Read Библия Церковнославянская I҆удi'ѳ 14 Bible Online

I҆удi'ѳ 14 - Библия Церковнославянская bible

I҆удi'ѳ 14

¹И҆ речѐ къ ни҄мъ ї҆ѹді́ѳъ: послѹ́шайте ѹ҆̀бо менѐ, бра́тїѧ, и҆ взе́мше главѹ̀ сїю̀ повѣ́сите ю҆̀ на забра́лѣ стѣны̀ ва́шеѧ:

²и҆ бѹ́детъ є҆гда̀ возсїѧ́етъ ѹ҆тро, и҆ взы́детъ со́лнце на зе́млю, прїимете ко́ждо ѻ҆рѹ҄дїѧ бра҄ннаѧ ва҄ша, и҆ и҆зы́дете всѧ́къ мѹ́жъ си́льный внѣ̀ гра́да, и҆ дади́те воево́дѹ над̾ ними, а҆́ки сходѧ́ще на по́ле ко пе́рвѣй стра́жи сынѡ́въ а҆ссѹ́ровыхъ, и҆ не сни́дете:

³и҆ взе́мше сі́и всеѻрѹ҄жїѧ своѧ҄, по́йдѹтъ ко ѡ҆полче́нїю своемѹ̀, и҆ возбѹ́дѧтъ воевѡ́ды си́лы а҆ссѹ́ровы, и҆ стекѹ́тсѧ ко шатрѹ̀ ѻ҆лофе́рновѹ, и҆ не ѡ҆крѧ́щѹтъ є҆гѡ̀, и҆ нападе́тъ на ни́хъ стра́хъ, и҆ побѣ́гнѹтъ ѿ лица̀ ва́шегѡ:

⁴и҆ возслѣ́довавшїи ва́мъ, и҆ всѝ живѹ́щїи во все́мъ предѣ́лѣ ї҆и҃лстѣмъ, постила́йте ѧ҆̀ по пѹтє́мъ и҆́хъ:

⁵пре́жде же є҆́же сотвори́ти сїѧ҄, призови́те мнѣ̀ а҆хїѡ́ра а҆ммані́тина, да ви́дѣвъ позна́етъ ѹ҆ничтожа́ющаго до́мъ ї҆и҃левъ, и҆ сего̀ ѩ҆́кѡ на сме́рть по́сланнаго къ на́мъ.

⁶И҆ призва́ша а҆хїѡ́ра и҆з̾ до́мѹ ѻ҆зі́ина. Е҆гда́ же прїи́де и҆ ви́дѣ главѹ̀ ѻ҆лофе́рновѹ въ рѹцѣ̀ мѹ́жа є҆ди́нагѡ въ собра́нїи люді́й, падѐ на лицѐ, и҆ разсла́бисѧ дѹ́хъ є҆гѡ̀.

⁷Е҆гда́ же под̾ѧ́ша є҆го̀, припадѐ къ нога́ма ї҆ѹді́ѳы, и҆ поклони́сѧ лицѹ̀ є҆ѧ̀, и҆ речѐ: благослове́на ты̀ во всѧ́цѣмъ селе́нїи ї҆ѹ́динѣ и҆ во всѧ́цѣмъ ѩ҆зы́цѣ, и҆̀же ѹ҆слы́шавше и҆́мѧ твоѐ смѧтѹ́тсѧ:

⁸и҆ нн҃ѣ̀ возвѣсти́ ми, є҆ли҄ка сотвори́ла є҆сѝ во дне́хъ си́хъ. И҆ возвѣстѝ є҆мѹ̀ ї҆ѹді́ѳъ посредѣ̀ люді́и всѧ҄, є҆ли҄ка сотворѝ, ѿ негѡ́же днѐ и҆зы́де, до́ндеже глаго́лаше и҆̀мъ.

⁹Е҆гда́ же преста̀ глаго́лющи, воскли́кнѹша лю́дїе гла́сомъ вели́кимъ и҆ дадо́ша гла́съ весе́лый во гра́дѣ свое́мъ.

¹⁰Ви́дѣвъ же а҆хїѡ́ръ всѧ҄, є҆ли҄ка сотворѝ бг҃ъ ї҆и҃левъ, вѣ́рова бг҃ѹ ѕѣлѡ̀, и҆ ѡ҆брѣ́за пло́ть кра́йнюю свою̀, и҆ приложи́сѧ къ до́мѹ ї҆и҃левѹ да́же до днѐ сегѡ̀.

¹¹Е҆гда́ же денни́ца взы́де, свѣ̀сиша главѹ̀ ѻ҆лофе́рновѹ со стѣны̀: и҆ воспрїѧ́тъ всѧ́къ мѹ́жъ ї҆и҃левъ ѻ҆рѹ҄жїѧ своѧ҄, и҆ и҆зыдо́ша полка́ми на восхо́ды горы̀.

¹²Сы́нове же а҆ссѹ́рѡвы, ѩ҆́кѡ ѹ҆ви́дѣша и҆̀хъ, разосла́ша къ вождє́мъ свои҄мъ: ѻ҆ни́ же прїидо́ша къ воево́дамъ и҆ ты́сѧщникѡмъ и҆ ко всѧ́комѹ киѧ́зю своемѹ̀,

¹³и҆ прїидо́ша къ шатрѹ̀ ѻ҆лофе́рновѹ, и҆ рѣ́ша сѹ́щемѹ над̾ всѣми є҆гѡ̀: возбѹдѝ ѹ҆̀бо господи́на на́шего, занѐ дерзнѹ́ша рабѝ сходи́ти къ на́мъ на бра́нь, да и҆стребѧ́тсѧ въ коне́цъ.

¹⁴И҆ вни́де вагѡ́а и҆ толкнѹ̀ во дворъ шатра̀, мнѧ́ше бо спа́ти є҆го̀ со ї҆ѹді́ѳою.

¹⁵Е҆гда́ же никто́же послѹ́шаше, раствори́въ вни́де въ ло́жницѹ и҆ ѡ҆брѣ́те є҆го̀ при пра́зѣ пове́ржена ме́ртва, и҆ глава̀ є҆гѡ̀ ѿѧ́та бы́сть ѿ негѡ̀:

¹⁶и҆ возопѝ гла́сомъ вели́кимъ съ пла́чемъ и҆ стена́нїемъ и҆ во́племъ крѣ́пкимъ, и҆ раздра̀ ри҄зы своѧ҄:

¹⁷и҆ вни́де въ шате́ръ, и҆дѣ́же бѣ̀ ї҆ѹді́ѳъ ѡ҆бита́ющи, и҆ не ѡ҆брѣ́те є҆ѧ̀, и҆ и҆зскочѝ къ лю́демъ и҆ возопѝ:

¹⁸ѿверго́шасѧ рабѝ, сотворѝ стѹ́дъ є҆ди́на жена̀ є҆вре́йскаѧ на до́мъ царѧ̀ навѹходоно́сора: занѐ сѐ, ѻ҆лофе́рнъ до́лѹ, и҆ главы̀ нѣ́сть на не́мъ.

¹⁹Е҆гда́ же ѹ҆слы́шаша сїѧ҄ глаго́лы кнѧ́зїе си́лы а҆ссѹ́ровы, раздра́ша ри҄зы своѧ҄, и҆ смѧте́сѧ дѹша̀ и҆́хъ ѕѣлѡ̀, и҆ бы̀сть и҆́хъ кри́къ и҆ во́пль ѕѣлѡ̀ посредѣ̀ полка̀.