Read Библия Церковнославянская Тѡві́т 1 Bible Online

Тѡві́т 1 - Библия Церковнославянская bible

Тѡві́т 1

¹Кни́га слове́съ тѡві́та, сы́на тѡвїи́лева, сы́на а҆нанїи́лева, сы́на а҆дѹи́лева, сы́на гаваи́лева, ѿ сѣ́мене а҆сїи́лева, ѿ пле́мене нефѳалі́млѧ,

²и҆́же плѣне́нъ бѣ̀ во дни҄ є҆немесса́ра са́ра царѧ̀ а҆ссѷрі́йска ѿ ѳі́свы, ѩ҆́же є҆́сть ѡ҆деснѹ́ю кѷді́а нефѳалі́млѧ въ галїле́и вы́ше а҆си́ра. А҆́зъ тѡві́тъ пѹте́мъ и҆́стины ходи́хъ и҆ пра́вды всѧ҄ дни҄ живота̀ моегѡ̀

³и҆ ми́лѡстыни мнѡ́ги твори́хъ бра́тїи мое́й и҆ ѩ҆зыкѹ моемѹ̀, ше́дшымъ со мно́ю во странѹ̀ а҆ссѷрі́йскѹю въ нїнеѵі́ю:

⁴и҆ є҆гда̀ бѣ́хъ во странѣ̀ мое́й въ землѝ ї҄и҃левѣ, ю҆нѣ́и҆шѹ мѝ сѹ́щѹ, все́ пле́мѧ нефѳалі́ма ѻ҆тца̀ моегѡ̀ ѿстѹпѝ ѿ до́мѹ ї҄ер҇ли́млѧ, и҆збра́ннагѡ ѿ колѣ́нъ ї҆и҃левыхъ, є҆́же жре́ти всѣ҄мъ колѣ́нѡмъ: и҆ ѡ҆свѧще́нъ бы́сть хра́мъ ѡ҆бита́нїѧ вы́шнемѹ и҆ созда́нъ бы́сть во всѧ҄ ро́ды вѣ́ка:

⁵и҆ всѧ҄ колѣ҄на кѹ́пнѡ ѿстѹпи҄вшаѧ жрѧ́хѹ ваа́ловѣ ю҆́ницѣ, и҆ до́мъ нефѳалі́ма ѻ҆тца̀ моегѡ̀:

⁶а҆́зъ же є҆ди́нъ хожда́хъ мно́гажды во ї҆ер҇ли́мъ въ пра́здники, ѩ҆́коже пи́сано є҆́сть всемѹ̀ ї҆и҃лю въ повелѣ́нїи вѣ́чнѣ, нача́тки и҆ десѧти҄ны плодѡ́въ и҆ первострижє́нїѧ и҆мѣ́ѧй,

⁷и҆ даѧ́хъ ѧ҆̀ ї҄ере́ємъ сынѡ́мъ а҆арѡ҄нимъ ко ѻ҆лтарю̀: ѿ всѣ́хъ плодѡ́въ десѧти́нѹ даѧ́хъ сынѡ́мъ леѵї҄инымъ слѹжа́щымъ во ї҄ер҇ли́мѣ, и҆ вторѹ́ю десѧти́нѹ продаѧ́хъ, и҆ хожда́хъ и҆ и҆ждива́хъ ѧ҆̀ во ї҄ер҇ли́мѣ на ко́еждо лѣ́то,

⁸тре́тїю же даѧ́хъ, и҆́мже подоба́ше, ѩ҆́коже заповѣ́да деввѡ́ра ма́ти ѻ҆тца̀ моегѡ̀,занѐ си́ръ ѡ҆ста́хъ ѿ ѻ҆тца̀ моегѡ̀.

⁹И҆ є҆гда̀ бы́хъ мѹ́жъ, поѧ́хъ а҆́ннѹ женѹ̀ ѿ сѣ́мене ѻ҆те́чества на́шегѡ, и҆ роди́хъ ѿ неѧ̀ тѡві́ю.

