и҆ леѵї҄тъ, и҆ и҆̀же сѹ́ть въ ца́рствїи на́шемъ, и҆тѝ съ тобо́ю во ї҆ер҇ли́мъ:

¹¹є҆ли́цы ѹ҆̀бо вожделѣ́ютъ, да соберѹ́тсѧ и҆ по́йдѹтъ съ тобо́ю, ѩ҆́коже ѹ҆го́дно мнѣ̀ и҆ седмѝ дрѹгѡ́мъ мои҄мъ совѣ́тникѡмъ:

¹²да ѹ҆ви́дѧтъ дѣ́ємаѧ во ї҆ѹде́и и҆ ї҆ер҇ли́мѣ, ѩ҆́коже є҆́сть въ зако́нѣ гд҇ни,

¹³и҆ да вно́сѧтъ да́ры гд҇ѹ ї҆и҃левѹ, и҆̀хже ѡ҆бѣща́хъ а҆́зъ и҆ дрѹ́зи во ї҆ер҇ли́мъ, и҆ всѐ зла́то и҆ сребро̀, є҆́же ѡ҆брѣ́тено бѹ́детъ во странѣ̀ вавѷлѡ́нстѣй, гд҇ѹ во ї҆ер҇ли́мъ, съ дарова́ннымъ ѿ ѩ҆зы́ка во свѧти́лище гд҇а бг҃а и҆́хъ, є҆́же во ї҆ер҇ли́мъ:

¹⁴да собере́тсѧ зла́то и҆ сребро̀ на ю҆нцы̀ и҆ ѻ҆вны̀ и҆ а҆́гнцы, и҆ ѩ҆̀же тѣ҄мъ послѣ́дѹютъ,

¹⁵да прино́сѧтъ жє́ртвы гд҇ѹ на ѻ҆лта́рь гд҇а бг҃а и҆́хъ, и҆́же во ї҆ер҇ли́мѣ:

¹⁶и҆ всѧ҄ є҆ли҄ка хо́щеши съ бра́тїею твое́ю сотвори́ти зла́томъ и҆ сребро́мъ, совершѝ по во́ли бг҃а твоегѡ̀,

¹⁷и҆ свѧщє́нныѧ сосѹ́ды гд҇ни, и҆̀же даны̀ сѹ́ть тебѣ̀, къ дѣ́лѹ до́мѹ гд҇а бг҃а твоегѡ̀, и҆́же во ї҆ер҇ли́мѣ, да положи́ши пред̾ гд҇емъ бг҃омъ твои́мъ, и҆́же во ї҆ер҇ли́мѣ:

¹⁸и҆ прѡ́чаѧ, є҆ли҄ка а҆́ще тебѣ̀ потрє́бна бѹ́дѹтъ къ дѣлѡ́мъ хра́мѹ бг҃а твоегѡ̀, да да́си ѿ ца́рскагѡ сокро́вища:

¹⁹и҆ а҆́зъ ца́рь а҆ртаѯе́рѯъ повелѣ́хъ стражє́мъ сокро́вища сѷрі́йскагѡ и҆ фїнїкі́йскагѡ, да, є҆ли́кѡ напи́шетъ є҆́здра свѧще́нникъ и҆ чте́цъ зако́на гд҇а бг҃а вы́шнѧгѡ, прилѣ́жнѡ даю́тъ є҆мѹ̀, да́же до сребра̀ тала́нтъ ста̀,

²⁰та́кожде и҆ до пшени́цы спѹ́дѡвъ ста̀ и҆ вїна̀ до мѣ́ръ ста̀:

²¹и҆ и҆́на премнѡ́га всѧ҄ по зако́нѹ бж҃їю да соверша́тсѧ съ поспѣше́нїемъ бг҃ѹ вы́шнемѹ, да не воста́нетъ гнѣ́въ на ца́рство царе́во и҆ сынѡ́въ є҆гѡ̀:

