Read Библия Церковнославянская I҆удi'ѳ 11 Bible Online

I҆удi'ѳ 11 - Библия Церковнославянская bible

I҆удi'ѳ 11

¹И҆ речѐ къ не́й ѻ҆лофе́рнъ: дерза́й, же́но, да не ѹ҆страша́ешисѧ се́рдцемъ твои́мъ, занѐ а҆́зъ не ѡ҆ѕло́бихъ человѣ́ка, и҆́же и҆зво́ли слѹжи́ти царю̀ навѹходоно́сорѹ всеѧ̀ землѝ:

²и҆ нн҃ѣ лю́дїе твоѝ живѹ́щїи въ го́рней, а҆́ще бы не ѹ҆ничто́жили мѧ̀, не воздви́глъ бы́хъ копїѧ̀ моегѡ̀ на ни́хъ, но ѻ҆нѝ са́ми себѣ̀ сотвори́ша сїѧ҄:

³и҆ нн҃ѣ глаго́ли мѝ, чесѡ̀ ра́ди ѿшла̀ є҆сѝ ѿ ни́хъ и҆ пришла̀ є҆сѝ къ на́мъ; прихо́диши бо ко спасе́нїю: дерза́й, въ но́щь сїю̀ жива̀ бѹ́деши, и҆ въ про́чее:

⁴нѣ́сть бо, и҆́же ѡ҆би́дитъ тѧ̀, но бла́го тебѣ̀ сотвори́тъ, ѩ҆́коже быва́етъ рабѡ́мъ господи́на моегѡ̀ царѧ̀ навѹходоно́сора.

⁵И҆ речѐ къ немѹ̀ ї҆ѹді́ѳъ: прїимѝ глаго́лы рабы̀ твоеѧ̀, и҆ да проглаго́летъ рабы́нѧ твоѧ̀ пред̾ лице́мъ твои́мъ, и҆ не возвѣщѹ̀ лжѝ госиоди́нѹ моемѹ̀ въ но́щь сїю̀:

⁶и҆ а҆́ще и҆́маши послѣ́довати словесе́мъ рабы́ни твоеѧ̀, соверше́нно дѣ́ло сотвори́тъ съ тобо́ю бг҃ъ, и҆ не ѿпаде́тъ господи́нъ мо́и ѿ начина́нїй свои́хъ:

⁷жїве́тъ бо ца́рь навѹходоно́соръ всеѧ̀ землѝ, и҆ живе́тъ держа́ва є҆гѡ̀, и҆́же посла́ тѧ во и҆справле́нїе всѧ́кїѧ дѹшѝ, ѩ҆́кѡ не то́кмѡ человѣ́цы тебє̀ ра́ди послѹ́жатъ є҆мѹ̀, но и҆ ѕвѣ́рїе по́льнїи и҆ ско́ти и҆ пти҄цы небє́сныѧ крѣ́постїю твое́ю жи́ви бѹ́дѹтъ ѡ҆ навѹходоно́сорѣ и҆ все́мъ до́мѣ є҆гѡ̀:

⁸слы́шахомъ бо премѹ́дрость твою̀ и҆ хи́трѡсти дѹшѝ твоеѧ̀, и҆ возвѣсти́сѧ все́й землѝ, ѩ҆́кѡ ты̀ є҆ди́нъ бла́гъ во все́мъ ца́рствѣ и҆ си́ленъ въ ра́зѹмѣ и҆ чѹ́денъ во ѡ҆полче́нїихъ бра́ни:

⁹и҆ нн҃ѣ̀ сло́во, є҆́же и҆зречѐ а҆хїѡ́ръ въ засѣда́нїи твое́мъ, слышахомъ глаго́лы є҆гѡ̀, ѩ҆́кѡ снабдѣ́ша є҆го̀ мѹ́жїе гра́да ветѷлѹ́и, и҆ возвѣстѝ и҆̀мъ всѧ҄, є҆ли҄ка и҆зглаго́ла ѻ҆́нъ ѹ҆ тебє́:

¹⁰сегѡ̀ ра́ди, влады́ко господи́не, да не престѹпа́еши словесѐ є҆гѡ̀, но положѝ є҆го̀ въ твое́мъ се́рдцы, ѩ҆́кѡ и҆́стинно є҆́сть: не бо̀ ѿмща́етсѧ ро́дъ на́шъ, не превозмога́етъ ме́чь на ни́хъ, а҆́ще не согрѣша́тъ къ бг҃ѹ своемѹ̀:

¹¹и҆ нн҃ѣ да не бѹ́детъ господи́нъ мо́й ѿве́рженъ и҆ недѣйстви́теленъ, и҆ нападе́тъ сме́рть на лицѐ и҆́хъ, и҆ пости́гнетъ и҆̀хъ согрѣше́нїе, и҆́мже раздража́тъ бг҃а своего̀, когда́ либо а҆́ще сотворѧ́тъ безмѣ́стїе:

¹²поне́же бо ѡ҆скѹдѣ́ша и҆̀мъ бра҄шна, и҆ ѹ҆ма́лисѧ всѧ̀ вода̀, восхотѣ́ша ѹ҆стреми́тисѧ на скоты̀ своѧ҄, и҆ всѧ҄, є҆ли҄ка ѡ҆предѣлѝ и҆̀мъ бг҃ъ въ зако́нѣхъ свои́хъ не ѩ҆́сти, ѹ҆мысли́ша ѹ҆потреблѧ́ти:

¹³и҆ нача́тки пшени́цы, и҆ десѧти҄ны вїиа̀ и҆ є҆ле́а, ѩ҆̀же соблюда́хѹ ѡ҆свѧти́вше ї҆ереѡ́мъ предстоѧ́щымъ во ї҆ер҇ли́мѣ пред̾ лице́мъ бг҃а на́шегѡ, сѹди́ша и҆ждива́ти, и҆̀мже нижѐ рѹка́ми подоба́ше прикаса́тисѧ комѹ̀ ѿ люді́й:

¹⁴и҆ посла́ша во ї҆ер҇ли́мъ, ѩ҆́кѡ и҆ та́мѡ живѹ́щїи сотвори́ша сїѧ҄, да принесѹ́тъ и҆̀мъ разрѣше́нїе ѿ старѣ́йшинъ:

¹⁵и҆ бѹ́детъ, є҆гда̀ возвѣсти́тсѧ и҆̀мъ, и҆ сотворѧ́тъ, дадѹ̀тсѧ тебѣ̀ въ погѹбле́нїе въ де́нь то́й:

¹⁶тѣ́мже а҆́зъ раба̀ твоѧ̀, позна́вши сїѧ҄ всѧ҄, ѿбѣго́хъ ѿ лица̀ и҆́хъ: и҆ посла̀ мѧ̀ бг҃ъ твори́ти съ тобо́ю дѣла̀, ѡ҆ ни́хже ѹ҆жа́снетсѧ всѧ̀ землѧ̀, є҆ли҄цы а҆́ще ѹ҆слы́шатъ сїѧ҄,

¹⁷занѐ раба̀ твоѧ̀ благочести́ва є҆́сть и҆ слѹжа́щи но́щїю и҆ дне́мъ бг҃ѹ нб҃сѐ: и҆ нн҃ѣ пребѹ́дѹ ѹ҆ тебє̀, господи́не мо́й, и҆ да и҆схо́дитъ раба̀ твоѧ̀ въ нощѝ въ де́брь и҆ мо́литсѧ къ бг҃ѹ: и҆ возвѣсти́тъ мѝ, є҆гда̀ сотворѧ́тъ согрѣшє́нїѧ своѧ҄:

¹⁸и҆ прише́дши возвѣщѹ̀ тебѣ̀, и҆ и҆зы́деши со все́ю си́лою твое́ю, и҆ нѣ́сть, и҆́же воспроти́витсѧ тебѣ̀ ѿ ни́хъ:

¹⁹и҆ поведѹ́ тѧ сквозѣ̀ ї҆ѹдею, до́идеже прїитѝ прѧ́мѡ ї҆ер҇ли́ма, и҆ положѹ̀ сѣда́лище твоѐ посредѣ̀ є҆гѡ̀, и҆ пожене́ши и҆̀хъ а҆́ки ѻ҆́вцы, и҆̀мже нѣ́сть па́стырѧ, и҆ не возско́млетъ пе́съ ѧ҆зы́комъ свои́мъ проти́вѹ тебє̀: занѐ мнѣ̀ сїѧ҄ речє́на сѹ́ть по предвѣ́дѣнїю моемѹ̀ и҆ возвѣщє́иа мѝ, и҆ послана̀ є҆́смь возвѣсти́ти тебѣ̀.

²⁰И҆ ѹ҆гѡ́дна бы́ша словеса̀ є҆ѧ̀ пред̾ ѻ҆лофе́рномъ и҆ пред̾ всѣ́ми слѹги҄ є҆гѡ̀, и҆ диви́шасѧ ѡ҆ премѹ́дрости є҆ѧ̀ и҆ рѣ́ша:

²¹нѣ́сть таковы́ѧ жены̀ ѿ конца̀ да́же до конца̀ землѝ въ красотѣ̀ лица̀ и҆ въ ра́зѹмѣ слове́съ.

²²И҆ речѐ къ не́й ѻ҆лофе́рнъ: бла́го сотворѝ бг҃ъ посла́вый тѧ̀ пред̾ людьмѝ, є҆́же бы́ти въ рѹка́хъ на́шихъ держа́вѣ, на ѹ҆ничижи́вшихъ же господи́на моего̀ поги́бели:

²³и҆ нн҃ѣ̀ красна̀ є҆сѝ ты̀ взо́ромъ твои́мъ и҆ блага̀ во словесѣ́хъ твои́хъ: занѐ а҆́ще сотвори́ши, ѩ҆́коже глаго́лала є҆сѝ, бг҃ъ тво́й бѹ́детъ мо́й бг҃ъ, и҆ ты̀ въ домѹ̀ царѧ̀ навѹходоно́сора сѧ́деши и҆ бѹ́деши и҆мени́та по все́й землѝ.