Read Библия Церковнославянская Тѡві́т 6 Bible Online

Тѡві́т 6 - Библия Церковнославянская bible

Тѡві́т 6

¹И҆ преста̀ пла́кати.

²Ѻ҆́на же шє́дша пѹте́мъ, прїидо́ста въ ве́черъ ко ті́грѹ рѣцѣ̀ и҆ пребы́ста та́мѡ.

³Ѻ҆́трочнщь же сни́де ѡ҆мытисѧ и҆ и҆зскочѝ ры́ба ѿ рѣкѝ и҆ хотѧ́ше пожре́ти ѻ҆́трочища.

⁴А҆́гг҃лъ же речѐ є҆мѹ̀: возмѝ ры́бѹ. И҆ ѩ҆́тъ ры́бѹ ѻ҆́трочищь и҆ и҆зве́рже ю҆̀ на зе́млю.

⁵И҆ речѐ є҆мѹ̀ а҆́гг҃лъ: разрѣ́жи ры́бѹ, и҆ взѧ́въ се́рдце и҆ пе́чень и҆ же́лчь, положѝ сохра́ннѡ.

⁶И҆ сотворѝ ѻ҆́трочищь, ѩ҆́коже речѐ є҆мѹ̀ а҆́гг҃лъ: ры́бѹ же и҆спє́кша, снѣдо́ста: и҆ и҆до́ста ѻ҆́ба, доне́лиже прили́жистасѧ ко є҆квата́нѡмъ.

⁷И҆ речѐ ѻ҆́трочищь а҆́гг҃лѹ: а҆зарі́а бра́те, что̀ є҆́сть се́рдце и҆ пе́чень и҆ же́лчь ры́бїѧ;

⁸И҆ речѐ є҆мѹ̀: се́рдце и҆ пе́чень, а҆́ще кого̀ смѹща́етъ де́мѡнъ и҆лѝ дѹ́хъ ѕо́лъ, си́мъ подоба́етъ кѹри́ти пред̾ человѣ́комъ и҆лѝ жено́ю, и҆ ктомѹ̀ не бѹ́детъ смѹща́тсиѧ:

⁹же́лчь же, пома́зати человѣ́ка, и҆́же и҆́мать бѣ́льма на ѻ҆чесѣ́хъ, и҆ и҆зцѣлѣ́етъ.

¹⁰Е҆гда́ же прибли́жистасѧ ко ра́гѣ,

¹¹речѐ а҆́гг҃лъ ѻ҆́трочищѹ: бра́те, дне́сь пребѹ́демъ ѹ҆ рагѹи́ла, и҆ ѻ҆́нъ сро́дникъ тво́й є҆́сть, и҆ є҆́сть є҆мѹ̀ дще́рь є҆диноро́дна и҆́менемъ са́рра:

¹²возглаго́лю ѡ҆ не́й, є҆́же да́тисѧ тебѣ̀ є҆́й въ женѹ̀, занѐ тебѣ̀ надлежи́тъ наслѣ́дїе є҆ѧ̀, и҆ ты̀ є҆ди́нъ є҆сѝ ѿ ро́да є҆ѧ̀: ѻ҆трокови́ца же красна̀ и҆ ѹ҆мна̀ є҆́сть:

¹³и҆ нн҃ѣ послѹ́шай мѧ̀, и҆ возглаго́лю ѻ҆тцѹ̀ є҆ѧ̀, и҆ є҆гда̀ возврати́мсѧ ѿ ра́гъ, сотвори́мъ бра́къ: поне́же вѣ́мъ рагѹи́ла, ѩ҆́кѡ не да́стъ є҆ѧ̀ мѹ́жѹ и҆но́мѹ по зако́нѹ мѡѷсе́овѹ, и҆лѝ пови́ненъ бѹ́детъ сме́рти, занѐ наслѣ́дїе тебѣ̀ подоба́етъ прїѧ́ти, не́жели всѧ́комѹ человѣ́кѹ.

¹⁴Тогда̀ речѐ ѻ҆́трочищь а҆́гг҃лѹ: а҆зарі́а бра́те, слы́шахъ а҆́зъ, ѩ҆́кѡ ѻ҆трокови́ца дана̀ бѣ̀ седмѝ мѹжє́мъ, и҆ всѝ въ невѣ́стницѣ погибо́ша:

¹⁵и҆ нн҃ѣ а҆́зъ є҆ди́нъ є҆́смь ѻ҆тцѹ̀ и҆ бою́сѧ, да не вше́дъ ѹ҆мрѹ̀ ѩ҆́коже и҆ пре́жднїи, поне́же де́мѡнъ лю́битъ ю҆̀ и҆́же не вреди́тъ ни кого́же ра́звѣ приходѧ́щихъ къ не́й: и҆ нн҃ѣ а҆́зъ бою́сѧ да не ѹ҆мрѹ̀ и҆ низведѹ̀ живо́тъ ѻ҆тца̀ моегѡ̀ и҆ ма́тере моеѧ̀ съ печа́лїю ѡ҆ мнѣ̀ во гро́бъ и҆́хъ, и҆ сы́нъ дрѹгі́й нѣ́сть и҆́ма, и҆́же погребе́тъ ѧ҆̀.

¹⁶Рече́ же є҆мѹ̀ а҆́гг҃лъ: не по́мниши ли слове́съ, ѩ҆́же заповѣ́да тебѣ̀ ѻ҆те́цъ тво́й, ѡ҆ є҆́же взѧ́ти тебѣ̀ женѹ̀ ѿ ро́да твоегѡ̀; и҆ нн҃ѣ послѹ́шай мѧ̀, бра́те, поне́же тебѣ̀ бѹ́детъ въ женѹ̀, а҆ ѡ҆ де́мѡнъ ни є҆ди́ныѧ мы́сли и҆мѣ́й, занѐ въ но́щь сїю̀ да́стсѧ тебѣ̀ ѻ҆на̀ въ женѹ̀:

¹⁷и҆ а҆́ще вни́деши въ невѣ́стникъ, во́змеши жера́токъ ѳѷмїа́мный, и҆ возложи́ши ѿ се́рдца и҆ ѿ пе́чени ры́бныѧ и҆ покѹри́ши:

¹⁸и҆ ѡ҆бонѧ́етъ де́мѡнъ, и҆ ѿбѣжи́тъ и҆ не возврати́тисѧ во вѣ́къ вѣ́ка: є҆гда́ же прїи́деши къ не́й, воста́ните ѻ҆́ба и҆ возопі́йте къ мл҇тивомѹ бг҃ѹ, и҆ сп҃се́тъ ва́съ и҆ поми́лѹетъ: не бо́йсѧ, занѐ тебѣ̀ сїѧ̀ ѹ҆гото́вана є҆́сть ѿ вѣ́ка, и҆ ты̀ ю҆̀ спасе́ши, и҆ по́йдетъ съ тобо́ю, и҆ непщѹ́ю, ѩ҆́кѡ тебѣ̀ бѹ́дѹтъ ѿ неѧ̀ ча҄да. И҆ ѩ҆́кѡ ѹ҆слы́ша тѡві́а сїѧ҄, возлюбѝ ю҆̀, и҆ дѹша̀ є҆гѡ̀ прилѣпи́сѧ ѕѣлѡ̀ є҆́й. И҆ прїидо́ста во є҆квата́ны.