²²ва́мъ же глаго́лю, да всѣ҄мъ свѧще́нникѡмъ и҆ леѵі́тѡмъ, и҆ свѧщеннопѣвцє́мъ и҆ вра́тникѡмъ, и҆ рабѡ́мъ церкѡ́внымъ и҆ писцє́мъ це́ркве тоѧ̀, ни є҆ди́на да́нь, нижѐ и҆́на тѧгота̀ бѹ́детъ, и҆ ни є҆ди́нѹ вла́сть и҆мѣ́ти налага́ти что̀ на ни́хъ:

²³ты́ же, є҆́здро, по премдрости бж҃їей, поста́ви сѹдїи҄ и҆ нача́лники, да сѹ́дѧтъ во все́й сѷрі́и и҆ фїнїкі́и всѣ́хъ вѣ́дѹщихъ зако́нъ бг҃а твоегѡ̀, а҆ невѣ́дѹщихъ ѹ҆чѝ:

²⁴и҆ всѝ є҆ли́цы престѹ́пѧтъ зако́нъ бг҃а твоегѡ̀ и҆ ца́рскїй тща́телнѡ да нака́жѹтсѧ, и҆лѝ сме́ртїю, и҆лѝ ка́знїю, и҆лѝ сребра̀ лише́нїемъ, и҆лѝ и҆згна́нїемъ.

²⁵И҆ речѐ є҆́здра книго́чїй: блг҇ве́нъ є҆ди́нъ гд҇ь бг҃ъ ѻ҆тє́цъ мои́хъ, и҆̀же дадѐ сїѧ҄ въ се́рдце царе́во просла́вити до́мъ є҆гѡ̀, и҆́же во ї҆ер҇ли́мѣ,

²⁶и҆ менѐ почтѐ пред̾ царе́мъ и҆ совѣ́тниками и҆ всѣ́ми дрѹ҄ги и҆ вельмѡ́жи є҆гѡ̀:

²⁷и҆ а҆́зъ благоде́рзостенъ бы́хъ по по́мощи гд҇а бг҃а моегѡ̀, и҆ собра́хъ ѿ ї҆и҃лѧ мѹ́жы, да вкѹ́пѣ взы́дѹтъ со мно́ю.

²⁸И҆ сі́и предводи́телїе по свои́мъ ѻ҆те́чествѡмъ и҆ нача́лствѡмъ, и҆̀же и҆зыдо́ша со мно́ю и҆з̾ вавѷлѡ́на въ ца́рство а҆ртаѯе́рѯа царѧ̀:

²⁹Ѿ сынѡ́въ фїнее́совыхъ гирсѡ́нъ, ѿ сынѡ́въ ї҆ѳама́ровыхъ гамалїи́лъ, ѿ сынѡ́въ даві́довыхъ латтѹ́съ, сы́нъ сехені́евъ,

³⁰ѿ сынѡ́въ форо́совыхъ заха́рїа и҆ съ ни́мъ ѡ҆пи́санныхъ мѹже́й сто̀ пѧтьдесѧ́тъ,

³¹ѿ сынѡ́въ фаа́ѳъ-мѡа́влихъ є҆лїаѡні́а заре́овъ и҆ съ ни́мъ мѹже́й двѣ́сти,

³²ѿ сынѡ́въ заѳо́евыхъ сехені́а є҆зеі́левъ и҆ съ ни́мъ мѹже́й три́ста, ѿ сынѡ́въ а҆ді́нихъ ѡ҆ви́ѳъ ї҆ѡнаѳѹ́евъ и҆ съ ни́мъ мѹже́й двѣ́сти пѧтьдесѧ́тъ,

