Read Библия Церковнославянская I҆удi'ѳ 15 Bible Online

I҆удi'ѳ 15 - Библия Церковнославянская bible

I҆удi'ѳ 15

¹И҆ є҆гда̀ ѹ҆слы́шаша въ шатрѣ́хъ сѹ́щїи, ѹ҆жасо́шасѧ ѡ҆ бы́вшемъ,

²и҆ нападѐ на нѧ̀ стра́хъ и҆ тре́петъ, и҆ не бѣ̀ человѣ́ка пребыва́юща пред̾ лице́мъ бли́жнѧгѡ ктомѹ̀, но и҆сте́кше є҆динодѹ́шнѡ бѣжа́хѹ по всѧ́комѹ пѹтѝ по́лѧ и҆ наго́рныѧ:

³и҆ и҆̀же ѡ҆полчи́вшїисѧ въ го́рней ѡ҆́крестъ ветѷлѹ́и ѡ҆брати́шасѧ въ бѣ́гство: и҆ тогда̀ сы́нове ї҆и҃лєвы всѧ́къ мѹ́жъ ра́тникъ ѿ ни́хъ ѹ҆стреми́шасѧ на ни́хъ.

⁴И҆ посла̀ ѻ҆зі́а въ ветомасѳе́мъ и҆ виваю̀, и҆ хѡваю̀ и҆ хѡлѹ̀, и҆ во всѧ́къ предѣ̀лъ ї҆и҃левъ, вѣ́стники ѡ҆ соверши́вшихсѧ, и҆ да всѝ потекѹ́тъ в̾слѣ́дъ врагѡ́въ на погѹбленїе и҆́хъ.

⁵Е҆гда́ же ѹ҆слы́шаша сы́нове ї҆и҃лєвы, всѝ є҆динодѹ́шнѡ нападо́ша на ни́хъ и҆ сѣко́ша и҆̀хъ да́же до хѡвы̀. Та́кожде же и҆ и҆̀же и҆з̾ ї҆ер҇ли́ма прїидо́ша и҆ и҆з̾ всеѧ̀ наго́рныѧ: возвѣсти́ша бо и҆̀мъ бы҄вшаѧ ѡ҆полче́нїю врагѡ́въ и҆́хъ: и҆ и҆̀же въ галаа́дѣ и҆ въ галїле́и бодо́ша и҆̀хъ ѩ҆́звою вели́кою, до́ндеже минѹ́ша дама́скъ и҆ предѣ́лы є҆гѡ̀.

⁶Про́чїи же живѹ́щїи во ветѷлѹ́и, нападо́ша на по́лкъ а҆ссѹ́ровъ и҆ плѣни́ша и҆̀хъ и҆ ѡ҆богати́шасѧ ѕѣлѡ̀.

⁷Сы́нове же ї҆и҃лєвы возврати́вшесѧ ѿ сѣ́чи, воз̾ѡблада́ша про́чими, и҆ вє́си и҆ се́ла, ѩ҆̀же въ го́рней и҆ напо́льнѣй, воз̾ѡблада́ша мно́гими коры́стьми: бѣ̀ бо мно́жество мно́го ѕѣлѡ̀.

⁸Ї҆ѡакі́мъ же ї҆ере́й вели́кїй и҆ старѣ҄йшины сынѡ́въ ї҆и҃левыхъ живѹ́щїи во ї҆ер҇ли́мѣ прїидо́ша є҆́же зрѣ́ти бл҃га҄ѧ, ѩ҆̀же сотворѝ гд҇ь ї҆и҃лю, и҆ є҆́же ви́дѣти ї҆ѹді́ѳъ и҆ глаго́лати съ не́ю ми́ръ.

⁹Е҆гда́ же прїидо́ша къ не́й, благослови́ша ю҆̀ всѝ є҆динодѹ́шнѡ и҆ рѣ́ша къ не́й: ты̀ возвыше́нїе ї҆и҃лево! ты̀ ра́дованїе вели́ко ї҆и҃лево! ты̀ сла́ва велїѧ ро́да на́шегѡ!

¹⁰сотвори́ла є҆сѝ всѧ҄ сїѧ҄ рѹко́ю твое́ю, сотвори́ла є҆сѝ блага҄ѧ со ї҆и҃лемъ, и҆ да бл҃говоли́тъ ѡ҆ ни́хъ бг҃ъ: благослове́на бѹ́ди ѹ҆ вседержи́телѧ гд҇а въ вѣ́чное вре́мѧ. И҆ рѣ́ша всѝ лю́дїе: бѹ́ди.

¹¹И҆ плѣнѧ́хѹ всѝ лю́дїе по́лкъ чрез̾ дні́й три́десѧть, и҆ да́ша ї҆ѹді́ѳѣ шате́ръ ѻ҆лофе́рновъ и҆ всѧ҄ срє́брѧныѧ сосѹ́ды, и҆ ѻ҆дры̀ и҆ ѹ҆мыва҄лницы, и҆ всѧ҄ ѹ҆строє́нїѧ є҆гѡ̀. И҆ прїе́мши ѻ҆на̀ возложѝ на мска̀ своего̀, и҆ впрѧжѐ колєсни́цы, и҆ сложѝ ѧ҆̀ на нѧ̀.

¹²И҆ притечѐ всѧ́каѧ жена̀ ї҆и҃лска є҆́же ви́дѣти ю҆̀, и҆ благослови́ша ю҆̀ и҆ сотвори́ша є҆́й ли́къ ѿ себє̀. И҆ взѧ̀ ко́пїѧ цвѣта́ми ѹ҆кра́шєннаѧ въ рѹ́цѣ своѝ и҆ дадѐ жена́мъ сѹ́щымъ съ не́ю:

¹³и҆ ѹ҆вѣнча́сѧ ма́слиною сама̀ и҆ ѩ҆̀же съ не́ю, и҆ и҆дѧ́ше пред̾ всѣ́ми людьмѝ въ ли́цѣ, ведѹ́щи всѣ́хъ же́нъ. И҆ послѣ́доваше всѧ́къ мѹ́жъ ї҆и҃левъ воѻрѹже́ни съ вѣнцы҄ и҆ пѣ̀сньми во ѹ҆ста́хъ свои́хъ.

¹⁴И҆ нача̀ ї҆ѹді́ѳъ и҆сповѣ́данїе сїѐ во все́мъ ї҆и҃ли, и҆ возглаша́хѹ всѝ лю́дїе хвале́нїе сїѐ.