Read Библия Церковнославянская I҆удi'ѳ 12 Bible Online

I҆удi'ѳ 12 - Библия Церковнославянская bible

I҆удi'ѳ 12

¹И҆ повелѣ̀ ввестѝ ю҆̀, и҆дѣ́же положе́ни бы́ша сосѹ́ди сре́брѧнїи є҆гѡ̀, и҆ повелѣ̀ ѹ҆гото́вити є҆́й ѿ пи́щей ѹ҆строева́емыхъ себѣ̀ и҆ ѿ вїна̀ своегѡ̀ пи́ти.

²И҆ речѐ ї҆ѹді́ѳъ: не снѣ́мъ ѿ ни́хъ, да не бѹ́детъ собла́знъ, но ѿ принесе́нныхъ со мно́ю мнѣ̀ подава́емо да бѹ́детъ.

³И҆ речѐ къ ней ѻ҆лофе́рнъ: а҆́ще же ѡ҆скѹдѣ́ютъ сѹ҄щаѧ съ тобо́ю, ѿкѹ́дѹ принесе́мъ тебѣ̀ дава́ти подѡ́бнаѧ си҄мъ; нѣ́сть бо съ на́ми ѿ ро́да твоегѡ̀.

⁴И҆ речѐ ї҆ѹді́ѳъ къ немѹ̀: жива̀ є҆́сть дѹша̀ твоѧ̀, господи́не мо́й, ѩ҆́кѡ не и҆ждиве́тъ раба̀ твоѧ̀ сѹ́щихъ со мно́ю, до́ндеже сотвори́тъ гд҇ь рѹко́ю мое́ю, ѩ҆̀же ѹ҆ста́ви.

⁵И҆ ведо́ша ю҆̀ ѻ҆́троцы ѻ҆лофе́рнѡвы въ шате́ръ, и҆ спа̀ да́же до полѹ́нощи: и҆ воста̀ ѡ҆ ѹ҆́тренней стра́жи

⁶и҆ посла̀ ко ѻ҆лофе́рнѹ, глаго́лющи: да повели́тъ ѹ҆̀бо господи́нъ мо́й пѹща́ти рабѹ̀ твою̀ на моли́твѹ и҆сходи́ти.

⁷И҆ повелѣ̀ ѻ҆лофе́рнъ тѣлохрани́телємъ не возбранѧ́ти є҆́й. И҆ пребы́сть въ полкѹ̀ дни҄ трѝ: и҆ и҆схожда́ше въ нощѝ въ де́брь ветѷлѹ́и и҆ ѹ҆мыва́шесѧ во ѡ҆полче́нїи во и҆сто́чницѣ воды̀,

⁸и҆ ѩ҆́кѡ взы́де, молѧ́шесѧ гдо҇ѹ бг҃ѹ ї҆и҃левѹ, да ѹ҆пра́витъ пѹ́ть є҆ѧ̀ ко возставле́нїю сынѡ́въ люді́й свои́хъ:

⁹и҆ входѧ́щи чиста̀ пребыва́ше въ шатрѣ̀, доне́лиже приноша́ше пи́щѹ свою̀ ко ве́черѹ.

¹⁰И҆ бы́сть въ де́нь четве́ртый, сотворѝ ѻ҆лофе́рнъ пи́ръ рабѡ́мъ свои҄мъ є҆ди҄нымъ, и҆ не призва̀ въ послѹже́нїе ни є҆ди́нагѡ ѿ сѹ́щихъ при слѹ́жбахъ,

¹¹и҆ речѐ вагѡ́ю є҆ѵнѹ́хѹ, и҆́же бѧ́ше приста́вникъ над̾ всѣ́ми сѹ́щими є҆гѡ̀: ше́дъ ѹ҆̀бо ѹ҆вѣща́й женѹ̀ є҆вре́иню, ѩ҆́же є҆́сть ѹ҆ тебє̀, є҆́же прїитѝ къ на́мъ и҆ ѩ҆́сти и҆ пи́ти съ на́ми:

¹²се́ бо, стѹ́дно лицѹ̀ на́шемѹ, а҆́ще женѹ̀ сицевѹ́ю ѡ҆ста́вимъ не бесѣ́довавше съ не́ю, занѐ а҆́ще сеѧ̀ не призове́мъ, посмѣе́тсѧ на́мъ.