³³ѿ сынѡ́въ и҆ла́мовыхъ ї҆есі́а гоѳолі́евъ и҆ съ ни́мъ мѹже́й се́дмьдесѧтъ,

³⁴ѿ сынѡ́въ сафаті́евыхъ зараі́а михаи́ловъ и҆ съ ни́мъ мѹже́й се́дмьдесѧтъ,

³⁵ѿ сынѡ́въ ї҆ѡа́влихъ а҆ваді́а ї҆ези́ловъ и҆ съ ни́мъ мѹже́й двѣ́сти двана́десѧть,

³⁶ѿ сынѡ́въ вані́евыхъ а҆ссалїмѡ́ѳъ сы́нъ ї҆ѡсафі́евъ и҆ съ ни́мъ мѹже́й сто̀ шестьдесѧ́тъ,

³⁷ѿ сынѡ́въ ваві́евыхъ заха́рїа виваі́евъ и҆ съ ни́мъ мѹже́й два́десѧть ѻ҆́смь,

³⁸ѿ сынѡ́въ а҆ста́ѳовыхъ ї҆ѡа́ннъ а҆ката́нь и҆ съ ни́мъ мѹже́й сто̀ де́сѧть,

³⁹ѿ сынѡ́въ а҆дѡнїка́мовыхъ послѣ́днїи, и҆ сїѧ҄ сѹ́ть и҆мена̀ и҆́хъ: є҆лїфала̀ сы́нъ ї҆еѹи́левъ и҆ саме́а и҆ съ ни́ма мѹже́й се́дмьдесѧтъ,

⁴⁰ѿ сынѡ́въ вагѡ́евыхъ ѹ҆ѳі́й ї҆стакѹ́ровъ и҆ съ ни́мъ мѹже́й се́дмьдесѧтъ.

⁴¹И҆ собра́хъ и҆̀хъ къ рѣцѣ̀ ѩ҆́же нарица́етсѧ ѳера́нъ, и҆ ѡ҆полчи́хомсѧ трѝ дни҄ здѣ̀, и҆ пресмотри́хъ и҆̀хъ.

⁴²И҆ ѿ сынѡ́въ свѧще́нничихъ и҆ ѿ леѵі́тскихъ не ѡ҆брѣ́тъ та́мѡ,

⁴³посла́хъ ко є҆леаза́рѹ и҆ ї҆дѹи́лѹ, и҆ маазма́нѹ и҆ а҆лнаѳа́нѹ, и҆ маме́ю и҆ саме́ю и҆ ї҆ѡрі́вѹ, наѳа́нѹ, є҆нната́нѹ, заха́рїи и҆ месѹлла́мѹ, предводи́телємъ и҆ ѹ҆чє́нымъ,

⁴⁴и҆ реко́хъ и҆̀мъ, да прїи́дѹтъ къ додде́ю вождѹ̀, и҆́же на мѣ́стѣ сокровищехрани́лницы,

⁴⁵заповѣ́давъ и҆̀мъ рещѝ додде́ю и҆ бра́тїи є҆гѡ̀ и҆ сѹ́щымъ на мѣ́стѣ сокровищехрани́телємъ, да по́слютъ къ на́мъ свѧще́нствовати и҆мѹ́щихъ въ домѹ̀ (гд҇а) бг҃а на́шегѡ.

⁴⁶И҆ приведо́ша къ на́мъ держа́вною рѹко́ю гд҇а бг҃а на́шегѡ мѹ́жы ѹ҆чє́ны ѿ сынѡ́въ моолі́а сы́на леѵі́ина, сы́на ї҆и҃лева, а҆севеві́ю и҆ сынѡ́въ є҆гѡ̀ и҆ бра́тїю ѻ҆смьна́десѧть,

⁴⁷и҆ а҆севі́ю и҆ а҆ннѹ́а и҆ ѡ҆се́а бра́та ѿ сынѡ́въ ханѹне́евыхъ, и҆ сынѡ́въ и҆́хъ мѹже́й два́десѧть:

⁴⁸и҆ ѿ церко́вныхъ слѹжи́телей, и҆̀хже дадѐ даві́дъ и҆ нача҄лницы къ дѣ́ланїю леѵі́тѡмъ, церко́вныхъ слѹжи́телей двѣ́сти два́десѧть: всѣ́хъ же и҆мена̀ знаменова҄нна сѹ́ть въ писа́нїи.

