Read Библия Церковнославянская Е҆сѳи́рь 4 Bible Online

Е҆сѳи́рь 4 - Библия Церковнославянская bible

Е҆сѳи́рь 4

¹Мардохе́й же разѹмѣ́въ замышлѧ́емое, раздра̀ ри҄зы своѧ҄ и҆ ѡ҆блече́сѧ во вре́тище и҆ посы́пасѧ пе́пеломъ: и҆ скочи́въ въ простра́ннѹю ѹ҆́лицѹ гра́да, возопѝ во́племъ вели́кимъ и҆ го́рькимъ: взима́етсѧ ро́дъ ничто́же престѹпи́вый.

²И҆ прїи́де да́же до вра́тъ царе́выхъ и҆ ста̀: не лѣ́ть бо бѣ̀ є҆мѹ̀ вни́ти во дво́ръ во вре́тище ѡ҆блече́нѹ и҆ пе́пеломъ ѡ҆сы́панѹ сѹ́щѹ.

³И҆ во всѧ́цѣй странѣ̀, и҆дѣ́же пока́зовахѹсѧ писа҄нїѧ (царє́ва), во́пль бѣ̀ и҆ пла́чь и҆ рыда́нїе преве́лїе ї҆ѹде́ѡмъ, вре́тище и҆ пе́пелъ постила́хѹ себѣ̀.

⁴И҆ внидо́ща рабы҄ни и҆ є҆ѵнѹ́си цари҄цыны и҆ возвѣсти́ша є҆́й. И҆ смѧте́сѧ ѹ҆слы́шавши бы́вшее: и҆ посла̀ ри҄зы ѡ҆блещѝ мардохе́а и҆ снѧ́ти вре́тище є҆гѡ̀. И҆ не послѹ́ша.

⁵Е҆сѳи́рь же призва̀ а҆храѳе́а скопца̀ своего̀, предстоѧ́щаго є҆́й,

⁶и҆ посла̀ є҆го̀ ѹ҆вѣ́дати ѿ мардохе́а и҆́стинѹ.

⁷Мардохе́й же сказа̀ є҆мѹ̀ бы́вшее, и҆ ѡ҆бѣща́нїе, є҆́же ѡ҆бѣша̀ а҆ма́нъ царю̀ въ сокро́вищный до́мъ (положи́ти) десѧ́ть тысѧ́щъ тала҄нтъ сребра̀, да погѹби́тъ ї҆ѹдє́й:

⁸и҆ списа́нїе (повелѣ́нїѧ) и҆зда́ннагѡ въ сѹ́сѣхъ (гра́дѣ) на погѹбле́нїе и҆́хъ дадѐ є҆мѹ̀, да пока́жетъ є҆сѳи́ри: и҆ речѐ є҆мѹ̀, заповѣ́дати є҆́й и҆тѝ моли́ти царѧ̀ и҆ проси́ти є҆го̀ ѡ҆ лю́дехъ, помина́юши дни҄ смире́нїѧ твоегѡ̀, ка́кѡ воспита́на є҆сѝ въ рѹцѣ̀ мое́й, занѐ а҆ма́нъ вторы́й по царѝ глаго́ла проти́вѹ на́мъ на сме́рть: призовѝ гд҇а и҆ глаго́ли царю̀ ѡ҆ на́съ, да и҆зба́витъ на́съ ѿ сме́рти.

⁹Вше́дъ же а҆храѳе́й, повѣ́да є҆сѳи́ри всѧ҄ глаго́лы сїѧ҄.

¹⁰И҆ речѐ є҆сѳи́рь ко а҆храѳе́ю: и҆дѝ къ мардохе́ю и҆ рцы̀:

¹¹поне́же всѝ ѩ҆зы́цы ца́рствїѧ вѣ́дѧтъ, ѩ҆́кѡ всѧ́къ мѹ́жъ и҆лѝ жена̀, и҆́же а҆́ще вни́детъ ко царве́и во внѹ́треннїй до́мъ не при́званъ, нѣ́сть є҆мѹ̀ спасе́нїѧ, то́чїю къ немѹ́же а҆́ще простре́тъ ца́рь златы́й же́злъ, сей спасе́нъ бѹ́детъ: а҆́зъ же нѣ́смь звана̀ внити ко царю̀ сѐ ѹ҆жѐ три́десѧть дні́й.

