Read Библия Церковнославянская Тѡві́т 10 Bible Online

Тѡві́т 10 - Библия Церковнославянская bible

Тѡві́т 10

¹И҆ тѡві́тъ ѻ҆те́цъ є҆гѡ̀ сочислѧ́ше кі́йждо де́нь: и҆ є҆гда̀ и҆спо́лнишасѧ дні́е пѹтѝ, и҆ не прихожда́хѹ,

²речѐ тѡві́тъ: є҆да̀ ка́кѡ посра́млени сѹ́ть; и҆лѝ не́гли ѹ҆́мре гаваи́лъ, и҆ никто́же є҆мѹ̀ дае́тъ сребра̀;

³И҆ скорбѧ́ше ѕѣло̀.

⁴Рече́ же є҆мѹ̀ жена̀ є҆гѡ̀: поги́бе ?ѻ҆́трочищь, поне́же ѹ҆ме́дли. И҆ нача̀ пла́кастисѧ є҆гѡ̀ и҆ речѐ:

⁵нѣ́сть попече́нїѧ мнѣ̀, ча́до, поне́же лиши́хсѧ тѧ̀ свѣ́та ѻ҆́чїю моє́ю.

⁶Тѡві́тъ же глаго́летъ є҆́й: молчѝ, не печа́лисѧ, здра́въ є҆́сть.

⁷И҆ речѐ є҆мѹ̀ молчѝ, не прельща́й менѐ, поги́бе ѻ҆́трочищь мо́й. И҆ и҆схожда́ше на всѧ́къ де́нь на пѹ́ть внѣ̀, и҆́мже ѿи́де: и҆ во дни҄ хлѣ́ба не ѩ҆дѧ́ше, въ но́щехъ же не престава́ше пла́чѹщисѧ тѡві́и сы́на своегѡ̀, доне́лѣже сконча́шасѧ четырена́десѧть дні́е бра́ка, въ нѧ́же заклѧ̀ рагѹи́лъ пребы́ти є҆мѹ̀ та́мѡ. Рече́ же тѡві́а рагѹи́лѹ: ѿпѹстѝ мѧ̀, занѐ ѻ҆те́цъ мо́й и҆ ма́ти моѧ̀ не ктомѹ̀ надѣ́ютсѧ ви́дѣти мѧ̀.

⁸Рече́ же є҆мѹ̀ те́сть є҆гѡ̀: пребѹ́ди ѹ҆ менє̀, и҆ а҆́зъ послю̀ ко ѻ҆тцѹ̀ твоемѹ̀, и҆ возвѣстѧ́тъ є҆мѹ̀, ѩ҆̀же ѡ҆ тебѣ̀.

⁹И҆ тѡві́а речѐ: нѝ, но ѿпѹстѝ мѧ̀ ко ѻ҆тцѹ̀ моемѹ̀.

¹⁰Воста́въ же рагѹи́лъ, дадѐ є҆мѹ̀ са́ррѹ женѹ̀ є҆гѡ̀ и҆ по́лъ и҆мѣ́нїй, рабы҄ и҆ скоты̀ и҆ сребро̀,

¹¹и҆ благослови́въ ѧ҆̀ ѿпѹстѝ, глаго́лѧ: да бл҃гопоспѣши́тъ ва́мъ, ча҄да, бг҃ъ нб҃сѐ пре́жде не́же ѹ҆мре́ти мѝ.

¹²И҆ речѐ дще́ри свое́й: чтѝ све́крѡвъ твои́хъ, ті́и нн҃ѣ роди́телїе твоѝ сѹ́ть, да слы́шѹ ѡ҆ тебѣ̀ слѹ́хъ до́бръ. И҆ ѡ҆блобыза̀ ю҆̀. И҆ є҆́дна речѐ ко тѡві́и: бра́те возлю́бленне, да возврати́тъ тѧ̀ гд҇ь нб҃сѐ и҆ да да́стъ мѝ ви́дѣти твоѧ҄ ча҄да ѿ са́рры дще́ре моеѧ̀, да возвеселю́сѧ пред̾ гд҇емъ: и҆ сѐ, вдаю̀ тебѣ̀ дще́рь мою̀ въ зало́гъ, и҆ да не ѡ҆печалѧ́еши є҆ѧ̀.

¹³По си́хъ ѿи́де тѡві́а благословѧ̀ бг҃а, ѩ҆́кѡ бл҃гопоспѣшѝ пѹ́ть є҆гѡ̀: и҆ благословѧ́ше рагѹи́ла и҆ є҆́днѹ женѹ̀ є҆гѡ̀, и҆ и҆дѧ́ше, дондеже прибли́житисѧ и҆̀мъ къ нїнеѵі́и.