⁴⁹И҆ ѡ҆бѣща́хъ тѹ̀ по́стъ ю҆́ношамъ пред̾ гд҇емъ бг҃омъ на́шимъ,

⁵⁰да взы́щемъ ѿ негѡ̀ бл҃гі́й пѹ́ть на́мъ и҆ сѹ́щымъ съ на́ми ча́дѡмъ на́шымъ и҆ скотѡ́мъ.

⁵¹Ѹ҆срами́хбосѧ проси́ти ѿ царѧ̀ пѣ́шихъ и҆ ко́нникѡвъ и҆ проводникѡ́въ ра́ди ѡ҆хране́нїѧ на́мъ ѿ сѹпоста҄тъ,

⁵²реко́хомъ бо царю̀, ѩ҆́кѡ си́ла гд҇а на́шегѡ бѹ́детъ со и҆́щѹщими є҆го̀ на всѧ́кое ѹ҆правле́нїе.

⁵³И҆ па́ки помоли́хомсѧ гд҇ѹ бг҃ѹ на́шемѹ ѡ҆ си́хъ и҆ мл҇тива полѹчи́хомъ.

⁵⁴И҆ ѿлѹчи́хъ ѿ племенонача́лникѡвъ и҆ свѧще́нникѡвъ мѹже́й двана́десѧть є҆севрі́ю и҆ а҆ссамі́ю и҆ съ ни́ми ѿ бра́тїи и҆́хъ мѹже́й де́сѧть,

⁵⁵и҆ и҆звѣ́сихъ и҆̀мъ сребро̀, зла́то и҆ сосѹ́ды свѧщє́нныѧ до́мѹ бг҃а на́шегѡ, ѩ҆̀же дарова̀ ца́рь и҆ совѣ҄тницы є҆гѡ̀ и҆ вельмѡ́жи и҆ ве́сь ї҆и҃ль:

⁵⁶и҆ и҆звѣ́сивъ преда́хъ и҆̀мъ сребра̀ тала҄нтъ ше́сть сѡ́тъ пѧтьдесѧ́тъ, и҆ сосѹ҄дъ сре́брѧныхъ тала҄нтъ сто̀, и҆ зла́та тала҄нтъ сто̀, и҆ сосѹ́дѡвъ позлаще́нныхъ два́десѧть, и҆ сосѹ́дѡвъ мѣ́дѧныхъ ѿ и҆збра́нныѧ мѣ́ди блеща́щихсѧ златови́дныхъ, сосѹ́дѡвъ двана́десѧть,

⁵⁷и҆ реко́хъ и҆̀мъ: и҆ вы̀ свѧ́ти є҆стѐ гд҇ѹ, и҆ сосѹ́ди свѧ́ти, и҆ зла́то и҆ сребро̀ ѡ҆бѣща́нное гд҇ѹ бг҃ѹ ѻ҆тє́цъ на́шихъ:

⁵⁸бди́те и҆ храни́те, до́ндеже воздади́те вы̀ всѧ҄ племенонача́лникѡмъ свѧще́нникѡвъ и҆ леѵі́тѡвъ и҆ нача́лникѡмъ ѻ҆те́чествъ ї҆и҃левыхъ во ї҆ер҇ли́мѣ въ сосѹдохрани́телницѣ до́мѹ бг҃а на́шегѡ.

⁵⁹И҆ прїе́мше свѧще́нницы и҆ леѵі́ти сребро̀ и҆ зла́то и҆ сосѹ́ды во ї҆ер҇ли́мъ, внесо́ша во хра́мъ гд҇ень.

