Read Библия Церковнославянская I҆удi'ѳ 6 Bible Online

I҆удi'ѳ 6 - Библия Церковнославянская bible

I҆удi'ѳ 6

¹И҆ є҆гда̀ ѹ҆тиши́сѧ мѧте́жъ мѹже́й сѹ́щихъ ѡ҆́крестъ засѣда́нїѧ и҆ речѐ ѻ҆лофе́рнъ вождонача́лникъ си́лы а҆ссѹ́рскїѧ ко а҆хїѡ́рѹ пред̾ всѣ́мъ наро́домъ и҆ноплеме́нникѡвъ и҆ ко всѣ҄мъ сынѡ́мъ мѡа҄влимъ:

²и҆ кто́ є҆си ты̀, а҆хїѡ́ре, и҆ нає́мницы є҆фрє́мли, ѩ҆́кѡ проро́чествовалъ є҆сѝ въ на́съ, ѩ҆́коже дне́сь, и҆ ре́клъ є҆сѝ ро́дъ ї҆и҃левъ не воева́ти, ѩ҆́кѡ бг҃ъ и҆́хъ защища́етъ и҆̀хъ; и҆ кто̀ бг҃ъ, а҆́ще не навѹходоно́соръ; се́й по́слетъ держа́вѹ свою̀ и҆ и҆стреби́тъ и҆̀хъ ѿ лица̀ землѝ, и҆ не и҆зба́витъ и҆́хъ бг҃ъ и҆́хъ:

³но мы̀ рабѝ є҆гѡ̀ порази́мъ и҆́хъ ѩ҆́ки человѣ́ка є҆ди́наго, и҆ не претерпѧ́тъ крѣ́пости ко́ней на́шихъ,

⁴попере́мъ бо и҆̀хъ и҆́ми, и҆ го́ры и҆́хъ ѹ҆пїю́тсѧ въ кро́ви и҆́хъ, и҆ полѧ̀ и҆́хъ и҆спо́лнѧтсѧ ме́ртвыми и҆́хъ, и҆ не постои́тъ стопа̀ но́гъ и҆́хъ проти́вѹ лица̀ на́шегѡ, но погѹбле́нїемъ поги́бнѹтъ, глаго́летъ ца́рь навѹходоно́соръ, господи́нъ всеѧ̀ землѝ, рече́ бо: не вотщѐ бѹ́дѹтъ глаго́лы слове́съ є҆гѡ̀:

⁵ты́ же, а҆хїѡ́ре, нае́мниче а҆ммѡ́нь, и҆́же глаго́лалъ є҆сѝ словеса̀ сїѧ҄ въ де́нь непра́вды твоеѧ̀, не ѹ҆́зриши ктомѹ̀ лица̀ моегѡ̀ ѿ днѐ сегѡ̀, до́ндеже не ѿмшѹ̀ ро́дѹ сѹ́щихъ и҆з̾ є҆гѵ́пта,

⁶и҆ тогда̀ про́йдетъ ме́чь во́инства моегѡ̀ и҆ наро́да рабѡ́въ мои́хъ ре́бра твоѧ҄, и҆ паде́ши въ ѩ҆́звенныхъ и҆́хъ, є҆гда̀ возвращѹ́сѧ:

⁷и҆ ѿведѹ́тъ тѧ̀ рабѝ моѝ въ го́рнюю, и҆ ѡ҆ста́вѧтъ тѧ̀ во є҆ди́нѣмъ ѿ градѡ́въ восхо́дѡвъ,

⁸и҆ не поги́бнеши до́ндеже и҆стребле́нъ бѹ́деши съ ни́ми:

⁹и҆ а҆́ще ѹ҆пова́еши се́рдцемъ твои́мъ, ѩ҆́кѡ не во́змѹтсѧ да не и҆спада́етъ твоѐ лицѐ: рѣ́хъ, и҆ ничто́же ѿпаде́тъ ѿ глаго́лѡвъ мои́хъ.

