Read Библия Церковнославянская I҆удi'ѳ 5 Bible Online

I҆удi'ѳ 5 - Библия Церковнославянская bible

I҆удi'ѳ 5

¹И҆ возвѣще́ио бы́сть ѻ҆лофе́рнѹ вождонача́лникѹ си́лы а҆ссѹ́рскїѧ, ѩ҆́кѡ сы́нове ї҆и҃лєвы ѹ҆гото́вашасѧ на бра́нь, и҆ прохо́ды го́рнїѧ заключи́ша, и҆ ѡ҆гради́ша стѣна́ми всѧ́кїй ве́рхъ горы̀ высо́кїѧ, и҆ положи́ша на полѧ́хъ преткновє́нїѧ.

²И҆ разгнѣ́васѧ ѩ҆́ростїю ѕѣлѡ̀, и҆ созва̀ всѣ́хъ нача́лникѡвъ мѡа́влихъ и҆ воево́дъ сынѡ́въ а҆ммѡ́нихъ и҆ всѣ́хъ вла́стелей помо́рїѧ,

³и҆ рече́ и҆̀мъ: возвѣсти́те ѹ҆̀бо мѝ, сы́нове ханаа҄ни, кто̀ лю́дїе сі́и живѹ́щїи въ го́рней, и҆ каковы̀, въ ни́хже живѹ́тъ, гра́ди, и҆ мно́жество си́лы и҆́хъ, и҆ въ че́мъ держа́ва и҆́хъ и҆ крѣ́пость и҆́хъ, и҆ кто̀ поста́вленъ над̾ ни́ми ца́рь во́ждь во́инства и҆́хъ;

⁴и҆ чесѡ̀ ра́ди сопроти́вишасѧ, є҆́же не и҆зы́ти во срѣ́тенїе мнѣ̀, па́че всѣ́хъ живѹ́щихъ на за́падѣхъ;

⁵И҆ речѐ къ немѹ̀ а҆хїѡ́ръ во́ждь всѣ́хъ сынѡ́въ а҆ммѡ́нихъ: послѹ́шай ѹ҆бо, господи́не мо́й, сло́ва ѿ ѹ҆́стъ раба̀ твоегѡ̀, и҆ возвѣщѹ̀ тебѣ̀ и҆́стинѹ ѡ҆ лю́дехъ си́хъ, и҆̀же ѡ҆бита́ютъ въ го́рней се́й бли́з̾ тебє̀ живѹ́ще, и҆ не и҆зы́детъ ло́жь и҆з̾ ѹ҆́стъ раба̀ твоегѡ̀:

⁶лю́дїе сі́и сѹ́ть и҆сча҄дїѧ халде́ѡвъ

⁷и҆ всели́шасѧ пе́рвѣе въ месопота́мїи, поне́же не восхотѣ́ша послѣ́довати богѡ́мъ ѻ҆тцє́въ свои́хъ, и҆̀же бѣ́ша въ землѝ халде́йстѣй:

⁸и҆ ѿврати́шасѧ ѿ пѹтѝ ѻ҆тє́цъ свои́хъ и҆ поклони́шасѧ бг҃ѹ нб҃сѐ, бг҃ѹ, є҆го́же позна́ша: и҆ и҆згна́ша и҆̀хъ ѿ лица̀ богѡ́въ свои́хъ, и҆ побѣго́ша въ месопота́мїю и҆ ѡ҆бита́ша та́мѡ дни҄ мнѡ́ги:

⁹и҆ речѐ бг҃ъ и҆́хъ, да и҆зы́дѹтъ ѿ прише́лствїѧ своегѡ̀ и҆ да и҆́дѹтъ въ зе́млю хаиаа́ню: и҆ всели́шасѧ та́мѡ, и҆ ѹ҆мно́жишасѧ зла́томъ и҆ сребро́мъ и҆ скѡты̀ мно́гими ѕѣлѡ̀:

¹⁰и҆ снидо́ша во є҆гѵ́петъ, покры́ бо лицѐ землѝ ханаа́ни гла́дъ, и҆ прише́лствоваша та́мѡ, до́идеже прекорми́шасѧ, и҆ бы́ша та́мѡ во мно́жество мно́го, и҆ не бѣ̀ числа̀ ро́дѹ и҆́хъ:

¹¹и҆ воста̀ на ни́хъ ца́рь є҆гѵ́петскїй и҆ прехи́три и҆̀хъ, и҆ въ трѹдѣ̀ и҆ плі́нѳѣ смирѝ и҆̀хъ, и҆ положѝ и҆̀хъ въ рабы҄:

¹²и҆ возопи́ша къ бг҃ѹ своемѹ̀, и҆ поразѝ всю̀ землю є҆гѵ́петскѹю ѩ҆́звами, въ ни́хже не бѣ̀ и҆зцѣле́нїе, и҆ и҆згна́ша и҆̀хъ є҆гѵ́птѧне ѿ лица̀ своегѡ̀:

¹³и҆ и҆зсѹшѝ бг҃ъ чермно́е мо́ре пред̾ ни́ми,

¹⁴и҆ ведѐ и҆̀хъ на пѹ́ть сїны̀ и҆ ка́дисъ-варнѝ, и҆ и҆згна́ша всѣ́хъ живѹ́щихъ въ пѹсты́ни,

¹⁵и҆ всели́шасѧ въ землѝ а҆морре́ѡвъ, и҆ всѣ́хъ є҆севѡні́тѡвъ и҆стреби́ша крѣ́постїю свое́ю, и҆ преше́дше ї҆ѻрда́нъ наслѣ́диша всю̀ го́рнюю:

¹⁶и҆ и҆згна́ша ѿ лица̀ своегѡ̀ ханане́а и҆ ферезе́а, и҆ ї҆евѹсе́а и҆ сѷхе́ма и҆ всѣ́хъ гергесе́ѡвъ, и҆ ѡ҆бита́ша въ не́й дни҄ мнѡ́ги:

¹⁷и҆ до́идеже не согрѣши́ша пред̾ бг҃омъ свои́мъ, бѣ́ша блага҄ѧ съ ни́ми, поне́же бг҃ъ ненави́дѧй непра́вды съ ни́ми є҆́сть:

¹⁸є҆гда́ же ѿстѹпи́ша ѿ пѹтѝ, є҆го́же завѣща̀ и҆̀мъ, и҆стреби́шасѧ во мно́зѣхъ бра́нехъ на мно́го ѕѣлѡ̀, и҆ плѣне́ни бы́ша въ зе́млю не свою̀, и҆ хра́мъ бг҃а и҆́хъ бы́сть въ попра́нїе, и҆ гра́ди и҆́хъ ѡ҆держа́ни бы́ша ѿ сѹпоста҄тъ:

¹⁹и҆ нн҃ѣ ѡ҆брати́вшесѧ къ бг҃ѹ своемѹ̀, взыдо́ша ѿ разсѣ́ѧнїѧ, и҆дѣ́же разсѣ́ѧни бы́ша та́мѡ, и҆ ѡ҆держа́ша ї҆ер҇ли́мъ, и҆дѣ́же свѧти́лище и҆́хъ, и҆ всели́шасѧ въ го́рней, поне́же бѣ̀ пѹста̀:

²⁰и҆ ни҃ѣ, влады́ко господи́не, а҆́ще ѹ҆бѡ є҆́сть безѹ́мїе въ лю́дехъ си́хъ, и҆ согрѣша́ютъ къ бг҃ѹ своемѹ̀, и҆ разсмо́тримъ сїѐ, ѩ҆́кѡ є҆́сть въ ни́хъ собла́знъ се́й, и҆ взы́демъ и҆ повою́емъ и҆̀хъ:

²¹а҆́ще же нѣ́сть беззако́нїѧ въ ѩ҆зы́цѣ и҆́хъ, да пре́йдетъ господи́нъ мо́й, да не когда̀ защи́титъ гд҇ь и҆́хъ и҆ бг҃ъ и҆́хъ по ни́хъ, и҆ бѹ́демъ въ поноше́нїе пред̾ все́ю земле́ю.

²²И҆ бы́стѣ ѩ҆́кѡ преста̀ а҆хїѡ́ръ глаго́лѧ словеса̀ сїѧ҄, и҆ возропта́ша всѝ лю́дїе ѡ҆бстоѧ́щїи шате́ръ и҆ предстоѧ́щїи, и҆ рѣ́ша вельмѡ́жи ѻ҆лофе́рнѡвы и҆ вси живѹ́щїи въ примо́рїи и҆ въ мѡа́вѣ посѣщѝ є҆го̀:

²³не бо̀ ѹ҆бои́мсѧ ѿ сынѡ́въ ї҆и҃левыхъ: се́ бо, лю́дїе, въ ни́хже нѣ́сть си́лы, нижѐ могѹ́тства ко ѡ҆полче́нїю крѣ́пкомѹ:

²⁴тѣ́мже ѹ҆̀бо взы́димъ, и҆ бѹ́дѹтъ во снѣ́дь всемѹ̀ во́инствѹ твоемѹ̀, влады́ко ѻ҆лофе́рне.