¹²И҆ возвѣстѝ а҆храѳе́й мардохе́ю всѧ҄ глаго́лы є҆сѳи҄рины.

¹³И҆ речѐ мардохе́й ко а҆храѳе́ю: и҆дѝ и҆ рцы̀ є҆́й: є҆сѳи́ре, да не рече́ши въ себѣ̀, ѩ҆́кѡ ты̀ є҆ди́на спасе́шисѧ во ца́рствїи па́че всѣ́хъ ї҆ѹдє́й:

¹⁴занѐ а҆́ще преслѹ́шаеши въ сїѐ вре́мѧ, ѿи́нѹдѹ по́мощь и҆ покро́въ бѹ́детъ ї҆ѹде́ѡмъ, ты́ же и҆ до́мъ ѻ҆тца̀ твоегѡ̀ поги́бнете: и҆ кто̀ вѣ́сть, а҆́ще на сїѐ вре́мѧ воцари́ласѧ є҆сѝ;

¹⁵И҆ посла̀ є҆сѳи́рь прише́дшаго къ не́й ко мардохе́ю, глаго́лющи:

¹⁶Ше́дъ соберѝ ї҆ѹдє́и и҆̀же въ сѹ́сѣхъ, и҆ пости́тесѧ ѡ҆ мнѣ̀, и҆ не ѩ҆ди́те нижѐ пі́йте трѝ дни҄ де́нь и҆ но́щь: а҆́зъ же и҆ слѹжє́бницы моѧ҄ (та́кожде) не и҆́мамы ѩ҆́сти: и҆ тогда̀ вни́дѹ ко царю̀ кромѣ̀ зако́на, а҆́ще и҆ поги́бнѹти мѝ приключи́тсѧ.

¹⁷И҆ ше́дъ мардохе́й сотворѝ, є҆ли҄ка заповѣ́да є҆мѹ̀ є҆сѳи́рь, и҆ помоли́сѧ гд҇еви помина́ѧ всѧ҄ дѣла̀ гд҇нѧ и҆ речѐ: гд҇и, гд҇и цр҃ю̀ вседержи́телю, ѩ҆́кѡ во вла́сти твое́й сїѐ всѐ є҆́сть, и҆ нѣ́сть противомѹ́дрствѹѧй тебѣ̀, внегда̀ восхо́щеши сп҇тѝ ї҆и҃лѧ: ѩ҆́кѡ ты̀ сотвори́лъ є҆сѝ не́бо и҆ зе́млю и҆ всѐ ѹ҆дивлѧ́емое въ поднебе́снѣй и҆ гд҇ь є҆сѝ всѣ́хъ, и҆ нѣ́сть, и҆́же воспроти́витсѧ тебѣ̀ гд҇еви: ты̀ всѧ҄ вѣ́си, ты̀ зна́еши, гд҇и, ѩ҆́кѡ не въ ѹ҆кори́знѣ ни въ го́рдости, нижѐ во тщела́вїи сотвори́хъ сїѐ, є҆́же не покланѧ́тисѧ прего́рдомѹ а҆ма́нѹ, поне́же благоволи́мъ бы́хъ лобза́ти и҆ слѣды̀ но́гъ є҆гѡ̀ спасе́нїѧ ра́ди ї҆и҃лева, но сїѐ сотвори́хъ, да не возда́мъ сла́вы человѣ́кѹ па́че сла́вы бж҃ѧ, и҆ не поклоню́сѧ ни комѹ́же, кромѣ̀ тебє̀ гд҇а моегѡ̀, и҆ не сотворю̀ сїѧ҄ въ гордости: и҆ нн҃ѣ, гд҇и бж҃е, цр҃ю̀, бж҃е а҆враа́мовъ, пощадѝ лю́ди твоѧ҄, ѩ҆́кѡ назира́ютъ на́мъ въ поги́бель и҆ вожделѣ́ша погѹби́ти є҆́же и҆з̾ нача́ла наслѣ́бдїе твоѐ: не пре́зри достоѧ҄нїѧ твоегѡ̀, є҆́же и҆зба́вилъ є҆сѝ(...)