Read Библия Церковнославянская I҆удi'ѳ 16 Bible Online

I҆удi'ѳ 16 - Библия Церковнославянская bible

I҆удi'ѳ 16

¹И҆ речѐ ї҆ѹді́ѳъ: начни́те бг҃ѹ моемѹ̀ въ тѷмпа́нѣхъ, пойте гд҇еви моемѹ̀ въ кѷмва́лѣхъ, кра́снѡ воспо́йте є҆мѹ̀ пѣ́снь но́вѹ, возноси́те и҆ призыва́йте и҆́мѧ є҆гѡ̀:

²ѩ҆́кѡ бг҃ъ сокрѹша́ѧй бра҄ни гд҇ь, ѩ҆́кѡ во ѡ҆полченїихъ є҆гѡ̀ посредѣ̀ люді́й и҆з̾ѧ́тъ мѧ̀ и҆з̾ рѹкѝ гонѧ́щихъ мѧ̀:

³прїи́де а҆ссѹ́ръ и҆з̾ го́ръ ѿ сѣ́вера, прїи́де во тма́хъ си́лы своеѧ̀, и҆́хже мно́жество заградѝ и҆сто́чники, и҆ ко́нница и҆́хъ покры̀ хо́лмы:

⁴речѐ пожещѝ предѣ́лы моѧ҄, и҆ ю҆́ношы моѧ҄ ѹ҆би́ти мече́мъ, и҆ ссѹ́щыѧ моѧ҄ положи́ти въ помо́стъ, и҆ младе́нцы моѧ҄ да́ти въ расхище́нїе, и҆ дѣ҄вы моѧ҄ плѣни́ти:

⁵гд҇ь вседержи́тель ѡ҆прове́рже и҆̀хъ рѹко́ю жены̀,

⁶не бо̀ падѐ си́льный и҆́хъ ѿ ю҆́ношъ, нижѐ сы́нове тїта́нѡвы порази́ша є҆го̀, нижѐ высо́цы и҆споли́ни нападо́ша на него̀, но ї҆ѹді́ѳъ дщѝ мера́рїна доброто́ю лица̀ своегѡ̀ разсла́би є҆го̀:

⁷совлече́сѧ бо ѡ҆дѣѧ́нїѧ вдовства̀ своегѡ̀ на возвыше́нїе бѣ́дствѹющихъ во ї҆и҃ли, пома́за лицѐ своѐ ѹ҆маще́нїемъ

⁸и҆ ѹ҆вѣнча̀ власы̀ своѧ҄ ѹ҆вѧ́сломъ и҆ прїѧ́тъ ѻ҆де́ждѹ льнѧ́нѹ въ прельще́нїе є҆гѡ̀:

⁹санда́лїѧ є҆ѧ̀ похи́ти ѻ҆́ко є҆гѡ̀, и҆ добро́та є҆ѧ̀ плѣнѝ дѹ́шѹ є҆гѡ̀, про́йде ме́чь вы́ю є҆гѡ̀:

¹⁰ѹ҆страши́шасѧ пе́рсы держа́вы є҆ѧ̀, и҆ ми́ды дерзнове́нїемъ є҆ѧ̀ разсѣдо́шасѧ:

¹¹тогда̀ воскли́кнѹша смире́ннїи моѝ и҆ возопи́ша немощні́и моѝ, и҆ ѹ҆страши́шасѧ: вознесо́ша гла́съ сво́й, и҆ побѣжде́ни бы́ша:

¹²сы́нове ѻ҆трокови́цъ бодо́ша и҆̀хъ и҆ ѩ҆́кѡ рабѡ́въ бѣглецѡ́въ ѹ҆ѧзвлѧ́хѹ и҆̀хъ, погибо́ша ѿ ѡ҆полче́нїѧ гд҇а моегѡ̀:

¹³воспою̀ гд҇еви моемѹ̀ пѣ́снь но́вѹ: гд҇и, ве́лїй є҆сѝ и҆ сла́венъ, ди́венъ въ крѣ́пости, непребори́мый,

¹⁴тебѣ̀ да рабо́таетъ всѧ́ка тва́рь твоѧ̀: ѩ҆́кѡ ре́клъ є҆сѝ, и҆ бы́ша: посла́лъ є҆сѝ дх҃а твоего̀, и҆ созда̀: и҆ нѣ́сть, и҆́же противоста́нетъ гла́сѹ твоемѹ̀:

¹⁵го́ры бо ѿ ѡ҆снова́нїи съ вода́ми подви́гнѹтсѧ, ка́менїе же ѿ лица̀ твоегѡ̀ ѩ҆́кѡ во́скъ рата́етъ: над̾ боѧ́щимисѧ же тебє̀ ты̀ ѹ҆мл҇тивлѧ́ешисѧ,

¹⁶ѩ҆́кѡ ма́лѡ всѧ́ка же́ртва въ воню̀ благоѹха́нїѧ, и҆ малѣ́йшїй всѧ́къ тѹ́къ во всесожже́нїе тебѣ̀: боѧ́йсѧ же гд҇а вели́къ вы́нѹ:

¹⁷го́ре ѩ҆зы́кѡмъ востаю́щымъ на ро́дъ мо́й: гд҇ь вседержи́тель ѿмститъ и҆̀мъ въ де́нь сѹ́дный, да́ти ѻ҆́гнь и҆ че́рвїе на плѡ́ти и҆́хъ, и҆ воспла́чѹтсѧ въ чѹ́вствѣ да́же до вѣ́ка.

¹⁸Е҆гда́ же внидо́ша во ї҆ер҇ли́мъ, поклони́шасѧ бг҃ѹ: и҆ є҆гда̀ ѡ҆чи́стишасѧ лю́дїе, принесо́ша всесожега́ємаѧ своѧ҄ и҆ произвѡ́льнаѧ своѧ҄ и҆ да́ры своѧ҄.

¹⁹И҆ возложѝ ї҆ѹді́ѳъ всѧ҄ сосѹ́ды ѻ҆лофе́рнѡвы, є҆ли҄ки дадо́ша лю́дїе є҆́й, и҆ завѣ́сѹ, ю҆̀же взѧ̀ ѻ҆иа̀ ѿ ло́жницы є҆гѡ̀, въ да́ръ гд҇ѹ дадѐ.

²⁰И҆ бѧ́хѹ лю́дїе веселѧ́щесѧ во ї҆ер҇ли́мѣ пред̾ лице́мъ ст҃ы́хъ мц҇ы трѝ, и҆ ї҆ѹді́ѳъ съ ни́ми пребы́сть.

²¹По дне́хъ же си́хъ возврати́сѧ кі́йждо во наслѣ́дїе своѐ: и҆ ї҆ѹді́ѳъ ѿи́де во ветѵлѹ́ю, и҆ пребыва́ше над̾ стѧжа́нїемъ свои́мъ, и҆ бы́сть во вре́мѧ своѐ сла́вна во все́й землѝ.

²²И҆ мно́зи жела́ша є҆ѧ̀, и҆ не позна̀ мѹ́жъ є҆ѧ̀ всѧ҄ дни҄ живота̀ є҆ѧ̀, ѿ негѡ́же днѐ ѹ҆́мре манассі́а мѹ́жъ є҆ѧ̀ и҆ приложи́сѧ къ лю́демъ свои҄мъ.

²³И҆ произы́де вели́ка ѕѣ́лѡ̀, и҆ состарѣ́сѧ въ домѹ̀ мѹ́жа своегѡ̀ лѣ́тъ ста̀ пѧтѝ, и҆ ѿпѹстѝ рабы́ню свою̀ свобо́днѹ, и҆ ѹ҆́мре во ветѷлѹ́и, и҆ погребо́ша ю҆̀ въ пеще́рѣ мѹ́жа є҆ѧ̀ манассі́и.

²⁴И҆ пла́касѧ є҆ѧ̀ до́мъ ї҆и҃левъ дні́й се́дмь. И҆ раздѣлѝ и҆мѣ҄нїѧ своѧ҄ пре́жде сме́рти своеѧ̀ всѣ҄мъ бли҄жнимъ манассі́и мѹ́жа своегѡ̀ и҆ бли҄жнимъ ро́да своегѡ̀.

²⁵И҆ не бѧ́ше ктомѹ̀ ѹ҆страша́ѧй сынѡ́въ ї҆и҃левыхъ во дни҄ ї҆ѹді́ѳы и҆ по сме́рти є҆ѧ̀ дни҄ мнѡ́ги.