⁶⁰И҆ воздви́гшесѧ ѿ рѣкѝ ѳеры̀ въ дванадесѧ́тый де́нь пе́рвагѡ мц҇а, внидо́хомъ во ї҆ер҇ли́мъ съ крѣ́пкою рѹко́ю гд҇а на́шегѡ, ѩ҆́же съ на́ми: и҆ и҆зба́ви на́съ гд҇ь ѿ и҆схо́да пѹтѝ ѿ всѣ́хъ вра҄гъ, и҆ прїидо́хомъ во ї҆ер҇ли́мъ.

⁶¹И҆ є҆гда̀ бы́сть та́мѡ тре́тїй де́нь, въ четве́ртый де́нь и҆змѣ́реное зла́то и҆ сребро̀ пре́дано въ до́мъ гд҇а бг҃а на́шегѡ мармѡ́ѳѣ сы́нѹ ѹ҆рі́инѹ свѧще́нникѹ,

⁶²и҆ съ ни́мъ (бѣ̀) є҆леаза́ръ сы́нъ фїнее́совъ, и҆ бы́ста съ ни́ма ї҆ѡсава́дъ сы́нъ ї҆исѹ́совъ и҆ мѡи́ѳъ саванні́евъ сы́нъ, леѵі́тѧне: всѧ҄ по числѹ̀ и҆ вѣ́сѹ, и҆ напи́санъ бы́сть ве́сь вѣ́съ и҆́хъ въ то́й ча́съ.

⁶³Прише́дшїи же ѿ плѣне́нїѧ принесо́ша жє́ртвы бг҃ѹ ї҆и҃левѹ ю҆нє́цъ двана́десѧть за ве́сь ї҆и҃ль, ѻ҆вє́нъ де́вѧтьдесѧтъ ше́сть, а҆́гнєцъ се́дмьдесѧтъ два̀, козлѡ́въ за спасе́нїе двана́десѧть всѧ҄ въ же́ртвѹ гд҇ню.

⁶⁴И҆ ѿда́ша повєлѣ́нїѧ царє́ва царє́вымъ строи́телємъ и҆ є҆па́рхѡмъ кїлисѷрі́и и҆ фїнїкі́и, и҆ почто́ша ѩ҆зы́къ и҆ хра́мъ гд҇ень.

⁶⁵И҆ соверши́вшымсѧ си҄мъ, пристѹпи́ша ко мнѣ̀ предводи́телїе, глаго́люще:

⁶⁶не ѿлѹчи́сѧ ро́дъ ї҆и҃левъ и҆ нача҄лницы, и҆ свѧще́нницы и҆ леѵі́ти ѿ и҆ноплеме́нныхъ ѩ҆зы́кѡвъ землѝ и҆ ѿ нечисто́тъ и҆́хъ, ѿ ѩ҆зы҄къ ханане́ѡвъ и҆ хетте́ѡвъ, и҆ ферезе́ѡвъ и҆ ї҆евѹсе́ѡвъ, и҆ мѡаві́тѡвъ и҆ є҆гѵ́птѧнъ и҆ ї҆дѹме́ѡвъ:

⁶⁷сопрѧго́шасѧ бо со дще́рьми и҆́хъ, и҆ ті́и и҆ сы́нове и҆́хъ, и҆ смѣси́сѧ сѣ́мѧ свѧто́е со и҆ноплеме́нными ѩ҆зы҄ки зе́мскими, и҆ прича҄стницы бы́ша предводи́телїе и҆ вельмѡ́жи беззако́нїѧ сегѡ̀ ѿ нача́ла ве́щи.