¹³И҆ и҆зы́де вагѡ́а ѿ лица̀ ѻ҆лофе́рнова и҆ вни́де къ не́й и҆ речѐ: да не ѡ҆блѣни́тсѧ ѹ҆̀бо ѻ҆трокови́ца до́браѧ сїѧ̀, прише́дши ко господи́нѹ моемѹ̀, просла́витисѧ пред̾ лице́мъ є҆гѡ̀ и҆ пи́ти съ на́ми въ весе́лїе вїно̀ и҆ бы́ти въ де́нь сей, ѩ҆́кѡ дщѝ є҆ди́на ѿ сынѡ́въ а҆ссѹ́ровыхъ, ѩ҆́же предстоѧ́тъ въ домѹ̀ навѹходоно́соровѣ.

¹⁴И҆ речѐ къ немѹ̀ ї҆ѹді́ѳъ: и҆ кто̀ є҆́смь а҆́зъ противоглаго́лющи господи́нѹ моемѹ̀; занѐ всѐ, є҆́же бѹ́детъ пред̾ ѻ҆чесы̀ є҆гѡ̀ ѹ҆го́дно, потща́вшисѧ сотворю̀, и҆ бѹ́детъ сїѐ мѝ ра́дованїе да́же до днѐ сме́рти моеѧ̀.

¹⁵И҆ воста́вши ѹ҆краси́сѧ ѡ҆дѣѧ́нїемъ и҆ всѧ́кимъ ѹ҆краше́нїемъ же́нскимъ: и҆ прїи́де раба̀ є҆ѧ̀ и҆ постла̀ є҆́й пред̾ ѻ҆лофе́рномъ до́лѹ ковры̀, и҆̀хже взѧ̀ ѿ вагѡ́и ко повседне́вномѹ ѹ҆потребле́нїю своемѹ̀, во є҆́же ѩ҆́сти возле́гшей на ни́хъ:

¹⁶и҆ вше́дши возлежѐ ї҆ѹді́ѳъ. И҆ и҆зстѹпѝ се́рдце ѻ҆лофе́рново ѡ҆ ней, и҆ подви́жесѧ дѹша̀ є҆гѡ̀: и҆ бѧ́ше жела́теленъ ѕѣлѡ̀, є҆́же сни́тисѧ съ не́ю, и҆ ѹ҆смотрева́ше вре́меие, є҆́же ѡ҆больсти́ти ю҆̀, ѿ негѡ́же днѐ ви́дѣ ю҆̀:

¹⁷и҆ речѐ къ не́й ѻ҆лофе́рнъ: пі́й ѹ҆̀бо и҆ бѹ́ди съ на́ми въ весе́лїи.

¹⁸И҆ речѐ ї҆ѹді́ѳъ: бѹ́дѹ ѹ҆̀бо пи́ти, господи́не, ѩ҆́кѡ возвели́чисѧ живо́тъ мо́й во мнѣ̀ дне́сь па́че всѣ́хъ дні́й рожде́нїѧ моегѡ̀.

¹⁹И҆ взе́мши ѩ҆дѐ и҆ пѝ пред̾ ни́мъ, ѩ҆̀же ѹ҆гото́ва раба̀ є҆ѧ̀.

²⁰И҆ возвесели́сѧ ѻ҆лофе́рнъ ѡ҆ не́й и҆ пѝ вїна̀ мно́гѡ ѕѣлѡ̀, є҆ли́кѡ не пѝ никогда́же въ де́нь є҆ди́нъ, ѿне́лиже роди́сѧ.