Read Библия Церковнославянская Тѡві́т 7 Bible Online

Тѡві́т 7 - Библия Церковнославянская bible

Тѡві́т 7

¹И҆ прїидо́ста въ до́мъ рагѹи́левъ: са́рра же срѣ́те и҆̀хъ и҆ ра́достнѡ привѣ́тствоваше и҆̀хъ, а҆ ѻ҆́на ю҆̀: и҆ введѐ и҆̀хъ въ до́мъ.

²И҆ речѐ рагѹи́лъ є҆́днѣ женѣ̀ свое́й: ко́ль подо́бенъ ю҆́ноша тѡві́тѹ сы́нѹ бра́та моегѡ̀;

³И҆ вопросѝ и҆̀хъ рагѹи́лъ: ѿкѹ́дѹ є҆стѐ, бра́тїѧ; И҆ рѣ́ста є҆мѹ̀: ѿ сынѡ́въ нефѳалі́млихъ плѣне́нныхъ въ нїнеѵі́ю.

⁴И҆ речѐ и҆́ма: зна́ета ли тѡві́та бра́та на́шего; Ѻ҆́на же рѣ́ста: зна́ема. И҆ речѐ и҆́ма: здра́вствѹетъ ли;

⁵Ѻ҆́на же рѣ́ста: и҆ жи́въ є҆́сть и҆ здра́вствѹетъ. И҆ рече́ тѡві́а: ѻ҆те́цъ мо́й є҆́сть.

⁶И҆ и҆зскочѝ рагѹи́лъ, и҆ ѡ҆блобыза̀ є҆го̀, и҆ пла́касѧ,

⁷и҆ благословѝ є҆го̀, и҆ речѐ є҆мѹ̀: до́брагѡ и҆ блага́гѡ человѣ́ка сы́нъ. И҆ слы́шавъ, ѩ҆́кѡ тѡві́тъ погѹбѝ ѻ҆́чи своѝ, ско́рбенъ бы́сть и҆ пла́касѧ:

⁸и҆ є҆́дна жена̀ є҆гѡ̀ и҆ са́рра дще́рь є҆гѡ̀ пла́кастѣсѧ. И҆ прїѧ́ша и҆́хъ ѹ҆се́рднѡ,

⁹и҆ закла́ша ѻ҆вна̀ ѿ ѻ҆ве́цъ, и҆ предложи́ша снѣ҄ди мно́жайшыѧ. Рече́ же тѡві́а рафаи́лѹ: а҆зарі́а бра́те, рцы̀, ѡ҆ ни́хже глаго́лалъ є҆сѝ на пѹтѝ, и҆ да соверши́тсѧ дѣ́ло.

¹⁰И҆ соѡбщѝ сло́во рагѹи́лѹ. И҆ речѐ рагѹи́лъ къ тѡві́и: ѩ҆́ждь, пі́й и҆ благодѹ́шествѹй, тебѣ́ бо досто́итъ дѣ́тище моѐ взѧ́ти: ѻ҆ба́че ѡ҆б̾ѧвлю̀ тебѣ̀ и҆́стинѹ:

¹¹вдава́хъ дѣ́тище моѐ седмѝ мѹжє́мъ, и҆ є҆гда̀ вхожда́хѹ къ не́й, ѹ҆мира́хѹ под̾ но́щь: но нн҃ѣ благодѹ́шествѹй. И҆ речѐ тѡві́а: не вкѹшѹ̀ ничто́же здѣ̀, до́идеже поста́вите и҆ совѣща́етесѧ со мно́ю. И҆ речѐ рагѹи́лъ: поимѝ ю҆̀ ѿнн҃ѣ по ѡ҆бы́чаю: ты̀ бо бра́тъ є҆сѝ є҆ѧ̀, и҆ ѻ҆на̀ твоѧ̀ є҆́сть, мл҇тивъ же бг҃ъ да бл҃гопоспѣши́тъ ва́ма во бл҃га҄ѧ.

¹²И҆ призва̀ са́ррѹ дще́рь свою̀, и҆ є҆́мь рѹ́кѹ є҆ѧ̀, предадѐ ю҆̀ тѡві́и въ женѹ̀ и҆ речѐ: сѐ, по зако́нѹ мѡѷсе́овѹ поимѝ ю҆̀ и҆ ѿведѝ ко ѻ҆тцѹ̀ твоемѹ̀ И҆ благословѝ и҆̀хъ.

¹³И҆ призва̀ є҆́днѹ женѹ̀ свою̀, и҆ взе́мъ кни́гѹ, написа̀ пнса́нїе и҆ запечатлѣ̀.

¹⁴И҆ нача́ша ѩ҆́сти.

¹⁵И҆ призва̀ рагѹи́лъ є҆́днѹ женѹ̀ свою̀ и҆ речѐ є҆́й: сестро̀, ѹ҆гото́ви и҆́нъ черто́гъ и҆ введѝ ю҆̀.

¹⁶И҆ сотворѝ, ѩ҆́коже речѐ: и҆ введѐ ю҆̀ та́мѡ и҆ пла́касѧ: и҆ воспрїѧ́тъ сле́зы дще́ре своеѧ̀ и҆ речѐ є҆́й:

¹⁷ѹ҆пова́й, ча́до, гд҇ь нб҃сѐ и҆ землѝ да да́стъ тебѣ̀ ра́дость вмѣ́стѡ печа́ли твоеѧ̀ тоѧ̀: ѹ҆пова́й, дщѝ.