Read Библия Церковнославянская Тѡві́т 8 Bible Online

Тѡві́т 8 - Библия Церковнославянская bible

Тѡві́т 8

¹Е҆гда́ же ѡ҆конча́ша ве́черю, введо́ша тѡві́ю къ не́й.

²Ѻ҆́нъ же и҆ды́й помѧнѹ̀ словеса̀ рафаи́лѡва, и҆ взѧ̀ жера́токъ ѳѷмїа́мный, и҆ возложѝ се́рдце ры́бїе и҆ пе́чень, и҆ покѹрѝ:

³є҆гда́ же ѡ҆бонѧ̀ де́мѡнъ воню̀, ѿбѣжѐ въ вы҄шнѧѧ є҆гѵ́пта, и҆ свѧза̀ є҆го̀ а҆́гг҃лъ.

⁴Е҆гда́ же заключє́на бы́ста ѻ҆́ба, воста̀ тѡві́а ѿ ло́жа и҆ речѐ: воста́ни, сестро̀, и҆ помо́лимсѧ, да поми́лѹетъ ны̀ гд҇ь.

⁵И҆ нача̀ тѡві́а глаго́лати: блг҇ве́нъ є҆сѝ, бж҃е ѻ҆тє́цъ на́шихъ, и҆ блг҇ве́но и҆́мѧ твоѐ ст҃о́е и҆ сла́вное во вѣ́ки, да блг҇вѧ́тъ тѧ̀ нб҃са̀ и҆ всѧ҄ созда҄нїѧ твоѧ҄:

⁶ты̀ сотвори́лъ є҆сѝ а҆да́ма и҆ да́лъ є҆сѝ є҆мѹ̀ помо́щницѹ є҆́ѵѹ ѹ҆твержде́нїе женѹ̀ є҆гѡ̀: ѿ тѣ́хъ роди́сѧ человѣ́ческое сѣ́мѧ: ты̀ ре́клъ є҆сѝ: не добро̀ бы́ти человѣ́кѹ є҆ди́номѹ, сотвори́мъ є҆мѹ̀ помо́щницѹ подо́бнѹю є҆мѹ̀:

⁷и҆ нн҃ѣ, гд҇и, не блѹдодѣѧ́нїѧ ра́ди а҆́зъ пое́млю сестрѹ̀ мою̀ сїю̀, но по и҆́стинѣ: повелѝ поми́лованѹ мѝ бы́ти и҆ съ не́ю состарѣ́тисѧ.

⁸И҆ речѐ съ ни́мъ: а҆ми́нь.

⁹И҆ спа́ста ѻ҆́ба но́щїю, И҆ воста́въ рагѹи́лъ по́йде и҆ и҆скопа̀ гро́бъ, глаго́лѧ:

¹⁰є҆да̀ и҆ то́й ѹ҆́мре;

¹¹И҆ прїи́де рагѹи́лъ въ до́мъ сво́й

¹²и҆ речѐ є҆́днѣ женѣ̀ свое́й: послѝ є҆ди́нѹ ѿ рабы́нь, и҆ да ви́дитъ, а҆́ще жи́въ є҆́сть: а҆́ще же ни, да погребе́мъ є҆го̀, и҆ да никто́же ѹ҆вѣ́сть.

¹³И҆ вни́де рабы́нѧ ѿве́рзши две́рь, и҆ ѡ҆брѣ́те ѻ҆бои́хъ спѧ́щихъ,

¹⁴и҆ и҆зше́дши возвѣстѝ и҆̀мъ, ѩ҆́кѡ жи́въ є҆́сть.

¹⁵И҆ благословѝ рагѹи́лъ бг҃а, глаго́лѧ: блг҇ве́нъ є҆сѝ ты̀, бж҃е, во всѧ́цѣмъ бл҃гослове́нїи чи́стѣмъ и҆ ст҃ѣ́мъ: и҆ да блг҇вѧ́тъ тѧ̀ ст҃і́и твоѝ и҆ всѧ҄ созда҄нїѧ твоѧ҄, и҆ всѝ а҆́гг҃ли твоѝ и҆ и҆збра́нни твоѝ: да блг҇вѧ́тъ тѧ̀ во вѣ́ки:

¹⁶блг҇ве́нъ є҆сѝ, ѩ҆́кѡ возвесели́лъ мѧ̀ є҆сѝ, и҆ не бы́сть мѝ, ѩ҆́коже непщева́хъ, но по мио́зѣй мл҇ти твое́й сотвори́лъ є҆сѝ съ на́ми:

¹⁷блг҇ве́нъ є҆сѝ, ѩ҆́кѡ поми́ловалъ є҆сѝ двои́хъ є҆диноро́дныхъ: сотворѝ и҆́ма, влдко, мл҇ть, совершѝ живо́тъ и҆́хъ во здра́вїи съ весе́лїемъ и҆ мл҇тїю.

¹⁸Повелѣ́ же рабѡ́мъ засы́пати гро́бъ,

¹⁹и҆ сотворѝ и҆̀мъ бра́къ дні́й четырена́десѧть,

²⁰И҆ речѐ є҆мѹ̀ рагѹи́лъ, пре́жде да́же соверши́тисѧ днє́мъ бра́ка, съ клѧ́твою, да не и҆зы́детъ, а҆́ще не и҆спо́лнѧтсѧ четырена́десѧть дні́е бра́ка:

²¹и҆ тогда̀ взе́мъ по́лъ и҆мѣ́нїй свои́хъ да по́йдетъ со здра́вїемъ ко ѻ҆тцѹ̀: прѡ́чаѧ же, є҆гда̀ ѹ҆мрѹ̀ и҆ жена̀ моѧ̀.