¹⁰И҆ є҆гда̀ плѣне́ни бы́хомъ въ нїнеѵі́ю, всѧ҄ кра́тїѧ моѧ҄ и҆ и҆̀же ѿ ро́да моегѡ̀ ѩ҆до́ша ѿ хлѣ́бѡвъ ѩ҆зы́ческихъ:

¹¹а҆́зъ же соблюдо́хъ дѹ́шѹ мою̀ є҆́же не ѩ҆́сти,

¹²ѩ҆́кѡ па́мѧтствовахъ бг҃а все́ю дѹше́ю мое́ю.

¹³И҆ дадѐ вы́шнїй благода́ть и҆ добро́тѹ пред̾ є҆немесса́ромъ, и҆ бы́хъ є҆гѡ̀ кѹпе́цъ:

¹⁴и҆ и҆до́хъ въ миді́ю и҆ вда́хъ гаваи́лѹ бра́тѹ гаврі́евѹ въ ра́гахъ миді́йскихъ сребра̀ де́сѧть тала҄нтъ.

¹⁵И҆ є҆гда̀ ѹ҆́мре є҆немесса́ръ, воцари́сѧ сеннахирі́мъ сы́нъ є҆гѡ̀ вмѣ́стѡ є҆гѡ̀, и҆ пѹтїѐ є҆гѡ̀ непостоѧ́нни бы́ша, и҆ ктомѹ̀ не возмого́хъ и҆тѝ въ миді́ю.

¹⁶И҆ во дне́хъ є҆немесса́ра ми́лѡстыни мнѡ́ги твори́хъ бра́тїи мое́й:

¹⁷хлѣ́бы моѧ҄ даѧ́хъ а҆́лчѹщымъ и҆ ѡ҆дѣѧ́нїе наги҄мъ, и҆ а҆́ще ко́его ѿ ро́да моегѡ̀ ви́дѣхъ ѹ҆ме́рша и҆ и҆зве́ржена внѣ̀ стѣны̀ нїеѵі́и, погрба́хъ є҆го̀:

¹⁸и҆ а҆́ще ко́его ѹ҆бива́ше сеннахирі́мъ ца́рь, є҆гда̀ прїи́де бѣжа́й ѿ ї҆ѹде́и, погреба́хъ и҆̀хъ ѡ҆́тай: мно́гихъ бо ѹ҆бѝ въ ѩ҆́рости свое́й: и҆ и҆скѡ́ма быва́хѹ ѿ царѧ̀ тѣлеса̀, и҆ не ѡ҆брѣта́хѹсѧ.

¹⁹Ше́дъ же є҆ди́нъ ѿ сѹ́щихъ въ нїнеѵі́и, сказа̀ царю̀ ѡ҆ мнѣ̀, ѩ҆́кѡ погреба́ю и҆̀хъ. И҆ скры́хсѧ. Ѹ҆ѣ́давъ же, ѩ҆́кѡ и҆́щѹтъ мѧ̀ ѹ҆би́ти, ѹ҆боѧ́всѧ ѿидо́хъ:

²⁰и҆ разгра́блєна бы́ша всѧ҄ и҆мѣ́нїѧ моѧ҄, и҆ не ѡ҆ста́сѧ мѝ ничто́же, кромѣ̀ а҆́нны жены̀ моеѧ̀ и҆ тѡві́и сы́на моегѡ̀.

²¹И҆ не преидо́ша дні́е пѧтьдесѧ́тъ, доне́лѣже ѹ҆би́ста є҆го̀ два̀ сы҄на є҆гѡ̀ и҆ бѣжа́ста въ го́ры а҆рара҆тскїѧ: и҆ воцари́сѧ сахерда́нъ сы́нъ є҆гѡ̀ вмѣ́стѡ є҆гѡ̀, и҆ поста́ви а҆хїа́хара а҆наи́ла, сы́на бра́та моегѡ̀, над̾ всѣ́мъ сочисле́нїемъ ца́рствїѧ своегѡ̀ и҆ над̾ всѣ́мъ ѹ҆строе́нїемъ.

²²И҆ просѝ а҆хїа́харъ ѡ҆ мнѣ̀, и҆ прїидо́хъ въ нїнеѵі́ю. А҆хїа́харъ же бѣ̀ вїиоче́рпчїй и҆ над̾ пе́рстнемъ, и҆ ѹ҆прави́тель и҆ сочисли́тель, и҆ поста́ви є҆го̀ сахерда́нъ вторы́мъ: бѣ́ же сы́нъ бра́та моегѡ̀.