Read Библия Церковнославянская Тѡві́т 12 Bible Online

Тѡві́т 12 - Библия Церковнославянская bible

Тѡві́т 12

¹И҆ призва̀ тѡві́тъ тѡві́ю сы́на своего̀ и҆ речѐ є҆мѹ̀: промы́сли, ча́до мздѹ̀ человѣ́кѹ ходи́вшемѹ съ тобо́ю: и҆ приложи́ти є҆мѹ̀ подоба́етъ.

²И҆ речѐ: ѻ҆́тче, не бѹ́дѹ ѡ҆би́жденъ да́въ є҆мѹ̀ по́лъ, ѩ҆̀же принесо́хъ,

³поне́же приведѐ мѧ̀ тебѣ̀ здра́ва и҆ женѹ̀ мою̀ и҆зцѣлѝ, и҆ сребро̀ моѐ принесѐ, и҆ тебѐ та́кожде ѹ҆врачева̀.

⁴И҆ речѐ ста́рецъ: пра́ведно є҆́сть є҆мѹ̀.

⁵И҆ призва̀ а҆́гг҃ла и҆ речѐ є҆мѹ̀: возмѝ по́лъ всѣ́хъ, ѩ҆̀же принесо́сте, и҆ пойдѝ здра́въ.

⁶Тогда̀ призва́въ ѻ҆бои́хъ та́йнѡ, речѐ и҆́ма: блг҇ви́те бг҃а и҆ томѹ̀ и҆сповѣ́дайтесѧ, и҆ вели́чїе дади́те є҆мѹ̀, и҆ и҆сповѣ́дайтесѧ є҆мѹ̀ пред̾ всѣ́ми живѹ́щими ѡ҆ си́хъ, ѩ҆̀же сотворѝ съ ва́ма: добро̀ є҆́же блг҇ви́ти бг҃а и҆ возноси́ти и҆́мѧ є҆гѡ̀, словеса̀ дѣ́лъ бж҃їихъ благоче́стно сказѹ́юще: и҆ да не лѣните́сѧ и҆сповѣ́датисѧ є҆мѹ̀:

⁷та́йнѹ царе́вѹ добро̀ храни́ти, дѣла́ же бж҃їѧ ѿкрыва́ти сла́внѡ: добро̀ твори́те, и҆ ѕло̀ не ѡ҆брѧ́щетъ вы̀:

⁸бла́го моли́тва съ посто́мъ и҆ ми́лостынею и҆ пра́вдою: бла́го ма́лое съ пра́вдою, не́жели мно́го съ непра́вдою: добро̀ твори́ти ми́лостыню, не́жели сокро́виществовати зла́то,

⁹ми́лостынѧ бо ѿ сме́рти и҆збавлѧ́етъ и҆ та́ѧ ѡ҆чища́етъ всѧ́къ грѣ́х: творѧ́щїи ми́лѡстыни и҆ пра҄вды и҆спо́лнѧтсѧ жи́зни,

¹⁰согрѣша́ющїи же вразѝ сѹ́ть своегѡ̀ живота̀:

¹¹не ѹ҆таю̀ ѿ ва́съ всѧ́кагѡ словесѐ, рѣ́хъ бо: та́йнѹ царе́вѹ храни́ти добро̀, дѣла́ же бж҃їѧ ѿкрыва́ти сла́внѡ:

¹²и҆ ни҃ѣ, є҆гда̀ моли́лсѧ є҆сѝ ты̀ и҆ невѣ́стка твоѧ̀ са́рра, а҆́зъ приноша́хъ па́мѧть моли́твы ва́шеѧ пред̾ ст҃а́го, и҆ є҆гда̀ погреба́лъ є҆сѝ мє́ртвыѧ, подо́бнѣ присѹ́тствовахъ тебѣ̀,

¹³и҆ є҆гда̀ не лѣни́лсѧ є҆сѝ воста́ти и҆ ѡ҆ста́вити ѡ҆бѣ́дъ тво́й, да ѿше́дъ покры́еши ме́ртваго, не ѹ҆таи́лсѧ є҆сѝ менє̀ благотворѧ́й, но съ тобо́ю бѣ́хъ:

¹⁴и҆ нн҃ѣ посла́ мѧ бг҃ъ и҆зцѣли́ти тѧ̀ и҆ невѣ́сткѹ твою̀ са́ррѹ:

¹⁵а҆́зъ є҆́смь рафаи́лъ, є҆ди́нъ ѿ седмѝ ст҃ы́хъ а҆́гг҃лѡвъ, и҆̀же прино́сѧтъ мѡли́твы ст҃ы́хъ и҆ вхо́дѧтъ пред̾ сла́вѹ ст҃а́гѡ.

¹⁶И҆ смѧто́стасѧ ѻ҆́ба и҆ падо́ста на лицѐ, занѐ ѹ҆боѧ́стасѧ.

¹⁷И҆ речѐ и҆́ма: не бо́йтесѧ, ѩ҆́кѡ ми́ръ ва́ма бѹ́детъ, бг҃а же благослови́те во вѣ́къ:

¹⁸ѩ҆́кѡ не свое́ю сѝ благода́тїю, но во́лею бг҃а на́шегѡ прїидо́хъ, сегѡ̀ ра́ди благослови́те є҆го̀ во вѣ́къ:

¹⁹всѧ҄ дни҄ ѩ҆влѧ́хсѧ ва́ма, и҆ не ѩ҆до́хъ, нижѐ пи́хъ, но видѣ́нїе вы̀ зрѧ́сте:

²⁰и҆ нн҃ѣ и҆сповѣ́дайтесѧ бг҃ѹ, занѐ восхождѹ̀ къ посла́вшемѹ мѧ̀, и҆ напиши́те всѧ҄, ѩ҆̀же соверши́шасѧ, въ кни́гѹ.

²¹И҆ воста́ста и҆ не ктомѹ̀ ви́дѣста є҆го̀:

²²и҆ и҆сповѣ́даста дѣла̀ вє́лїѧ и҆ чѹ҄днаѧ бж҃їѧ, и҆ ка́кѡ ѩ҆ви́сѧ и҆́ма а҆́гг҃лъ гд҇ень.