⁶⁸И҆ а҆́бїе, є҆гда̀ ѹ҆слы́шахъ сїѧ҄, раздра́хъ ѡ҆дѣѧ҄нїѧ и҆ свѧще́ннѹю ри́зѹ, и҆ терза́хъ власы̀ главы̀ и҆ брады̀, и҆ сѣдѣ́хъ ско́рбенъ и҆ печа́ленъ,

⁶⁹И҆ собра́шасѧ ко мнѣ̀, є҆ли́цы тогда̀ подвиза́хѹсѧ во сло́вѣ гд҇а бг҃а ї҆и҃лева, мнѣ̀ пла́чѹщѹ ѡ҆ беззако́нїи, и҆ сѣдѣ́хъ ско́рбенъ да́же до вече́рнїѧ же́ртвы:

⁷⁰и҆ воста́хъ ѿ поста̀, раздра҄на и҆мѣ́ющь ѡ҆дѣѧ҄нїѧ и҆ свѧще́ннѹю ри́зѹ, преклони́въ кѡлѣ́на и҆ просте́ръ рѹ́цѣ ко гд҇ѹ, реко́хъ:

⁷¹гд҇и, постыдѣ́хсѧ и҆ ѹ҆срами́хсѧ пред̾ лице́мъ твои́мъ,

⁷²грѣси́ бо на́ши ѹ҆мно́жишасѧ вы́ше гла́въ на́шихъ, и҆ безѹ҄мїѧ на҄ша воздвиго́шасѧ да́же до небесѐ,

⁷³є҆щѐ ѿ време́нъ ѻ҆тє́цъ на́шихъ, и҆ є҆смы̀ въ вели́цѣ грѣсѣ̀ да́же до днѐ сегѡ̀:

⁷⁴и҆ ра́ди грѣ҄хъ на́шихъ и҆ ѻ҆тє́цъ на́шихъ пре́дани є҆смы̀ со бра́тїѧми на́шими и҆ съ царьмѝ на́шими и҆ со свѧщє́нники на́шими царє́мъ зємны́мъ въ ме́чь и҆ плѣне́нїе и҆ въ грабле́нїе со стыдѣ́нїемъ да́же до дне́шнѧгѡ днѐ:

⁷⁵и҆ нн҃ѣ коли́ко бы́сть на́мъ мл҇рдїе ѿ тебє̀, гд҇и бж҃е, є҆́же ѡ҆ста́вити на́мъ ко́рень и҆ и҆́мѧ на мѣ́стѣ ст҃ы́ни твоеѧ̀

⁷⁶и҆ є҆́же ѿкры́ти свѣти́лникъ на́мъ въ домѹ̀ гд҇а бг҃а на́шегѡ, да́ти на́мъ пи́щѹ во вре́мѧ рабо́ты на́шеѧ: и҆ є҆гда̀ слѹжи́хомъ, не бы́хомъ ѡ҆ста́влени ѿ гд҇а бг҃а на́шегѡ,

⁷⁷но поста́ви на́съ во благода́ти пред̾ цари҄ пе́рсскими да́ти на́мъ пи́щѹ,

⁷⁸и҆ просла́вити хра́мъ гд҇а на́шегѡ, и҆ воздви́гнѹти ѡ҆пѹстоше́нный сїѡ́нъ, да́ти на́мъ тверды́ню во ї҆ѹде́и и҆ ї҆ер҇ли́мѣ:

⁷⁹и҆ нн҃ѣ что̀ рече́мъ, гд҇и, и҆мѣ́юще сїѧ҄; престѹпи́хомъ бо повєлѣ́нїѧ твоѧ҄, ѩ҆̀же да́лъ є҆сѝ рѹко́ю ѻ҆трокѡ́въ твои́хъ про҇ро́кѡвъ, гл҃ѧ:

⁸⁰ѩ҆́кѡ землѧ̀, въ ню́же хо́дите наслѣ́дити, землѧ̀ ѡ҆скверне́на є҆́сть скве́рною и҆ноплеме́нныхъ землѝ, и҆ нечистото́ю свое́ю напо́лниша ю҆̀,

⁸¹и҆ нн҃ѣ дще́рей ва́шихъ не сопрѧзи́те сынѡ́мъ и҆́хъ, и҆ дще́рей и҆́хъ не прїе́млите сыновѡ́мъ ва́шымъ,

