Read Библия Церковнославянская Е҆сѳи́рь 2 Bible Online

Е҆сѳи́рь 2 - Библия Церковнославянская bible

Е҆сѳи́рь 2

¹И҆ по словесѣ́хъ си́хъ ѹ҆толи́сѧ ца́рь ѿ гнѣ́ва, и҆ не воспомѧнѹ̀ ктомѹ̀ а҆сті́ни, воспомина́ѧ, є҆ли҄ка глаго́ла и҆ ка́кѡ ѡ҆сѹдѝ є҆ѧ̀.

²И҆ рѣ́ша слѹги҄ царє́вы: да и҆зы́щѹтсѧ царю̀ дѣви҄цы нерастлѣ҄нны, красны҄ зра́комъ, и҆ да поста́витъ ца́рь взыска́тєли во всѣ́хъ страна́хъ ца́рствїѧ своегѡ̀,

³и҆ да и҆зберѹ́тъ ѻ҆трокови́цъ дѣ́вственныхъ доброзра́чныхъ въ сѹ́сы гра́дъ, въ черто́гъ же́нскїй, и҆ да ѿдадѹ́тсѧ є҆ѵнѹ́хови царе́вѹ стра́жѹ же́нъ, и҆ да дадѹ́тсѧ ма҄сти и҆ про́чыѧ потрє́бы:

⁴и҆ жена̀, ю҆́же возлю́битъ ца́рь, да бѹ́детъ цари́цею вмѣ́стѡ а҆сті́ни. И҆ ѹ҆го́дно бѣ̀ царю̀ сло́во, и҆ сотворѝ та́кѡ.

⁵И҆ мѹ́жъ бѣ̀ ї҆ѹде́анинъ во гра́дѣ сѹ́сѣхъ, и҆ и҆́мѧ є҆мѹ̀ мардохе́й сы́нъ ї҆аі́ровъ, сы́на семе́ина, сы́на кїсе́ова, ѿ пле́мене венїамі́нѧ,

⁶и҆́же бѧ́ше плѣне́нъ ѿ ї҆е҇рли́ма навѹходоно́соромъ царе́мъ вавѷлѡ́нскимъ:

⁷и҆ бѧ́ше є҆мѹ̀ ѻ҆трокови́ца воспита́на, дще́рь а҆мїнада́ва бра́та ѻ҆тцѹ̀ є҆гѡ̀, и҆ и҆́мѧ є҆́й є҆сѳи́рь. По преставле́нїи же роди́телей є҆ѧ̀, прїѧ̀ ю҆̀ мардохе́й во дще́ре мѣ́сто: и҆ бѧ́ше дѣви́ца красна̀ и҆ доброзра́чна.

⁸И҆ є҆гда̀ ѹ҆слы́шано бы́сть повелѣ́нїе царе́во, сѡ́браны бы́ша дѣви҄цы мнѡ́ги во гра́дъ сѹ́сы, под̾ рѹ́кѹ га́їевѹ, и҆ приведена̀ бы́сть є҆сѳи́рь ко га́їю храни́телю же́нъ:

⁹и҆ ѹ҆го́дна бы́сть є҆мѹ̀ ѻ҆трокови́ца и҆ ѡ҆крѣ́те благода́ть пред̾ ни́мъ: и҆ потща́сѧ да́ти є҆́й ма҄сти и҆ ѹ҆ча́стїе, и҆ се́дмь дѣви́цъ приста́ви къ не́й и҆з̾ до́мѹ царе́ва, и҆ снабдѣва́ше ю҆̀ и҆ рабы́нь є҆ѧ̀ до́брѣ въ домѹ̀ же́нстѣмъ.

¹⁰И҆ не повѣ́да є҆сѳи́рь ро́да своегѡ̀, нижѐ ѻ҆те́чества, мардохе́й бо заповѣ́да є҆́й не возвѣща́ти.

¹¹На всѧ́къ же де́нь хожда́ше мардохе́й по дворѹ̀ же́нскомѹ, назира́ѧ, что̀ є҆сѳи́ри слѹчи́тсѧ.

