Read Библия Церковнославянская Тѡві́т 14 Bible Online

Тѡві́т 14 - Библия Церковнославянская bible

Тѡві́т 14

¹И҆ преста̀ и҆сповѣ́даѧсѧ тѡві́тъ.

²И҆ бѣ̀ лѣ́тъ ѻ҆сми́десѧти ѻ҆смѝ, є҆гда̀ погѹбѝ зра́ки, и҆ по лѣ́тѣхъ ѻ҆смѝ прозрѣ̀: и҆ творѧ́ше ми́лѡстыни, и҆ приложѝ боѧ́тисѧ гд҇а бг҃а и҆ и҆сповѣ́датисѧ є҆мѹ̀:

³ѕѣлѡ́ же состарѣ́сѧ, и҆ прнзва̀ сы́на своего̀ и҆ ше́сть сынѡ́въ є҆гѡ̀ и҆ речѐ є҆мѹ̀: ча́до, возмѝ сы́ны твоѧ҄, сѐ, состарѣ́хсѧ и҆ при и҆схожде́нїи ѿ житїѧ̀ є҆́смь:

⁴пойдѝ въ миді́ю, ча́до, ѹ҆вѣ́рихсѧ бо, є҆ли҄ка глаго́ла ї҆ѡ́на про҇ро́къ ѡ҆ нїнеѵі́и, ѩ҆́кѡ разори́тсѧ, въ миді́и же бѹ́детъ ми́ръ па́че да́же до вре́мене, и҆ ѩ҆́кѡ бра́тїѧ на҄ша на землѝ расточа́тсѧ ѿ благі́ѧ землѝ, и҆ ї҆ер҇ли́мъ бѹ́детъ пѹ́стъ, и҆ до́мъ бж҃їй въ не́мъ сожже́нъ бѹ́детъ и҆ пѹ́стъ бѹ́детъ до вре́мене:

⁵и҆ па́ки поми́лѹетъ и҆̀хъ бг҃ъ и҆ возврати́тъ и҆̀хъ въ зе́млю, и҆ сози́ждѹтъ до́мъ, не ѩ҆ко́въ пе́рвый, до́ндеже и҆спо́лнѧтсѧ времена̀ вѣ́ка: и҆ по си́хъ возвратѧ́тсѧ ѿ плѣне́нїй и҆ сози́ждѹтъ ї҆ер҇ли́мъ че́стнѡ, и҆ до́мъ бж҃їй въ не́мъ сози́ждетсѧ во всѧ҄ ро́ды вѣ́ка зда́нїемъ сла́внымъ, ѩ҆́коже глаго́лаша ѡ҆ не́мъ про҇ро́цы:

⁶и҆ всѝ ѩ҆зы́цы ѡ҆братѧ́тсѧ и҆́стиннѡ боѧ́тисѧ гд҇а бг҃а и҆ ѡ҆прове́ргнѹтъ їдѡлы своѧ҄,

⁷и҆ возблг҇вѧ́тъ всѝ ѩ҆зы́цы гд҇а, и҆ лю́дїе є҆гѡ̀ и҆сповѣ́дѧтсѧ бг҃ѹ, и҆ вознесе́тъ гд҇ь лю́ди своѧ҄, и҆ возра́дѹютсѧ всѝ лю́бѧщїи гд҇а бг҃а во и҆́стинѣ и҆ пра́вдѣ, творѧ́ще ми́лость бра́тїи на́шей:

⁸и҆ нн҃ѣ, ча́до, ѿидѝ ѿ нїнеѵі́и, ѩ҆́кѡ всѧ́чески бѹ́дѹтъ, ѩ҆̀же глаго́ла про҇ро́къ ї҆ѡ́на:

⁹ты́ же сохранѝ зако́нъ и҆ повелѣ҄нїѧ и҆ бѹ́ди любоми́лостивъ и҆ пра́веденъ, да тебѣ̀ бла́го бѹ́детъ:

¹⁰и҆ погребѝ мѧ̀ до́брѣ, и҆ ма́терь твою̀ со мно́ю, и҆ да не ктомѹ̀ пребѹ́дете въ нїнеѵі́и: ча́до, ви́ждь, что̀ сотворѝ а҆ма́нъ а҆хїа́харѹ корми́вшемѹ є҆го̀, ѩ҆́кѡ ѿ свѣ́та ѿведѐ є҆го̀ во тмѹ̀, и҆ є҆ли҄ка воздадѐ є҆мѹ̀: и҆ а҆хїа́харъ ѹ҆́бѡ спасе́сѧ, томѹ́ же воздаѧ́нїе воздаде́сѧ, и҆ то́й сни́де во тмѹ̀: манассі́а сотворѝ милосе́рдїе и҆ спасе́сѧ ѿ сѣ́ти сме́ртныѧ, ю҆́же потчѐ є҆мѹ̀: а҆ма́нъ же падѐ въ сѣ́ть и҆ поги́бе:

¹¹и҆ ни҃ѣ, ча҄да, вѣ́ждьте, что̀ ми́лостынѧ твори́тъ и҆ пра́вда и҆збавлѧ́етъ. И҆ сїѧ҄ глаго́лѧ, и҆спѹстѝ дѹ́шѹ свою̀ на ѻ҆дрѣ̀: бѣ́ же лѣ́тъ ста̀ пѧти́десѧти ѻ҆смѝ. И҆ погребѐ є҆го̀ сла́внѡ.

¹²И҆ є҆гда̀ ѹ҆́мре а҆́нна, погребѐ ю҆̀ со ѻ҆тце́мъ свои́мъ. Ѿи́де же тѡві́а съ жено́ю свое́ю и҆ съ сынмѝ свои́ми во є҆квата́ны ко рагѹи́лѹ те́стю своемѹ̀,

¹³и҆ состарѣ́сѧ че́стнѡ, и҆ погребѐ те́стєвъ свои́хъ сла́внѡ, и҆ наслѣ́ди и҆мѣ́нїе и҆́хъ и҆ тѡві́та ѻ҆тца̀ своегѡ̀:

¹⁴и҆ ѹ҆́мре (сы́й) лѣ́тъ ста̀ два́десѧти седмѝ во є҆квата́нѣхъ миді́йскихъ:

¹⁵и҆ слы́ша, пре́жде не́же ѹ҆мре́ти є҆мѹ̀, погѹбле́нїе нїнеѵі́и, ю҆́же плѣнѝ навѹходоно́соръ и҆ а҆сѹи́ръ: и҆ возра́довасѧ, пре́жде не́же ѹ҆́мре, ѡ҆ нїнеѵі́и.