Read Библия Церковнославянская Тѡві́т 11 Bible Online

Тѡві́т 11 - Библия Церковнославянская bible

Тѡві́т 11

¹И҆ речѐ рафаи́лъ ко тѡві́и: не вѣ́си ли, бра́те, ка́кѡ ѡ҆ста́вилъ є҆сѝ ѻ҆тца̀ твоего̀;

²предтеце́мъ пред̾ жено́ю твое́ю и҆ ѹ҆гото́ваимъ до́мъ:

³возми́ же въ рѹ́кѹ же́лчь ры́бїю. И҆ поидо́ста, и҆ кѹ́пнѡ и҆́де пе́съ в̾слѣ́дъ и҆́хъ.

⁴А҆́нна же сѣдѧ́ше ѡ҆бзира́ющи на пѹтѝ сы́на своего̀.

⁵И҆ ѹ҆смотрѝ є҆го̀ грѧдѹ́ща и҆ речѐ ѻ҆тцѹ̀ є҆гѡ̀: сѐ, сы́нъ мо́й грѧде́тъ и҆ человѣ́къ поше́дый съ ни́мъ.

⁶А҆ рафаи́лъ речѐ: вѣ́мъ а҆́зъ, тѡві́е, ѩ҆́кѡ ѿве́рзетъ ѻ҆́чи ѻ҆те́цъ тво́й:

⁷ты̀ ѹ҆́бѡ пома́жи же́лчїю на ѻ҆чесе́хъ є҆гѡ̀, и҆ ѹ҆грызе́нъ ѡ҆тре́тъ, и҆ ѿве́рзетъ бѣ́льма, и҆ ѹ҆́зритъ тѧ̀.

⁸И҆ прите́кши а҆́нна нападѐ на вы́ю сы́на своегѡ̀ и҆ речѐ є҆мѹ̀: ви́дѣхъ тѧ̀, ча́до,ѿни҃ѣ да ѹ҆мрѹ̀. И҆ пла́кастасѧ ѻ҆́ба.

⁹Тѡві́тъ же и҆схожда́ше ко две́ремъ и҆ преткнѹ́сѧ. Сы́нъ же є҆гѡ̀ притечѐ къ немѹ̀

¹⁰и҆ под̾ѧ̀ ѻ҆тца̀ своего̀ и҆ посы́па же́лчь на ѻ҆чеса̀ ѻ҆тца̀ своегѡ̀, глаго́лѧ: дерза́й, ѻ҆́тче.

¹¹Е҆гда́ же ѡ҆грызє́на бы́ша, ѡ҆трѐ ѻ҆́чи своѝ,

¹²и҆ ѿрто́шасѧ ѿ ѹ҆́глѡвъ ѻ҆че́съ є҆гѡ̀ бѣ́льма, и҆ ви́дѣвъ сы́на своего̀, нападѐ на вы́ю є҆гѡ̀

¹³и҆ пла́касѧ и҆ речѐ: блг҇ве́нъ є҆сѝ, бж҃е, и҆ блг҇ве́но и҆́мѧ твоѐ во вѣ́ки, и҆ блг҇ве́ни всѝ ст҃і́и твоѝ а҆́гг҃ли,

¹⁴ѩ҆́кѡ наказа́лъ є҆сѝ и҆ поми́ловалъ є҆сѝ мѧ̀: сѐ, ви́ждѹ тѡві́ю сы́на моего̀. И҆ вни́де сы́нъ є҆гѡ̀ ра́дѹѧсѧ, и҆ возвѣстѝ ѻ҆тцѹ̀ своемѹ̀ вели҄чїѧ бы҄вшаѧ є҆мѹ̀ въ миді́и.

¹⁵И҆ и҆зы́де тѡві́тъ во срѣ́тенїе невѣ́стки своеѧ̀ ра́дѹѧсѧ и҆ благословѧ̀ бг҃а, ко вратѡ́мъ нїнеѵі́и. И҆ чѹдѧ́хѹсѧ ви́дѧщїи є҆го̀ грѧдѹ́ща, ѩ҆́кѡ прозрѣ̀.

¹⁶И҆ тѡві́тъ и҆сповѣ́дашесѧ пред̾ ни́ми, ѩ҆́кѡ поми́лова є҆го̀ бг҃ъ. И҆ є҆гда̀ прнбли́жисѧ тѡві́тъ къ са́ррѣ невѣ́стцѣ свое́й, благословѝ ю҆̀, глаго́лѧ: прїидѝ здра́ва, дщѝ: блг҇ве́нъ бг҃ъ, и҆́же приведѐ тѧ̀ къ на́мъ, и҆ ѻ҆те́цъ тво́й и҆ ма́ти твоѧ̀. И҆ бы́сть ра́дость всѣ҄мъ сѹ́щымъ въ нїнеѵі́и бра́тїѧмъ є҆гѡ̀.

¹⁷И҆ прїи́де а҆хїа́харъ, и҆ насва́съ сы́нъ бра́та є҆гѡ̀,

¹⁸и҆ бы́сть бра́къ тѡві́и съ весе́лїемъ дні́й се́дмь.