Read Библия Церковнославянская I҆удi'ѳ 1 Bible Online

I҆удi'ѳ 1 - Библия Церковнославянская bible

I҆удi'ѳ 1

¹Лѣ́та вторагѡна́десѧть ца́рства навѹходоно́сора, и҆́же ца́рствова над̾ а҆ссѷрї҄аны въ нїнеѵі́и гра́дѣ вели́цѣмъ, во дни҄ а҆рфаѯа́да, и҆́же ца́рствова над̾ ми҄дѧны во є҆квата́нѣхъ

²и҆ созда̀ во є҆квата́нѣхъ ѡ҆́крестъ стѣ́ны ѿ ка́меней те́саныхъ въ широтѹ̀ ла́ктей трїе́хъ, а҆ въ долготѹ̀ ла́ктей шестѝ, и҆ сотворѝ высотѹ̀ стѣны̀ ла́ктей седми́десѧти, а҆ широтѹ̀ є҆ѧ̀ ла́ктей пѧти́десѧти:

³и҆ столпы̀ є҆ѧ̀ поста́ви на вратѣ́хъ є҆гѡ̀ ла́ктей сто̀, и҆ широтѹ̀ и҆́хъ ѡ҆снова̀ на ла́ктей шетьдесѧ́тъ:

⁴и҆ сотворѝ врата̀ є҆гѡ̀ врата̀ воздви́жєна въ высотѹ̀ ла́ктей седмьдесѧтъ, а҆ широтѹ̀ и҆́хъ ла́ктей четы́редесѧть ко и҆схо́дѹ си́лъ си́льныхъ є҆гѡ̀ и҆ ѹ҆строе́нїємъ пѣшцє́въ є҆гѡ̀:

⁵и҆ сотворѝ бра́нь во дни҄ ѡ҆́ны ца́рь навѹходоно́соръ на царѧ̀ а҆рфаѯа́да на по́ли вели́цѣмъ, є҆́же є҆́сть въ предѣ́лѣхъ рага́ѵлихъ.

⁶И҆ собра́шасѧ къ немѹ̀ всѝ живѹ́щїи въ го́рней и҆ всѝ ѡ҆бита́ющїи при є҆ѵфра́тѣ и҆ ті́грѣ и҆ ѵ҆да́спи и҆ на по́ли а҆рїѡ́ха царѧ̀ є҆лѷмеѡ́нска, и҆ собра́шасѧ ѩ҆зы́цы мно́зи ѕѣлѡ̀ на ѡ҆полче́нїе сынѡ́въ хелеѹ́дихъ.

⁷И҆ посла̀ навѹходоно́соръ ца́рь а҆ссѷрі́йскїй ко всѣ҄мъ ѡ҆бита́ющымъ въ персі́дѣ и҆ ко всѣ҄мъ живѹ́щымъ къ за́падѡмъ, ѡ҆бита́ющымъ въ кїлїкі́и и҆ дама́сцѣ, и҆ лїва́нѣ и҆ а҆нтїлїва́нѣ, и҆ ко всѣ҄мъ живѹ́щымъ на лицы̀ примо́рїѧ,

⁸и҆ къ сѹ́щымъ во ѩ҆зы́цѣхъ карми́ла и҆ въ галаа́дѣ, и҆ въ вы́шней галїле́и и҆ на вели́цѣмъ по́ли є҆сдрилѡ́на,

⁹и҆ ко всѣ҄мъ сѹ́щымъ въ самарі́и и҆ градѣ́хъ є҆ѧ̀, и҆ ѡ҆б̾ ѡ҆́нъ по́лъ ї҆ѻрда́на да́же до ї҆ер҇ли́ма и҆ вета́ни, и҆ хе́лла и҆ ка́диса, и҆ рѣкѝ є҆гѵ́пєтскїѧ и҆ тафны̀, и҆ рамессѝ и҆ всеѧ̀ землѝ гесе́мскїѧ,

¹⁰до́ндеже прїитѝ вы́ше та́ниса и҆ ме́мфиса, и҆ ко всѣ҄мъ ѡ҆бита́ющымъ во є҆гѵ́птѣ, до́ндеже прїитѝ на предѣ́лы є҆Ѳїо́пїи.

¹¹И҆ ни во что̀ вмѣни́ша всѝ ѡ҆бита́ющїи по все́й землѝ сло́во навѹходоно́сора царѧ̀ а҆ссѷрі́йска, и҆ не снидо́шасѧ къ немѹ̀ на бра́нь, поне́же не боѧ́шасѧ є҆гѡ̀, но бы́сть пред̾ ни́ми а҆́ки мѹ́жъ є҆ди́нъ: и҆ возврати́ша посла́нникѡвъ є҆гѡ̀ тщи́хъ со безче́стїемъ ѿ лица̀ своегѡ̀.

¹²И҆ раз̾ѧри́сѧ навѹходоно́соръ на всѧ́кѹ зе́млю сїю̀ ѕѣлѡ̀, и҆ клѧ́тсѧ престо́ломъ и҆ ца́рствомъ свои́мъ всѧ́чески ѿмсти́ти всѣ҄мъ предѣ́лѡмъ кїлїкі́и и҆ дама́ска и҆ сѷрі́и, погѹби́ти мече́мъ свои́мъ и҆ всѧ҄ живѹ́щыѧ въ землѝ мѡа́вли и҆ сы́ны а҆ммѡ҆ни, и҆ всю̀ ї҆ѹде́ю и҆ всѣ́хъ сѹ́щихъ во є҆гѵ́птѣ, до́идеже прїитѝ на предѣ́лы двѹ́хъ мо́рь.

¹³И҆ ѡ҆полчи́сѧ въ си́лѣ свое́й на а҆рфаѯа́да царѧ̀ въ лѣ́то седмоена́десѧть, и҆ ѡ҆долѣ̀ на бра́ни свое́й, и҆ побѣдѝ всю̀ си́лѹ а҆рфаѯа́довѹ и҆ всю̀ ко́нницѹ є҆гѡ̀ и҆ всѧ҄ колєсни́цы є҆гѡ̀,

¹⁴и҆ воз̾ѡблада̀ гра́дами є҆гѡ̀: и҆ прїи́де да́же до є҆квата́нъ, и҆ ѡ҆держа̀ столпы̀, и҆ плѣнѝ стѡ́гны є҆гѡ̀, и҆ красотѹ̀ є҆гѡ̀ положѝ во ѹ҆ничиже́нїе є҆гѡ̀:

¹⁵и҆ взѧ̀ а҆рфаѯа́да на гора́хъ рага́влихъ, и҆ и҆збодѐ є҆го̀ сѹ́лицами свои́ми, и҆ и҆стребѝ є҆го̀ да́же въ де́нь ѻ҆́ный:

¹⁶и҆ возврати́сѧ съ ни́ми въ нїнеѵі́ю са́мъ и҆ всѐ присовокѹпле́нїе є҆гѡ̀, мно́жество мѹже́й ра́тныхъ мно́гое ѕѣлѡ̀, и҆ бѣ̀ та́мѡ почива́ѧ и҆ пи́ршествѹѧ са́мъ и҆ си́ла є҆гѡ̀ дні́й сто̀ два́десѧть.