¹⁰И҆ повелѣ̀ ѻ҆лофе́рнъ рабѡ́мъ свои҄мъ, и҆̀же предстоѧ́хѹ въ шатрѣ̀ є҆гѡ̀, ѩ҆́ти а҆хїѡ́ра и҆ ѿвстѝ є҆го̀ къ ветѷлѹ́и и҆ преда́ти въ рѹ́ки сынѡ́въ ї҆и҃левых.

¹¹И҆ ѩ҆́ша є҆го̀ рабѝ є҆гѡ̀ и҆ и҆зведо́ша є҆го̀ внѣ̀ полка̀ на по́ле, и҆ воздвиго́шасѧ ѿ среды̀ напо́льныѧ въ го́рнюю и҆ прїидо́ша на и҆сто́чники, и҆̀же бы́ша под̾ ветѵ́лѹ́ею.

¹²И҆ ѩ҆́кѡ ѹ҆би́дѣша и҆̀хъ мѹ́жїе гра́да на верхѹ̀ горы̀, взѧ́ша ѻ҆рѹ҄жїѧ своѧ҄ и҆ ѿидо́ша внѣ̀ гра́да на ве́рхъ горы̀: и҆ бсѧ́кїй мѹ́жъ пра́щникъ ѡ҆держа́ша восхо́дъ сво́й и҆ мета́хѹ ка́менїемъ на ни́хъ.

¹³И҆ подше́дше под̾ го́рѹ, свѧза́ша а҆хїѡ́ра и҆ ѡ҆ста́виша пове́рженна под̾ ко́ренемъ горы̀, и҆ ѿидо́ша ко господи́нѹ своемѹ̀.

¹⁴Снизоше́дше же сы́нове ї҆и҃лєвы ѿ гра́да своегѡ̀ ста́ша над̾ ни́мъ, и҆ разрѣши́вше є҆го̀ введо́ша въ ветѷлѹ́ю и҆ поста́виша є҆го̀ пред̾ нача́лниками гра́да своегѡ̀,

¹⁵и҆̀же бы́ша во дне́хъ ты́хъ, ѻ҆зі́а сы́нъ мі́хинъ ѿ пле́мене сѷмеѡ́нѧ, и҆ хаврі́й сы́нъ гоѳонїи́левъ, и҆ хармі́й сы́нъ мелхїи́левъ.

¹⁶И҆ созва́ша всѣ́хъ старѣ́йшинъ гра́да: и҆ стеко́шасѧ всѧ́кїй ю҆́ноша и҆́хъ и҆ жєны̀ въ собра́нїе, и҆ поста́виша а҆хїѡ́ра посредѣ̀ всегѡ̀ наро́да своегѡ̀. И҆ вопросѝ є҆го̀ ѻ҆зі́а ѡ҆ слѹчи́вшемсѧ.

¹⁷И҆ ѿвѣща́въ возвѣстѝ и҆̀мъ глаго́лы засѣда́нїѧ ѻ҆лофе́рнова и҆ всѧ҄ глаго́лы, є҆ли҄ка глаго́ла посредѣ̀ кнѧзе́й сынѡ́въ а҆ссѹ́рскихъ, и҆ є҆ли҄ка велерѣ́чева ѻ҆лофе́рнъ на до́мъ ї҆и҃левъ.

¹⁸И҆ па́дше лю́дїе поклони́шасѧ бг҃ѹ и҆ возопи́ша, глаго́люще:

¹⁹гд҇и бж҃е нб҃сѐ, при́зри на горды҄ни и҆́хъ, и҆ поми́лѹй смире́нїе ро́да на́шегѡ, и҆ при́зри на лицѐ ѡ҆свѧще́нныхъ тевѣ̀ въ де́нь се́й.

²⁰И҆ ѹ҆тѣ́шиша а҆хїѡ́ра и҆ похвали́ша є҆го̀ ѕѣлѡ̀.

²¹И҆ взѧ̀ є҆го̀ ѻ҆зі́а и҆з̾ собра́нїѧ въ до́мъ сво́й и҆ сотворѝ пи́ръ старѣ́йшинамъ, и҆ призыва́хѹ бг҃а ї҆и҃лева на по́мощь всю̀ но́щь ѻ҆́нѹ.