⁸²и҆ не взыщи́те ми́ра и҆мѣ́ти съ ни́ми во всѐ вре́мѧ, да ѹ҆крѣпи́вшесѧ ѩ҆ди́те блага҄ѧ землѝ и҆ достоѧ́нїе раздѣлѧ́ете сыновѡ́мъ ва́шымъ да́же до вѣ́ка:

⁸³и҆ ѩ҆̀же слѹча́ютсѧ на́мъ, всѧ҄ быва́ютъ ра́ди дѣ́лъ на́шихъ лѹка́выхъ и҆ вели́кихъ грѣ҄хъ на́шихъ: ты́ бо, гд҇и, ѡ҆блегчи́лъ є҆сѝ грѣхѝ на́шѧ

⁸⁴и҆ да́лъ є҆сѝ на́мъ сицевы́й ко́рень, и҆ па́ки ѡ҆брати́хомсѧ престѹпи́ти зако́нъ тво́й, є҆́же смѣси́тисѧ съ нечистото́ю ѩ҆зы҄къ зе́мскихъ:

⁸⁵не прогнѣ́валсѧ ли є҆сѝ на ны̀ погѹби́ти на́съ, до́ндеже не ѡ҆ста́нетсѧ ко́рень и҆ сѣ́мѧ и҆ и҆́мѧ на́ше;

⁸⁶гд҇и бж҃е ї҆и҃левъ, и҆́стиненъ є҆сѝ, ѡ҆ста́хомсѧ бо ко́рень до дне́шнѧгѡ днѐ:

⁸⁷сѐ, нн҃ѣ є҆смы̀ пред̾ тобо́ю во беззако́нїихъ на́шихъ, нѣ́сть бо ста́ти є҆щѐ пред̾ тобо́ю въ си́хъ.

⁸⁸И҆ є҆гда̀ молѧ́сѧ є҆́здра и҆сповѣ́дашесѧ, пла́чѹщь на землѝ ни́цъ просте́ртъ пред̾ хра́момъ, собра́шасѧ къ немѹ̀ ѿ ї҆ер҇ли́ма наро́дъ мно́гъ ѕѣлѡ̀, мѹ́жїе и҆ жєны̀, и҆ ю҆́нѡши и҆ ю҆́нѡты: пла́чь бо бы́сть вели́къ въ то́мъ мно́жествѣ.

⁸⁹И҆ возопи́въ ї҆ехоні́а ї҆еи́левъ ѿ сынѡ́въ ї҆и҃левыхъ, речѐ: є҆́здро, мы̀ согрѣши́хомъ ко гд҇ѹ бг҃ѹ, поѧ́хомъ жєны̀ и҆ноплемє́нничи ѿ ѩ҆зы҄къ землѝ: и҆ нн҃ѣ є҆́сть пред̾ тобо́ю ве́сь ї҆и҃ль:

⁹⁰въ то́мъ да бѹ́детъ на́мъ клѧ́тва пред̾ гд҇емъ, є҆́же и҆згна́ти всѣ́хъ же́нъ на́шихъ, ѩ҆̀же ѿ и҆ноплеме́нныхъ, со ча́ды и҆́хъ, ѩ҆́коже сѹди́сѧ тебѣ̀, и҆ є҆ли́цы повинѹ́ютсѧ зако́нѹ гд҇ню:

⁹¹воста́въ соверша́й, къ тебѣ̀ пристои́тъ дѣ́ло, и҆ мы̀ съ тобо́ю мѹ́жественнѡ сотвори́мъ.

⁹²И҆ воста́въ є҆́здра, заклѧ̀ племенонача́лникѡвъ свѧще́нническихъ и҆ леѵі́тскихъ всегѡ̀ ї҆и҃лѧ сотвори́ти по си҄мъ. И҆ клѧ́шасѧ.