Read Библия Церковнославянская I҆удi'ѳ 4 Bible Online

I҆удi'ѳ 4 - Библия Церковнославянская bible

I҆удi'ѳ 4

¹И҆ ѹ҆слы́шаша сы́нове ї҆и҃лєвы живѹ́щїи во ї҆ѹде́и всѧ҄, є҆ли҄ка сотворѝ ѻ҆лофе́рнъ ѩ҆зы́кѡмъ, вождонача́лникъ навѹходоно́сора царѧ̀ а҆ссѷрі́йскагѡ, и҆ и҆́мже ѡ҆́бразомъ расхи́ти всѧ҄ свѧщє́ннаѧ и҆́хъ и҆ дадѐ сїѧ҄ во и҆стребле́нїе:

²и҆ ѹ҆боѧ́шасѧ ѕѣлѡ̀ ѿ лица̀ є҆гѡ̀, и҆ ѡ҆ ї҆ерли́мѣ и҆ ѡ҆ хра́мѣ гд҇а бг҃а своегѡ̀ смѧто́шасѧ,

³поне́же неда́внѡ и҆зыдо́ша ѿ плѣне́нїѧ и҆ неда́внѡ всѝ лю́дїе совра́шасѧ ї҆ѹде́йстїи, и҆ сосѹ́ди и҆ ѻ҆лта́рь и҆ до́мъ ѿ ѡ҆скверне́нїѧ ѡ҆свѧщє́на бы́ша.

⁴И҆ посла́ша во всѧ́кїй предѣ́лъ самарі́и и҆ кѡні́и, и҆ веѳѡрѡ́на и҆ велме́на и҆ ї҆ерїхѡ́на, и҆ въ хѡвѹ̀ и҆ є҆сѡ́рѹ и҆ во ю҆до́ль сали́мскѹю,

⁵и҆ предпрїѧ́ша всѧ҄ верхѝ го́ръ высо́кихъ, и҆ ѡ҆гради́ша стѣна́ми сѹ́щыѧ въ ни́хъ се́ла, и҆ ѿложи́ша на пи́щѹ ко приѹготовле́нїю бра́ни, ѩ҆́кѡ неда́внѡ бы́ша полѧ̀ и҆́хъ пожа҄та.

⁶И҆ писа̀ ї҆ѡакі́мъ ї҆ере́й вели́кїй, и҆́же бѣ̀ во дне́хъ ѻ҆́нѣхъ во ї҆ер҇ли́мѣ, живѹ́щымъ во ветѷлѹ́и и҆ ветомесѳе́мѣ, и҆́же є҆́сть проти́вѹ є҆сдрилѡ́иа, на лицы̀ по́лѧ сѹ́щагѡ бли́з̾ дѡѳаі́ма,

⁷глаго́лѧ ѡ҆держа́ти восхо́ды го́рнїѧ, и҆́бо и҆́ми бѣ̀ вхо́дъ во ї҆ѹде́ю, и҆ бѣ̀ ѹ҆до́бно возбранѧ́ти и҆̀хъ приходѧ́щихъ, тѣ́снѹ прохо́дѹ сѹ́шѹ, ѩ҆́кѡ всѣ҄мъ мѹжє́мъ по два̀ (проитѝ).

⁸И҆ сотвори́ша сы́нове ї҆и҃лєвы, ѩ҆́коже повелѣ̀ и҆̀мъ ї҆ѡакі́мъ ї҆ере́й вели́кїй и҆ старѣ́йшинство всегѡ̀ со́нма ї҆и҃лева, и҆̀же сѣдѧ́хѹ во ї҆ер҇ли́мѣ.

⁹И҆ возопи́ша всѧ́кїй мѹ́жъ ї҆и҃левъ къ бг҃ѹ съ прилѣжа́нїемъ вели́кимъ и҆ смири́ша дѹ́шы своѧ҄ въ прилѣжа́нїи вели́цѣмъ:

¹⁰са́ми и҆ жєны̀ и҆́хъ и҆ младе́нецы и҆́хъ, и҆ ско́ти и҆́хъ, и҆ всѧ́кїй пришле́цъ и҆ нае́мникъ, и҆ сребро́мъ кѹ́пленый и҆́хъ, возложи́ша вре́тища на чрє́сла своѧ҄.

¹¹И҆ всѧ́кїй мѹ́жъ ї҆и҃левъ и҆ жена̀, и҆ дѣ́ти, и҆ жнвѹ́щїи во ї҄ер҇ли́мѣ падо́ша пред̾ лице́мъ хра́ма, и҆ посы́паша пе́рстїю главы҄ своѧ҄, и҆ простро́ша врє́тища своѧ҄ пред̾ лице́мъ гд҇нимъ,

¹²и҆ ѻ҆лта́рь вре́тищемъ ѡ҆дѣ́ѧша, и҆ возопи́ша къ бг҃ѹ ї҆и҃левѹ є҆динодѹ́шнѡ прилѣ́жнѡ, є҆́же не да́ти въ расхище́нїе младе́нцєвъ и҆́хъ, и҆ же́нъ въ плѣне́нїе, и҆ градѡ́въ наслѣ́дїѧ и҆́хъ въ разоре́нїе, и҆ ст҃а҄ѧ во ѡ҆скверне́нїе и҆ поноше́нїе, ѡ҆бра́дованїе ѩ҆зы́кѡмъ.

¹³И҆ ѹ҆слы́ша гд҇ь гла́съ и҆́хъ и҆ призрѣ̀ на ско́рбь и҆́хъ. И҆ бѧ́хѹ лю́дїе постѧ́щесѧ дни҄ мнѡ́ги во все́й ї҆ѹде́и и҆ ї҆ер҇ли́мѣ, пред̾ лице́мъ ст҃ы́хъ гд҇а вседержи́телѧ.

¹⁴И҆ ї҆ѡакі́мъ ї҆ере́й вели́кїй, и҆ всѝ предстоѧ́щїи пред̾ гд҇емъ, ї҆ере́є и҆ слѹжа́щїи гд҇еви, вре́тищами преиоѧ́сани ѡ҆ чре́слѣхъ свои́хъ, приноша́хѹ всесожже́нїе непреста́нное и҆ ѡ҆бѣ́ты и҆ произвѡ́льнаѧ даѧ҄нїѧ люді́й:

¹⁵и҆ бѣ̀ пе́пелъ на кїда́рѣхъ и҆́хъ, и҆ вопїѧ́хѹ ко гд҇ѹ ѿ всеѧ̀ си́лы, да посѣти́тъ во бл҃го ве́сь до́мъ ї҆и҃левъ.