¹²Сїе́ же бѣ̀ вре́мѧ дѣви́цъ входи́ти ко царю̀, є҆гда̀ и҆спо́лнѧтсѧ двана́десѧть мц҇ей: та́кѡ бо наполнѧ́хѹсѧ дні́е ѹ҆краше́нїѧ, ше́сть мц҇ъ во а҆рѡма́тѣхъ и҆ въ ма́стехъ же́нскихъ, и҆ ше́сть мц҇ъ намазѹ́ющѧсѧ смѵ́рновымъ є҆ле́емъ,

¹³и҆ тогда̀ вхожда́хѹ ко царе́ви: и҆ є҆мѹ́же а҆́ще рече́тъ привестѝ ю҆̀, вхо́дитъ съ ни́мъ кѹ́пнѡ и҆з̾ до́мѹ же́нскагѡ да́же до до́мѹ царе́ва:

¹⁴на ве́черъ вхожда́ше и҆ заѹ́тра возвраща́шесѧ въ до́мъ же́нскїй вторы́й, и҆дѣ́же га́й є҆ѵнѹ́хъ царе́въ храни́тель же́нъ, и҆ не вхожда́ше па́ки ко царю̀, а҆́ще не бѹ́детъ позвана̀ и҆́менемъ.

¹⁵Е҆гда́ же и҆спо́лнисѧ вре́мѧ є҆сѳи́ри дще́ри а҆мїнада́ва, бра́та ѻ҆тца̀ мардохе́ова, (и҆́же поѧ́лъ ю҆̀ себѣ̀ въ дще́ре мѣ́сто,) вни́ти ко царе́ви, ничто́же престѹпѝ ѿ си́хъ, ѩ҆̀же заповѣ́да є҆́й є҆ѵнѹ́хъ храни́тель же́нъ: бѣ́ бо є҆сѳи́рь ѡ҆брѣта́ющаѧ благода́ть пред̾ всѣ́ми зрѧ́щими ю҆̀.

¹⁶И҆ вни́де є҆сѳи́рь ко царю̀ а҆ртаѯе́рѯѹ во вторыйна́десѧть мц҇ъ, и҆́же є҆́сть а҆да́ръ, въ лѣ́то седмо́е ца́рства є҆гѡ̀.

¹⁷И҆ возлюбѝ ца́рь є҆сѳи́рь, и҆ ѡ҆брѣ́те благода́ть па́че всѣ́хъ дѣви́цъ, и҆ возложѝ вѣне́цъ же́нскїй на главѹ̀ є҆ѧ̀.

¹⁸И҆ сотворѝ ца́рь пи́ръ всѣ҄мъ дрѹгѡ́мъ свои҄мъ и҆ си́ламъ се́дмь дні́й, и҆ вознесѐ бра́къ є҆сѳи́ринъ, и҆ сотворѝ ѿра́дѹ сѹ́щымъ во ца́рствїи є҆гѡ̀.

¹⁹Мардохе́й же слѹжа́ше во дворѣ̀ (царе́вѣ).

²⁰Е҆сѳи́рь же не повѣ́да ро́да своегѡ̀, (ни люді́й свои́хъ): си́це бо заповѣ́да є҆́й мардохе́й боѧ́тисѧ бг҃а и҆ твори́ти за́пѡвѣди є҆гѡ̀, ѩ҆́коже бѣ̀ съ ни́мъ, є҆сѳи́рь же не и҆змѣнѝ ѡ҆бы́чаѧ своегѡ̀.

²¹И҆ ѡ҆печа́листасѧ два̀ є҆ѵнѹ҄ха царє́ва нача́лнѣйшїи стра́жы тѣ́ла є҆гѡ̀, ѩ҆́кѡ предпочте́нъ бы́сть мардохе́й, и҆ и҆ска́ста ѹ҆би́ти а҆ртаѯе́рѯа царѧ̀.

²²И҆ возвѣсти́сѧ сло́во мардохе́ю, и҆ сказа̀ є҆сѳи́ри: ѻ҆на́ же повѣ́да царю̀, ѩ҆̀же навѣ́тѹютъ.

²³Ца́рь же и҆спыта̀ двѹ̀ є҆ѵнѹ҄хѹ, (и҆ и҆сповѣ́даста,) и҆ ѡ҆бѣ́си и҆̀хъ. И҆ повелѣ̀ ца́рь вписа́ти на па́мѧть въ ца́рстѣй книгохрани́телницѣ ѡ҆ благодѣѧ́нїи мардохе́овѣ въ похвалѹ̀.